Sumat han mga Parasamwak han Ginhadian

An mga Kingdom Hall Abrido Para ha Ngatanan

SAMTANG ginbabansay an iya mga disipulo para ha ministeryo ha publiko, gindasig hira ni Jesu-Kristo nga “[magwali] didto ha mga kabubungan.” (Mateo 10:27) Oo, kinahanglan nira buhaton an ira Kristiano nga ministeryo ha kadaygan, nga bug-os nga nakikita han publiko. Pinaagi han pag-aplikar han prinsipyo hini nga sagdon, an buruhaton han mga Saksi ni Jehova gindudumara liwat ha kadaygan. Ini nga pagin dayag nakakabulig ha mga Saksi nga malamposan an pagkontra ngan magkaada maopay nga reputasyon.

Bisan kon an mga katirok han mga kongregasyon han mga Saksi ni Jehova abrido ha publiko, an maraot nga ideya an nagigin hinungdan nga mag-alang an iba nga mga tawo ha pagsulod ha Kingdom Hall. Ini an kahimtang ha Finland. Nag-aalang la an iba ha pagkadto ha bag-o nga mga lugar. Kon gintutukod an bag-o nga Kingdom Hall o gin-aayad an daan nga katirokan, kasagaran nga ginhihikay an pagin abrido han pasilidad ha publiko. Mahimo himoon an espesyal nga pangalimbasog ha pagdapit han mga amyaw ha pagbisita ha Kingdom Hall ngan magin pamilyar ha buruhaton han mga Saksi ni Jehova.

Ha usa nga lugar, an mga Saksi naghikay hin panaltag hin mga magasin ha adlaw mismo nga abrido an ira bag-o nga Kingdom Hall ha publiko. Duha nga Saksi an iginkaistorya hin lagas nga lalaki nga nagsiring nga naruyag hiya pagbasa han Barantayan ngan Awake! nga mga magasin. Ginsumatan hiya han kabugtoan nga abrido an pasilidad ha publiko ngan nagtanyag ha pag-agi ha iya basi ig-upod ha Kingdom Hall. An lalaki nagsiring nga malilipay hiya ha pag-upod ha ira. An iya asawa, tungod kay namamati ha pag-istorya, nagsinggit, “Maupod liwat ako!”

Ha pagsulod ha Kingdom Hall, an lalaki nagkita ha palibot ngan nagsiring: “Diri man ngay-an masirom an kolor hini. Aw, maopay ini pagkit-on ngan malamrag. Ginsumatan ako nga masirom an kolor han Kingdom Hall!” Nagpabilin anay an mag-asawa ngan naghangyo hin pipira han mga literatura nga nakita didto.

Usa nga kongregasyon an naruyag nga ipaanunsyo ha lokal nga peryodiko nga abrido an pasilidad ha publiko durante han dedikasyon han ira Kingdom Hall. Han makarawat an pahibaro mahitungod han okasyon, an nangunguna nga editor nagsuhestyon nga magsurat hin artikulo may kalabotan hito. Inuyon an kabugtoan, ngan paglabay hin halipot nga panahon, an katunga-han-pahina nga maopay nga artikulo nakita ha peryodiko, nagsusumat han okasyon ngan nagsasaysay han mga buruhaton han lokal nga kongregasyon han mga Saksi ni Jehova.

Han maipublikar an artikulo, iginkita an usa nga lagas nga Saksi hin amyaw nga nagsiring ha iya: “May-ada maopay nga artikulo mahitungod han mga Saksi ni Jehova ha peryodiko yana nga adlaw!” Nakagsangyaw an bugto nga babaye ngan ha urhi nakapahamutang ha iya hin brosyur nga Jehovah’s Witnesses in the Twentieth Century.

Dugang pa ha pagtadong han pipira nga sayop nga mga ideya mahitungod han mga Saksi ni Jehova, an sugad nga mga kahikayan may kalabotan ha pagin abrido han mga pasilidad ha publiko ngan mga programa han dedikasyon ha bag-o nga mga Kingdom Hall nakaaghat ha mga magwarali pinaagi han pagdasig ha ira ha pagdapit hin dugang nga mga tawo nga tumambong ha mga katirok. Oo, ha damu nga mga nasud, upod na ha Finland, nahibaro na an mga tawo nga an mga Kingdom Hall han mga Saksi ni Jehova abrido para ha ngatanan.