Kapitulo Bainte-uno

Nagkakaylap an Totoo nga Pagsingba ha Bug-os nga Kalibotan

Isaias 60:1-22

 1. Ano nga makapadasig nga mensahe an aada ha Isaias kapitulo 60?

 AN KAPITULO 60 han Isaias iginsurat sugad nga usa ka makabantad-ha-emosyon nga drama. Ha siyahan nga mga bersikulo, an aton atensyon gindadani han makabantad nga kahimtang. Sunod-sunod nga mga hitabo an nasunod dayon hini, nga nagdadara ha aton ngadto ha makabantad nga kataposan. Iginsasaysay han kapitulo pinaagi han matin-aw nga paghulagway an pagpahiuli han totoo nga pagsingba ha kadaan nga Jerusalem ngan an bug-os-kalibotan nga pagkaylap han totoo nga pagsingba yana. Dugang pa, ginpapabug-atan hito an waray-kataposan nga mga bendisyon nga nakaandam para ha ngatanan nga maunungon nga mga magsiringba han Dios. An tagsa ha aton mahimo magkaada hin bahin ha katumanan hinin makaruruyag gud nga bahin han tagna ni Isaias. Salit usisahon naton ito hin maopay.

Nasanag an Kapawa ha Kasisidman

 2. Ano an iginsugo ha babaye nga nahuyang ha kasisidman, ngan kay ano nga importante nga sundon dayon niya ito?

² Para ha usa nga babaye nga aada ha makasurubo nga mga kahimtang an siyahan nga mga pulong hini nga kapitulo han Isaias. Matin-aw nga nahuyang hiya ha tuna ha kasisidman. Tigda la nga nagsanag an kapawa ha kasisidman han hi Jehova, pinaagi kan Isaias, nagsinggit: “Bangon, [“O babaye,” NW] sanag, kay an imo kapawa inabot na, ngan an himaya ni Jehova binangon dida ha imo.” (Isaias 60:1) Oo, an simboliko nga “babaye” kinahanglan tumindog ngan magpakita han himaya han Dios! Kay ano nga apurado ini? An tagna nagpapadayon: “Kitaa, an kasisidman magpuputos han tuna, ngan an madakmol nga kasisidman han mga katawohan; kondi hi Jehova mabangon dida ha imo, ngan an iya himaya makikita dida ha imo.” (Isaias 60:2) Basi magpahimulos adton aada ha iya palibot nga aada pa gihapon ha kasisidman, an “babaye” kinahanglan ‘magpasanag han kapawa.’ Ano an magigin resulta? “An mga nasud makada ha imo kapawa, ngan an kahadian ngada ha kahayag han imo pagsirang.” (Isaias 60:3) Inin siyahan nga mga pulong naghahatag han punto han igsasaysay pa hin mas detalyado ha sunod nga mga bersikulo—an totoo nga pagsingba kinahanglan magin kaylap ha bug-os nga kalibotan!

 3. (a) Hin-o an “babaye”? (b) Kay ano nga an “babaye” nahuyang ha kasisidman?

³ Bisan kon nag-uunabi mahitungod han tidaraon nga mga hitabo, ginsusumatan ni Jehova an “babaye” nga an iya kapawa “inabot na.” Ginpapabug-atan hini an kasigurohan nga matutuman an tagna. An “babaye” nga gin-uunabi amo an Sion, o Jerusalem, an sentro han Juda. (Isaias 52:1, 2; 60:14) An siyudad nagrirepresentar han bug-os nga nasud. Durante han siyahan nga katumanan hini nga tagna, hinkit-an an “babaye” nga nahuyang ha kasisidman, nga iya hinmumutangan tikang pa han pagbungkaga han Jerusalem han 607 A.K.P. Kondi, han 537 A.K.P., an matinumanon nga nanhibilin han nabihag nga mga Judio binalik ha Jerusalem ngan nagpahiuli han putli nga pagsingba. Ha kataposan, ginpahinabo ni Jehova nga an kapawa sumanag ngada ha iya simboliko nga “babaye,” ngan an iya nakabalik nga katawohan nagin surok han kalamrag dida ha mga nasud nga madulom ha espirituwal.

Usa nga Mas Daku nga Katumanan

 4. Hin-o yana dinhi ha tuna an nagrirepresentar ha “babaye,” ngan kan kanay pa naaplikar an matagnaon nga mga pulong?

⁴ An aton interes hinin matagnaon nga mga pulong nalahos pa ha katumanan hito dida ha kadaan nga Jerusalem. Yana nga panahon, an langitnon nga “babaye” ni Jehova ginrirepresentaran dinhi ha tuna han “Israel han Dios.” (Galasia 6:16, NW) Durante han pag-eksister hito, tikang han Pentekostes 33 K.P. tubtob yana, inin espirituwal nga nasud may-ada na kadamu nga 144,000 nga dinihogan-han-espiritu nga mga membro, nga “mga gintubos tikang ha tuna” nga may paglaom nga maghadi kaupod ni Kristo ha langit. (Pahayag 14:1, 3) An moderno nga katumanan han Isaias kapitulo 60 nakasentro ha mga kaupod han 144,000 nga buhi pa ha tuna durante han “kataposan nga mga adlaw.” (2 Timoteo 3:1) An tagna nag-uunabi liwat mahitungod han mga kaupod hinin dinihogan nga mga Kristiano, an “daku nga panon” han ‘iba nga mga karnero.’—Pahayag 7:9, NW; Juan 10:11, 16.

 5. Kakan-o naeksperyensyahan han buhi pa nga mga membro han Israel han Dios nga nahuyang hira ha kasisidman, ngan kakan-o nagsanag ha ira an kapawa ni Jehova?

⁵ Sulod hin halipot nga panahon ha tinikangan han dekada han 1900, naeksperyensyahan han mga membro han Israel han Dios nga nakanhi pa ha tuna nga nahuyang hira ha kasisidman, siring pa. Natapos an siyahan nga girra ha kalibotan nga nakada hira ha kahimtang nga iginhuhulagway ha simboliko nga paagi ha libro nga Pahayag—an ira mga patay nga lawas nahuyang “didto ha mga dalan han dagku nga  bungto, nga ha espirituhanon ginngangaranan nga Sodoma ngan Ehipto.” (Pahayag 11:8) Kondi, han 1919, ginpasanag ni Jehova an iya kapawa dida ha ira. Ha pagbaton, nanindog hira ngan iginpasanag an kapawa han Dios, waray kahadlok nga iginpapasamwak an maopay nga sumat han Ginhadian han Dios.—Mateo 5:14-16; 24:14.

 6. Paonan-o an kalibotan ha kabug-osan ginios ha pagpasamwak mahitungod han hadianon nga presensya ni Jesus, kondi hin-o an gindadara ngada ha kalamrag ni Jehova?

⁶ Tungod kay naimpluwensyahan ni Satanas, nga punoan han “mga magburuot hini nga masirom nga kalibotan,” iginsalikway han katawohan ha kabug-osan an pahibaro mahitungod han hadianon nga presensya ni Jesu-Kristo, “an kalamrag han kalibotan.” (Efeso 6:12; Juan 8:12; 2 Korinto 4:3, 4) Kondi, minilyon an gindadara ngada ha kalamrag ni Jehova, upod na an “kahadian” (adton nagin dinihogan nga mga manurunod han langitnon nga Ginhadian) ngan an “mga nasud” (an daku nga panon han iba nga mga karnero).

An Pagkaylap Naghahatag hin Kinasingkasing nga Kalipay

 7. Ano nga makalilipay nga kiritaon an hinkit-an han “babaye”?

⁷ Ha paghan-ay han tema nga nakasurat ha Isaias 60:3, an “babaye” gintagan ni Jehova hin lain pa nga sugo: “Itan-aw an imo mga mata ha palibot, ngan kitaa!” Han sinugot an “babaye,” kinalasan hiya ha makalilipay nga kiritaon—tipauli na an iya mga anak! “Hira ngatanan nagtitirok, hira makada ha imo; an imo mga anak nga kalalakin-an maabot tikang ha kahigrayoan, ngan an imo mga anak nga kababayin-an pananad-on ha mga butkon.” (Isaias 60:4) An internasyonal nga pagpasamwak han Ginhadian nga nagtikang han 1919 nagresulta hin yinukot pa nga dinihogan nga “mga anak nga kalalakin-an” ngan “mga anak nga kababayin-an” nga nahidugang ha Israel han Dios. Hini nga paagi ginkompleto ni Jehova an igintagna nga kadamu nga 144,000, nga maghahadi kaupod ni Kristo.—Pahayag 5:9, 10.

 8. Ano an hinungdan han kalipay han Israel han Dios tikang pa han 1919?

⁸ Ini nga pagdamu nagin hinungdan han kalipay. “Hito [“nga panahon,” NW] ikaw makita ngan magmamasilaw, ngan an imo kasingkasing mangingibigkibig ngan madaku; tungod kay an kahuraan han dagat pakakadaon ha imo, an manggad han mga nasud makada ha imo.” (Isaias 60:5) An pagtirok ha mga dinihogan durante han mga dekada han 1920 ngan 1930 nagdara hin daku nga kalipay ha Israel han Dios. Kondi, may-ada pa hira dugang nga hinungdan han kalipay. Labi na tikang ha kabutngaan han dekada han 1930, an mga tawo nga kaupod hadto han “dagat” han katawohan nga nahibulag ha Dios nagkagawas tikang ha ngatanan nga mga nasud basi magsingba kaupod han Israel han Dios. (Isaias 57:20; Hagay 2:7) Ini nga mga tawo diri nag-aalagad ha Dios sumala ha ira kalugaringon nga paagi. Lugod, nadaop hira ha simboliko nga “babaye” han Dios ngan nagigin kaupod han nagkakaurosa nga panon han Dios. Sugad nga resulta, an ngatanan nga mga surugoon han Dios nagbuburublig ha pagpakaylap han totoo nga pagsingba.

An mga Nasud Nagkatirok ha Jerusalem

9, 10. Hin-o an hinkikit-an nga nagkakatirok ha Jerusalem, ngan paonan-o hira ginkarawat ni Jehova?

⁹ Pinaagi han paggamit hin mga ilustrasyon nga pamilyar ha mga tawo ha panahon ni Isaias, iginhulagway ni Jehova an pagkaylap. Samtang nagkikita tikang ha iya hinmumutangan ha Bukid Sion, ginkita anay han “babaye” an este nga dapit. Ano an iya nakita? “An kadam-an han mga kamelyo magpuputos ha imo, an mga mananap nga dagku ha Madia ngan ha Epa; ngatanan hira tikang ha Seba makanhi; hira magdadara hin bulawan ngan hin insenso, ngan magpapasangyaw han pagdayaw kan Jehova.” (Isaias 60:6) An panon han mga kamelyo nga ginagamit han nagbibiyahe nga mga negosyante tikang ha magkalainlain nga tribo nagkakalakat dida ha mga dalan tipakadto ha Jerusalem. (Genesis 37:25, 28; Hukom 6:1, 5; 1 Hadi 10:1, 2) An mga kamelyo nakikita ha bisan diin, pariho hin baha nga nakakatabon han tuna! Ini nga mga panon may dara nga birilhon nga mga regalo, nagpapakita nga pakigmurayaw an katuyoan han pagkadto han mga negosyante. Karuyag nira mag-alagad kan Jehova ngan hatagan hiya han pinakamaopay nga ira maihahatag.

¹⁰ Diri la ini nga mga negosyante an nagkakaabot. “An ngatanan nga panon han mga hayop ha Kedar—hira pagtitirukon ngada ha imo. An mga karnero nga lalaki ha Nebayot—mag-aalagad ha imo.” Oo, tipakadto liwat ha Jerusalem an mga tribo han mga paramangno han mga hayop. Nagkakaabot hira nga may dara nga mga regalo nga pinakaimportante nira nga mga panag-iya—mga panon han kakarnerohan—ngan iginpipresentar nira an ira kalugaringon sugad nga mga surugoon. Paonan-o hira kakarawaton ni Jehova? Hiya nagsiring: “Inuyonan nga masaka hira ha akon halaran, ngan akon patatahumon an akon balay nga matahom.” (Isaias 60:7, “NW”) Ginkarawat ni Jehova an ira mga regalo, nga gagamiton ha putli nga pagsingba.—Isaias 56:7; Jeremias 49:28, 29.

11, 12. (a) Ano nga kiritaon an nakapakalas ha “babaye” samtang nagkikita hiya ha weste nga dapit? (b) Kay ano nga damu hinduro an nagdadagmit tipakadto ha Jerusalem?

¹¹ Ginsugo yana ni Jehova an “babaye” nga magkita ha weste nga dapit, ngan hiya nagpakiana: “Hin-o ini nga nanlulupad pariho hin dampog, ngan sugad hin mga sarapati ha ira mga tamboanan?” Hi Jehova mismo binaton: “Ha waray ruhaduha an mga puro maghuhulat ha akon, ngan siyahan an mga sakayan han Tarsis, ha pagdara han imo mga anak nga kalalakin-an tikang ha kahigrayoan, an ira salapi ngan an ira bulawan dara nira tungod han ngaran ni Jehova an imo Dios, ngan tungod han Baraan nga Usa han Israel, tungod kay hiya naghimaya ha imo.”—Isaias 60:8, 9.

¹² Handurawa nga natindog ka ha sapit han “babaye,” nagkikita ha weste ha tabok han Daku nga Dagat. Ano an imo nakikita? An hirayo nga dampog han busag nga mga tuldok nga igin-aanod-anod ha igbaw han tubig. Sugad ito  hin mga tamsi pagkit-on, kondi samtang nagtitikahirani ito, nakikita mo nga mga barko ito nga nakabuklad an mga layag. Nagkakaabot ito “tikang ha kahigrayoan.” a (Isaias 49:12) Damu hinduro nga mga sarakyan ha dagat an malaksi nga nagtitipakadto ha Sion salit sugad hira hin usa ka panon han tipauli nga mga sarapati. Kay ano nga nagdadagmit hin sugad hito an grupo han mga barko? Nagdadagmit ito ha pagdul-ong han mga sakay hito nga mga magsiringba ni Jehova tikang ha higrayo nga mga pantalan. Oo, an ngatanan nga bag-o la nga nagkakaabot—mga Israelita ngan mga dumuruong, tikang ha este o ha weste ngan tikang ha kahirani o ha hirayo nga mga lugar—nagdadagmit pakadto ha Jerusalem basi ipahinungod an ira kalugaringon ngan an ngatanan nga aada ha ira ngadto ha ngaran ni Jehova, an ira Dios.—Isaias 55:5.

13. Ha moderno nga mga panahon, hin-o an “mga anak nga kalalakin-an” ngan “mga anak nga kababayin-an,” ngan hin-o an mga “manggad han mga nasud”?

¹³ Matin-aw gud an paghulagway han Isaias 60:4-9 mahitungod han bug-os-kalibotan nga pagkaylap nga nahitatabo tikang pa han nagtikang an “babaye” ha pagpasanag han kalamrag ngada ha kasisidman hinin kalibotan! Siyahan nga inabot an “mga anak nga kalalakin-an” ngan “mga anak nga kababayin-an” han langitnon nga Sion, adton nagin dinihogan nga mga Kristiano. Han 1931 nagpakilala hira ha publiko sugad nga mga Saksi ni Jehova. Pagkatapos, an usa nga dampog han mga maaghop, “an manggad han mga nasud” ngan “an kahuraan han dagat,” nagdagmit ha pag-upod ha nanhibilin nga kabugtoan ni Kristo. b Yana, ini ngatanan nga mga surugoon ni Jehova tikang ha magkalainlain nga dapit han kalibotan ngan tikang ha ngatanan nga kahimtang ha kinabuhi naupod ha Israel han Dios ha pagdayaw ha ira Soberano nga Ginoo, hi Jehova, ngan ha pagpasidungog ha iya ngaran sugad nga an gihitaasi nga ngaran ha bug-os nga uniberso.

14. Ha ano nga paagi ‘nasaka ha halaran han Dios’ an bag-o nga nagkakaabot?

¹⁴ Kondi, ano an karuyag ipasabot nga inin bag-o nga mga nagkakaabot tikang ha mga nasud ‘nasaka ha halaran han Dios’? Usa nga halad an iginbutang dida ha halaran. Ginamit ni apostol Pablo an ekspresyon nga nag-uunabi hin halad han hiya nagsurat: “Nanginginyupo ako ha iyo . . . nga ighalad niyo an iyo mga lawas sugad han buhi nga halad, maputli, karuruyagon ha Dios, nga amo an iyo espirituhanon nga pag-alagad [“baraan nga pag-alagad upod an iyo abilidad ha pangatadongan,” NW].” (Roma 12:1) Andam ihatag han totoo nga mga Kristiano an ira kalugaringon. (Lukas 9:23, 24) Ira ginagamit an ira panahon, kusog, ngan mga abilidad para ha pagpauswag han putli nga pagsingba. (Roma 6:13) Ha pagbuhat hito, naghahalad hira hin kinakarawat nga mga halad han pagdayaw ha Dios. (Hebreo 13:15) Makapadasig gud nga mas inuuna han minilyon nga mga magsiringba ni Jehova yana, nga batan-on ngan lagas, an mga interes han Ginhadian han Dios kay han ira kalugaringon nga mga hingyap! Nagpapakita hira hin totoo nga espiritu han pagsakripisyo ha kalugaringon.—Mateo 6:33; 2 Korinto 5:15.

An Bag-o nga mga Nagkakaabot Nabulig ha Pagpakaylap

15. (a) Ha kadaan nga mga panahon, paonan-o iginpahayag an kalooy ni Jehova may kalabotan ha mga dumuruong? (b) Ha moderno nga mga panahon, paonan-o nabulig an “mga dumuruong” ha pagparig-on han totoo nga pagsingba?

¹⁵ An bag-o nga mga nagkakaabot naghahatag han ira mga panag-iya ngan han ira personal nga mga serbisyo ha pagsuporta ha simboliko nga “babaye” ni Jehova. “An mga dumuruong magtutukod han imo mga kuta, ngan an ira kahadian mag-aalagad ha imo kay ha akon kapungot akon ka hinampak, kondi ha akon pagdapig ako nalooy ha imo.” (Isaias 60:10) Iginpahayag an kalooy ni Jehova ha ikaunom ka siglo A.K.P. han an mga dumuruong binulig ha pagtukod nga buruhaton ha Jerusalem. (Esra 3:7; Nehemia 3:26) Ha mas daku nga katumanan yana, an “mga dumuruong,” an daku nga panon, nasuporta ha nanhibilin nga mga dinihogan ha pagparig-on han totoo nga pagsingba. Nabulig hira ha pagpatubo han Kristiano nga mga kalidad ha ira mga gindudumarahan hin pag-aram ha Biblia ngan hito nga paagi ira ginpaparig-on an Kristiano nga mga kongregasyon ngan an “mga kuta” han sugad-siyudad nga organisasyon ni Jehova. (1 Korinto 3:10-15) Nagtutukod liwat hira ha literal nga paagi, mauyatom nga nagtatrabaho ha pagtukod hin mga Kingdom Hall, mga Assembly Hall, ngan mga pasilidad han Bethel. Ha sugad nga paagi nabulig hira ha ira dinihogan nga kabugtoan ha pagmangno han mga panginahanglan han nagtitikadaku nga organisasyon ni Jehova.—Isaias 61:5.

16, 17. (a) Paonan-o nagpapabilin nga abrido an “mga ganghaan” han organisasyon han Dios? (b) Paonan-o an “kahadian” nagsiserbisyo ha Sion? (c) Ano an mahitatabo hadton nangangalimbasog ha pagsara han “mga ganghaan” nga karuyag ni Jehova nga magpabilin nga abrido?

¹⁶ Sugad nga resulta han programa han espirituwal nga pagtukod, kada tuig ginatos ka yukot nga “mga dumuruong” an nagtitikang pag-upod ha organisasyon ni Jehova, ngan abrido pa gihapon an dalan para ha damu pa. Hi Jehova nasiring: “An imo mga ganghaan liwat aabrihan ha dayoday; diri hira sasadhan ha adlaw o ha gab-i; nga an mga tawo makagdara ngada ha imo han manggad han mga nasud, ngan an ira kahadian nga gindadara nga bihag.” (Isaias 60:11) Kondi, hin-o an “kahadian” nga nangunguna ha pagdara han mga manggad han mga nasud ngadto ha Sion? Ha kadaan nga mga panahon, ginpagios ni Jehova an mga kasingkasing han pipira nga mga magmarando basi ‘mag-alagad’ ha Sion. Pananglitan, hi  Ciro an nanguna ha pagpabalik ha mga Judio ngadto ha Jerusalem basi tukuron utro an templo. Ha urhi, hi Artaherhes naghatag hin mga manggad ngan nagsugo kan Nehemia ha pagtukod utro han mga pader han Jerusalem. (Esra 1:2, 3; Nehemia 2:1-8) Tinuod nga “an kanan hadi kasingkasing aada ha kamot ni Jehova sugad han mga agianan han tubig.” (Proberbios 21:1) Mahimo pa ngani pagiuson han aton Dios an gamhanan nga mga magmarando uyon ha iya kaburut-on.

¹⁷ Ha moderno nga mga panahon damu nga “kahadian,” o sekular nga mga awtoridad, an nangangalimbasog ha pagsara han “mga ganghaan” han organisasyon ni Jehova. Kondi, an iba nagsiserbisyo ha Sion pinaagi ha paghimo hin mga desisyon nga nakabulig basi magpabilin nga abrido ito nga “mga ganghaan.” (Roma 13:4) Han 1919, hi Joseph F. Rutherford ngan an iya mga kaupod ginpagawas han sekular nga mga awtoridad tikang ha waray-hustisya nga kapriso. (Pahayag 11:13) “Gintulon” han mga gobyerno han tawo an baha han pagtimaraot nga ginbuhian ni Satanas katapos han paghuloga ha iya tikang ha langit. (Pahayag 12:16) Igin-aaghat han iba nga mga gobyerno an kagawasan han relihiyon, usahay espisipiko nga para ha mga Saksi ni Jehova. Ini nga klase hin serbisyo mas nakakapasayon para ha damu hinduro nga mga maaghop nga makaagi ha abrido nga “mga ganghaan” pakadto ha organisasyon ni Jehova. Ngan kumusta man an mga parakontra nga nangangalimbasog ha pagsara hito nga “mga ganghaan”? Diri gud hira maglalampos. Mahitungod ha ira, hi Jehova nagsiring: “Adton nasud ngan ginhadian nga diri mag-alagad ha imo mahahanaw, oo, adto nga mga nasud paglalaglagon hin tinuod.” (Isaias 60:12) An ngatanan nga nakikig-away kontra ha simboliko nga “babaye” han Dios—mga indibiduwal man hira o mga organisasyon—mahahanaw durante o antes pa ha tiarabot nga girra ha Armagedon.—Pahayag 16:14, 16.

18. (a) Ano an kahulogan han saad nga an mga kahoy magigin marampag ha Israel? (b) Ano an ‘lugar han mga tiil ni Jehova’ yana nga panahon?

¹⁸ Katapos hini nga pahamangno mahitungod han paghukom, an tagna binalik ha mga saad mahitungod han pagpasidungog ngan kahuraan. Ha pakiistorya ha iya simboliko nga “babaye,” hi Jehova nasiring: “An himaya han Libano maabot ha imo, ngatanan an kahoy nga abeto, an pino, ngan an kahoy nga alamos, ha paghimo nga maanyag nga lugar han akon santuaryo, ngan akon hihimoon an lugar han akon mga tiil nga mahimayaon.” (Isaias 60:13) An marampag nga mga kahoy nagsisimbolo hin kaanyag ngan pagkamabungahon. (Isaias 41:19; 55:13) An mga pulong nga “santuaryo” ngan “lugar han akon mga tiil” dinhi hini nga bersikulo nagtutudlok ha templo han Jerusalem. (1 Kronikas 28:2; Salmo 99:5) Kondi, iginpatin-aw ni apostol Pablo nga an templo ha Jerusalem amo an simboliko nga representasyon nga nagpapadagaw han mas daku nga espirituwal nga templo, an kahikayan ha pagdaop kan Jehova ha pagsingba basado ha halad ni Kristo. (Hebreo 8:1-5; 9:2-10, 23) Yana nga panahon ginhihimaya ni Jehova an ‘lugar han iya mga tiil,’ an tunan-on nga mga bungsaran han iya daku nga espirituwal nga templo. Nagigin makaruruyag ito hinduro salit nakakadani ito ha mga tawo tikang ha ngatanan nga mga nasud nga umupod ha totoo nga pagsingba dida.—Isaias 2:1-4; Hagay 2:7.

19. Mapipiritan an mga parakontra nga kilalahon an ano, ngan san-o nira ini pagbubuhaton?

¹⁹ Samtang iginbabalik niya yana an iya atensyon ha mga parakontra, hi Jehova nagsiring: “An mga anak nira hadto nga nagsakit ha imo makada nga maduko ngada ha imo; ngan ngatanan hira nga nagtamay ha imo maduko ngada ha mga rapadapa han imo mga tiil; ngan ira ka tatawagon nga an bungto [“siyudad,” NW] ni Jehova, an Sion han Baraan nga Usa ha Israel.” (Isaias 60:14) Oo, ha pakakita han madagmit nga pagdamu ngan han maopay nga paagi han pagkinabuhi nga gindadara han mga bendisyon han Dios ngada ha iya katawohan, mapipiritan an iba nga mga parakontra ha pagyukbo ngan pagtawag ha “babaye.” Karuyag sidngon, mapipiritan hira ha pagkilala—durante o antes pa han Armagedon—nga an nanhibilin nga mga dinihogan ngan an ira mga kaupod tinuod nga nagrirepresentar ha langitnon nga organisasyon han Dios, ‘an siyudad ni Jehova, an Sion han Baraan han Israel.’

Paggamit han Makukuha nga mga Manggad

20. Ano nga daku nga pagbag-o han mga kahimtang an naeksperyensyahan han “babaye”?

²⁰ Daku gud nga pagbag-o han mga kahimtang an naieksperyensyahan han simboliko nga “babaye” ni Jehova! Hi Jehova nagsiring: “Tungod kay ikaw binayaan ngan ikinangalas, ha pagkaagi nga waray tawo nga nag-agi dida ha imo, akon ka hihimoon nga minahal [“usa nga butang nga igpapasigarbo,” NW] ha waray kataposan, kahimongayaan han kadam-an nga lito. Ikaw liwat magsusupsop han gatas han mga nasud, ngan magsusupsop han dughan han kahadian; ngan ikaw makilala nga ako, [hi ] Jehova, ako an imo Manluluwas, ngan imo Manunubos, an Makagarahum nga Usa ni Jakob.”—Isaias 60:15, 16.

21. (a) Paonan-o an kadaan nga Jerusalem nagin “usa nga butang nga igpapasigarbo”? (b) Ano nga mga bendisyon an ginpapahimulsan han dinihogan nga mga surugoon ni Jehova tikang pa han 1919, ngan paonan-o hira nagsusupsop “han gatas han mga nasud”?

²¹ Ha sulod hin 70 ka tuig an kadaan nga Jerusalem nawara ha mapa, siring pa, kay “waray tawo nga nag-agi dida.” Kondi tikang han 537 A.K.P., an siyudad ginpaukyan utro ni Jehova, ginhimo ito nga magin “usa nga butang nga igpapasigarbo.” Ha pariho nga kaagi, ha ikatarapos han siyahan nga girra ha kalibotan, an Israel han Dios nakaeksperyensya hin usa ka panahon han pagkabinayaan nga durante hito ira inabat nga “binayaan” na hira. Kondi han 1919, ginlukat ni Jehova an iya dinihogan nga mga surugoon tikang ha pagkabihag, ngan tikang hito nga panahon iya ginbendisyonan hira hin waray-kapariho nga pagkaylap ngan kahuraan ha espirituwal. An iya katawohan nagsusupsop han “gatas han mga nasud,” ginagamit an materyal nga mga manggad tikang ha mga nasud para ha pagpauswag han totoo nga pagsingba. Pananglitan, pinaagi han maaramon nga paggamit han moderno nga teknolohiya, nagin posible an paghubad  ngan pagpublikar han mga Biblia ngan mga literatura ha Biblia ha ginatos nga yinaknan. Sugad nga resulta, ginatos ka yukot kada tuig an nag-aaram ha Biblia kaupod han mga Saksi ni Jehova ngan nahibabaro nga hi Jehova, pinaagi kan Kristo, amo an ira Manluluwas ngan Manlulukat.—Buhat 5:31; 1 Juan 4:14.

Pag-uswag han Organisasyon

22. Ano nga espesyal nga klase hin pag-uswag an iginsasaad ni Jehova?

²² An pagdugang han kadamu han katawohan ni Jehova kadungan ha pag-uswag han organisasyon. Hi Jehova nagsiring: “Para han tumbaga magdadara ako hin bulawan, ngan para han puthaw magdadara ako hin salapi, ngan para han kahoy tumbaga, ngan para han mga bato, puthaw. Akon liwat papapagdaiton an imo mga punoan, ngan papapagmatadungon an imo mga manurukot.” (Isaias 60:17) Usa nga pag-uswag an pagsaliwani han tumbaga hin bulawan, ngan totoo liwat ini ha iba pa nga materyales nga gin-unabi dinhi. Uyon hini, an katawohan ni Jehova nakakaeksperyensya hin pinauswag nga mga kahikayan ha organisasyon durante hinin kataposan nga mga adlaw.

23, 24. Ano nga pinauswag nga mga kahikayan ha organisasyon an naieksperyensyahan han katawohan ni Jehova tikang pa han 1919?

²³ Pag-abot han 1919, an mga kongregasyon nagkaada hin mga tigurang ngan mga diakono nga ginpili ha demokratiko nga paagi. Tikang hito nga tuig, nagpili ha teokratiko nga paagi hin usa nga direktor ha pag-alagad basi magmangno ha mga buruhaton han kongregasyon ha pag-alagad ha kanataran, kondi nagkaada mga kahimtang nga an iba han ginpili nga mga tigurang kinontra ha direktor ha pag-alagad. Han 1932, nagkaada mga pagbag-o. Pinaagi han magasin nga Watchtower, gintagan hin instruksyon an mga kongregasyon nga diri na magpili hin mga tigurang ngan mga diakono. Lugod, magpipili hira hin komite ha pag-alagad nga magtatrabaho kaupod han direktor ha pag-alagad. Daku ito nga pag-uswag.

²⁴ Han 1938, mas damu pa nga “bulawan” an gindara han nagin establisado na nga an ngatanan nga mga surugoon ha kongregasyon pipilion ha teokratiko nga paagi. An pagdumara ha kongregasyon nagin responsabilidad han usa nga company servant (ha urhi, surugoon han kongregasyon) ngan han iba pa nga mga surugoon nga nabulig ha iya, nga hira ngatanan pinili ilarom ha pagdumara han “matinumanon ngan maaramon nga uripon.” c (Mateo 24:45-47, NW) Kondi, han 1972, nasabtan nga an Kasuratanhon nga paagi ha pagdumara ha usa nga kongregasyon amo an pinaagi han usa nga grupo han mga tigurang imbes nga pinaagi han usa nga tawo. (Filipos 1:1) Ginhimo an iba pa nga mga pagbag-o ha kongregasyon ngan ha Nagmamando nga Lawas. Nakita an usa nga ehemplo han pagbag-o han Nagmamando nga Lawas han Oktubre 7, 2000, han igin-anunsyo nga an mga membro han Nagmamando nga Lawas nga nag-aalagad sugad nga mga direktor han Watch Tower Society of Pennsylvania ngan han kaupod hito nga mga korporasyon kinaburut-on nga nagtubyan han ira mga katungdanan. Ha sugad hini nga paagi, mas nahahatagan hin atensyon han Nagmamando nga Lawas, nga nagrirepresentar han matinumanon ngan maaramon nga uripon, an pagmangno ha espirituwalidad han “kongregasyon han Dios” ngan ha mga kaupod hito, an iba nga mga karnero. (Buhat 20:28, NW) Ito ngatanan nga mga kahikayan nagpapakita hin mga pag-uswag. Nagpaparig-on ito ha organisasyon ni Jehova ngan nagbibendisyon ha iya mga magsiringba.

25. Hin-o an nagpapahinabo han pag-uswag han organisasyon han katawohan ni Jehova, ngan nag-aani hira hin ano nga mga kapulsanan?

²⁵ Hin-o an nagpapahinabo hini nga mga pag-uswag? Tungod ba ito ha kaabtik ha pag-organisa o ha kamaopay maghunahuna han pipira nga mga tawo? Diri, tungod kay hi Jehova nagsiring: “Magdadara ako hin bulawan.” Ini ngatanan nga pag-uswag amo an resulta han paggiya han Dios. Tubtob nga nasunod an katawohan ni Jehova ha iya giya ngan naghihimo hin mga pagbag-o, nag-aani hira han mga kapulsanan. May-ada hira kamurayawan, ngan an gugma ha katadongan nagpapagios ha ira nga mag-alagad ha iya.

26. Ano an tigaman han totoo nga mga Kristiano nga nakikita bisan han mga parakontra?

²⁶ An hatag-han-Dios nga kamurayawan nagriresulta hin mga pagbag-o. Hi Jehova nagsaad: “An pagpungka diri na hibabatian dida ha imo tuna, an pagkalaglag o an pagkagunaw ha sulod han imo mga pag-ultan; kondi imo tatawagon an imo mga kuta nga Kaluwasan, ngan an imo mga ganghaan nga Pagdayaw.” (Isaias 60:18) Totoo gud ito! Bisan an mga parakontra nakarawat nga an pagin mamurayawon usa nga makatirigamnan nga pangirilal-an han totoo nga mga Kristiano. (Mika 4:3) Ini nga pakigmurayaw ha Dios ngan dida mismo ha mga Saksi ni Jehova nakakahimo han tagsa nga katirokan han mga Kristiano nga magin nakakarepresko nga lugar ha mabangis nga kalibotan. (1 Pedro 2:17) Abanse ito nga pakaeksperyensya han hura nga kamurayawan nga maeksister kon an ngatanan nga mga umurukoy han tuna magin “mga tawo nga natutdoan ni Jehova.”—Isaias 11:9; 54:13, NW.

An Mahimayaon nga Kalamrag han Pag-uyon han Dios

27. Ano nga nagpapadayon nga suga an naglalamrag ha simboliko nga “babaye” ni Jehova?

²⁷ Iginhuhulagway ni Jehova kon mationan-o kapawa an kalamrag nga nasanag ngada ha Jerusalem han hiya nagsiring: “An adlaw diri na maaamo an imo suga ha adlaw; diri man para ha kahayag mahatag ha imo an bulan hin kapawa: kondi hi Jehova maaamo para ha imo an dayon nga suga, ngan an imo Dios imo himaya. An imo adlaw diri na matutunod, diri man an imo bulan magdudulom; kay hi Jehova maiimo suga nga dayon, ngan an mga adlaw han imo pagkamasurub-on matatapos.” (Isaias 60:19, 20) Magpapadayon hi Jehova ha pagin “suga nga dayon” para ha iya simboliko nga “babaye.” Diri gud hiya “matutunod” sugad han adlaw o “magdudulom” sugad han  bulan. d An iya nagpapadayon nga kalamrag han pag-uyon nasanag ha dinihogan nga mga Kristiano, an tawhanon nga mga representante han simboliko nga “babaye” han Dios. Kaupod han daku nga panon, nagpapahimulos hira han sugad nga sanag han espirituwal nga kalamrag salit waray kasisidman dida ha politika o ekonomiya hini nga kalibotan nga makakaiban hito. Ngan naglalaom hira han malamrag nga tidaraon nga igin-andam ni Jehova para ha ira.—Roma 2:7; Pahayag 21:3-5.

28. (a) Ano an iginsaad mahitungod han binalik nga mga umurukoy han Jerusalem? (b) Ano an gintag-iya han dinihogan nga mga Kristiano han 1919? (c) Mationan-o kaiha pagtatag-iyahon han mga magtadong an tuna?

²⁸ Mahitungod han mga umurukoy han Jerusalem, hi Jehova padayon nga nagsiring: “An imo liwat katawohan magigin matadong ngatanan; hira manununod han tuna ha kadayonan, an sanga han akon tinanom, an buhat han akon mga kamot, nga ako paghimayaon.” (Isaias 60:21) Han an natural nga Israel nakabalik tikang ha Babilonya, ira ‘pinanunod an tuna.’ Kondi hito nga kahimtang, an tubtob ha “kadayonan” nagin tubtob la han siyahan nga siglo K.P. han an Jerusalem ngan an Judio nga estado ginbungkag han kasundalohan han Roma. Han 1919 an nanhibilin han dinihogan nga mga Kristiano nakagawas tikang ha espirituwal nga kabihag ngan nagtag-iya hin espirituwal nga tuna. (Isaias 66:8) Nakikita dinhi hini nga tuna, o lugar han buruhaton, an sugad-paraiso nga espirituwal nga kahuraan nga diri mawawara. Diri pariho han kadaan nga Israel, an espirituwal nga Israel sugad nga usa nga grupo diri gud maglilingo. Dugang pa, an tagna ni Isaias magkakaada liwat pisikal nga katumanan kon an tuna magin literal nga paraiso na nga may-ada “kahuraan han kamurayaw.” Hito nga panahon, an magtadong nga may-ada tunan-on nga paglaom magtatag-iya han tuna ha kadayonan.—Salmo 37:11, 29.

29, 30. Paonan-o an “usa nga gutiayay” nagin “usa ka yukot”?

²⁹ Ha kataposan han Isaias kapitulo 60 mababasa an sinsero nga saad, nga ginagarantiyahan ni Jehova pinaagi han iya mismo ngaran. Hiya nagsiring: “An usa nga gutiayay mahihimo nga usa ka yukot, ngan an usa nga gutiay usa nga nasud nga makusog: ako, hi Jehova, mag-iikag hini ha iya panahon.” (Isaias 60:22) Han an nagpatlaag nga mga dinihogan nakabalik na ha buruhaton han 1919, hira amo an “usa nga gutiayay.” e Kondi nagtikadamu hira samtang gintitirok an nabibilin pa nga espirituwal nga mga Israelita. Ngan an pagdamu nagin makatirigamnan gud samtang nagpapadayon an pagtirok han daku nga panon.

³⁰ Waray pag-iha, an kamurayawan ngan katadongan nga naeksister dida ha katawohan han Dios nakadani ha damu hinduro nga mga tawo nga tangkod an kasingkasing salit “an usa nga gutiayay” literal nga nagtubo ngadto ha pagin “usa nga nasud nga makusog.” Yana nga panahon mas daku pa an populasyon hito kay ha damu nga independente nga mga estado ha kalibotan. Matin-aw nga pinaagi kan Jesu-Kristo, ginigiyahan ni Jehova an buruhaton han Ginhadian ngan ginpapadagmit niya ito. Makalilipay gud kitaon an bug-os-kalibotan nga pag-uswag han totoo nga pagsingba ngan an pagin bahin hito! Oo, nakakalipay gud hibaroan nga ini nga pag-uswag naghahatag hin himaya kan Jehova, nga nagtagna hini nga mga butang maiha na nga panahon an naglabay.

[Mga footnote]

[Mga Pakiana]