Paonan-o Ka Mabubuligan han Totoo nga mga Santo?

HA Kasuratan, an Griego nga pulong para ha “santo” ha pipira nga mga bersyon mahimo ighubad nga “baraan nga usa.” Kan kanay aplikado an termino? “Ha pulong nga para ha damu, sugad kon nag-uunabi ha mga tumuroo,” siring han An Expository Dictionary of New Testament Words, “nagtutudlok ito ha ngatanan nga mga tumuroo ngan diri aplikado la ha mga tawo nga baraan hinduro, o ngada hadton, ha kamatay, kinilala tungod han makatirigamnan nga mga buhat han pagin santo.”

Salit gintawag ni apostol Pablo an ngatanan nga siyahan nga mga Kristiano sugad nga totoo nga mga santo, o mga baraan. Pananglitan, iya iginpahinungod an usa nga surat nga iginsurat ha siyahan nga siglo K.P. ngadto “ha singbahan han Dios nga aadto ha Korinto, lakip an ngatanan nga mga baraan nga aadto ha bug-os nga [Romano nga probinsya han] Akaya.” (2 Korinto 1:1) Ha urhi, hi Pablo nagsurat ngadto “ha ngatanan nga mga aadto ha Roma, mga hinigugma han Dios, mga gintawag nga mga magigin baraan [“mga santo,” NW].” (Roma 1:7) Ini nga mga baraan matin-aw nga waray pa mamatay, waray man hira kilal-a tungod han bantogan nga pagkamaopay, nga labaw ha iba nga mga tumuroo. Ha ano nga basihan ginkilala hira sugad nga mga santo?

Ginpakabaraan han Dios

An Pulong han Dios nagpapakita nga an usa ka tawo diri gindideklara nga santo pinaagi han mga tawo o han usa nga organisasyon. An Kasuratan nasiring: “[An Dios] nagluwas ha aton, ngan nagtawag ha aton hin baraan nga pagtawag, diri pinaagi ha aton mga buhat, kondi pinaagi ha iya kalugaringon nga tuyo ngan grasya.” (2 Timoteo 1:9) An baraan nga usa ginpakabaraan pinaagi han pagtawag ni Jehova, sumala han diri-takos nga pagkabuotan han Dios ngan uyon ha Iya katuyoan.

An mga baraan han Kristiano nga kongregasyon bahin han “usa nga bag-o nga tugon.” An iginbubo nga dugo ni Jesu-Kristo nagpaparig-on hini nga kauyonan ngan nagbabaraan han mga sakop hito. (Hebreo 9:15; 10:29; 13:20, 24) Tungod kay nalimpyohan ha paniplatan han Dios, hira an ‘baraan nga pagkasaserdote ngan naghahalad hin espirituwal nga mga halad nga kinaruruyagan han Dios pinaagi kan Jesu-Kristo.’—1 Pedro 2:5, 9.

Pagsangpit Para han Bulig Ngan Pagin Manlalaban han mga Santo

Tungod kay minilyon an natoo nga an “mga santo” makakahatag hin espesyal nga gahum ha mga tumuroo, gindadayaw hira han minilyon pinaagi ha paggamit hin mga rebulto o pagsangpit ha ira sugad nga mga manlalaban.  Katutdoan ba ini han Biblia? Ha Sermon ha Bukid, gintutdoan ni Jesus an iya mga sumurunod kon paonan-o dumaraon ha Dios, nasiring: “Busa mag-ampo kamo sugad hini nga paagi: Amay namon, nga aada ka ha langit, gindadayaw an imo ngaran.” (Mateo 6:9) Husto nga igpahinungod an mga pag-ampo kan Jehova nga Dios la.

Basi pamatud-an an pagin manlalaban han “mga santo,” gingamit han pipira nga mga teologo an Roma 15:30, diin aton mababasa: “Pinanginginyupo ko ha iyo, mga kabugtoan, tungod ha aton Ginoo Jesu-Kristo, ngan ha gugma han espiritu santo, nga magtinguha gud kamo upod ha akon ha iyo mga pag-ampo ha Dios tungod ha akon.” Gindadasig ba ni Pablo adton mga tumuroo nga mag-ampo ha iya o magsangpit ha iya ngaran ha pagdaraon ha Dios? Diri. Bisan kon gindadasig ha Biblia an mga pag-ampo para ha totoo nga mga santo, o mga baraan, waray kita sugoa han Dios nga mag-ampo ha o pinaagi han sugad nga mga baraan.—Filipos 1:1, 3, 4.

Kondi, an Dios nagpili hin usa nga Manlalaban para han aton mga pag-ampo. “Ako amo an dalan, ngan an kamatuoran, ngan an kinabuhi,” siring ni Jesu-Kristo. “Waray bisan hin-o nga maabot ha Amay, kon diri maagi ha akon.” Hi Jesus nagsiring liwat: “Bisan ano nga bagay an iyo pangaroon ha akon ngaran, ini akon bubuhaton, basi an Amay paghimayaon ha Anak. Bisan ano an iyo pangaroon ha akon ngaran, iton akon hihimoon.” (Juan 14:6, 13, 14) Makakasarig kita han pagkadisidido ni Jehova ha pamati han mga pag-ampo pinaagi han ngaran ni Jesus. Mahitungod kan Jesus, an Biblia nasiring: “Sadang man gud hiya makaluwas han ngatanan nga nahirani ha Dios pinaagi ha iya, tungod kay hiya nabuhi ha gihapon basi ha pag-ampo tungod ha ira.”—Hebreo 7:25.

Kon andam hi Jesus magin manlalaban para ha aton, kay ano nga an “mga santo” agsob nga ginsasangpit ha pag-ampo han mga magsiringba ha Kakristianohan? Ha iya libro nga The Age of Faith, gin-unabi han historyador nga hi Will Durant an tinikangan hini nga buhat. Bisan kon naoobserbahan nga ginkakahadlokan an Makagarahum-ha-ngatanan nga Dios ngan baga hin mas madagmit madaraon hi Jesus, hi Durant nasiring: “An usa haros diri nasari nga direkta nga makiistorya [kan Jesus] katapos igbalewaray gud an iya Mga Kapahayagan. Baga hin mas maaramon an pagpahinungod han pag-ampo ha usa nga santo nga aadto na ha langit tungod kay opisyal nga gindeklara hiya nga santo pinaagi han kanonisasyon, ngan maghangyo o mangamuyo han iya pagin manlalaban kan Kristo.” Makatadunganon ba ini nga mga kabaraka  mahitungod han direkta nga pag-ampo ha Dios pinaagi kan Jesus?

An Biblia nagtututdo ha aton nga pinaagi kan Jesus magkakaada kita “kagawasan ha pagyakan ngan pagdaraon nga may pagsarig” ha pag-ampo ngadto ha Dios. (Efeso 3:11, 12, NW) An Makagarahum-ha-ngatanan nga Dios diri hirayo hinduro ha katawohan ha pagpamati ha aton mga pag-ampo. Hi salmista David may pagsarig nga nag-ampo: “O ikaw nga nabati hin pag-ampo, ngadto ha imo makanhi an ngatanan nga unod.” (Salmo 65:2) Imbes nga ipadara an gahum pinaagi han mga gamit han patay na nga “mga santo,” iginbububo ni Jehova an iya baraan nga espiritu ngada hadton nangangaro hito ha pag-ampo. Hi Jesus nangatadongan: “Kon kamo nga mga magraot, mahibabaro kamo paghatag hin mag-opay nga mga hatag ha iyo mga kabataan labi pa gud an iyo Amay nga langitnon, nga mahatag han espiritu santo ha mga nangangaro ha iya?”—Lukas 11:13.

An Bahin han mga Baraan

An mga baraan nga ginsuratan ni Pablo namatay mga siglo na an naglabay ngan, ha maabot nga panahon, makarawat han “pudongpudong han kinabuhi,” an pagkabanhaw ngadto ha langit. (Pahayag 2:10) An mga magsiringba ni Jehova nga Dios maaram nga an pagdayaw hini nga totoo nga mga santo diri-kasuratanhon ngan diri nakakahatag hin panalipod tikang ha sakit, natural nga mga kalamidad, problema ha pinansyal, kalagas, o kamatayon. Salit, bangin magpakiana ka, ‘Napaid gud ba ha aton an mga baraan han Dios? Sadang ba kita maglaom nga magios hira para ha aton?’

Bantogan nga gin-unabi an mga baraan ha usa nga tagna nga iginrekord ni Daniel. Han ikaunom ka siglo A.K.P., nakita niya an makatirigamnan nga bisyon, nga an katumanan hito naabot tubtob ha aton panahon. Ginawas ha dagat an upat nga makaharadlok nga mga mananap nga nagsisimbolo han mga gobyerno han tawo, nga diri makakatagbaw han totoo nga mga panginahanglan han katawohan. Katapos hi Daniel nagtagna: “Kondi an mga baraan han Gihihitaasi makarawat han ginhadian, ngan magtatag-iya han ginhadian ha kadayonan, bisan ha waray kataposan.”—Daniel 7:17, 18.

Ginparig-on ni Pablo ini nga “panurundon ha mga baraan,” an pagin kaupod nga mga manurunod ni Kristo ha mga langit. (Efeso 1:18-21) An dugo ni Jesus nag-abri han dalan para han 144,000 nga mga baraan nga mabanhaw ngadto ha langitnon nga himaya. Hi apostol Juan nagpahayag: “Bulahan ngan baraan an mahiangbit han siyahan nga pagkabanhaw: an ikaduha nga kamatayon waray na kagamhanan ha ira; kondi magkakahihimo hira nga mga saserdote han Dios ngan ni Kristo, ngan maghahadi hira upod niya hin usa ka yukot ka tuig.” (Pahayag 20:4, 6; 14:1, 3) Ha bisyon, hinbatian ni Juan an damu hinduro nga langitnon nga mga linarang nga nagkakanta ha atubangan han ginhimaya nga hi Jesus: “Ikaw an . . . nagpalit ngadto ha Dios pinaagi han imo dugo han mga tawo tikang ha tagsatagsa nga panon, ngan yinaknan, ngan katawohan, ngan nasud, ngan ginhihimo mo hira ngadto ha aton Dios nga ginhadian ngan mga saserdote; ngan naghahadi hira ha tuna.” (Pahayag 5:9, 10) Nagpapasarig gud ito! Ginpili hin maopay ni Jehova nga Dios mismo ini nga kalalakin-an ngan kababayin-an. Dugang pa, nag-alagad na hira nga matinumanon ha tuna, gin-aatubang an haros ngatanan nga problema nga naieksperyensyahan han katawohan. (1 Korinto 10:13) Salit, makakasiguro gud kita nga ini nga binanhaw nga mga baraan, o mga santo, magigin maloloy-on ngan masinabuton nga mga magmarando, gintatagad an aton mga kaluyahan ngan mga limitasyon.

Mga Bendisyon Ilarom han Pagmando han Ginhadian

Ha diri na maiha pagwawad-on han gobyerno han Ginhadian an ngatanan nga karaotan ngan pag-antos ha tuna. Hito nga panahon, an katawohan magigin duok ha Dios kay ha bisan kakan-o pa man. Hi Juan nagsurat: “Kitaa, an payag han Dios aada ha mga tawo, ngan mag-uukoy hiya upod nira, ngan hira magigin iya katawohan, ngan an Dios ha iya ngahaw maupod man ha ira.” Magdadara ini hin damu nga mga bendisyon ha katawohan, kay an tagna nagpapadayon: “Pagpapahiron niya an ngatanan nga luha tikang ha ira mga mata; ngan mawawaray  na kamatayon; ngan mawawaray na an kabidoan, bisan pagtangis, bisan kasakit pa gud: kay an siyahan nga mga bagay nag-agi na.”—Pahayag 21:3, 4.

Makalilipay gud ito nga panahon! An mga resulta han hingpit nga pagmando ni Kristo Jesus ngan han 144,000 nga mga baraan dugang nga iginsasaysay hini nga mga pulong nga nakarekord ha Mika 4:3, 4: “[Hi Jehova] maghuhukom han damu nga katawohan, ngan mahatag hin kahusayan mahitungod han magkusog nga mga nasud ha kahigrayoan: ngan ira hihimoon an ira mga kampilan nga mga arado, ngan an ira mga bangkaw nga mga garab nga ipangarapon; an nasud diri mawaay hin kampilan patok ha nasud, diri na man hira mag-aaram han away. Kondi hira an tagsatagsa nga tawo malingkod ha sirong han iya balagon han ubas ngan ha sirong han iya kahoy nga igera; ngan waray bisan hin-o nga maghahadlok ha ira: kay an baba ni Jehova han mga kasundalohan nagyakan hini.”

An pagdapit nga makigbahin ha sugad nga mga bendisyon iginpapahayag han mga baraan. An totoo nga mga santo, nga ginsisimbolohan han usa nga nobya, padayon nga nasiring: “Kadi.” An bersikulo nagpapadayon: “Ngan an nakakabati, pasiringa hiya, kadi. Ngan an inuuhaw, pakadia; an buot uminom, painma hiya han tubig han kinabuhi ha waray bayad.” (Pahayag 22:17) Ano an nahiuupod ha “tubig han kinabuhi”? Upod han iba nga mga butang, an husto nga kahibaro ha mga katuyoan han Dios. Ha pag-ampo ngadto ha Dios, hi Jesus nagsiring: “Ini amo an kinabuhi nga waray kataposan, nga hira kumilala ha imo, nga amo la an matuod nga Dios, ngan hi Jesu-Kristo nga imo ginpakanhi.” (Juan 17:3) Ini nga kahibaro makukuha pinaagi han regular nga pag-aram han Biblia. Makalilipay gud nga pinaagi han Pulong han Dios masasabtan naton an totoo nga pangirilal-an han mga baraan ngan mahibabaroan kon paonan-o niya gagamiton hira para ha waray kataposan nga kapulsanan han katawohan.

[Retrato ha pahina 4]

Hi Pablo nagsurat hin giniyahan han Dios nga mga surat ngadto ha totoo nga mga santo

[Retrato ha pahina 4, 5]

An matinumanon nga mga apostol ni Jesus nagin totoo nga mga santo, o mga baraan

[Retrato ha pahina 6]

May-pagsarig nga makakag-ampo kita ngadto ha Dios pinaagi kan Jesu-Kristo

[Retrato ha pahina 7]

An binanhaw nga mga santo, o mga baraan, magigin mapinairon nga mga magmarando ha bug-os nga tuna