Naieksperyensyahan Mo ba an Kalipay nga Resulta han Paghatag?

USA nga matinumanon nga Kristiano nga babaye an haros 50 ka tuig na ha aktibo nga Kristiano nga pag-alagad. Bisan kon maluya na an iya lawas tungod han mga epekto han kalagas, determinado hiya nga bisitahon an katutukod pa la nga Kingdom Hall. Samtang nakapot ha butkon han usa nga mabinuligon nga Kristiano nga lalaki, sinulod hiya ha katirokan ngan naglakat hin hinay-hinay kondi diretso ha iya tumong—an kahon para han mga amot. Dida hito iya iginhulog an kasadangan nga kantidad hin kwarta nga iya gintinirok para hinin bag-o nga Kingdom Hall. Bisan kon diri hiya makahimo hin pisikal nga buruhaton ha pagtukod hito nga katirokan, karuyag niya nga makabulig.

Ini nga Kristiano nga babaye mahimo magpahinumdom ha imo han usa pa nga matinumanon nga babaye—an “kablas nga balo nga babaye” nga nakita ni Jesus nga naghuhulog hin duha nga gudtiay nga sinselyo ha burutangan hin salapi han templo. Waray kita sumati mahitungod han iya mga kahimtang, kondi an kawaray bana hadto nga panahon mahimo magin hinungdan nga magkuri ha pinansyal an usa nga babaye. Sigurado nga hi Jesus inabat hin empatiya ha iya, tungod kay bug-os nga hinsabtan niya an iya kahimtang. Ha pagpasidungog ha babaye sugad nga usa nga susbaranan para ha iya mga disipulo, hi Jesus nagsiring nga an iya gutiay nga regalo nagrepresentar han “ngatanan niya [“nga gintatag-iya,” NW], ngatanan nga iya ginpakabuhian.”—Markos 12:41-44.

Kay ano nga an usa nga kablas nga babaye pariho hinin pobre nga balo nakahimo hin sugad nga halad? Matin-aw nga tungod ito kay debotado gud hiya kan Jehova nga Dios, nga an pagsingba ha Iya nakasentro ha templo ha Jerusalem. Bisan kon limitado la an iya mahihimo, karuyag niya sumuporta ha sagrado nga pag-alagad. Ngan sigurado nga inabat hiya hin totoo nga kalipay ha paghatag hin bisan ano nga iya maihahatag.

Paghatag ha Pagsuporta han Buruhaton ni Jehova

Tikang pa hadto, an paghatag hin materyal nga mga butang ngan hin kwarta pirme kinahanglanon nga bahin han putli nga pagsingba, ngan pirme ito surok han daku nga kalipay. (1 Kronikas 29:9) Ha kadaan nga Israel, ginagamit an mga kontribusyon diri la ha pagpaopay han templo kondi basi liwat adlaw-adlaw nga magpadayon an ngatanan nga mga bahin han pagsingba kan Jehova didto. An Balaud espisipiko nga nagsiring nga an mga anak ni Israel maghatag han ikanapulo ka bahin han ira mga produkto basi suportahan an mga Lebita, nga nagbubuhat han mga buruhaton ha templo. Kondi an mga Lebita liwat kinahanglan maghatag kan Jehova han ikanapulo ka bahin han mga produkto nga ira nakarawat.—Numeros 18:21-29.

 Bisan kon diri na obligado an mga Kristiano nga tumanon an mga ginkinahanglan han kauyonan han Balaud, waray magbag-o an prinsipyo nga an mga surugoon han Dios maghatag ha materyal nga paagi ha pagsuporta han totoo nga pagsingba. (Galasia 5:1) Dugang pa, gintagad han siyahan-siglo nga mga Kristiano nga kalipay an paghatag han ginkikinahanglan han ira kabugtoan. (Buhat 2:45, 46) Ginpahinumdom ni apostol Pablo an mga Kristiano nga sugad la nga an Dios hura nga nagtagana ha ira hin maopay nga mga butang, sadang liwat hira magin mahinatagon ha iba. Hiya nagsurat: “Sugoa adton mga manggaranon hini yana nga panahon, nga diri hira magpakahitaas, ngan diri nira ibutang an ira paglaom dida ha diri kamarig-on han mga bahandi, kondi ha Dios, nga nahatag ha aton hin kahuraan ha ngatanan ha pagkalipay; nga magbuhat hira hin maopay, nga mamanggaran hira ha mag-opay nga mga buhat, nga maandam hira ha panhatag, ngan ha kalooy; nga nagtitirok ha ira kalugaringon hin maopay nga patukoranan andam han tidaraon nga panahon, basi nga madakop nira an kinabuhi nga amo an kinabuhi nga totoo.” (1 Timoteo 6:17-19; 2 Korinto 9:11) Oo, tikang ha personal nga eksperyensya ni Pablo, napamatud-an niya nga husto an mga pulong ni Jesus: “May-ada darodaku nga kalipay ha paghatag kay ha pagkarawat.”—Buhat 20:35.

Kristiano nga Paghatag Yana

Yana nga panahon, padayon nga ginagamit han mga surugoon ni Jehova an ira materyal nga mga panag-iya basi buligan an kada tagsa ngan basi suportahan an buruhaton han Dios. Bisan adton gutiay la an tinatag-iya naghahatag han ira maaakos. Inaabat han “matinumanon ngan maaramon nga uripon” nga responsabilidad nira kan Jehova nga gamiton ha gimaopayi nga paagi nga posible ini ngatanan nga iginhatag nga mga pundo. (Mateo 24:45, NW) Ginagamit an mga pundo ha pagpalakat han mga sanga nga opisina, paghubad ngan paghimo hin mga Biblia ngan mga literatura ha Biblia, paghikay hin dagku nga Kristiano nga mga katirok, pagbansay ngan pagpadara hin nagbibiyahe nga mga paramangno ngan mga misyonero, pagtagana hin bulig kon may kalamidad, sugad man ha iba pa nga importante nga mga katuyoan. Aton isentro an aton atensyon ha usa hito nga mga katuyoan—pagtukod hin mga lugar han pagsingba.

An mga Saksi ni Jehova nagkakatirok hin pipira ka beses ha sulod han usa ka semana ha ira mga Kingdom Hall basi makapahimulos ha espirituwal nga edukasyon ngan maopay nga asosasyon. Kondi, tungod han kahimtang ha ekonomiya han damu nga mga nasud, an mga Saksi hito nga lugar diri nagkakaada igo nga pundo para ha pagtukod hin mga Kingdom Hall nga waray abanse nga bulig. Salit, han 1999, gintikangan han mga Saksi ni Jehova an usa nga programa ha paggamit hin mga pundo  tikang ha mas riko nga mga nasud basi makabulig ha pagtukod hin mga Kingdom Hall ha mas kablas nga mga nasud. Dugang pa, yinukot nga mga boluntaryo an naggamit han ira panahon ngan mga kaabtik, agsob nga nagtatrabaho ha higrayo nga mga lugar hini nga mga nasud. Durante han pagtukod, an mga Saksi hito nga lugar nahibabaro hin mga kaabtik ha pagtukod ngan pagmintinar, ngan tungod han Kingdom Hall Fund nagigin posible an pagpalit han kinahanglanon nga mga garamiton ngan mga materyales. An mga Saksi nga nagamit yana hinin bag-o nga mga katirokan mapasalamaton gud nga an ira mga igkasi-tumuroo naghatag hin panahon ngan kwarta. Kada bulan, an lokal nga mga Saksi nahatag liwat hin kwarta basi mamintinar an bag-o nga Kingdom Hall ngan basi maibalik an mga nagasto han pagtukod, ha sugad nga paagi nabulig ha pagtukod hin dugang pa nga mga Kingdom Hall.

Gintutukod an mga Kingdom Hall nga ginagamit an lokal nga mga paagi ngan mga materyales. Bisan kon diri magarbo ini nga mga katirokan, maopay ito pagkit-on, praktikal ngan komportable. Han magtikang an programa ha pagtukod han 1999, mga 40 nga nasud nga limitado an pundo an nahiupod. Tikang hito nga panahon, an programa ha pagtukod ginpahaluag basi mahiupod an 116 han sugad hito nga mga nasud, nga sobra katunga han mga kongregasyon han mga Saksi ni Jehova ha kalibotan. Ha naglabay nga lima ka tuig, sobra 9,000 nga Kingdom Hall an natukod pinaagi hini nga kahikayan, ha aberids nga sobra 5 nga bag-o nga katirokan kada adlaw! Bisan pa hito, hinin 116 nga nasud, may-ada pa gihapon panginahanglan hin 14,500 nga bag-o nga Kingdom Hall. Pinaagi han bendisyon ni Jehova ngan han pagin andam ngan pagkamahinatagon han mga Saksi ha bug-os nga kalibotan, ginlalaoman nga magkakaada igo nga mga pundo basi matagbaw ini nga panginahanglan.—Salmo 127:1.

An mga Kingdom Hall Nag-aaghat hin Pag-uswag

Ano an epekto hinin duro gud nga pangalimbasog ha mga Saksi hito nga mga lugar ngan ha pagsangyaw han Ginhadian nga buruhaton? Ha damu nga mga lugar, may-ada makatirigamnan nga pagdamu han mga natambong ha katirok katapos matukod an usa nga bag-o nga Kingdom Hall. Usa nga kasagaran nga ehemplo an aada hini nga report tikang ha Burundi: “Ha panahon gud nga natatapos an Kingdom Hall, napuno na ito. Pananglitan, usa nga Kingdom Hall an gintukod para ha usa nga kongregasyon nga mga 100 an aberids nga natambong ha ira mga katirok. An ira bag-o nga Kingdom Hall may 150 nga kapasidad. Han natapos ito, 250 na an natambong ha mga katirok.”

Kay ano nga nag-uswag hin sugad hito? An usa nga hinungdan, an mga grupo han mga magwarali han Ginhadian nga waray pormal nga katirokan  kondi kinahanglan magkatirok ha ilarom han usa nga puno o ha usa nga hawan usahay gintatahapan. Ha usa nga nasud, an kamadarahog han mga tribo iginkakaw-ing ha sugad nga gudtiay nga mga grupo han relihiyon, ngan an balaud nag-oobligar nga an ngatanan nga relihiyoso nga mga katirok pagdumarahon ha sulod han usa nga balay han pagsingba.

An pagkaada han ira kalugaringon nga mga tinukod nabulig liwat ha mga Saksi ni Jehova nga ipakita ha komunidad nga diri hira mga disipulo han usa nga indibiduwal nga pastor. An sanga nga opisina han mga Saksi ni Jehova ha Zimbabwe nagsurat: “Ha naglabay, an kabugtoan hini nga lugar nagkakatirok ha pribado nga kabalayan, ngan ginngangaranan han mga tawo hito nga lugar an kongregasyon ha ngaran han tag-iya han balay nga ira ginkatirokan. Gintatawag nira an kabugtoan sugad nga mga kaapi han iglesia ni Mr. Polano. Ini ngatanan nagbabag-o na yana tungod kay an mga tawo nakakakita hin mga karatola nga matin-aw nga nagpapakilala han tagsa nga katirokan sugad nga ‘Kingdom Hall of Jehovah’s Witnesses.’ ”

Malipayon nga mga Humaratag

“An Dios nahigugma ha malipayon nga humaratag,” nagsurat hi apostol Pablo. (2 Korinto 9:7) Syempre, mapulsanon hinduro an dagku nga mga  donasyon. Kondi an mas daku nga bahin han kwarta nga igin-aamot para ha buruhaton han mga Saksi ni Jehova nagtitikang ha mga kahon para han kontribusyon ha Kingdom Hall. Daku man o guti, importante an ngatanan nga mga kontribusyon ngan diri ginbabalewaray. Hinumdumi nga nakita ni Jesus an kablas nga balo nga babaye nga nag-amot han iya duha nga gudti nga sinselyo. Nakita liwat hiya han mga anghel ngan ni Jehova. Diri ngani kita maaram han ngaran han balo, kondi ginsiguro ni Jehova nga an iya waray-kahakog nga buhat nakarekord ha Biblia ha kadayonan.

Dugang pa ha pagtukod hin Kingdom Hall, an aton mga kontribusyon nasuporta ha ngatanan nga iba pa nga mga bahin han importante nga buruhaton han Ginhadian. An pagkooperar hini nga mga paagi naghahatag ha aton hin hinungdan nga magrayhak ngan magin ‘hura ha damu nga pagpasalamat ha Dios.’ (2 Korinto 9:12) An aton Kristiano nga kabugtoan ha Benin nagreport: “Kada adlaw, damu nga mga pag-ampo han pagpasalamat an iginpapadangat ngadto kan Jehova tungod han pinansyal nga bulig nga nakakarawat tikang ha kabugtoan ha bug-os nga tuna.” Ha pariho nga panahon, kita ngatanan nga nakikigbahin ha pagsuporta han buruhaton han Ginhadian ha pinansyal nga paagi nakakaeksperyensya han kalipay nga resulta han Kristiano nga paghatag!

[Kahon/Retrato ha pahina 22, 23]

Mga Paagi han Paghatag nga Ginpipili han Iba

MGA AMOT PARA HA BUG-OS-KALIBOTAN NGA BURUHATON

Damu an nagtitirok, o naggagahin, hin kantidad nga ira ibinubutang ha mga kahon para han donasyon nga minarkahan hin “Contributions for the Worldwide Work—Matthew 24:14.”

Kada bulan, ini nga kantidad iginpapadara han mga kongregasyon ngadto ha opisina han mga Saksi ni Jehova nga nagsiserbi ha ira mga nasud. An kinaburut-on nga mga donasyon nga kwarta mahimo liwat direkta nga ipadara ha Watch Tower Bible and Tract Society of the Philippines, P.O. Box 2044, 1060 Manila, o ha sanga nga opisina nga nagsiserbi ha iyo nasud. An mga tseke sadang igngaran ha “Watch Tower.” Mahimo liwat maghatag hin mga alahas o iba pa nga birilhon nga mga butang. Sadang updan ini nga mga donasyon hin halipot nga surat nga nagsusumat nga ito nga butang usa ka direkta nga regalo.

KAHIKAYAN HAN IGINTAPOD NGAN MAY-KONDISYON NGA DONASYON

An kwarta mahimo itapod basi mapahimulsan han Watch Tower. Kondi, kon hangyoon ito han nagpahuram, ibabalik ito ha iya. Para ha dugang nga impormasyon, alayon pakigkomunikar ha Office of the Secretary and Treasurer ha adres nga aada ha igbaw.

GINPLANO NGA PAGHATAG

Dugang pa ha direkta nga mga regalo nga kwarta, may-ada iba pa nga mga paagi han paghatag basi magamit ha pag-alagad ha Ginhadian ha bug-os nga kalibotan. Nag-uupod ini han:

Insurance: An Watch Tower Society mahimo himoon nga beneficiary han palisiya han life insurance o han plano ha pagretiro/pensyon.

Mga Deposito ha Bangko: An mga deposito ha bangko, mga sertipiko han deposito, o indibiduwal nga mga deposito ha pagretiro mahimo itapod o ihatag ha panahon han kamatay ha Watch Tower Society, uyon ha lokal nga mga kahikayan han bangko.

Kapital han Negosyo Ngan mga Bono: An mga kapital han negosyo ngan mga bono mahimo igdonar ha Watch Tower Society sugad nga direkta nga regalo.

Tuna Ngan Balay: An maibabaligya nga tuna ngan balay mahimo igdonar pinaagi man han direkta nga pagregalo o, kon residensya nga panag-iya, pinaagi han pagreserba hin balay ngan tuna ha nagdonar, nga makakapadayon ha pag-ukoy dida samtang buhi pa hiya. Pahibaroa an sanga nga opisina ha iyo nasud antes himoon an dokumento han pagbalhin han bisan ano nga tuna ngan balay.

Gift Annuity: An gift annuity amo an usa nga kahikayan diin an usa nagbabalhin hin kwarta o mga deposito ngadto ha Watch Tower Society. Sugad nga kabalyo, an naghatag, o an usa nga ginpili han naghatag, makarawat hin espisipiko nga kwarta kada tuig samtang hiya buhi. An naghatag makarawat hin pag-iban ha buhis para ha kità ha tuig nga gintikangan an gift annuity.

Mga Testamento Ngan mga Igintatapod: An mga panag-iya o kwarta mahimo ihatag ha Watch Tower Society pinaagi hin testamento nga legal nga ginhimo, o an Watch Tower Society mahimo magin beneficiary han usa nga kasabotan ha pagtapod. An igintapod nga pahihimulsan han usa nga relihiyoso nga organisasyon mahimo maghatag hin pipira nga mga bentaha ha buhis.

Sugad han iginpapasabot han termino nga “ginplano nga paghatag,” ini nga mga klase hin mga donasyon kasagaran nga nagkikinahanglan han pagplano ha bahin han nahatag. Basi mabuligan an mga indibiduwal nga naghihingyap nga makabulig ha bug-os-kalibotan nga buruhaton han mga Saksi ni Jehova pinaagi han usa nga klase han ginplano nga paghatag, igin-andam an usa nga brosyur ha Ingles ngan Espanyol nga may ulohan nga Charitable Planning to Benefit Kingdom Service Worldwide. An brosyur iginsurat basi makahatag hin impormasyon mahitungod ha magkalainlain nga mga paagi nga mahimo maghatag hin mga regalo yana o ha kamatay pinaagi han pagbilin hin panurundon. Katapos basahon an brosyur ngan magpakiana ha ira mga magsaragdon may kalabotan ha balaud o ha buhis ngan ha Charitable Planning Office, damu an nakabulig ha pagsuporta han buruhaton han mga Saksi ni Jehova ha bug-os nga kalibotan, ngan nakakapahimulos hin daku ha ira buhis samtang binubuhat ito. Ini nga brosyur mahimo makuha pinaagi han direkta nga paghangyo hin kopya ha Charitable Planning Office.

Para han dugang nga impormasyon, mahimo ka makigkomunikar ha Charitable Planning Office, pinaagi man ha surat o ha telepono, ha adres nga nakalista ha ubos o ha opisina han mga Saksi ni Jehova nga nagsiserbi ha iyo nasud.

Charitable Planning Office

Sanga nga Opisina han mga Saksi ni Jehova

Watch Tower

186 Roosevelt Avenue,

San Francisco del Monte

1105 Quezon City

Telepono: 411-6090

[Mga Retrato ha pahina 20, 21]

Daan ngan bag-o nga mga katirokan han mga Saksi ni Jehova

Zambia

Republika han Sentral Aprika