Nagdaog Na ba an Maraot?

AN IDEYA mahitungod han unibersal nga away han mga puwersa han maopay ngan maraot nakaaghat hin waray-kataposan nga mga opinyon nga iginbasar ha diri-kompleto nga impormasyon han mga parasurat ngan mga pilosopo ha bug-os nga kasaysayan. Kondi, may-ada usa nga libro nga nagsusulod han husto nga asoy mahitungod ha away han Dios ngan han Yawa. Ito nga libro amo an Biblia. Nagsusumat ito mahitungod han mga isyu may kalabotan hini nga away ngan nagtatagana hin mga paagi ha paghibaro kon hin-o gud an nagdaog na.

Waray pag-iha katapos ha paglarang han siyahan nga lalaki ngan babaye, gin-ayat han diri makita nga espiritu nga linarang, hi Satanas nga Yawa, an pagmando han Dios. Paonan-o? Pinaagi han tuso nga pagsuhestyon nga diri iginhahatag han Dios an mag-opay nga mga butang ha iya mga linarang ngan nga magkakaada mas maopay nga kinabuhi an katawohan kon bulag ha iya.—Genesis 3:1-5; Pahayag 12:9.

Ha urhi, ha panahon han patriarka nga hi Job, nagbangon hi Satanas hin usa pa nga isyu. Ha pangalimbasog nga bungkagon an integridad ni Job ha Dios, hi Satanas nagsiring: “Panit para ha panit, oo, an ngatanan nga gintatag-iya han tawo iya ihahatag para han iya kinabuhi.” (Job 2:4) Usa gud ito nga akusasyon nga nag-uupod han ngatanan! Pinaagi han paggamit ha termino nga “tawo” nga para ha kabug-osan imbes han ngaran nga Job, ginruhaduhaan ni Satanas an integridad han ngatanan nga tawo. Hiya, ha iba nga pagkayakan, nagdeklara: ‘Bubuhaton han usa ka tawo an bisan ano basi maluwas an iya kinabuhi. Tagi ako hin higayon, ngan maitatalikod ko an bisan hin-o tikang ha Dios.’

An kadaogan han away butnga han Dios ngan han Yawa mahibabaroan pinaagi han pagbaton ha duha nga pakiana: Naglalampos ba an tawo ha pagmando ha iya kalugaringon? Naglalampos ba an Yawa ha pagpatalikod han ngatanan tikang ha totoo nga Dios?

Mahimo Ba Maglampos an Katawohan ha Pagmando ha Ira Kalugaringon?

Ha sulod hin yinukot ka mga tuig na, nag-ieksperimento an katawohan hin magkalainlain nga mga klase han pagmando. An magkalainlain nga mga klase hin gobyerno, sugad han monarkiya, aristokrasya, demokrasya, awtokrasya, Pasismo, ngan Komunismo, ginsarihan na ha naglabay nga panahon. Diri ba an kamatuoran mismo nga may-ada permanente nga panginahanglan ha pag-eksperimento hin magkalainlain nga mga porma han gobyerno nagpapasabot nga diri igo ini nga magkalainlain nga mga paagi han pagmando?

“An Romano nga katawohan diri tinuyo nga nagbuhat hin daku hinduro nga eksperimento ha administrasyon,” nagsurat hi H. G. Wells ha A History of the World, nga iginpublikar han 1922. Hiya nagpadayon: “Pirme ito nagbabag-o, waray gud ito magin establisado. Ha usa nga bahin, napakyas an eksperimento. Ha luyo nga bahin, an eksperimento nagpapabilin nga diri tapos, ngan an Europa ngan Amerika yana nangangalimbasog pa gihapon ha pagsulbad han komplikado nga mga problema han arte ha pagdumara han mga kahikayan han estado ha bug-os nga kalibotan nga siyahan nga gin-atubang han Romano nga katawohan.”

An eksperimento ha gobyerno nagpadayon tubtob ha ika-20 ka siglo. Ha ikatarapos nga mga tuig han dekada 1900, an demokratiko nga pagmando nagkaada mas daku nga suporta kay ha kakan-o pa man. Ha teoriya, an demokrasya nag-aangkon nga natugot ito han ngatanan nga magkaada bahin ha gobyerno. Kondi naipapakita ba han demokrasya nga an tawo makakagmando nga malampuson nga waray Dios? Hi Jawaharlal Nehru, nga primero ministro hadto han India, nagsiring nga an demokrasya maopay kondi nagdugang: “Ini an akon masisiring tungod kay an iba nga mga sistema maraot hinduro.” An presidente hadto han Fransia nga hi Valéry Giscard d’Estaing nagsiring: “Nakikita naton an makuri nga kahimtang han mga representante han demokrasya.”

Sobra 2,400 ka tuig na an naglabay, an Griego nga pilosopo nga hi Plato nakaobserba hin usa nga kaluyahan ha demokratiko nga paagi han pagmando. Sumala ha libro nga A History of Political Theory, iya gin-atake “an pagin ignorante ngan pagin diri kuwalipikado han mga politiko, nga amo  an labi nga nakakadaot han demokrasya.” Damu han mga politiko yana an nagrireklamo han kakuri ha pamiling hin may kapas nga mga indibiduwal nga kuwalipikado ha pagserbi ha gobyerno. An mga tawo “naaaringit ha mga lider nga baga hin gudti ha panahon nga dagku hinduro an mga problema nga ira inaatubang,” siring han The Wall Street Journal. Nagpadayon ito: “Nasisina hira ha pakakita hin pag-alang-alang ngan panlimbong kon namimiling hira hin giya.”

Yana tagda an pagmando ni Hadi Salomon han kadaan nga Israel. Gintagan ni Jehova nga Dios hi Salomon hin hitaas gud nga kinaadman. (1 Hadi 4:29-34) Paonan-o naglampos an nasud han Israel durante han 40-ka-tuig nga pagmando ni Salomon? “An Juda ngan Israel damu,” nabaton an Biblia, “pariho han mga baras nga aada ha baybayon han dagat an kadamu, nangangaon ngan nanginginom ngan nagrarayhak.” An asoy nasiring liwat: “An Juda ngan an Israel padayon nga nag-ukoy ha kasigurohan, an ngatanan ilarom han iya kalugaringon nga ubasan ngan kalugaringon nga puno han igos, tikang ha Dan ngadto ha Beer-seba, ha ngatanan nga mga adlaw ni Salomon.” (1 Hadi 4:20, 25) Tungod han usa ka maaramon nga hadi nga nagmamando ha ira sugad nga nakikita nga representante han diri nakikita nga Supremo nga Magmarando, hi Jehova nga Dios, an nasud nagpahimulos hin diri malabawan nga seguridad, kauswagan, ngan kalipay.

Daku gud nga kaibahan butnga ha pagmando han tawo ngan han Dios! Masisiring gud ba han bisan hin-o nga nagdaog na hi Satanas ha isyu han pagmando? Diri, tungod kay hi propeta Jeremias husto nga nagpahayag: “O Jehova, maaram ako nga an paagi han tawo diri aada ha iya ngahaw, diri aada ha tawo nga naglalakat an pagmando han iya mga pitad.”—Jeremias 10:23.

Maitatalikod Ba ni Satanas an Ngatanan Tikang ha Dios?

Naglalampos ba hi Satanas ha iya pag-angkon nga maitatalikod niya an ngatanan tikang ha Dios? Ha kapitulo 11 ha libro nga Mga Hebreohanon ha Biblia, ginngaranan ni apostol Pablo an damu han matinumanon nga kalalakin-an ngan kababayin-an han antes-Kristiano nga mga panahon. Katapos hiya nagsiring: “Kukulangon ako hin oras kon ako magsusumat mahitungod kanda Gideon, Barak, Samson, Jepte; mahitungod kan David ngan Samuel ngan han mga manaragna.” (Hebreo 11:32) Matin-aw nga gin-uunabi ni Pablo ini nga maunungon nga mga surugoon han Dios sugad nga an ‘madakmol nga dampog han mga saksi.’ (Hebreo 12:1, NW) An Griego nga pulong nga ginamit dinhi para ha “dampog” nangangahulogan, diri hin usa nga burublag, ginporma gud nga dampog nga may-ada espisipiko nga sukol ngan porma, kondi usa ka daku nga dampog nga waray porma. Angayan ini tungod kay an matinumanon nga mga surugoon han Dios ha naglabay damu hinduro salit pariho hira hin usa nga madakmol nga dampog. Oo, mga siglo na nga ginagamit han diri maihap nga daku nga panon han katawohan an ira kagawasan ha pagbuot ngan nagpili ha paghatag han ira pagtahod ngadto kan Jehova nga Dios.—Josue 24:15.

Ano an aton nakikita ha aton panahon? An kadamu han mga Saksi ni Jehova ha bug-os nga kalibotan nag-uswag na ngadto ha sobra unom ka milyon bisan pa han makangingirhat nga  pagtimaraot ngan pagkontra nga ira naeksperyensyahan durante han ika-20 ka siglo. Ginbabanabana nga mga siyam ka milyon an nakikig-upod ha ira, ngan damu hini an nagbubuhat hin determinado nga mga pitad basi magkaada duok nga personal nga relasyon ha Dios.

An pinakamakatirigamnan nga baton ha pag-angkon ni Satanas nga iya maitatalikod an mga tawo tikang kan Jehova nagtikang ha Anak han Dios mismo, hi Jesu-Kristo. Bisan an duro nga kaul-ol ha pasakitan nga kahoy waray gud makabungkag han iya integridad. Han kataposan nga pagginhawa ni Jesus, hiya nagsinggit: “Amay, ha imo mga kamot akon itinutubyan an akon espiritu.”—Lukas 23:46.

Ginagamit ni Satanas an ngatanan ha iya gahum—tikang ha mga pagsulay tubtob ha direkta nga pagtimaraot—ha pangalimbasog nga magpabilin an iya pagkontrol ha mga tawo. Ginagamit “an kairiphon han unod ngan an kairiphon han mga mata, ngan an paghambog han kinabuhi” ha pagsulay ha mga tawo, nangangalimbasog hiya nga aghaton o sulayon hira pahirayo kan Jehova. (1 Juan 2:16) Hi Satanas liwat ‘nagbubuta han mga hunahuna han mga diri-tumuroo basi an kahayag han mahimayaon nga maopay nga sumat mahitungod kan Kristo diri magsidlak.’ (2 Korinto 4:4) Ngan diri nag-aalang hi Satanas nga gamiton an mga pagtarhog ngan paghadlok ha katawohan basi matuman an iya tumong.—Buhat 5:40.

Kondi, adton dapig ha Dios diri nadadaog han Yawa. Nahibaro hira ha pagkilala kan Jehova nga Dios ngan ‘ha paghigugma ha iya ha ira bug-os nga kasingkasing ngan ha ira bug-os nga kalag ngan ha ira bug-os nga hunahuna.’ (Mateo 22:37) Oo, an marig-on nga pagkamaunungon ni Jesu-Kristo ngan han diri maihap nga katawohan nagpapamatuod han daku nga kapirdihan ni Satanas nga Yawa.

Ano an Mahitatabo ha Tidaraon?

Magpapadayon ba ha waray kataposan an mga pag-eksperimento han katawohan ha magkalainlain nga mga porma hin gobyerno? Hi propeta Daniel nagtagna: “Ha mga adlaw hito nga kahadian an Dios ha langit magpapabangon hin usa nga ginhadian, nga diri gud magugunaw, diri man an kagamhanan hini itatapod ha iba nga katawohan; kondi ini magpipinitpinit ngan mag-aanaw hini ngatanan nga ginhadian, ngan ini matindog ha kadayonan.” (Daniel 2:44) An Ginhadian nga gintutukod han Dios ha langit usa ka langitnon nga gobyerno nga pagmamandoan ni Jesu-Kristo. Ito mismo an Ginhadian nga igintutdo ni Jesus ha iya mga sumurunod nga ig-ampo. (Mateo 6:9, 10) Bubungkagon hito nga Ginhadian an ngatanan nga mga gobyerno han katawohan ha “[tiarabot nga] pakipag-away han daku nga adlaw han Dios, nga Makagarahum” ngan makakaapekto ito ha bug-os nga tuna.—Pahayag 16:14, 16.

Ano an mahitatabo kan Satanas? Iginhuhulagway han Biblia ini nga panhitabo ha tidaraon: “Gindakop [han anghel ni Jehova] an Dragon, an daan nga halas, nga amo an Yawa ngan Satanas, ngan gin-gapos hiya hin usa ka yukot ka tuig, ngan ilinabog niya hiya ngadto ha atabay nga waray sag-od, ngan sadhan ito, ngan selyohan ito ha bawbaw niya, basi nga diri na niya paglimbongan an mga nasud, ngada ha katapos han usa ka yukot ka tuig.” (Pahayag 20:1-3) Magtitikang la an Usa ka Yukot ka Tuig nga Pagmando ni Jesu-Kristo katapos ihulog hi Satanas ha pagkawaray-buruhaton ha atabay nga waray sag-od.

Magigin maopay gud nga lugar ini nga tuna hito nga panahon! Mawawaray na an karaotan ngan adton nagbubuhat hito. An Biblia nagsasaad: “Paglalaglagon an mga magburuhat hin maraot . . . Kondi an maaghop makakapanunod han tuna, ngan maglilipay hira tungod han kahuraan han kamurayawan.” (Salmo 37:9-11) An ira kamurayawan diri tatarhugon hin bisan ano—tawo man o hayop. (Isaias 11:6-9) Bisan an minilyon, nga tungod han pagin inosente ngan tungod han kawaray higayon nga makilala hi Jehova, dinapig ha Yawa ha naglabay, babanhawon ngan tututdoan mahitungod han Dios.—Buhat 24:15.

Ha ikatarapos han Usa ka Yukot ka Tuig nga Pagmando, an tuna magigin sugad hin paraiso an kahimtang, ngan an katawohan nga aada hito nadara na ha kahingpitan. Katapos, bubuhian hi Satanas hin “halipotay nga oras,” ngan katapos hito bubungkagon na hiya ha waray kataposan kaupod han ngatanan nga mga nakontra ha pagmando han Dios.—Pahayag 20:3, 7-10.

Kan Kanay Ka Madapig?

An ika-20 ka siglo usa ka panahon nga nagsabwag hin kadaot hi Satanas ha tuna. Kondi, imbes  nga magpasabot nga nagdaog na hiya, an mga kahimtang ha tuna nagtitigaman nga aada na kita ha kataposan nga mga adlaw hinin maraot nga kalibotan. (Mateo 24:3-14; Pahayag 6:1-8) Diri an duro nga karaotan ha tuna o an ideya han kadam-an an nagpapakita kon hin-o an nagdaog na. An magpapakita amo an kon kan kanay paagi han pagmando an gimaopayi ngan kon may-ada ba nag-aalagad ha Dios tungod han gugma. Sumala ha resulta han duha nga isyu, an kadaogan kan Jehova.

Kon an panahon nga igintutugot han Dios nagpamatuod na nga sayop hi Satanas, kay ano nga gintutugotan han Dios nga magpadayon an karaotan? Hi Jehova nagpapailob ‘tungod kay diri niya buot nga may-ada mawara, kondi nga an ngatanan magbasol.’ (2 Pedro 3:9) Kaburut-on han Dios “nga an ngatanan nga mga tawo maluwas, ngan nga makadangat ha pagkilala han kamatuoran.” (1 Timoteo 2:4) Hinaot gamiton mo an nabibilin nga panahon ha pag-aram ha Biblia ngan ‘pagkuha hin kahibaro mahitungod han amo la nga totoo nga Dios ngan ha usa nga iya sinugo, hi Jesu-Kristo.’ (Juan 17:3, NW) Malilipay an mga Saksi ni Jehova nga buligan ka nga magkaada hito nga kahibaro basi ikaw liwat makaupod han minilyon nga natindog hin marig-on dapig ha madaugon.

[Mga Retrato ha pahina 5]

Pinaagi han pagtipig han integridad, an mga Saksi ni Jehova naghahatag hin dugang nga ebidensya ha kapirdihan ni Satanas

[Retrato ha pahina 7]

Damu an mga maunungon nga nadapig kan Jehova