“Iya Ako Gintutugwayan ha Ligid han Malinaw nga Katubigan”

HA MAPASO nga klima han mga katunaan ha Biblia, an mga karnero kinahanglan uminom kada adlaw. Salit, usa nga importante nga bahin han trabaho han magbarantay han mga karnero amo an paghatag hin tubig ha iya panon. Usahay ginpapainom han mga magbarantay an ira mga panon hin tubig tikang ha bubon, iginhuhuwad an tubig ha mga surudlan basi makainom an mga karnero. (Genesis 29:1-3) Kondi, labi na ha panahon nga mauran, an lugar ha palibot han gudtiay nga mga sapa ngan mga salog nagigin mamurayawon, “tubigon nga mga pahuwayan.”—Salmo 23:2, NW.

An maopay nga magbarantay kinahanglan maaram kon diin hiaagian an tubig ngan angayan nga sabsaban para han iya panon. An iya kahibaro ha lugar magsisiguro han kaluwasan han iya mga karnero. Iginpariho ni David, nga naggasto hin damu ka tuig ha pagpasabsab han iya mga karnero ha kabungtoran han Judea, an espirituwal nga giya han Dios ha usa nga magbarantay nga nagtutugway han iya mga karnero ngadto ha maopay nga mga sabsaban ngan ngadto ha naghahatag-kinabuhi nga tubig. “Iya ako gintutugwayan ha ligid han malinaw nga katubigan,” siring ni David sumala ha usa nga hubad.—Salmo 23:1-3, New International Version.

Paglabay hin mga tuig, pinaagi han iya propeta nga hi Esekiel, ginamit ni Jehova an pariho nga ilustrasyon. Nagsaad hiya ha pagtirok han iya katawohan nga nagpatlaag ha katunaan, sugad hin usa nga magbarantay han mga karnero nga nagtitirok han iya mga karnero. “Akon hira dadad-on . . . ha ira kalugaringon nga tuna; ngan akon hira panunubongan dida ha kabukiran ha Israel, ha ligid han mga agianan han tubig,” iya ginpasarig hira.—Esekiel 34:13.

Hi Jehova nga Dios interesado gud liwat ha pagtagana hin espirituwal nga tubig. Iginsasaysay han libro nga Pahayag an “salog nga tubig han kinabuhi” nga naawas tikang ha trono han Dios. (Pahayag 22:1) An pagdapit nga uminom tikang hini nga salog iginpapaabot ha ngatanan nga mga tawo. “An buot uminom, [makakainom] hiya han tubig han kinabuhi ha waray bayad.”—Pahayag 22:17.

Inin simboliko nga tubig han kinabuhi nagrirepresentar han mga tagana han Dios para han kinabuhi nga waray kataposan. An bisan hin-o makakainom hito nga tubig pinaagi han ‘pagkuha hin kahibaro mahitungod han amo la nga matuod nga Dios ngan ha usa nga iya ginpakanhi, hi Jesu-Kristo.’—Juan 17:3, NW.