Maglalakat Kita ha Ngaran ni Jehova ha Kadayonan!
Maglalakat Kita ha Ngaran ni Jehova ha Kadayonan!
“Kita maglalakat ha ngaran ni Jehova ha kagihaponan [“kadayonan,” NW].”—MIKA 4:5.
1. Ano nga mga mensahe an matin-aw nga iginsasaysay ha Mika kapitulo 3 tubtob 5?
HI Jehova may-ada isusumat ha iya katawohan, ngan ginagamit niya hi Mika sugad nga iya propeta. Katuyoan han Dios nga gumios kontra ha mga magburuhat hin maraot. Iya sisirotan an Israel tungod han apostasya hito. Kondi, makalilipay, bibendisyonan ni Jehova adton naglalakat ha iya ngaran. Ini nga mga mensahe matin-aw nga iginsasaysay ha kapitulo 3 tubtob 5 han tagna ni Mika.
2, 3. (a) An mga lider han Israel sadang magpakita hin ano nga kalidad, kondi ano an tinuod nga ira ginbubuhat? (b) Paonan-o mo isasaysay an ilustrasyon nga ginamit ha Mika 3:2, 3?
2 An propeta han Dios nasiring: “Pamati, ako nanginginyupo ha iyo, kamo nga mga pangulo ni Jakob, ngan nga mga maglalarang han balay han Israel: Diri ba para ha iyo an paghibaro han kasubayan?” Oo, ito unta an ira sadang pagbuhaton, kondi ano an tinuod nga ira ginbubuhat? Siring ni Mika: “Kamo nga nangangalas han maopay, ngan nahigugma han maraot; nga naglaknit han ira panit tikang ha ira, ngan han ira unod tikang ha ira mga tul-an; nga nagkaon liwat han unod han akon katawohan, ngan nag-anit han ira panit tikang ha ira, ngan nagdugmok han ira mga tul-an, ngan pag-utod-uturon hira sugad hin para ha daba, ngan sugad hin unod ha sakob han kaldero.”—Mika 3:1-3.
3 Aw, an mga lider nagtatalumpigos ha mga kablas, ha waray-mahihimo nga mga tawo! An simboliko nga mga pulong nga ginamit dinhi masayon masabtan hadton namamati kan Mika. Kon an ginpatay nga karnero gin-aandam pinaagi han pagpakaladkad, gin-aanitan anay ito ngan katapos ginbabari an kaluluthan. Usahay ginbubuka an mga tul-an basi gumawas an mga utok. An unod ngan an mga tul-an ginpapakaladkad ha daku nga kaldero, sugad han gin-unabi ni Mika. (Esekiel 24:3-5, 10) Naangay gud ini nga ilustrasyon mahitungod han abusado nga pagtrato nga gin-aantos han mga tawo ha panahon ni Mika tikang ha ira magraot nga mga lider!
Hi Jehova Naglalaom nga Buhaton Naton an Hustisya
4. Ano nga kaibahan an makikita butnga ni Jehova ngan han mga lider han Israel?
4 Daku gud an kaibahan butnga han mahigugmaon nga Magbarantay, hi Jehova, ngan han mga lider han Israel. Tungod kay diri hira nagbubuhat han hustisya, napakyas hira ha pagtuman han sugo ha ira nga panalipdan an panon. Lugod, hakugnon nga inaabuso nira an simboliko nga mga karnero, diri nagbubuhat ha ira hin hustisya ngan ginpapaantos hira hin ‘pagbubo hin dugo,’ sugad han ginsiring ha Mika 3:10. Ano an aton mahibabaroan tikang hini nga kahimtang?
5. Ano an ginlalaoman ni Jehova ha mga nangunguna ha iya katawohan?
5 Naglalaom an Dios nga adton nangunguna ha iya katawohan magpapadapat hin hustisya. Nakikita naton nga gintutuman ini han mga surugoon ni Jehova yana nga panahon. Dugang pa, nauyon ini ha Isaias 32:1, diin aton mababasa: “Kitaa, an usa nga hadi maghahadi ha pagkamatadong, ngan an mga prinsipe maglalarang ha kasubayan [“hustisya,” NW].” Kondi, ano an aton nakikita ha panahon ni Mika? An “nangangalas han maopay, ngan nahigugma han maraot” nagpapadayon ha pagbaliko han hustisya.
Kan Kanay mga Pag-ampo an Binabaton?
6, 7. Ano nga importante nga punto an pinabubug-atan ha Mika 3:4?
6 Makakalaom ba han pag-uyon ni Jehova an magraot nga mga kadungandungan ni Mika? Syempre diri! An Mika 3:4 nasiring: “Hira magsasangpit kan Jehova, kondi hiya diri mabaton ha ira; oo, iya tatagoon an iya nawong tikang ha ira hadto nga panahon, sumala han ira nabuhat nga maraot ha ira mga binubuhat.” Pinabubug-atan hini an importante hinduro nga punto.
7 Diri babatunon ni Jehova an aton mga pag-ampo kon nagbubuhat kita hin sala. Sigurado gud ito kon nagkikinabuhi kita hin doble nga kinabuhi, igintatago an aton sayop nga buhat samtang nag-aangkon nga matinumanon nga nag-aalagad ha Dios. Sumala ha Salmo 26:4, hi David nagkanta: “Waray ako paglingkod upod han mga tawo nga mga buwaon; diri liwat ako maglalakat upod hiton mga tawo nga maglimbungon.” Diri gud liwat babatunon ni Jehova an mga pag-ampo hadton tinuyo nga nagtatalapas han iya Pulong!
Ginpakusog han Espiritu han Dios
8. An palso nga mga propeta ha panahon ni Mika ginpahamangnoan mahitungod han ano?
8 Maraot gud nga mga buhat an kaylap ha espirituwal nga mga lider han Israel! Tungod han palso nga mga propeta nawara an espirituwalidad han katawohan han Dios. An hakog nga mga lider nagsisinggit hin ‘Kamurayawan!’ kondi ha tinuod nagbabaraan han girra kontra ha bisan hin-o nga diri naghahatag ha ira hin pagkaon. “Busa,” siring ni Jehova, “ini magagab-i para ha iyo, nga kamo mawaray bisyon; ngan ini magmamasirom para ha iyo, nga kamo diri manag-an; ngan an adlaw matutunod dida ha mga manaragna, ngan an adlaw magmamaitom ha igbaw nira. Ngan an mga manarag-an pagpapakaalohan, ngan an mga parapanag-an magugupong; oo, hira ngatanan matabon han ira mga im-im [“bungot,” NW].”—Mika 3:5-7a.
9, 10. Ano an kahulogan han ‘pagtabon han bungot,’ ngan kay ano nga waray hinungdan hi Mika nga buhaton ito?
9 Kay ano nga ‘tabonan an bungot’? Ini an ginbuhat han magraot nga mga kadungandungan ni Mika tungod ha kaawod. Ngan inin magraot nga kalalakin-an sadang maawod. “Waray baton tikang ha Dios,” siring hini nga mga magraot. (Mika 3:7b) Diri pinamamatian ni Jehova an mga pag-ampo han bisan hin-o nga mapahitas-on nga mga magraot.
10 Hi Mika waray hinungdan nga ‘magtabon han bungot.’ Diri hiya naaawod. Binabaton ni Jehova an iya mga pag-ampo. Tigamni an Mika 3:8, diin an matinumanon nga propeta nasiring: “Kondi mahitungod ha akon, ako puno hin gahum pinaagi han espiritu ni Jehova, ngan hin paghukom, ngan hin kusog.” Mapasalamaton gud hi Mika nga durante han iya hilawig ngan matinumanon nga ministeryo, pirme hiya “puno hin gahum pinaagi han espiritu ni Jehova”! Nagpakusog ini ha iya “ha pagsaysay ngada kan Jakob han iya pagtalapas, ngan ngada ha Israel han iya sala.”
11. Paonan-o ginpapakusog an mga tawo ha pagpasamwak han mga mensahe han Dios?
11 Hi Mika nagkinahanglan hin labaw ha tawo nga kusog basi maipasamwak an mensahe han Dios mahitungod han makaharadlok nga paghukom. Importante an espiritu ni Jehova, o gamhanan nga aktibo nga puwersa. Kumusta man kita? An sugo ha aton nga pagsangyaw matutuman la kon paririg-unon kita ni Jehova pinaagi han iya baraan nga espiritu. Sigurado nga mapapakyas an aton mga pangalimbasog ha pagsangyaw kon tinuyo nga magbubuhat kita hin sala. Hito nga kahimtang diri mababaton han Dios an aton mga pag-ampo para han kusog ha pagbuhat hini nga buruhaton. Sigurado nga diri naton maipapasamwak an mga mensahe han paghukom han aton langitnon nga Amay kon waray ha aton an “espiritu ni Jehova.” Pinaagi han mga pag-ampo nga pinamamati ngan pinaagi han bulig han baraan nga espiritu, maisugon nga naipapasamwak naton an pulong han Dios pariho kan Mika.
12. Kay ano nga an siyahan nga mga disipulo ni Jesus ‘padayon nga nagyayakan han pulong han Dios nga waray kahadlok’?
12 Bangin nahinunumdoman mo an asoy ha Buhat 4:23-31. Handurawa nga usa ka han siyahan-siglo nga mga disipulo ni Jesus. An panatiko nga mga persigidor nangangalimbasog ha pagpaundang han pagsangyaw han mga sumurunod ni Kristo. Kondi ini nga mga maunungon nag-aampo ha ira Soberano nga Ginoo, nanginginyupo: “Ginoo, kitaa, an ira mga tarhog: ngan hatagi an imo mga uripon, nga igyakan nira an imo pulong ha waray kahadlok.” Ano an resulta? Han ira pakag-ampo, nauy-og an lugar nga ira ginkakatirokan, ngan hira ngatanan napuno han baraan nga espiritu ngan nagyakan han pulong han Dios nga waray kahadlok. Salit hinaot mainampoon nga maglaom kita kan Jehova ngan sumarig ha iya bulig pinaagi han baraan nga espiritu samtang ginbubuhat naton an aton ministeryo.
13. Ano an mahitatabo ha Jerusalem ngan Samaria, ngan kay ano?
13 Hunahunaa utro an panahon ni Mika. Sumala ha Mika 3:9-12, an salaan-ha-dugo nga mga magmarando naghukom tungod han hukip, an mga saserdote nagtutdo tungod han suhol, ngan an palso nga mga propeta nananagna tungod han kwarta. Diri urusahon nga an Dios nagsugo nga an kapital han Juda, an Jerusalem, “mahihimo nga mga tambak hin mga guba”! Tungod kay nagdudugang liwat ha Israel an palso nga pagsingba ngan kadaot ha moral, giniyahan hi Mika ha pagpahamangno nga hihimoon han Dios an Samaria nga “tambak hin mga guba.” (Mika 1:6, NW) Ha pagkamatuod, padayon nga nabuhi an propeta salit nakita niya an igintagna nga kabungkagan han Samaria pinaagi han Asiryahanon nga mga kasundalohan han 740 A.K.P. (2 Hadi 17:5, 6; 25:1-21) Matin-aw nga inin mapuwersa nga mga mensahe kontra ha Jerusalem ngan Samaria maipapahayag la pinaagi han kusog ni Jehova.
14. Paonan-o natuman an tagna nga nakarekord ha Mika 3:12, ngan paonan-o sadang makaapekto ito ha aton?
14 Diri gud makakapalagiw an Juda ha makaharadlok nga paghukom ni Jehova. Sugad nga katumanan han tagna nga nakarekord ha Mika 3:12, an Sion “pag-aaraduhon sugad hin uma.” Sumala ha aton punto-de-bista yana, maaram kita nga nahitabo ini han ginbungkag han mga Babilonyahanon an Juda ngan Jerusalem han 607 A.K.P. Nahitabo ini sobra usa ka gatos ka tuig na katapos magtagna hi Mika, kondi sigurado hiya nga ito maabot. Oo, sadang liwat kita sumarig nga an presente nga sistema han mga butang matatapos ha igintagna nga “adlaw ni Jehova.”—2 Pedro 3:11, 12.
Hi Jehova Nagtatadong han mga Butang
15. Ha imo kalugaringon nga mga pulong, paonan-o mo isasaysay an tagna nga nakarekord ha Mika 4:1-4?
15 Kon babalikon naton iton nga panahon, makikita naton nga sunod nga iginsusumat ni Mika an makalilipay hinduro nga mensahe han paglaom. Makalilipay gud ini nga mga pulong nga aton makikita ha Mika 4:1-4! Hi Mika, ha bahin, nasiring: “Ha urhi nga mga adlaw mahinanabo, nga an bukid han kan Jehova balay pagtitindugon ha bawbaw han mga bukid, ngan ini pagpapahitas-on labaw han mga bungtod; ngan an mga katawohan mahuyog ngada hini. . . . Ngan hiya maghuhukom han damu nga katawohan, ngan mahatag hin kahusayan mahitungod han magkusog nga mga nasud ha kahigrayoan: ngan ira hihimoon an ira mga kampilan nga mga arado, ngan an ira mga bangkaw nga mga garab nga ipangarapon; an nasud diri mawaay hin kampilan patok ha nasud, diri na man hira mag-aaram han away. Kondi hira an tagsatagsa nga tawo malingkod ha sirong han iya balagon han ubas ngan ha sirong han iya kahoy nga igera; ngan waray bisan hin-o nga maghahadlok ha ira: kay an baba ni Jehova han mga kasundalohan nagyakan hini.”
16, 17. Paonan-o natutuman yana nga panahon an Mika 4:1-4?
16 Hin-o an “damu nga katawohan” ngan an “magkusog nga mga nasud” nga gin-unabi dinhi? Diri hira an mga nasud ngan mga gobyerno hini nga kalibotan. Lugod, an tagna naaplikar ha mga indibiduwal tikang ha ngatanan nga mga nasud nga nagkakaurosa na yana ha baraan nga pag-alagad dida ha bukid han totoo nga pagsingba kan Jehova.
17 Uyon ha tagna ni Mika, an limpyo nga pagsingba kan Jehova ha diri mag-iiha pagbubuhaton na ha pinakabug-os nga sukol ha bug-os nga tuna. Yana nga panahon, an mga tawo nga “husto nga nahiuuyon para ha kinabuhi nga waray kataposan” gintututdoan ha mga paagi hi Jehova. (Buhat 13:48, NW) Hi Jehova naghuhukom ngan nagtatadong han mga butang ha espirituwal nga paagi para ha mga tumuroo nga nadapig ha Ginhadian. Maluluwas hira ha “daku nga kagol-anan” sugad nga bahin han ‘daku nga panon.’ (Pahayag 7:9, 14, NW) Tungod kay an ira mga kampilan ira na ginhimo nga mga arado, bisan yana mamurayawon nga nagkikinabuhi hira upod han mga igkasi-Saksi ni Jehova ngan han iba pa. Makalilipay gud nga makaupod hira!
Determinado nga Maglakat ha Ngaran ni Jehova
18. Ano an ginsisimbolohan han ‘paglingkod ha sirong han kalugaringon nga balagon han ubas ngan kahoy nga igera han usa’?
18 Ha aton panahon, nga an kahadlok nagtatabon ha tuna sugad hin nagtatarhog nga dampog, nalilipay kita nga damu an nahibabaro han mga paagi ni Jehova. Ginhahandom naton an panahon nga hirani na gud umabot nga an ngatanan han sugad nga mga mahigugmaon ha Dios diri la kay diri na mag-aaram hin away kondi malingkod liwat ha sirong han ira kalugaringon nga balagon han ubas ngan kahoy nga igera. An mga kahoy nga igera agsob nga igintatanom ha mga urubasan. (Lukas 13:6) An paglingkod ha sirong han kalugaringon nga balagon han ubas ngan kahoy nga igera han usa nagsisimbolo hin mamurayawon, mainuswagon, ngan may seguridad nga mga kahimtang. Bisan yana, an aton relasyon kan Jehova naghahatag ha aton hin mamurayawon nga hunahuna ngan espirituwal nga seguridad. Kon an sugad nga mga kahimtang naeksister na ilarom han pagmando han Ginhadian, diri na kita mahahadlok ngan magkakaada na kita hin bug-os nga seguridad.
19. Ano an kahulogan han paglakat ha ngaran ni Jehova?
19 Basi makarawat an pag-uyon ngan bendisyon han Dios, kinahanglan maglakat kita ha ngaran ni Jehova. Mapuwersa nga iginpapahayag ini ha Mika 4:5, diin an propeta nasiring: “An ngatanan nga katawohan maglalakat an tagsatagsa ha ngaran han iya dios; ngan kita maglalakat ha ngaran ni Jehova nga aton Dios ha kagihaponan [“kadayonan,” NW].” An paglakat ha ngaran ni Jehova diri nangangahulogan hin pagsiring la nga hiya an aton Dios. Nagkikinahanglan ito hin labaw pa kay ha aton pakigbahin ha Kristiano nga mga katirok ngan ha pagsangyaw-han-Ginhadian nga buruhaton, bisan kon importante liwat an sugad nga mga buruhaton. Kon naglalakat kita ha ngaran ni Jehova, dedikado kita ha iya ngan nangangalimbasog ha pag-alagad ha iya nga matinumanon tungod han bug-os-kalag nga gugma. (Mateo 22:37) Ngan sugad nga iya mga magsiringba, sigurado nga determinado kita nga maglakat ha ngaran ni Jehova nga aton Dios ha kadayonan.
20. Ano an igintagna ha Mika 4:6-13?
20 Alayon tagda yana an matagnaon nga mga pulong han Mika 4:6-13. An “anak nga babaye han Sion” magigin bihag “ngadto ha Babilonya.” Ito gud an nahitabo ha mga umurukoy ha Jerusalem han ikapito ka siglo A.K.P. Kondi, ipinapakita han tagna ni Mika nga may-ada nanhibilin nga pababalikon ha Juda, ngan ha pagpahiuli han Sion sisiguruhon ni Jehova nga mabubungkag an mga kaaway hito.
21, 22. Paonan-o natuman an Mika 5:2?
21 An iba nga makatirigamnan nga mga hitabo igintagna ha Mika kapitulo 5. Pananglitan, tigamni an ginsisiring ha Mika 5:2-4. Hi Mika nagtatagna nga an pinili-han-Dios nga Magmarando—usa nga ‘an gintikangan tikang pa ha kadaan nga mga panahon’—magtitikang ha Betlehem. Magmamando hiya sugad nga magbarantay “ha kusog ni Jehova.” Dugang pa, ini nga Magmarando magigin bantogan, diri la ha Israel, kondi ha “mga kataposan han tuna.” An iya pangirilal-an bangin makawurok ha kalibotan ha kabug-osan, kondi diri ito misteryo ha aton.
22 Hin-o an pinakaimportante nga persona nga natawo ha Betlehem? Ngan hin-o an magigin ‘bantogan tubtob ha mga kataposan han tuna’? Waray iba kondi an Mesias, hi Jesu-Kristo! Han hi Hadi Herodes nagpakiana ha punoan nga mga saserdote ngan ha mga eskriba kon diin matatawo an Mesias, hira binaton: “Ha Betlehem ha Judea.” Ira pa ngani ginkotar an mga pulong han Mika 5:2. (Mateo 2:3-6) An iba han ordinaryo nga mga tawo maaram liwat hini, kay an Juan 7:42 nagkukotar ha ira nga nasiring: “Waray ba an santos nga surat pagsiring, nga hi Jesus matikang ha katulinan ni David, ngan ha gutiay nga bungto ha Betlehem, diin taga-dida hi David?”
Totoo nga Karepresko Para ha Katawohan
23. Ano an nahitatabo na yana sugad nga katumanan han Mika 5:7?
23 An Mika 5:5-15 nag-uunabi han usa nga pagsulong han mga Asiryahanon nga makakaeksperyensya hin madaliay la nga kadaogan ngan nagsusumat nga ipapadapat han Dios an panimalos ha matinalapason nga mga nasud. An Mika 5:7 (NW) nagsasaad han pagpahiuli han mabinasulon nga mga Judio nga nanhibilin ngadto ha ira natawohan nga tuna, kondi ini nga mga pulong naaplikar liwat ha aton panahon. Hi Mika nasiring: “An mga salin ni Jakob magigin sugad hin tun-og tikang kan Jehova ha butnga han damu nga mga katawohan, sugad hin hura nga uran ha mga tanom.” Inin makaruruyag hinduro nga ilustrasyon ginagamit ha pagtagna nga an nanhibilin han espirituwal nga Jakob, o Israel, magigin usa nga bendisyon tikang ha Dios ngada ha katawohan. An ‘iba nga mga karnero’ ni Jesus, nga may-ada tunan-on nga paglaom, nalilipay ha pag-alagad nga kahiusa han moderno nga nanhibilin han “Israel han Dios,” nga nabulig ha pagparepresko ha iba ha espirituwal. (Juan 10:16; Galasia 6:16, NW; Sepania 3:9) May kalabotan hini, may-ada importante nga punto nga angay pamalandungon. Sugad nga mga parasamwak han Ginhadian, sadang pabilhan naton ngatanan an aton pribilehiyo ha pagdara han totoo nga karepresko ngadto ha iba.
24. Ano nga mga punto tikang ha Mika kapitulo 3 tubtob 5 an naruyagan mo?
24 Ano an imo hinbaroan tikang ha kapitulo 3 tubtob 5 han tagna ni Mika? Bangin an mga punto nga sugad hini: (1) An Dios naglalaom nga adton nangunguna ha iya katawohan magpapadapat han hustisya. (2) Diri babatunon ni Jehova an aton mga pag-ampo kon tinuyo nga nagbubuhat kita hin sala. (3) Matutuman la an sugo ha aton nga pagsangyaw kon parig-unon kita han Dios pinaagi han iya baraan nga espiritu. (4) Basi magpahimulos han pag-uyon han Dios, kinahanglan maglakat kita ha ngaran ni Jehova. (5) Sugad nga mga parasamwak han Ginhadian, sadang pabilhan naton an aton pribilehiyo ha pagdara han totoo nga karepresko ngadto ha katawohan. An iba nga mga punto bangin nahisilsil na ha imo hunahuna. Ano pa an aton mahibabaroan tikang hinin matagnaon nga libro han Biblia? An masunod nga artikulo mabulig ha aton nga mahibaroan an praktikal nga mga leksyon tikang ha ultimo nga duha nga kapitulo han nagpaparig-on-han-pagtoo nga tagna ni Mika.
Paonan-o Mo Babatunon?
• Ano an ginlalaoman han Dios ha mga nangunguna ha iya katawohan?
• Kay ano nga importante an pag-ampo ngan an baraan nga espiritu may kalabotan ha aton pag-alagad kan Jehova?
• Paonan-o an katawohan ‘naglalakat ha ngaran ni Jehova’?
[Mga Pakiana]
[Retrato ha pahina 15]
Maisasaysay mo ba an ilustrasyon ni Mika may kalabotan ha usa nga kaldero?
[Mga Retrato ha pahina 16]
Pariho kan Mika maisugon nga ginbubuhat naton an aton ministeryo