Relihiyon—Maopay ba o Maraot nga Impluwensya?

“DAKU an akon utang ha Kristianidad tungod han nabuhat hito ha akon, ngan salit, natoo ako nga an kalibotan nga naapektohan han Kristianidad ha naglabay nga 2000 ka tuig sadang liwat umabat hin pagin utangan ngada hito.”—Introduksyon, Two Thousand Years—The First Millennium: The Birth of Christianity to the Crusades.

Ito nga pag-endorso ha “Kristianidad” ginyakan han Ingles nga awtor ngan brodkaster nga hi Melvyn Bragg. An iya mga pulong nagpapakita han mga pagbati han minilyon nga umurukoy ha tuna nga naabat hin pariho nga daku nga pagkautangan ngan pagkamaunungon ha usa nga relihiyon o ha bisan ano nga relihiyon. Kombinsido hira nga an relihiyon may-ada gamhanan nga impluwensya para ha kaopayan ha ira kinabuhi. Pananglitan, an usa nga parasurat nasiring nga an Islam “nakaaghat hin usa nga bantogan nga sibilisasyon . . . [nga] nagpauswag han bug-os nga kalibotan.”

Bahin han Relihiyon—Maopay o Maraot?

Kondi, an sunod nga mga pulong ni Bragg, nagbangon hin seryoso nga pakiana mahitungod ha kon an relihiyon ba ha kabug-osan nagin totoo nga impluwensya para ha maopay. Hiya nagdugang: “May-ada liwat kinahanglan isaysay ha akon an Kristianidad.” Mahitungod ha ano an iya karuyag nga pagsaysay? “Tungod ha pagkadiri-matinuguton, ha karaotan, ha kabangis ngan ha tinuyo nga diri pakasabot nga nagin kaylap liwat ha kadak-an han ‘kasaysayan’ hito,” siring niya.

Damu nga tawo an masiring nga an pagkadiri-matinuguton, karaotan, kabangis, ngan tinuyo nga diri pakasabot naghuhugaw ha kadam-an nga mga relihiyon han kalibotan ha bug-os nga kasaysayan. An ira opinyon amo nga an relihiyon baga la hin usa nga parabulig han katawohan—nga ilarom han malimbungon nga dagway hito han pagkamaopay ngan pagkabaraan, ito ha pagkatinuod puno hin pagkasalingkapaw ngan mga buwa. (Mateo 23:27, 28) “An pinakakomon nga tema ha aton literatura amo nga an relihiyon may-ada espesyal nga bili may kalabotan ha sibilisasyon,” siring han A Rationalist Encyclopædia. “Ngan ha kamatuoran ito nga mga pulong mahitungod ha relihiyon napamatud-an gud nga buwa pinaagi han mga panhitabo ha kasaysayan,” nagpapadayon ito.

Pagbasa hin bisan ano nga peryodiko yana, ngan makakabiling ka hin damu hinduro nga mga ehemplo han mga lider han relihiyon nga nagsasangyaw hin gugma, kamurayawan, ngan pagpaid kondi nag-aaghat hin kapungot ngan ginagamit an ngaran han Dios basi pagmatadungon an ira madarahog nga mga girra. Diri urusahon nga damu nga mga tawo an naabat nga an relihiyon agsob gud nga usa ka nakakadaot nga impluwensya ha kinabuhi!

Magigin Mas Maopay ba an Kalibotan kon Waray Relihiyon?

An iba naghunahuna pa ngani, sugad han panhunahuna han Ingles nga pilosopo nga hi Bertrand Russell, nga magigin maopay unta kon ha urhi an  “ngatanan nga klase han relihiyoso nga gintotoohan diri na umiksister.” Ha ira opinyon, an pagpoo han relihiyon amo la an magpapadayon nga solusyon ha ngatanan nga mga problema han tawo. Kondi, bangin maruyag hira ha pagbalewaray han kamatuoran nga adton nagdudumiri ha relihiyon mahimo makaaghat hin daku nga kapungot ngan pagkadiri-matinuguton sugad hadton maunungon nga nasuporta hito. An parasurat mahitungod han relihiyon nga hi Karen Armstrong nagpapahinumdom ha aton: “Ha pinakaminos, an Holocaust nagpakita nga an sekular nga ideolohiya [mahimo] magin makamaratay sugad gud han bisan ano nga relihiyoso nga krusada.”—The Battle for God—Fundamentalism in Judaism, Christianity and Islam.

Salit maopay gud ba nga impluwensya an relihiyon, o ito ba, usa nga nangunguna nga hinungdan han mga problema han katawohan? An solusyon ba hito nga mga problema amo an pagpoo han ngatanan nga relihiyon? Tagda an ginsisiring han Biblia mahitungod hini ha sunod nga artikulo. Bangin mahipausa ka han baton.