Paraiso—Para ba ha Imo?

“Kinilala ako hin usa nga tawo nga Kristohanon . . . nga gin-agaw hiya ngadto ha paraiso.”—2 KORINTO 12:2-4.

 1. Ano nga mga saad han Biblia an makaruruyag ha damu nga mga tawo?

 PARAISO. Nahinunumdoman mo pa ba an inabat mo han siyahan nga hinbatian mo an mahitungod han saad han Dios nga tunan-on nga paraiso? Bangin nahinunumdom ka han hinbaroan mo nga ‘an mga mata han buta maaabrihan, ngan an mga talinga han mga bungol kukuhaan hin sarop, ngan ha kamingawan an mga tubig’ mabugwak ha duro nga kaanyag. O kumusta man an tagna mahitungod han lobo nga kaupod han nati nga karnero ngan han nati nga kanding nga kaupod han leopardo? Diri ba nalipay ka han mabasa mo nga an nagkamatay nga mga hinigugma mababanhaw nga may paglaom nga magpabilin dida hito nga Paraiso?—Isaias 11:6; 35:5, 6; Juan 5:28, 29.

2, 3. (a) Kay ano nga masisiring nga may basihan an imo basado-ha-Biblia nga paglaom? (b) Ano pa an aton basihan para ha paglaom?

² May basihan an imo paglaom. Makatadunganon nga natoo ka ha mga saad han Biblia mahitungod hito nga Paraiso. Pananglitan, nasarig ka ha ginsiring ni Jesus ha iginraysang nga magburuhat hin maraot: “Mabunyog ka ha akon ngadto ha Paraiso.” (Lukas 23:43) Nasarig ka hini nga saad: “Sumala ha iya saad, naghuhulat kita hin mga bag-o nga langit ngan bag-o nga tuna, diin mag-uukoy an katadongan.” Nasarig ka liwat ha saad nga papahiron han Dios an aton mga luha; mawawaray na an kamatayon; matatapos na an kabidoan, pagtangis, ngan kasakit. Nangangahulogan ini nga an tunan-on nga Paraiso maeksister utro!—2 Pedro 3:13; Pahayag 21:4.

³ Kondi an usa pa nga basihan hini nga paglaom ha Paraiso amo an kahimtang diin bahin hito yana an mga Kristiano ha bug-os nga kalibotan. Ano ito? An Dios naghimo hin espirituwal nga paraiso ngan iya gindara an iya katawohan ngada hito. An mga pulong nga “espirituwal nga paraiso” baga in imahinasyon la, nga makuri masabtan, kondi igintagna an sugad nga paraiso, ngan naeksister na gud ito.

Usa nga Bisyon Mahitungod han Paraiso

 4. Ano nga bisyon an gin-uunabi ha 2 Korinto 12:2-4, ngan hin-o an posible nga nakakita hito?

⁴ Mahitungod hinin espirituwal nga paraiso, tigamni an iginsurat ni apostol Pablo: “Kinilala ako hin usa nga tawo nga Kristohanon, . . . nga gin-agaw tubtob ha ikatulo nga langit . . . Ngan hinbaroan ko an amo nga tawo kon ha lawas, o gawas ha lawas ambot; an Dios an maaram, nga gin-agaw hiya ngadto ha paraiso ngan hinbatian niya an mga diri mayayakan nga mga pulong, nga diri tugot nga pagyaknon han tawo.” (2 Korinto 12:2-4) Ito nga mga bersikulo sinunod dayon katapos han mga bersikulo diin gindepensahan ni Pablo an iya pagkaapostol. Dugang pa, an Biblia diri nag-uunabi hin bisan hin-o nga iba nga tawo nga nakaeksperyensya hito, ngan hi Pablo amo an nagsusumat ha aton mahitungod hito. Salit posible nga hi Pablo an nakakita hini nga bisyon. Dida hinin urusahon nga eksperyensya, sinulod hiya ha ano nga “paraiso”?—2 Korinto 11:5, 23-31.

 5. Ano an waray makita ni Pablo, ngan ano nga klase ito hin “paraiso”?

⁵ An konteksto diri nagpapasabot nga “an ikatulo nga langit” nagtutudlok ha atmospera ha palibot han aton globo, ha kawanangan o ha bisan ano nga iba pa nga mga uniberso, sugad han ginbanabana han mga astropisisista (syentista nga nag-aaram mahitungod han mga linarang ha kawanangan sugad han mga bitoon ngan mga planeta). Agsob nga ginagamit han Biblia an numero nga tulo para ha pagpabug-at, kakusog han pwersa, o dugang nga pagparig-on. (Eklesiastes 4:12; Isaias 6:3; Mateo 26:34, 75; Pahayag 4:8) Salit, hitaas o harangdon gud an hinkit-an ni Pablo ha bisyon. Espirituwal ito.

 6. Ano nga panhitabo ha kasaysayan an nabulig nga masabtan an hinkit-an ni Pablo?

⁶ An nauna nga mga tagna han Biblia may-ada iginpapasabot ha aton. Katapos pamatud-an han kadaan nga katawohan han Dios nga hira diri-matinumanon  ha iya, gintugotan niya an mga Babilonyahanon nga atakehon an Juda ngan Jerusalem. Natapos ito ha kabungkagan han 607 A.K.P., sumala ha kronolohiya han Biblia. An tagna nagsiring nga an siyudad magpapabilin nga binayaan ha sulod hin 70 ka tuig; katapos, tutugotan han Dios an mabinasulon nga mga Judio nga bumalik ngan ipahiuli an totoo nga pagsingba. Nahitabo ini tikang han 537 A.K.P. padayon. (Deuteronomio 28:15, 62-68; 2 Hadi 21:10-15; 24:12-16; 25:1-4; Jeremias 29:10-14) Kondi, ano gud an nahitabo ha siyudad? Durante hiton 70 ka tuig, nagin lugar ito han kabanwaan, han mamara nga tuna, nga urukyan han mga tsakal. (Jeremias 4:26; 10:22) Bisan pa hito, inabot ini nga saad: “Hi Jehova naglipay han Sion; hiya naglipay han ngatanan niya nga lugar nga guba, ngan ginhimo an iya kamingawan nga pariho han Eden, ngan an iya kabadsan nga pariho han tanaman [o Paraiso, Septuagint] ni Jehova.”—Isaias 51:3.

 7. Ano an mahitatabo katapos han 70-ka-tuig nga pagkabinayaan?

⁷ Nahitabo ito katapos han 70 ka tuig. Tungod han bendisyon han Dios, nagin mas maopay an mga kahimtang. Handurawa ini ha imo hunahuna: “An kamingawan ngan an mamara nga tuna magmamalipayon; ngan an kabadsan malilipay, ngan mabukad sugad han rosas. Ini mabukad hin damu gud, ngan malilipay bisan han kahimongaya ngan han kanta. . . . An tawo nga piol malukso sugad hin bugsok, ngan an dila han ngula magkakanta; kay didto ha kamingawan an mga tubig matubod, ngan an mga sapa dida ha kabadsan. Ngan an nag-iinggat nga baras mahihimo nga libaong, ngan an uhaw nga tuna nga mga burabod han tubig; dida ha puroy-anan han mga tsakal, diin hira luluob, maaamo an kabanwaan nga may mga tangbo ngan mga manban.”—Isaias 35:1-7.

An Katawohan nga Binalik Ngan Nagbag-o

 8. Paonan-o kita nahibaro nga an Isaias kapitulo 35 naaplikar ha katawohan?

⁸ Daku gud ini nga pagbag-o! Tikang ha pagkabinayaan ngadto ha pagin paraiso. Kondi, ini ngan an iba pa nga masasarigan nga mga tagna nagpapakita nga magkakaada liwat pagbag-o ha katawohan, pariho han binayaan nga tuna nga nagin mabungahon. Kay ano nga masisiring naton ito? Bueno, an ginhihisgotan ni Isaias amo an “mga linukat ni Jehova,” nga mabalik ha ira tuna “lakip an kanta” ngan magkakaada hin “kalipay ngan hin kahimongaya.” (Isaias 35:10) Naaplikar ito, diri ha literal nga tuna, kondi ha katawohan. Dugang pa, hi Isaias nagtagna liwat mahitungod han katawohan nga iginbalik ha Sion: “Hira matatawag nga mga kahoy han pagkamatadong, an tinanom ni Jehova . . . Kay sugad nga an tuna nagpapagawas han iya biyoos, . . . amo man an Ginoo nga hi Jehova  magpapaturok han pagkamatadong ngan han pagdayaw ha atubangan han mga nasud.” Hi Isaias nagsiring liwat mahitungod han katawohan han Dios: “Hi Jehova magmamando ha imo ha dayoday . . . , ngan magpaparig-on han imo mga tul-an; ngan ikaw masusugad hin binaribihan nga tanaman.” (Isaias 58:11; 61:3, 11; Jeremias 31:10-12) Salit, sugad la han mga kahimtang ha palibot han literal nga tuna nga mag-uuswag, mababag-o liwat an mga kahimtang han binalik nga mga Judio.

 9. Ano nga “paraiso” an hinkit-an ni Pablo, ngan kakan-o natuman ito?

⁹ Ini nga ehemplo ha kasaysayan nabulig ha aton nga masabtan an hinkit-an ni Pablo ha bisyon. Mahidadabi hito an Kristiano nga kongregasyon, nga iya gintawag nga “uma han Dios” ngan magigin mabungahon. (1 Korinto 3:9) San-o matutuman ito nga bisyon? Gintawag ni Pablo an iya hinkit-an nga usa ka “pagpahayag,” nga mahitatabo ha tidaraon. Maaram hiya nga katapos niya mamatay mahitatabo an daku nga apostasya. (2 Korinto 12:1; Buhat 20:29, 30; 2 Tesalonika 2:3, 7) Samtang naglalampos an mga apostata ngan baga in nadadaog an totoo nga mga Kristiano, diri gud hira magigin pariho han mabungahon nga hardin. Kondi, maabot an panahon nga pagpapahitas-on utro an totoo nga pagsingba. Ibabalik an katawohan han Dios basi ‘an mga magtadong maglamrag sugad han adlaw ha ginhadian han ira Amay.’ (Mateo 13:24-30, 36-43) Ito gud an nahitabo paglabay hin pipira ka tuig katapos nga natukod an Ginhadian han Dios ha langit. Ngan ha paglabay han mga dekada, nagin matin-aw gud nga an katawohan han Dios nagpapahimulos han espirituwal nga paraiso, nga hinkit-an ni Pablo ha bisyon.

10, 11. Kay ano nga masisiring naton nga aada kita ha espirituwal nga paraiso bisan pa han aton pagin diri-hingpit?

¹⁰ Oo, maaram kita nga sugad nga indibiduwal kita diri-hingpit, salit diri kita nahipapausa nga usahay nabangon an mga problema, sugad la ha mga Kristiano ha panahon ni Pablo. (1 Korinto 1:10-13; Filipos 4:2, 3; 2 Tesalonika 3:6-14) Kondi, hunahunaa la an espirituwal nga paraiso nga aton pinahihimulosan yana. Kon itanding ha masakiton nga kahimtang naton hadto, natambal na kita ha espirituwal nga paagi. Ngan diri sugad ha gutom nga kahimtang naton hadto, ginpapakaon na kita yana hin maopay ha espirituwal. Imbes nga magkuri dida ha mamara nga espirituwal nga tuna, an katawohan han Dios nakarawat han iya pag-uyon ngan pinauuranan hin mga bendisyon. (Isaias 35:1, 7) Imbes nga mabuta ha sugad-lungib nga espirituwal nga kasisidman, nakikita naton an kalamrag han kagawasan ngan han pag-uyon han Dios. Damu han sugad hin mga bungol nga waray pa makabati ha mga tagna han Biblia an nakakabati na nga may pagsabot ha ginsisiring han Kasuratan. (Isaias 35:5) Pananglitan, gin-adman han minilyon nga mga Saksi ni Jehova ha bug-os nga kalibotan an tagsa nga bersikulo han tagna ni Daniel. Katapos, ira gin-adman hin maopay an tagsa nga kapitulo han libro han Biblia nga Isaias. Diri ba inin makarepresko nga espirituwal nga pagkaon  usa nga ebidensya han aton espirituwal nga paraiso?

¹¹ Hunahunaa liwat, an mga pagbag-o ha pamatasan samtang an sinsero nga mga tawo tikang ha ngatanan nga mga kahimtang nangangalimbasog ha pagsabot ngan pag-aplikar han Pulong han Dios. Nangangalimbasog gud hira ha pagsalikway han hayupnon nga pamatasan nira hadto. Bangin ginpangalimbasogan mo ito ngan nagkaada mag-opay nga mga resulta, ngan sugad man an imo kabugtoan ha espirituwal. (Kolosas 3:8-14) Salit, samtang nakikig-upod ka ha kongregasyon han mga Saksi ni Jehova, kaupod mo an mga tawo nga nagigin mas mamurayawon ngan makaruruyag. Diri pa hira hingpit, kondi diri gud maisasaysay nga sugad hira hin mabangis nga mga leon o matukob nga ihalas nga mga mananap. (Isaias 35:9) Ano an iginpapasabot hinin mamurayawon nga espirituwal nga pakig-upod? Matin-aw, pinahihimulosan naton an espirituwal nga kahimtang nga husto nga matatawag naton nga espirituwal nga paraiso. Ngan an aton espirituwal nga paraiso nagpapadagaw han tunan-on nga paraiso nga pahihimulosan naton kon magpabilin kita nga maunungon ha Dios.

12, 13. Ano an kinahanglan buhaton naton basi magpabilin kita ha aton espirituwal nga paraiso?

¹² Kondi, may-ada usa pa nga butang nga kinahanglan diri naton hingalimtan. An Dios nagsiring ha mga Israelita: “Bantayan niyo an ngatanan nga sugo nga akon isusugo ha iyo hini nga adlaw, basi kamo magmakusog, ngan makasulod, ngan makatag-iya han tuna.” (Deuteronomio 11:8) Ha Lebitiko 20:22, 24, gin-unabi na liwat ito nga tuna: “Iyo bantayan an ngatanan ko nga kasugoanan, ngan an ngatanan ko nga sugo, ngan buhata niyo ini; basi ha tuna nga akon ha iyo pagdadad-an nga iyo urukyan diri kamo isuka. Kondi ako nagsiring ha iyo: Kamo an manununod han ira tuna, ngan akon ini ihahatag ha iyo ha pag-angkon hini, an tuna nga nag-aawas hin gatas ngan hin dugos.” Oo, an pagtag-iya ha Tuna nga Iginsaad nagdepende ha maopay nga relasyon kan Jehova nga Dios. Tungod kay napakyas an mga Israelita ha pagsugot ha iya, gintugotan han Dios an mga Babilonyahanon nga sakupon hira ngan kuhaon hira tikang ha ira lugar nga inuukyan.

¹³ Bangin damu nga mga butang an makalilipay ha aton mahitungod han aton espirituwal nga paraiso. Makaruruyag pagkit-on an palibot, ngan nakakaparelaks. May kamurayawan kita kaupod han mga Kristiano nga nangangalimbasog pagsalikway han hayupnon nga pamatasan. Nangangalimbasog hira nga magin buotan ngan mabinuligon. Kondi, an pagpabilin dida ha aton espirituwal nga paraiso nagkikinahanglan hin labaw pa han pagkaada la maopay nga relasyon hini nga mga tawo. Kinahanglan may-ada liwat kita maopay nga relasyon kan Jehova ngan ginbubuhat naton an iya kaburut-on. (Mika 6:8) Kinaburut-on nga nahingada kita hinin espirituwal nga paraiso, kondi mahimo kita ig-anod pahirayo—o pagawson—kon diri kita mangalimbasog ha pagtipig han aton relasyon ha Dios.

14. Ano an makakabulig ha aton pagpabilin ha espirituwal nga paraiso?

¹⁴ An importante nga butang nga mabulig ha aton amo an aton pagpadayon nga napaparig-on kita han Pulong han Dios. Tigamni an simboliko nga mga pulong ha Salmo 1:1-3: “Mahimayaon an tawo nga diri naglalakat ha sagdon han mga magraot . . . Kondi ha balaud ni Jehova aada an iya kalipay; ngan adlaw ug gab-i hiya namamalandong ha iya balaud. Ngan hinunugad hiya hin kahoy nga gintanom ha ligid han mga kasapaan hin tubig, nga mabunga ha iya panahon, ngan an iya dahon diri malalaya; ngan an ngatanan nga iya paghihimoon madukwag [o mauswag].” Dugang pa, an basado-ha-Biblia nga mga publikasyon han matinumanon ngan maaramon nga uripon nga klase nagtatagana hin espirituwal nga pagkaon ha espirituwal nga paraiso.—Mateo 24:45-47.

Pagparig-on han Imo Pagkita ha Paraiso

15. Kay ano nga waray tuguti hi Moises nga manguna ha mga Israelita ngadto ha Tuna nga Iginsaad, kondi ano an iya hinkit-an?

¹⁵ Tagda an usa pa nga abanse nga pagpakita han Paraiso. Katapos maglinakatlakat an Israel ha kamingawan ha sulod hin 40 ka tuig, pinangunahan hira ni Moises pakadto ha Kapatagan han Moab, ha este han Salog Jordan. Tungod han naglabay nga sayop ni Moises, nagdesisyon hi Jehova nga diri hi Moises an mangunguna ha Israel ha pagtabok ha Jordan. (Numeros 20:7-12; 27:12, 13) Hi Moises nakimalooy ha Dios: “Pakadtoa ako, nanginginyupo ako ha imo, ngan pakitaa han maopay nga tuna  nga aadto ha tabok han Jordan.” Bisan kon diri hiya makakasulod ngadto, katapos sumagka ha Bukid Pisga ngan makita an magkalainlain nga mga bahin hito nga tuna, sigurado nga nasabtan ni Moises nga “maopay nga tuna” ito. Ha imo hunahuna, ano an kahimtang hito nga tuna?—Deuteronomio 3:25-27.

16, 17. (a) Paonan-o an Tuna nga Iginsaad ha kadaan nga mga panahon naiiba ha tuna yana nga mga panahon? (b) Kay ano nga makakatoo kita nga an Tuna nga Iginsaad hadto pariho hin usa nga paraiso?

¹⁶ Kon ibasar mo an imo opinyon ha kahimtang han kadak-an nga bahin hito nga tuna yana, bangin mahunahuna mo an mamara nga tuna nga mabaras, batuhon nga mga disyerto, ngan duro nga kapaso. Kondi, makatadunganon an pagsiring nga iba an kahimtang han bug-os nga tuna ha mga panahon han Biblia. Ha barasahon nga Scientific American, an eksperto ha tubig ngan ha tuna nga hi Dr. Walter C. Lowdermilk nagsaysay nga an tuna hini nga rehiyon “nadaot tungod han yinukot ka tuig nga pag-abusoha.” Ini nga agronomista nagsurat: “An ‘disyerto’ nga sinaliwan ha mabungahon hadto nga tuna amo an resulta han buhat han tawo, diri han kinaiya.” Ha pagkamatuod, ipinakita han iya mga pagsaliksik nga “ini nga tuna usa nga paraiso hadto han mga magbarantay han kakarnerohan.” Matin-aw nga an pag-abuso han tawo nakadaot ha tinatawag nga “paraiso han mga magbarantay han kakarnerohan.” a

¹⁷ Ha pamalandong ha imo nabasa ha Biblia, bangin masabtan mo nga makatadunganon gud an pagsiring nga haros paraiso na an Tuna nga Iginsaad. Hinumdumi an iginpasarig ni Jehova ha katawohan pinaagi kan Moises: “An tuna nga iyo kakadtoan ha pagtag-iya hini, amo an tuna han mga bungtod ngan han mga walog, ngan nainom han tubig han uran ha langit, an tuna nga ginmangnoan ni Jehova nga imo Dios.”—Deuteronomio 11:8-12.

18. Paonan-o an Isaias 35:2 naghatag ha bihag nga mga Israelita hin ideya kon ano an magigin kahimtang ha Tuna nga Iginsaad?

¹⁸ Maanyag gud ngan mabungahon an Tuna nga Iginsaad salit an pag-unabi la ha pipira nga mga lugar hito nagpapahinumdom la han sugad-paraiso nga mga kahimtang. Iginsaysay ito hin matin-aw ha tagna ha Isaias kapitulo 35, nga nagkaada siyahan nga katumanan han binalik an mga Israelita tikang ha Babilonya. Hi Isaias nagtagna: “Ini mabukad hin damu gud, ngan malilipay bisan han kahimongaya ngan han kanta; an himaya han Libano ihahatag hini, an kamahalan han Karmelo ngan han Saron; hira makakakita han himaya ni Jehova, an kamahalan han aton Dios.” (Isaias 35:2) An pag-unabi han Libano, Karmelo, ngan Saron nagpahinumdom gud ha mga Israelita han makapatagbaw ngan matahom nga kahimtang.

19, 20. (a) Ihulagway an lugar han kadaan nga Saron. (b) Ano an usa nga paagi ha pagparig-on han aton paglaom ha Paraiso?

¹⁹ Tagda an Saron, an kapatagan nga hirani ha  dagat ha butnga han mga bungtod han Samaria ngan han Daku nga Dagat, o an Mediteranyo. (Kitaa an retrato ha pahina 10.) Bantogan ito tungod ha kaanyag ngan pagkamabungahon hito. Tungod kay tubigon, maopay ito nga sarabsaban, kondi may-ada ito mga kagurangan han kakahoyan nga roble ha norte. (1 Kronikas 27:29; Kanta ni Salomon 2:1; Isaias 65:10) Hito nga paagi igintagna han Isaias 35:2 an pagpahiuli ngan an tuna nga mamumukad hin maanyag, nga magigin pariho hin usa nga paraiso. Ito nga tagna nagpapasabot liwat hin makalilipay nga espirituwal nga paraiso, sumala ha hinkit-an ni apostol Pablo ha bisyon. Ha kataposan, ini nga tagna upod an iba pa nga mga tagna, nagpaparig-on han aton paglaom ha tunan-on nga paraiso para ha katawohan.

²⁰ Samtang naukoy kita ha aton espirituwal nga paraiso, mapaparig-on naton an aton apresasyon hito ngan an aton paglaom ha Paraiso dinhi ha tuna. Paonan-o? Pinaagi han pagpahilarom han aton pagsabot ha aton nababasa ha Biblia. An mga paghulagway ngan mga tagna han Biblia agsob nga nag-uunabi hin espisipiko nga mga lugar. Karuyag mo ba masabtan hin mas maopay kon diin nahimumutang hadto ini nga mga lugar ngan kon ano an kalabotan hito ha iba pa nga mga rehiyon? Ha masunod nga artikulo, aton paghihisgotan kon paonan-o mo masasabtan ito nga may kapulsanan.

[Mga footnote]

Nahinunumdoman Mo Ba?

• Ano nga “paraiso” an hinkit-an ni apostol Pablo ha bisyon?

• Mahitungod han Isaias kapitulo 35, ano an siyahan nga katumanan hito, ngan ano an kalabotan hito ha hinkit-an ni Pablo ha bisyon?

• Paonan-o naton mapaparig-on an aton apresasyon ha aton espirituwal nga paraiso ngan an aton paglaom ha tunan-on nga paraiso?

[Mga Pakiana]

[Retrato ha pahina 10]

An Kapatagan han Saron, mabungahon nga lugar ha Tuna nga Iginsaad

[Ginkuhaan han Retrato]

Pictorial Archive (Near Eastern History) Est.

[Retrato ha pahina 12]

Nasabtan ni Moises nga “maopay nga tuna” ito