Mga Pakiana Tikang ha mga Magbarasa

Kon an usa nga Kristiano baga hin nakakabati hin mga tingog, nangangahulogan ba dayon ito nga gin-aatake hiya hin demonyo?

Diri. Bisan kon an mga demonyo iginsumat na nga nagpapaabat ha sugad hito nga paagi, damu nga mga indibiduwal nga nakakabati hin mga tingog o nakakaeksperyensya hin iba nga diri-maisaysay, nakakawurok nga mga pag-abat an nahibaro nga may-ada hira problema ha pisikal han gin-eksamin hira han doktor.

Bisan ha siyahan nga siglo, matin-aw nga ginkilala nga an mga pag-atake hin demonyo ngan an mga kahimtang ha pisikal usahay may-ada pariho nga mga epekto. Ha Mateo 17:14-18, mababasa naton an mahitungod han usa nga olitawohay nga gintambal ni Jesus. Bisan kon an olitawohay may-ada grabe nga mga sintomas han pagin epileptiko, an iya pag-antos ha pagkatinuod ginpahinabo han usa nga demonyo. Kondi, ha nauna nga okasyon han an damu nga nag-aantos nga mga tawo gindara kan Jesus basi tambalon, kaupod hini an pipira nga mga “sinudlan hin demonyo ngan mga epileptiko.” (Mateo 4:24, NW) Matin-aw, ginkilala nga an iba nga mga epileptiko diri sinudlan hin demonyo. Pisikal an ira mga problema.

Iginrireport nga an iba nga nag-aantos hin schizophrenia, usa nga sakit nga agsob nga natatambal pinaagi han medisina, nakakabati hin mga tingog o nakakaeksperyensya hin iba nga mga sintomas nga baga hin misteryoso. a An iba nga mga kahimtang ha pisikal mahimo liwat magin hinungdan han kagupong han panhunahuna nga posible nga hunahunaon hin sayop han iba nga ginpahinabo ito han mga demonyo. Salit, bisan kon an usa nga indibiduwal nga nasiring nga nakakabati hiya hin mga tingog o may-ada iba nga nakakawurok nga mga pag-abat mahimo maghunahuna han posibilidad han pag-atake hin demonyo, sadang gud hiya dasigon nga usisahon kon maisasaysay ba han mediko an iya naieksperyensyahan.

[Footnote]