An Moderno nga Interes ha “mga Santo”

“Nahinunumdoman ba naton an panahon nga baga hin nasumhan na kita mahitungod han mga bayani? Baga hin waray ito makaapekto ha 4.2 ka milyon nga Amerikano nga nagkita han lubong ni Mother Teresa han Septyembre 13. Tikang han hiya mamatay han Septyembre 5, waray undang nga naghihinangyo an mga tawo ha Vatican nga pormal nga ideklara hiya nga santa. Gutiay la nga mga tawo an nagruruhaduha nga mahitatabo ito.”—Sun-sentinel, Estados Unidos, Oktubre 3, 1997.

AN PAGBULIG ha igkasi-tawo ngan an mahinatagon nga buhat han Katoliko nga misyonera nga hi Mother Teresa gintatagad han damu sugad nga kapahayagan han pagin totoo nga santa. May-ada mga sugad-bayani ha iba nga mga relihiyon. Kondi, bangin waray opisyal nga ginkikilala sugad hadton gindeklara nga santo han Iglesia Romana Katolika.

Durante han iya termino, gindeklara ni Papa John Paul II an pagin santo han sobra 450 ka tawo pinaagi han kanonisasyon, sobra ha kadamu han igindeklara nga santo han ngatanan iba nga mga papa han ika-20 ka siglo. a Kay ano nga may-ada nagpapadayon nga debosyon ha “mga santo,” nga damu ha ira an diri duro kakilala han kadam-an nga mga Katoliko?

An teologo han Notre Dame University nga hi Lawrence Cunningham nagsasaysay: “An ideya nga posible nga may-ada baraan ha kalibotan nag-aaghat han interes han mga tawo. An mga santo nagpapakita han posibilidad han pagkinabuhi nga sugad hin bayani, bisan yana nga panahon.” Dugang pa, gintotoohan nga an “mga santo” may-ada espesyal nga paagi ha pagdaraon ha Dios, nga nakakahimo ha ira nga epektibo nga mga manlalaban para han mga buhi. Kon may nabibilngan nga mga gamit o patay nga lawas han usa nga “santo,” gindadayaw ini tungod kay tinotoohan nga may-ada gahum nga nagawas tikang hito.

An Catechism of the Council of Trent, nga iginpublikar han ika-16 ka siglo ha pagparig-on utro han doktrina han Katoliko, nagsiring: “Husto kita ha pagsiring, nga ha pagdayaw ha mga santo ‘nga nagkamatay ha Ginoo,’ ha paghangyo han ira pagin manlalaban, ngan ha pagdayaw han ira sagrado nga mga gamit ngan mga abo, diri gud naiibanan, kondi nadudugangan pa gud an himaya han Dios, sumala ha sukol nga gin-aaghat ngan ginpaparig-on an paglaom han Kristiano, ngan hiya mismo naaaghat nga subaron an maopay nga moralidad han mga santo.” (The Catechism of the Council of Trent, 1905) An totoo nga mga Kristiano sigurado nga naruruyag nga magkaada maopay nga kinabuhi, nga dumaraon ha Dios ha husto nga paagi, ngan kumarawat hin bulig tikang ha Dios. (Jakobo 4:7, 8) Salit, sumala ha Pulong han Dios, hin-o an kuwalipikado nga magin totoo nga mga santo? Ngan ano an ira mga bahin?

[Footnote]