Totoo nga Bulig Para ha mga Kablas

HAN hi Jesu-Kristo, an Anak han Dios, nakanhi pa ha tuna, ipinakita niya an totoo nga pagkadisidido ha pagbulig ha mga kablas. Mahitungod han ministeryo ni Jesus, usa nga nakakita an nagsiring: “An mga buta nakakita; ngan an mga piang nakalakat; an mga lasaruhon nalinisan; ngan an mga bungol nakabati; ngan an mga minatay nagkababanhaw; ngan ginwalihan an mga kablas han maopay nga sumat.” (Mateo 11:5) Kondi, kumusta man an damu ka milyon nga mga kablas yana nga panahon? May-ada ba maopay nga sumat para ha ira? Oo, may-ada mensahe han paglaom!

Bisan kon an mga kablas agsob nga ginbabalewaray ngan hinngangalimtan han mga tawo ha kabug-osan, an Pulong han Dios, an Biblia, nagsasaad: “An kablas diri hingangalimtan ha kagihaponan, bisan an paglaom han kablasanon diri mawawara ha kadayonan.” (Salmo 9:18) Matutuman inin nakakaliaw nga mga pulong kon an Ginhadian han Dios, usa nga totoo nga langitnon nga gobyerno, sumaliwan na ha ngatanan nga pagmando han tawo. (Daniel 2:44) Sugad nga Hadi hiton langitnon nga gobyerno, hi Jesus “malolooy . . . ha mga kablasanon ngan makinurion, ngan an mga kalag han mga makinurion iya pagluluwason. Tutubson niya an ira mga kalag tikang ha pagtalumpigos ngan paglugos; ngan marahalon an ira dugo ha iya mga mata.”—Salmo 72:13, 14.

Ano an magigin kahimtang han pagkinabuhi kon hi Kristo na an nagmamando ha tuna? Adton nagkikinabuhi ilarom han pagmando ni Kristo ha kalibotan magpapahimulos han ira mga buhat. An Biblia nasiring ha Mika 4:3, 4: “Hira an tagsatagsa nga tawo malingkod ha sirong han iya balagon han ubas ngan ha sirong han iya kahoy nga igera; ngan waray bisan hin-o nga maghahadlok ha ira: kay an baba ni Jehova han mga kasundalohan nagyakan hini.” An Ginhadian han Dios magsusulbad pa ngani han mga problema nga sakit ngan kamatayon. (Isaias 25:8) Naiiba gud ito nga kalibotan! Makakatoo kita hini nga mga saad han Biblia tungod kay giniyahan ito han Dios mismo.

Dugang pa ha paghatag hin mensahe han paglaom, an Biblia nabulig ha aton nga malamposan an adlaw-adlaw nga mga problema, sugad han kon paonan-o malalamposan an kakulang hin pagtahod-ha-kalugaringon, nga bangin resulta han pagin kablas. Pinaagi han iya pag-aram ha Biblia, maaram an usa nga kablas nga Kristiano nga presyoso hiya ha paniplatan han Dios sugad la han usa nga Kristiano nga riko. An libro han Biblia nga Job nasiring nga an Dios “diri nagtatagad han bahandianon labi kay han kablasanon; kay hira ngatanan mga buhat han iya mga kamot.” (Job 34:19) Waray-pagpasulabi nga hinigugma han Dios hira ngatanan.—Buhat 10:34, 35.