Mga Kontribusyon nga Nagpapalipay ha Kasingkasing han Dios

DIRI makalilipay an istorya. Gin-agaw ni Rayna Atalia an trono han Juda pinaagi han panlimbong ngan pamatay. Tungod kay sayop nga naghunahuna nga an ngatanan nga mga manurunod ginpatay na, iya ginproklama an iya kalugaringon sugad nga rayna. Usa pa nga babaye, an prinsesa nga hi Jehoseba, nga nahigugma gud kan Jehova ngan han iya Balaud, maisugon nga nagtago han usa nga anak han hadi, an minasus-an nga hi Joas. Gintago ni Jehoseba ngan han iya bana, an hitaas nga saserdote nga hi Jehoyada, an manurunod ha sulod hin unom ka tuig didto ha ira kwarto ha templo.—2 Hadi 11:1-3.

Han nagsyete anyos hi Joas, andam na an hitaas nga saserdote nga hi Jehoyada nga tikangan an iya plano ha pagpaiwas han rayna tikang ha trono nga iya gin-agaw. Iya igin-gawas an bata nga iya gintinago ngan ginkoronahan hiya sugad nga an may-katungod nga manurunod ha ginhadian. Katapos, an maraot nga hi Rayna Atalia igin-gawas han mga bantay han palasyo tikang ha bungsaran han templo ngan ginpatay hiya, nga nagresulta hin katalwasan ngan kalipayan ha mga tawo. Tungod han ira mga ginbuhat, hira Jehoyada ngan Jehoseba nakabulig gud ha pagpahiuli han totoo nga pagsingba ha tuna han Juda. Kondi labaw nga importante, nakabulig hira ha pagpadayon han hadianon nga katulinan ni David, nga magtutugway ngadto ha Mesias.—2 Hadi 11:4-21.

An bag-o nga ginproklama nga hadi kinahanglan liwat maghimo hin kontribusyon nga magpapalipay ha kasingkasing han Dios. An balay ni Jehova kinahanglan gud aydon. An sobra nga ambisyon ni Atalia nga magin an amo la nga magmarando han Juda nagresulta diri la ha pagbalewaraya han templo kondi ha pagtikasi liwat hito. Salit determinado hi Joas ha pagpaayad ngan pagpaopay han templo. Waray langan nga nagpasa hiya hin sugo ha pagtirok han ginkikinahanglan nga pundo para han pag-ayad han balay ni Jehova. Hiya nagsiring: “An ngatanan nga kwarta han baraan nga mga butang nga gindara ngadto ha balay ni Jehova, ha kwarta nga ginagamit, an kwarta han mga tawo nga tungod hini an tagsa ka tawo ginbalihan, ngan an ngatanan nga kwarta nga ha kasingkasing han bisan hin-o nga tawo inabot an tinguha pagdara hini ngadto ha balay ni Jehova, ipadara han mga saserdote ngadto ha ira, an tagsa nga tawo tikang ha iya kilala; ngan ira pag-aaydon an mga guba han balay, bisan diin an bisan ano nga kagubaan hiagii.”—2 Hadi 12:4, 5.

An mga tawo kinaburut-on nga naghatag. Kondi, diri bug-os-kasingkasing nga gintuman han mga saserdote an ira obligasyon ha pag-ayad han templo. Tungod hito, nagdesisyon an hadi nga personal nga atamanon an mga butang ngan nagsugo nga an ngatanan nga mga kontribusyon direkta nga ibutang ha usa nga espesyal nga kahon. Hi Jehoyada an iya ginpadumara hito, ngan an asoy nasiring: “Hi Jehoyada an saserdote kinmuha hin usa nga alkansiya, ngan luhoan hin usa nga luho dida ha takop hini, ngan ipahamutang ini ha kiliran han halaran, ha too nga ligid kon in usa masulod ngadto ha balay ni Jehova: ngan ibubutang dida hini han mga saserdote nga nagbabantay dida ha purtahan an ngatanan nga kwarta nga gindara ngadto ha balay ni Jehova. Ngan nahinabo, han ira pakakita nga damu na an kwarta dida ha alkansiya, nga an kanan hadi eskriba ngan an hitaas nga saserdote nakada, ngan  ira ipinamutang ha mga supot ngan ihapon an kwarta nga hin-agian ha balay ni Jehova. Ngan ira ihinatag an kwarta ngan gintimbang ngadto ha mga kamot nira han nagbuhat han buruhaton, hadto nga nagmamangno han balay ni Jehova: ngan ira ini iginbayad ngadto ha mga panday ngan han mga parapanukod, nga nagbuhat dida han balay ni Jehova. Ngan ha mga parakuta ngan ha mga parapangutod han bato, ngan para ha pagpalit hin tigkahoy ngan mga bato nga tinabasan ha pag-ayad han mga kagubaan han balay ni Jehova, ngan para han ngatanan nga iginbutang para han balay ha pag-ayad hini.”—2 Hadi 12:9-12.

Bug-os-kasingkasing an pagsunod han katawohan. Gin-ayad an balay han pagsingba kan Jehova basi an iya pagsingba makapadayon ha may-dignidad nga paagi. Tungod hito, masisiring nga an ngatanan nga kontribusyon gin-gamit ha husto nga paagi. Ginsiguro ito ni Hadi Joas!

Yana, ginsisiguro gud han nakikita nga organisasyon ni Jehova nga an ngatanan nga donasyon ginagamit ha husto nga paagi ha pagpauswag han pagsingba kan Jehova, ngan an totoo nga mga Kristiano nagios sugad han ginbuhat han mga Israelita ha naglabay—ha bug-os-kasingkasing nga paagi. Bangin usa ka han mga naghatag para ha pagpauswag han mga interes han Ginhadian durante han naglabay nga tuig han pag-alagad. Aton usisahon an pipira han mga paagi nga gin-gamitan han imo mga kontribusyon.

PAGPUBLIKAR

Ha bug-os nga kalibotan, an masunod nga mga publikasyon gin-imprinta basi pag-adman ngan ipanaltag:

• Libro: 47,490,247

• Bokleta: 6,834,740

• Brosyur: 167,854,462

• Kalendaryo: 5,405,955

• Magasin: 1,179,266,348

• Tract: 440,995,740

• Video: 3,168,611

An pag-imprinta ginhihimo ha Aprika, Norte, Sentral, ngan Sur Amerika, Asia, Europa, ngan mga isla nga nasud ha Pasipiko—may kabug-osan nga 19 nga nasud.

“Ako hi Katelyn May. Otso anyos an akon edad. May-ada ako $28, ngan karuyag ko ihatag ini ha iyo basi makabulig ha pagbayad han mga imprintahan. An iyo gutiay nga bugto, Katelyn.”

“Nag-iristorya kami nga pamilya mahitungod han bag-o nga mga imprintahan. An amon mga anak, an usa nag-iedad hin 11 ngan an usa 9, nagdesisyon ha pagkuha hin kwarta tikang ha ira natirok ngan idonar ito. Nalilipay kami nga ipadara ha iyo an ira kontribusyon upod han amon.”

 PAGTUKOD

An masunod amo an pipira han mga proyekto ha pagtukod nga ginhimo basi masuportahan an mga buruhaton han mga Saksi ni Jehova:

• Mga Kingdom Hall ha katunaan nga limitado an kwarta: 2,180

• Assembly Hall: 15

• Sanga nga Opisina: 10

• Internasyonal nga mga boluntaryo ha bug-os-panahon nga pag-alagad: 2,342

“Hinin naglabay nga kataposan han semana, nagkatirok kami ha siyahan nga higayon ha amon bag-o nga Kingdom Hall. Malipayon kami hinduro ha pagkaada maopay nga lugar ha pagdayaw ha aton Amay, hi Jehova nga Dios. Nagpapasalamat kami kan Jehova ngan ha iyo ha pagtagad han amon mga panginahanglan pinaagi ha pagtukod hin dugang nga mga Kingdom Hall. Oo, an amon Kingdom Hall birilhon gud ha amon lugar.”—Chile.

“Gin-aapresyar gud han kabugtoan an bulig nga iginhahatag han organisasyon ni Jehova. Tubtob yana, nag-iiristorya pa kami mahitungod han makalilipay nga takna upod han mga nagtatrabaho ha konstruksyon.”—Moldova.

“Bag-o pa la nga ginsaurog namon nga mag-asawa an ika-35 nga anibersaryo han amon kasal. Nangangalimbasog kami ha pagdesisyon kon ano an amon ihahatag ha kada tagsa para hini nga okasyon, ngan nagdesisyon kami ha pagbalos kan Jehova ngan ha iya organisasyon, tungod kay kon waray an ira bulig, bangin diri magmamalampuson an amon pag-asawa. Karuyag namon nga an kwarta nga kaupod hini nga surat gamiton sugad nga bulig ha pagtukod hin usa nga Kingdom Hall ha usa han pobre nga mga nasud.”

“Bag-o pa la nga nakakarawat ako hin panurundon, ngan tungod kay gutiay la an akon ‘mga karuyag’ ngan mas gutiay pa gud an akon ‘mga ginkikinahanglan,’ karuyag ko ihatag ha iyo an kwarta nga kalakip hini nga surat basi makabulig ha pagtukod hin mga Kingdom Hall, nga ginkikinahanglan gud ha damu nga mga nasud.”

 PAGBULIG HA PANAHON HAN KALAMIDAD

Hinin kataposan nga mga adlaw, diri linalaoman nga naabot an mga kalamidad. Damu han mga Saksi ni Jehova an naghihimo hin dugang nga mga kontribusyon basi mabuligan an ira kabugtoan ha naapektohan nga mga lugar. Sugad nga pahinumdom, an mga kontribusyon para ha bulig ha panahon han kalamidad gindudumara sugad nga bahin han bug-os-kalibotan nga buruhaton. An masunod amo an pipira han mga lugar diin nabuligan han mga Saksi ni Jehova an mga biktima han kalamidad:

• Aprika

• Asia

• Rehiyon han Caribbean

• Mga Isla ha Pasipiko

“Nagpapasalamat gud kami nga mag-asawa ha iyo tungod han iyo pagpadara hin mga suplay sugad nga bulig para han kadaot nga nahimo han mga bagyo. Napaatupan namon an amon balay. Gin-aapresyar gud namon an iyo madagmit nga paggios.”

“Ako hi Connor, ngan 11 anyos an akon edad. Han nakita ko an nahitabo han nagkaada hin tsunami, karuyag ko makabulig. Naglalaom ako nga makakabulig ini ha akon kabugtoan.”

 KABUGTOAN HA ESPESYAL NGA BUG-OS-PANAHON NGA PAG-ALAGAD

Damu han mga Kristiano an bug-os-panahon nga nag-aalagad ha pag-ebanghelyo nga buruhaton o ha Bethel. An pipira nga bug-os-panahon nga mga boluntaryo sinusuportahan pinaagi han boluntaryo nga mga kontribusyon. Kaupod hini an masunod:

• Misyonero: 2,635

• Nagbibiyahe nga mga paramangno: 5,325

• Nag-aalagad ha Bethel: 20,092

“Tungod kay diri pa ako makakatrabaho ha Bethel yana [singko anyos nga lalaki], karuyag ko ipadara ini nga kontribusyon upod an daku nga gugma. Pagdaku ko, makadto ako ha Bethel basi magtrinabaho.”

Pagpauswag han Edukasyon May Kalabotan ha Biblia

Ginsugo ni Jesu-Kristo an iya mga sumurunod nga “manhimo . . . hin mga tinon-an ha ngatanan nga mga nasud.” (Mateo 28:19) Ha pagsunod ha iya, sagipo an mga Saksi ni Jehova ha pagsangyaw ngan pagtutdo han mensahe han Biblia ha 235 nga katunaan. Nagpupublikar ngan nananaltag hira hin mga literatura mahitungod ha Biblia ha 413 nga yinaknan.

Oo, an pinakabirilhon nga kontribusyon nga maihahatag han usa nga Kristiano basi mabuligan an damu pa nga mahibaro mahitungod ha Dios ngan han Iya katuyoan amo an iya panahon. An mga Saksi ni Jehova hura nga naghahatag han ira panahon ngan kusog basi buligan an iba. Hura liwat nga naghahatag hira hin pinansyal nga bulig, ngan an ngatanan nga kontribusyon, nga ira ginhihimo ha magkalainlain nga paagi, nakakabulig ha pagpabantog han ngaran ni Jehova ngan han iya mga katuyoan ha bug-os nga tuna. Hinaot padayon nga bendisyonan ni Jehova ini nga mga pangalimbasog ha pagbulig ha iba nga mahibaro hin dugang pa mahitungod ha iya. (Proberbios 19:17) An sugad nga pagkadisidido ha pagbulig nagpapalipay han kasingkasing ni Jehova!—Hebreo 13:15, 16.

[Kahon ha pahina 28-30]

Mga Paagi han Paghatag nga Ginpipili han Iba

MGA AMOT PARA HA BUG-OS-KALIBOTAN NGA BURUHATON

Damu an nagtitirok, o naggagahin, hin kantidad nga ira ibinubutang ha mga kahon para han donasyon nga minarkahan hin “Contributions for the Worldwide Work—Matthew 24:14.”

Kada bulan, ini nga kantidad iginpapadara han mga kongregasyon ngadto ha opisina han mga Saksi ni Jehova nga nagsiserbi ha ira nasud. An kinaburut-on nga mga donasyon nga kwarta mahimo liwat direkta nga ipadara ha Watch Tower Bible and Tract Society of the Philippines, Attention Treasurer’s Office, P.O. Box 2044, 1060 Manila, o ha sanga nga opisina han mga Saksi ni Jehova nga nagsiserbi ha iyo nasud. An mga tseke nga iginpapadara ha adres ha igbaw sadang igngaran ha “Watch Tower.” Mahimo liwat maghatag hin mga alahas o iba pa nga birilhon nga mga butang. Sadang updan ini nga mga donasyon hin halipot nga surat nga nagsusumat nga ito nga butang usa ka direkta nga regalo.

KAHIKAYAN HAN IGINTAPOD NGAN MAY-KONDISYON NGA DONASYON

An kwarta mahimo itapod ha Watch Tower basi magamit ha bug-os nga kalibotan. Kondi, kon hangyoon ito han nagpahuram, ibabalik ito ha iya. Para ha dugang nga impormasyon, alayon pakigkomunikar ha Treasurer’s Office ha adres nga aada ha igbaw.

GINPLANO NGA PAGHATAG

Dugang pa ha direkta nga mga regalo nga kwarta, may-ada iba pa nga mga paagi han paghatag basi magamit ha pag-alagad ha Ginhadian ha bug-os nga kalibotan. Nag-uupod ini han:

Insurance: An Watch Tower Society mahimo himoon nga beneficiary han palisiya han life insurance o han plano ha pagretiro/pensyon.

Mga Deposito ha Bangko: An mga deposito ha bangko, mga sertipiko han deposito, o indibiduwal nga mga deposito ha pagretiro mahimo itapod o ihatag ha panahon han kamatay ha Watch Tower Society, uyon ha lokal nga mga kahikayan han bangko.

Kapital han Negosyo Ngan mga Bono: An mga kapital han negosyo ngan mga bono mahimo igdonar ha Watch Tower Society sugad nga direkta nga regalo.

Tuna Ngan Balay: An maibabaligya nga tuna ngan balay mahimo igdonar pinaagi man han direkta nga pagregalo o, kon residensya nga panag-iya, pinaagi han pagreserba hin balay ngan tuna ha nagdonar, nga makakapadayon ha pag-ukoy dida samtang buhi pa hiya. Pahibaroa an sanga nga opisina ha iyo nasud antes himoon an dokumento han pagbalhin han bisan ano nga tuna ngan balay.

Gift Annuity: An gift annuity amo an usa nga kahikayan diin an usa nagbabalhin hin kwarta o mga deposito ngadto ha usa nga pinili nga korporasyon nga ginagamit han mga Saksi ni Jehova. Sugad nga kabalyo, an naghatag, o an usa nga ginpili han naghatag, makarawat hin espisipiko nga kwarta kada tuig samtang hiya buhi. An naghatag makarawat hin pag-iban ha baraydan nga buhis para ha tuig diin gintikangan an gift annuity.

Mga Testamento Ngan mga Igintatapod: An mga panag-iya o kwarta mahimo ihatag ha Watch Tower pinaagi hin testamento nga legal nga ginhimo, o an Watch Tower mahimo magin beneficiary han usa nga kasabotan ha pagtapod. An igintapod nga pahihimulsan han usa nga relihiyoso nga organisasyon mahimo maghatag hin pipira nga mga bentaha ha buhis.

Sugad han iginpapasabot han termino nga “ginplano nga paghatag,” ini nga mga klase hin mga donasyon kasagaran nga nagkikinahanglan hin pagplano han nahatag. Basi mabuligan an mga indibiduwal nga naghihingyap nga makabulig ha bug-os-kalibotan nga buruhaton han mga Saksi ni Jehova pinaagi han usa nga klase han ginplano nga paghatag, igin-andam an usa nga brosyur ha Ingles ngan Espanyol nga may ulohan nga Charitable Planning to Benefit Kingdom Service Worldwide. An brosyur iginsurat basi makahatag hin impormasyon mahitungod ha magkalainlain nga mga paagi nga mahimo maihatag an mga regalo yana o ha kamatay pinaagi han pagbilin hin panurundon. Katapos basahon an brosyur ngan magpakiana ha ira mga magsaragdon may kalabotan ha balaud o ha buhis, damu an nakabulig ha pagsuporta han mga Saksi ni Jehova ha bug-os nga kalibotan may kalabotan ha ira relihiyoso nga mga buruhaton ngan pagbulig ha iba, ngan nakakapahimulos hin daku ha ira buhis samtang binubuhat ito. Ini nga brosyur mahimo makuha pinaagi han paghangyo hin kopya direkta tikang ha Charitable Planning Office.

Para han dugang nga impormasyon, mahimo ka makigkomunikar ha Charitable Planning Office, pinaagi ha surat o ha telepono, ha adres nga nakalista ha ubos o mahimo ka makigkomunikar ha sanga nga opisina han mga Saksi ni Jehova nga nagsiserbi ha iyo nasud.

Charitable Planning Office

Watch Tower Bible and Tract Society of the Philippines

186 Roosevelt Avenue,

San Francisco del Monte

1105 Quezon City

Telepono: (02) 411-6090

[Ginkuhaan han Retrato ha pahina 27]

Faithful nga video: Stalin: retrato han U.S. Army