Sumat han mga Parasamwak han Ginhadian

Bulig ha Pagtipig han Pagkabaraan han Dugo

HA BUG-OS nga tuna an mga surugoon ni Jehova nagpapakita hin pagkamaunungon ha Dios may kalabotan ha pagkabaraan han dugo. (Buhat 15:28, 29) An bulig ha Kristiano nga pagminagburugto igintatagana han matinumanon ngan maaramon nga uripon nga klase. (Mateo 24:45-47, NW) Aton kitaon an nagin mga resulta ha Pilipinas.

An sanga nga opisina han Pilipinas nagsusumat: “Han 1990, ginpahibaro kami nga an mga representante tikang ha Brooklyn Bethel magdudumara hin seminar dinhi ha Pilipinas. Gindapit an kabugtoan nga kalalakin-an tikang ha pipira nga sanga nga opisina ha Asia, upod na an Korea, Taiwan, ngan Hong Kong. An katuyoan amo an pagbulig ha pag-establisar han Hospital Information Services ha ira sanga nga mga opisina ngan ha paghikay liwat han mga Hospital Liaison Committee. Ha Pilipinas, an mga komite siyahan nga gin-establisar ha upat nga dagku nga siyudad.” An mga komite mangangalimbasog ha pamiling hin mga doktor nga andam ha pagkooperar ha aton mahitungod ha aton gintotoohan sugad nga Kristiano may kalabotan ha dugo. Bubuligan liwat nira an kabugtoan kon bumangon an mga problema may kalabotan ha dugo.

Hi Remegio ginpili nga magin membro han Hospital Liaison Committee ha Baguio. Ha paglabay han panahon, nagtikang maobserbahan han mga doktor an epekto han serbisyo han mga Hospital Liaison Committee. Nahinunumdoman ni Remegio an usa nga okasyon han damu nga doktor nga nakipagkatirok ha Hospital Liaison Committee an naruyag mahibaro kon paonan-o tatambalon an mga pasyente nga Saksi nga nadiri pagpaabuno hin dugo. Hi Remegio nagsiring: “Nagtikang magbangon hin mga pakiana an mga doktor, kondi nahulop ako tungod kay teknikal hinduro an mga pakiana.” Nag-ampo hiya ngadto kan Jehova para han bulig ha paglampos hini nga problema. Hi Remegio nagpadayon: “Katapos han tagsa nga pakiana, an iba nga mga doktor nag-alsa han ira mga kamot ngan nagsumat kon paonan-o nira nalamposan an pariho hito nga kahimtang.” Nalipay hi Remegio tungod han bulig, labi na nga an pakiana-ngan-baton nga sesyon nagpadayon ha sulod hin duha ka oras.

May-ada na yana 21 nga komite ha bug-os nga nasud, nga may kabug-osan nga 77 nga kabugtoan nga kalalakin-an hini nga mga komite. Hi Danilo, usa nga Saksi nga doktor, nasiring: “Nasasantop han mga doktor nga an ira mga pasyente nga Saksi sinusuportahan hin usa nga organisasyon nga mahigugmaon nga nag-aataman ha ira.” Usa nga doktor an nag-alang anay ha pag-opera nga diri mag-aabuno hin dugo ha usa nga bugto nga lalaki. Kondi, marig-on an bugto ha iya gintotoohan. Ginhimo an pag-opera ngan naglampos ito. An Hospital Information Services nagsumat: “Nahipausa gud an doktor ha paagi nga naopay an bugto. Hiya nagsiring: ‘Tungod han nahitabo dinhi, kon nagkikinahanglan an bisan hin-o han iyo mga membro hini nga klase han operasyon nga waray dugo, malilipay ako ha pagbuhat hito.’ ”