“An Tulo nga Lalaki nga Makinaadmananon”—Hin-o Hira?

An mga kiritaon han katawo ni Jesus agsob nga nagpapakita hin tulo nga lalaki nga higlawig an bado upod an ira mga kamelyo, nga tiarabot ha kuwadra diin an bata nga hi Jesus iginbutang ha usa nga tubungan. An mga bisita nga mag-opay an mga bado kasagaran nga tinatawag nga an tulo nga lalaki nga makinaadmananon. Ano an ginsisiring han Biblia mahitungod ha ira?

Sumala ha Biblia, an tinatawag nga mga lalaki nga makinaadmananon “tikang ha sinirangan,” ngan didto nira hinbaroan an mahitungod han katawo ni Jesus. (Mateo 2:1, 2, 9) Sigurado nga maiha an biyahe hini nga mga lalaki pakadto ha Judea. Han ha kataposan ira hin-agian hi Jesus, diri na hiya usa nga natawo pa la nga minasus-an ha kuwadra. Lugod, hin-agian han mga lalaki hi Maria ngan “an bata” nga naukoy ha balay.—Mateo 2:11.

Tinatawag han Biblia ini nga mga lalaki nga mga mago, o “mga astrologo,” ngan diri ito nag-uunabi kon pira hira. An The Oxford Companion to the Bible nasiring: “An kalabotan han mahika ngan astrolohiya nakikita ha interes han mga bisita ha bitoon nga naggiya ha ira ngadto ha Betlehem.” Matin-aw nga ginkukondenar han Biblia an ngatanan nga klase han mahika ngan an Babilonyahanon nga buhat ha pangalimbasog nga makakuha hin impormasyon tikang ha mga bitoon.—Deuteronomio 18:10-12; Isaias 47:13.

An impormasyon nga iginhatag ngada hini nga mga lalaki nagresulta hin maraot. Naaghat hito an nangangabugho nga kasina han maraot nga hi Hadi Herodes. Salit nagresulta ini han pagpalagiw ni Jose, Maria, ngan Jesus ngadto ha Ehipto ngan han pagpataya han ngatanan nga kabataan nga lalaki ha Betlehem “tikang ha duha ka tuig an edad ngan ha ubos pa.” Ginsiguro hin maopay ni Herodes an panahon han katawo ni Jesus sumala ha iya hinbaroan tikang ha mga astrologo. (Mateo 2:16) Tungod han ngatanan nga problema nga nahimo han ira pagbisita, makatadunganon an pagsiring nga an bitoon nga ira hinkit-an ngan an mensahe mahitungod han “usa nga natawo nga hadi han mga Judio” nagtikang ha kaaway han Dios, hi Satanas nga Yawa, nga naruyag nga patayon hi Jesus.—Mateo 2:1, 2.