Kapitulo Disinoybe

Iginbuhayhag an Pagkasalingkapaw!

Isaias 58:1-14

 1. Paonan-o ginhuhunahuna ni Jesus ngan ni Jehova an pagkasalingkapaw, ngan ha ano nga paagi ito nahitabo ha panahon ni Isaias?

 “HA GAWAS, matadong [kamo] kitaon ha mga tawo,” nagsiring hi Jesus ha mga lider han relihiyon ha iya panahon, “kondi ha sulod puno kamo hin pagkasalingkapaw ngan karaotan.” (Mateo 23:28, NW) Ipinapakita ha pagkondenar ni Jesus ha pagkasalingkapaw an punto-de-bista han iya langitnon nga Amay. An kapitulo 58 han tagna ni Isaias nakasentro labi na ha pagkasalingkapaw nga kalyap ha Juda. Ordinaryo na la an araway, panalumpigos, ngan kamadarahog, ngan an pagsaurog han Sabbath nagin usa na la nga rituwal nga waray pulos. An mga tawo diri-kinasingkasing nga nag-aalagad kan Jehova ngan nagpapasigarbo hin pakita la nga pagkamakidios pinaagi han diri-sinsero nga pagpuasa. Diri urusahon nga iginbuhayhag ni Jehova kon ano hira nga klase hin mga tawo!

‘Pag-asoyi an Katawohan han Ira mga Sala’

 2. Ano nga espiritu an ipinakita ni Isaias samtang iginpapahayag niya an mensahe ni Jehova, ngan hin-o yana nga panahon an pariho ha iya?

² Bisan kon nangalas hi Jehova ha paggawi han Juda, an Iya mga pulong nag-uupod hin kinasingkasing nga panginyupo ha nasud nga magbasol. Kondi, diri karuyag ni Jehova nga an iya pagsaway magin diri matin-aw. Salit, iya ginsugo hi Isaias: “Singgit ha daku, ayaw pagpugong, alsaha an imo tingog sugad hin usa nga trumpeta, ngan pag-asoyi an akon katawohan han ira pagtalapas, ngan an balay ni Jakob han ira mga sala.” (Isaias 58:1) Tungod han maisugon nga pagpasamwak han mga pulong ni Jehova bangin masina an mga tawo kan Isaias, kondi waray hiya umisol. May-ada pa gihapon hiya espiritu han pagin dedikado nga iya ipinakita han hiya nagsiring: “Iini ako; pakadtoa ako.” (Isaias 6:8) Maopay gud hi Isaias nga susbaranan han pagpailob para ha mga Saksi ni Jehova yana nga panahon, nga ginsusugo liwat ha pagpasamwak han Pulong han Dios ngan pagbuhayhag han pagkasalingkapaw ha relihiyon!—Salmo 118:6; 2 Timoteo 4:1-5.

3, 4. (a) Ano nga pagkasalingkapaw an ginbuhat han mga tawo ha panahon ni Isaias? (b) Ano an tinuod nga kahimtang ha Juda?

³ Ginbibiling hi Jehova han mga tawo ha panahon ni Isaias ngan nagpapahayag hira hin kalipay ha iya matadong nga mga paghukom ha salingkapaw la nga paagi. Mababasa naton an mga pulong ni Jehova: “Hira nangingita ha akon ha adlaw-adlaw, ngan nalilipay ha paghibaro han akon mga paagi: sugad hin usa nga nasud nga nagbuhat hin pagkamatadong, ngan waray baya han lagda [“hustisya,” NW] han ira Dios, hira nangaro tikang ha akon hin matadong nga mga paghukom: hira malipay ha paghirani ha Dios.” (Isaias 58:2) Kinasingkasing gud ba ini nga pag-angkon hin kalipay ha mga paagi ni Jehova? Diri. Hira “sugad hin usa nga nasud nga nagbuhat hin pagkamatadong,” kondi an pagkapariho ha gawas la. Ha pagkamatuod, ini nga nasud ‘binaya ha hustisya han ira Dios.’

⁴ An kahimtang pariho gud han iginpahayag ha urhi kan propeta Esekiel. Ginsumatan ni Jehova hi Esekiel nga an mga Judio nagsiring ha usa kag usa: “Pakadi kamo, alayon, ngan pamatii an pulong nga tikang kan Jehova.” Kondi ginpahamangnoan han Dios hi Esekiel mahitungod han ira pagin diri sinsero: “Hira makada ha imo, . . . ngan sigurado nga mamamati hira han imo mga pulong kondi diri nira bubuhaton ito, kay pinaagi han ira baba nagpapahayag hira hin malaw-ay nga mga hingyap ngan an ira kasingkasing nagtitinguha han ira diri-matadong nga ganansya. Ngan, kitaa! para ha ira ikaw sugad hin usa nga kanta mahitungod han unudnon nga gugma, sugad hin usa nga may makaruruyag nga tingog ngan maopay magtokar hin may-kuwerdas nga paturunggon. Ngan sigurado nga mamamati hira han imo mga pulong, kondi waray usa nga nagbubuhat hito.” (Esekiel 33:30-32, NW) Nag-aangkon liwat an mga kadungandungan ni Isaias nga padayon nga ginbibiling nira hi Jehova, kondi diri nira ginsusunod an iya mga pulong.

Sinalingkapaw nga Pagpuasa

 5. Paonan-o nangalimbasog an mga Judio nga makarawat an pag-uyon han Dios, ngan ano an reaksyon ni Jehova?

⁵ Ha pangalimbasog nga uyonan han Dios, pormalidad la nga nagpupuasa an mga Judio, kondi an ira salingkapaw nga pagpakamatadong nagpapahirayo la ha ira tikang kan Jehova. Tungod kay matin-aw nga nahipapausa, nagpakiana hira: “Tungod hin ano an aton pagpuasa, nasiring hira, ngan waray ka ba makakita? Tungod hin ano an aton pagsakit han aton kalag ngan waray ka ba mahibaro?” Hi Jehova prangka nga nabaton, nasiring: “Kitaa, ha adlaw han iyo pagpuasa, kamo nakakita han iyo kalugaringon nga karuyag, ngan nagpupugos han ngatanan niyo nga magburuhat. Kitaa, kamo nagpupuasa para  ha pagkasumpaki ngan ha pagkasuhay, ngan ha paghampak pinaagi han kamaoo han pagkamaraot: diri kamo magpuasa hini nga adlaw ha pagkaagi nga an iyo tingog hibatian ha kahitas-an. Amo ba ito an pagpuasa nga akon ginpili? An adlaw para hin usa ka tawo ha pagsakit han iya kalag? Ha pagduko han iya ulo sugad hin usa nga tigbaw, ngan ha pagbitad hin panapton nga sako ngan hin mga agbon ha ilarom niya? Tatawgon ba ini nimo nga pagpuasa, ngan adlaw nga makakarawat ni Jehova?”—Isaias 58:3-5.

 6. Ano nga mga buhat han mga Judio an nagbubuhayhag nga salingkapaw la an ira pagpuasa?

⁶ Samtang nagpupuasa, nagpapakamatadong, ngan naghahangyo pa ngani han matadong nga mga paghukom ni Jehova, an mga tawo nagbubuhat han hakugnon nga mga kalipayan ngan mga bentaha ha negosyo. Ura-ura an ira kamakiaawayon, panalumpigos, ngan kamadarahog. Ha pagsari nga itago an ira maraot nga batasan, dayag nga nagpapakita hira hin kasubo—idinuduko an ira mga ulo pariho hin mga tikog ngan nanlilingkod ha tela nga sako ngan mga agbon—ha pagpakita hin pagbasol tungod han ira mga sala. Ano an pulos hini ngatanan kon padayon hira nga nagrirebelde? Diri hira nagpapakita hin diosnon nga kasubo ngan pagbasol nga sadang magin kaupod han sinsero nga mga pagpuasa. An ira pagnguyngoy—bisan kon maaringasa—diri nahibabatian ha langit.

 7. Paonan-o ginios hin may pagkasalingkapaw an mga Judio ha panahon ni Jesus, ngan paonan-o nagbubuhat hin pariho hito an damu nga tawo yana?

⁷ An mga Judio ha panahon ni Jesus nagbuhat liwat hin pakita la nga seremonya han pagpuasa, ngan ginbubuhat ito han iba hin makaduha ha usa ka semana! (Mateo 6:16-18; Lukas 18:11, 12) Damu han mga lider ha relihiyon an nagsubad liwat ha henerasyon ni Isaias pinaagi han pagin mapintas ngan pagpakaagaron. Salit, maisugon nga iginbuhayhag ni Jesus adton relihiyoso nga mga salingkapaw, ginsusumatan hira nga an ira paagi han pagsingba waray pulos. (Mateo 15:7-9) Yana nga panahon, minilyon liwat an “dayag nga nasiring nga nakilala hira ha Dios, kondi ira hiya iginsasalikway pinaagi han ira mga buhat, tungod kay hira mangil-ad ngan diri-masinugtanon ngan diri inuuyonan para ha bisan ano nga klase hin maopay nga buhat.” (Tito 1:16, NW) Bangin maglaom hira han kalooy han Dios, kondi an ira paggawi nagbubuhayhag han ira pagkadiri-sinsero. Ha kabaliktaran, an mga Saksi ni Jehova nagpapakita hin totoo nga debosyon ha Dios ngan sinsero nga gugma ha kabugtoan.—Juan 13:35.

Kon Ano an Nahiuupod ha Totoo nga Pagbasol

8, 9. Ano nga maopay nga mga buhat an kinahanglan nga magin kaupod han sinsero nga pagbasol?

⁸ Karuyag ni Jehova nga an iya katawohan magbuhat hin labaw pa kay ha pagpuasa la tungod han ira mga sala; karuyag niya nga magbasol hira. Pinaagi hito makakarawat nira an iya pag-uyon. (Esekiel 18:23, 32) Nagsaysay hiya nga basi magin makahuluganon, an pagpuasa kinahanglan updan hin pagtadong han naglabay nga mga sala. Tagda an nag-uusisa-han-kasingkasing nga mga pakiana ni Jehova: “Diri ba ini amo an pagpuasa nga akon ginpili: han pagturos han mga gapos han pagkamaraot, han paghukas han mga tabang han yugo, ngan han paghatag hin kagawasan ha mga gintatalumpigos, ngan nga iyo barion an tagsatagsa nga yugo?”—Isaias 58:6.

⁹ An mga gapos ngan mga yugo angayan nga mga simbolo han mapintas nga pag-uripon. Salit imbes nga magpuasa ngan ha pariho nga panahon magtalumpigos ha mga igkasi-tumuroo, an mga tawo angay sumunod ha sugo: “Higugmaon mo an imo igkasitawo sugad ha imo ngahaw.” (Lebitiko 19:18) Sadang nira hatagan hin kagawasan an ngatanan nga ira gintatalumpigos ngan gin-uuripon ha diri makatadunganon nga paagi. a An pakita la nga relihiyoso nga mga buhat, sugad han pagpuasa, diri kasaliwan han sinsero nga debosyon ha Dios ngan han pagpahayag hin minagburugto nga gugma. An kadungandungan ni Isaias, hi propeta Mika, nagsurat: “Ano an kan Jehova ginkikinahanglan ha imo, kondi an pagbuhat ha subay, ngan paghigugma han pagpaid, ngan ha paglakat ha mapainubsanon kaupod han imo Dios?”—Mika 6:8.

10, 11. (a) Para ha mga Judio, ano an mas maopay pa kay han pagpuasa? (b) Paonan-o susundon han mga Kristiano yana an sagdon ni Jehova ha mga Judio?

¹⁰ An hustisya, pagkabuotan, ngan pagpaubos nagkikinahanglan han pagbuhat hin maopay ha iba, nga amo an kahulogan han Balaud ni Jehova. (Mateo 7:12) Mas maopay pa ha pagpuasa an pagpaangbit han ira bahandi ha mga nanginginahanglan. Hi Jehova nagpakiana: “Diri ba ini [an pagpuasa nga akon ginpipili] an pagbahinbahin han imo tinapay ha mga ginugutom, ngan nga ikaw magdara han mga kablas nga isinasalikway ngada ha imo balay? Kon ikaw makakita hin hubo, nga imo hiya pagtabonan: ngan nga ikaw diri tumago tikang ha imo kalugaringon nga unod?” (Isaias 58:7) Oo, imbes nga magpuasa hin pakita la, adton may-ada katigayonan ha pagbuhat hito sadang maghatag hin pagkaon, bado, o urukyan ha nanginginahanglan nga mga igkasi-umurukoy ha Juda—ha ira mismo mga igkasi-tawo.

¹¹ Inin maopay nga mga prinsipyo han minagburugto nga gugma ngan pagpaid nga iginpahayag ni Jehova diri para la ha mga Judio ha panahon ni Isaias. Naggigiya liwat ito ha mga Kristiano. Tungod hini, hi apostol Pablo nagsurat: “Busa niyan, nga may-ada ta katigayonan, magbuhat kita han maopay ha ngatanan nga mga tawo, labi na gud ha panimalay han pagtoo.” (Galasia 6:10) An Kristiano nga kongregasyon kinahanglan magin usa nga lugar ha pagpakita han gugma ngan minagburugto nga pagtagad, labi na nga nagtitikaraot an peligroso nga mga panahon nga aton kinabubuhian.—2 Timoteo 3:1; Jakobo 1:27.

 An Pagsugot Nagdadara hin Damu nga mga Bendisyon

12. Ano an bubuhaton ni Jehova kon an iya katawohan sumugot ha iya?

¹² Kon mahibabaro la unta an katawohan ni Jehova ha pagsunod han iya mahigugmaon nga pagsaway! Hi Jehova nagsiring: “Dida hito an imo kapawa masanag sugad hin kaagahon, ngan an imo pagkaopay maabot ha kadagmitan; ngan an imo pagkamatadong mag-uuna ha imo; an himaya ni Jehova mapaurhi ha imo. Dida hito ikaw matawag, ngan hi Jehova mabaton; ikaw magsasangpit, ngan hiya masiring: Iini ako.” (Isaias 58:8, 9) Pagkamahigugmaon ngan pagkamakaruruyag hini nga mga pulong! Ginbibendisyonan ngan ginpapanalipdan ni Jehova adton nalilipay ha mahigugmaon-nga-pagkabuotan ngan pagkamatadong. Kon an katawohan ni Jehova magbasol ha ira pagkamapintas ngan pagkasalingkapaw ngan magsugot ha iya, an ira kahimtang magtitikang ha pagtikaopay. Hi Jehova mahatag han “pagkaopay,” an kahibalik han nasud ha espirituwal ngan pisikal nga kaopayan. Iya liwat hira pananalipdan, sugad han iya ginbuhat ha ira kaapoy-apoyan han pagbaya nira ha Ehipto. Ngan mabaton dayon hiya ha ira mga pagsinggit ha pangaro hin bulig.—Eksodo 14:19, 20, 31.

13. Ano nga mga bendisyon an maabot ha mga Judio kon sumugot hira ha sagdon ni Jehova?

¹³ Gindugangan yana ni Jehova an iya nauna nga sagdon, nasiring: “Kon imo kuhaon tikang ha butnga nimo an yugo [han mapintas, waray-hustisya nga pag-uripon], an pagtudlok han tudlo [bangin ha pagtamay ngan buwa nga akusasyon], ngan an pagyakan hin maraot; ngan kon imo hukaron an imo kalag para ha ginugutom, ngan busgon mo an kalag nga sinakit: dida hito an imo kapawa mabangon dida ha kasisidman, ngan an imo kadulom masusugad han kaudtuhon.” (Isaias 58:9b, 10) An pagin hakog ngan pagin mapintas nakakadaot ha kalugaringon ngan nagigin hinungdan han kapungot ni Jehova. Kondi, an pagkabuotan ngan pagkamahinatagon nagriresulta ha hura nga bendisyon han Dios labi na kon ginbubuhat para ha mga nagugutom ngan nagsasakit. Kon kinasingkasing nga kakarawaton la unta han mga Judio ini nga mga kamatuoran! Niyan an ira espirituwal nga kapawa ngan kauswagan magpapahinabo ha ira nga maglamrag pariho han adlaw ha kaudtuhon, nga nagwawara han bisan ano nga kasirom. Labaw ha ngatanan, maghahatag hira hin dungog ngan kadayawan kan Jehova, an Surok han ira himaya ngan mga bendisyon.—1 Hadi 8:41-43.

Iginpahiuli nga Nasud

14. (a) Ano an reaksyon han mga kadungandungan ni Isaias ha iya ginsiring? (b) Ano an padayon nga igintanyag ni Jehova?

¹⁴ Makasurubo, ginbalewaray han nasud an hangyo ni Jehova ngan mas nahilubong pa gud ha karaotan. Ha kataposan, waray na nahimo hi Jehova kondi igtubyan hira ha pagkabihag, sugad la han iya iginpahamangno. (Deuteronomio 28:15, 36, 37, 64, 65) Kondi, an sunod nga mga pulong ni Jehova pinaagi kan Isaias padayon nga naghatag hin paglaom. Nagtagna an Dios nga an dinisiplina, mabinasulon nga nanhibilin malipayon nga mabalik ha nasud han Juda, bisan kon binayaan na ito.

15. Ano nga makalilipay nga pagpahiuli an igintagna ni Jehova?

¹⁵ Ha pag-unabi han tiarabot nga pagpahiuli han iya katawohan han 537 A.K.P., pinaagi kan Isaias hi Jehova nagsiring: “Hi Jehova magmamando ha imo ha dayoday ngan magbubusog han imo kalag dida ha mga lugar nga magmara, ngan magpaparig-on han imo mga tul-an; ngan ikaw masusugad hin binaribihan nga tanaman, ngan pariho hin usa nga burabod han tubig, kanay mga tubig diri nauubos [“napapakyas,” The New English Bible].” (Isaias 58:11) Igpapahiuli ni Jehova an uga nga tuna-nga-natawohan han Israel ngadto ha pagkaada hura nga ani. An mas makalilipay pa gud, iya bibendisyonan an iya mabinasulon nga katawohan, pakukusgon an ira “mga tul-an” tikang ha kahimtang nga patay ha espirituwal ngadto ha kahimtang nga puno hin kadasig. (Esekiel 37:1-14) An katawohan mismo masusugad hin “binaribihan nga tanaman” nga puno hin mga bunga ha espirituwal.

16. Paonan-o an nasud maipapahiuli?

¹⁶ An pagpahiuli mag-uupod hin pagtukod utro han mga siyudad nga ginguba han mga Babilonyahanon nga sinulong han 607 A.K.P. “Tungod ha imo sugo sigurado nga tutukuron han mga tawo an mga lugar nga guba hin maiha na nga panahon; pagbabangunon mo an mga pundasyon han sunod-sunod nga mga henerasyon. Ngan tatawagon ka nga paraayad han kaguhangan, an nagpapahiuli han mga agianan nga an mga ligid hini pag-uukyan.” (Isaias 58:12, NW) An magkapariho-an-kahulogan nga mga pulong nga “an mga lugar nga guba hin maiha na nga panahon” ngan “an mga pundasyon han sunod-sunod nga mga henerasyon” (o, an mga pundasyon nga nagkaguguba sulod hin mga henerasyon na) nagpapakita nga an nakabalik nga mga nanhibilin magtutukod utro han naguba nga mga siyudad han Juda, labi na han Jerusalem. (Nehemia 2:5; 12:27; Isaias 44:28) Hira mag-aayad “han kaguhangan”—termino para ha kabug-osan nga nagtutudlok ha mga guba ha mga pader han Jerusalem ngan sigurado nga han iba nga mga siyudad liwat.—Jeremias 31:38-40; Amos 9:14.

Mga Bendisyon nga Resulta han Matinumanon nga Pagsaurog han Sabbath

17. Paonan-o naghangyo hi Jehova ha iya katawohan nga sundon an mga balaud ha Sabbath?

¹⁷ An Sabbath amo an kapahayagan han hilarom nga pagtagad han Dios para ha pisikal ngan espirituwal nga kaopayan han iya katawohan. Hi Jesus nagsiring: “An adlaw nga iparahuway ginbuhat tungod ha tawo.” (Markos 2:27) Ini nga adlaw nga ginbaraan ni Jehova naghatag ha mga Israelita hin espesyal nga higayon ha pagpakita han ira gugma ha Dios. Makasurubo nga ha panahon ni Isaias nagin usa na la ini nga adlaw ha pagsaurog hin waray-pulos nga mga rituwal ngan pagpatagbaw ha hakugnon nga mga hingyap. Salit makausa pa, may rason hi Jehova nga sawayon an iya katawohan. Ngan nangalimbasog na liwat hiya ha pagtugkad han ira mga kasingkasing. Hiya nagsiring:  “Kon iisol mo an imo tiil tikang ha adlaw nga iparahuway, tikang ha pagbuhat han imo karuyag ha akon baraan nga adlaw; ngan tawgon an adlaw nga iparahuway nga usa nga kahimongaya, ngan an kabaraan ni Jehova dungganan; ngan magpapasidungog hini, nga diri magbubuhat han imo kalugaringon nga mga paagi, o diri mangingita han imo kalugaringon nga karuyag, o diri magyayakan han imo kalugaringon nga mga pulong. Dida hito ikaw maglilipay ha imo ngahaw dida kan Jehova; ngan akon ka pasasakyon dida ha higtaas nga mga lugar han tuna; ngan akon ka pakakaunon han panurundon ni Jakob nga imo amay: kay an baba ni Jehova nagyakan hini.”—Isaias 58:13, 14.

18. Ano an magigin resulta han kapakyas han Juda ha pagpasidungog han Sabbath?

¹⁸ An Sabbath amo an adlaw para ha espirituwal nga pamalandong, pag-ampo, ngan pagsingba han pamilya. Sadang ito makabulig ha mga Judio ha pamalandong mahitungod han urusahon nga mga buhat ni Jehova para ha ira kaopayan ngan para ha hustisya ngan gugma nga dayag ha iya Balaud. Salit, an matinumanon nga pagsaurog hini nga baraan nga adlaw sadang bumulig ha katawohan nga magin duok ha ira Dios. Kondi, ira ginbabaliko an Sabbath ngan tungod hito namimeligro hira nga mawad-an han bendisyon ni Jehova.—Lebitiko 26:34; 2 Kronikas 36:21.

19. Ano nga hura nga mga bendisyon an maabot ha katawohan han Dios kon padayon nga ira saurugon an Sabbath?

¹⁹ Bisan pa hito, kon an mga Judio mahibaro tikang ha disiplina ngan magpasidungog ha kahikayan han Sabbath, maabot ha ira an hura nga mga bendisyon. An maopay nga mga epekto han totoo nga pagsingba ngan pagtahod ha Sabbath magsasap-ay ha ngatanan nga bahin han ira mga kinabuhi. (Deuteronomio 28:1-13; Salmo 19:7-11) Pananglitan, kan Jehova “pasasakyon dida ha higtaas nga mga lugar han tuna” an iya katawohan. Ini nga mga pulong nagpapasabot hin seguridad ngan kapirdihan han mga kaaway han usa. Hin-o man an nagkukontrol han higtaas nga mga lugar—an kabungtoran ngan an kabukiran—amo an nagkukontrol han tuna. (Deuteronomio 32:13; 33:29) Hadto an Israel nagsugot kan Jehova, ngan an nasud nagpahimulos han iya panalipod ngan gintahod ito, ginkahadlokan pa ngani, han iba nga mga nasud. (Josue 2:9-11; 1 Hadi 4:20, 21) Kon sugton utro nira hi Jehova, an iba hito nga kahimayaan hadto mahibabalik. Tatagan ni Jehova an iya katawohan hin bug-os nga bahín han “panurundon ni Jakob”—an mga bendisyon nga iginsaad pinaagi han Iya kauyonan ha ira kaapoy-apoyan, labi na an bendisyon nga murayaw nga pagtag-iya han Tuna nga Iginsaad.—Salmo 105:8-11.

20. May-ada ano nga “pagpahuway ha sabbath” para ha mga Kristiano?

²⁰ May-ada ba leksyon dinhi para ha mga Kristiano? Han mamatay hi Jesu-Kristo, ginkuha na an Mosaiko nga Balaud, upod na an mga ginkikinahanglan hito ha Sabbath. (Kolosas 2:16, 17) Kondi, an disposisyon nga naiaghat unta ha Juda han pagsaurog han Sabbath—pag-una han espirituwal nga mga kaopayan ngan pagin duok kan Jehova—importante pa gihapon para ha mga magsiringba ni Jehova. (Mateo 6:33; Jakobo 4:8) Dugang pa, ha iya surat ha mga Hebreohanon, hi Pablo nagsiring: “May-ada pa nahibibilin nga pagpahuway ha sabbath para ha katawohan han Dios.” An mga Kristiano nasulod hini nga “pagpahuway ha sabbath” pinaagi han pagin masinugtanon kan Jehova ngan pagpadayon han pagkamatadong basado ha pagtoo ha iginbubo nga dugo ni Jesu-Kristo. (Hebreo 3:12, 18, 19; 4:6, 9-11, NW, 14-16) Para ha mga Kristiano, ini nga klase hin pagsaurog han sabbath ginbubuhat, diri la usa ka adlaw ha kada semana, kondi kada adlaw.—Kolosas 3:23, 24.

An Espirituwal nga Israel ‘Nasakay Dida ha Higtaas nga mga Lugar han Tuna’

21, 22. Ha ano nga paagi ni Jehova ‘ginpasakay dida ha higtaas nga mga lugar han tuna’ an Israel han Dios?

²¹ Tikang han ira pakagawas ha sugad-Babilonya nga pagkabihag han 1919, matinumanon nga ginsaurog han dinihogan nga mga Kristiano an ginpadagawan han Sabbath. Sugad nga resulta, kan Jehova hira ‘ginpasakay dida ha higtaas nga mga lugar han tuna.’ Ha ano nga kahulogan? Han 1513 A.K.P., naghimo hi Jehova hin kauyonan ha katulinan ni Abraham nga kon hira magmasinugtanon, magigin usa hira nga ginhadian han mga saserdote ngan baraan nga nasud. (Eksodo 19:5, 6) Ha bug-os nga 40 ka tuig ha kamingawan, talwas nga gindara hira ni Jehova, sugad la han pagdara han agila ha mga pisô hito, ngan ginbendisyonan hira hin hura nga mga tagana. (Deuteronomio 32:10-12) Kondi, an nasud nawad-an han pagtoo, ngan ha kataposan nawad-an han ngatanan nga mga pribilehiyo nga ira unta makakarawat. Bisan pa hito, hi Jehova may-ada pa gihapon usa nga ginhadian han mga saserdote yana. Amo ito an espirituwal nga Israel han Dios.—Galasia 6:16; 1 Pedro 2:9.

²² Durante han “panahon han kataposan,” inin espirituwal nga nasud nagbubuhat han waray mabuhat han kadaan nga Israel. Padayon hira nga natoo kan Jehova. (Daniel 8:17) Tungod kay ginsusugot gud han mga membro hito an hitaas nga mga suruklan ngan harangdon nga mga paagi ni Jehova, ha espirituwal nga kahulogan ginpapahitaas hira ni Jehova. (Proberbios 4:4, 5, 8; Pahayag 11:12) Tungod kay napapanalipdan kontra han pagkamahugaw nga nakapalibot ha ira, nagpapahimulos hira hin dungganon nga estilo  han pagkinabuhi, ngan imbes nga magpirit ha pagsunod ha ira kalugaringon nga mga paagi, nagkakaada hira “duro nga kalipay kan Jehova” ngan ha iya Pulong. (Salmo 37:4, NW) Ginsisiguro ni Jehova nga magin marig-on hira ha espirituwal ha atubangan han marig-on nga pagkontra ha bug-os nga kalibotan. Tikang han 1919 an ira espirituwal nga “tuna” waray gud maguba. (Isaias 66:8) Nagpapadayon hira ha pagin katawohan para ha iya harangdon nga ngaran, nga ira iginpapasamwak nga malipayon ha bug-os nga kalibotan. (Deuteronomio 32:3; Buhat 15:14) Dugang pa, an nagtitikadamu nga mga maaghop tikang ha ngatanan nga mga nasud kaupod na yana nira ha daku nga pribilehiyo han pagin natutdoan han mga paagi ni Jehova ngan pagin nabuligan ha paglakat ha iya mga dalan.

23. Paonan-o ni Jehova “pakakaunon han panurundon ni Jakob” an iya dinihogan nga mga surugoon?

²³ An dinihogan nga mga surugoon ni Jehova iya “pakakaunon han panurundon ni Jakob.” Han ginbendisyonan ni Isaak hi Jakob imbes nga hi Esaw, igintagna han mga pulong han patriarka an mga bendisyon para ha ngatanan nga matoo ha iginsaad nga Binhi ni Abraham. (Genesis 27:27-29; Galasia 3:16, 17) Pariho kan Jakob—ngan diri pariho kan Esaw—an dinihogan nga mga Kristiano ngan an ira mga kaupod ‘naapresyar han sagrado nga mga butang,’ labi na han espirituwal nga pagkaon nga hura nga iginhahatag han Dios. (Hebreo 12:16, 17; Mateo 4:4) Inin espirituwal nga pagkaon—nga nag-uupod han kahibaro ha kon ano an ginbubuhat ni Jehova pinaagi han iginsaad nga Binhi ngan han mga kaupod hito nga Binhi—nagpaparig-on, nagdadasig, ngan importante para ha ira espirituwal nga pagkinabuhi. Salit, importante gud nga padayon hira nga kumarawat han espirituwal nga pagkaon pinaagi han pagbasa ngan pamalandong ha Pulong han Dios. (Salmo 1:1-3) Kinahanglan makig-upod hira ha mga igkasi-tumuroo ha Kristiano nga mga katirok. Ngan importante nga ira suportahan an hitaas nga mga suruklan han putli nga pagsingba samtang malipayon nga iginpapaangbit nira ha iba ito nga pagkaon.

24. Paonan-o nanggagawi an totoo nga mga Kristiano yana nga panahon?

²⁴ Samtang naiikag nga naghuhulat ha katumanan han mga saad ni Jehova, hinaot an totoo nga mga Kristiano padayon nga magdumiri ha ngatanan nga klase han pagkasalingkapaw. Tungod kay napapakaon han “panurundon ni Jakob,” magpadayon unta hira ha pagpahimulos han espirituwal nga kasigurohan dida ha “higtaas nga mga lugar han tuna.”

[Footnote]

[Mga Pakiana]