Ipakita an Mahigugmaon nga Pagkabuotan ha mga Nanginginahanglan

“Buhata ha usa kag usa an mahigugmaon nga pagkabuotan.”—SAKARIAS 7:9.

1, 2. (a) Kay ano nga sadang ipakita naton an mahigugmaon nga pagkabuotan? (b) Ano nga mga pakiana an paghihisgotan naton?

 AN Pulong ni Jehova nga Dios nagsasagda ha aton nga higugmaon an ‘mahigugmaon nga pagkabuotan.’ (Mika 6:8) Naghahatag liwat ito ha aton hin mga hinungdan kon kay ano nga sadang buhaton naton ito. An usa nga hinungdan, ‘an tawo nga may mahigugmaon nga pagkabuotan nagbubuhat hin maopay ha iya kalugaringon nga kalag.’ (Proberbios 11:17) Totoo gud! An pagpakita hin mahigugmaon nga pagkabuotan, o maunungon nga gugma, nag-aaghat hin mapaso ngan nagpapadayon nga duok nga relasyon ha iba. Sugad nga resulta, magkakaada kita maunungon nga mga sangkay—usa gud ka presyoso nga balos!—Proberbios 18:24.

² Dugang pa, an Kasuratan nagsusumat ha aton: “Hiya nga nasunod ha katadongan ngan [mahigugmaon nga pagkabuotan] makakaagi hin kinabuhi.” (Proberbios 21:21) Oo, hihigugmaon kita han Dios ngan maghahatag ito ha aton hin higayon ha pagpahimulos han tidaraon nga mga bendisyon, upod na an kinabuhi nga waray kataposan tungod han aton pagbuhat hin mahigugmaon nga pagkabuotan. Kondi paonan-o naton maipapakita an mahigugmaon nga pagkabuotan? Kan kanay naton sadang ipakita ito? Ngan naiiba ba an mahigugmaon nga pagkabuotan ha normal nga tawhanon nga pagkabuotan o ha pagkabuotan ha kabug-osan?

 Tawhanon nga Pagkabuotan Ngan Mahigugmaon nga Pagkabuotan

 3. Paonan-o naiiba an mahigugmaon nga pagkabuotan ha tawhanon nga pagkabuotan?

³ An normal nga tawhanon nga pagkabuotan ngan an mahigugmaon nga pagkabuotan magkaiba ha magkalainlain nga mga paagi. Pananglitan, adton nagpapakita hin tawhanon nga pagkabuotan agsob nga nagbubuhat hito nga waray hilarom ngan personal nga pagbati, o relasyon, ha mga indibiduwal nga ira gintatrato ha buotan nga paagi. Kondi, kon ipinapakita naton an mahigugmaon nga pagkabuotan ha usa, mahigugmaon nga nagigin duok kita hito nga tawo. Ha Biblia, an mga kapahayagan han mahigugmaon nga pagkabuotan butnga han mga tawo mahimo igbasar ha naeksister na nga mga relasyon. (Genesis 20:13; 2 Samuel 3:8; 16:17) O mahimo ito igbasar ha mga relasyon nga resulta han nauna na nga mga buhat han mahigugmaon nga pagkabuotan. (Josue 2:1, 12-14; 1 Samuel 15:6; 2 Samuel 10:1, 2) Ha pag-ilustrar hini nga kaibahan, aton itanding an duha nga susbaranan ha Biblia, usa han tawhanon nga pagkabuotan ngan usa han mahigugmaon nga pagkabuotan nga iginpahayag butnga han mga tawo.

4, 5. Paonan-o an duha nga susbaranan ha Biblia nga iginsaysay dinhi nagpapakita han kaibahan butnga han tawhanon nga pagkabuotan ngan han mahigugmaon nga pagkabuotan?

⁴ Usa nga susbaranan han tawhanon nga pagkabuotan amo an may kalabotan ha usa ka grupo han mga tawo nga nalunod an sinasakyan nga barko, nga upod hi apostol Pablo. Sinampig hira ha baybayon ha isla han Malta. (Buhat 27:37–28:1) Bisan kon an mga taga-Malta waray nauna nga obligasyon ha sinampig nga mga manarakay ngan waray relasyon ha ira, maabiabihon nga ginkarawat han mga taga-isla an mga estranghero, ipinapakita ha ira an ‘diri ordinaryo nga tawhanon nga pagkabuotan.’ (Buhat 28:2, 7) Binuotan an ira pagkamaabiabihon, kondi nauyon la ito ha higayon ngan ipinakita ha mga estranghero. Salit, tawhanon nga pagkabuotan ito.

⁵ Ha pagtanding, tagda an pagkamaabiabihon nga ipinakita ni Hadi David kan Mepiboset, an anak han iya sangkay nga hi Jonatan. Hi David nagsiring kan Mepiboset: “Ikaw makakakaon han tinapay ha dayoday dida ha akon lamesa.” Ha pagsaysay kon kay ano nga iya ginhimo ini nga kahikayan, hi David nagsiring ha iya: “Ha waray ruhaduha magpapakita ako ha imo hin [mahigugmaon nga pagkabuotan] tungod kan Jonatan nga imo amay.” (2 Samuel 9:6, 7, 13) An nagpapadayon nga pagkamaabiabihon ni David husto nga tinatawag nga kapahayagan han mahigugmaon nga pagkabuotan, diri la tawhanon nga pagkabuotan, tungod kay ebidensya ito han iya pagkamaunungon ha naparig-on na nga relasyon. (1 Samuel 18:3; 20:15, 42) Sugad man yana nga panahon, an mga surugoon han Dios nagpapakita hin tawhanon nga pagkabuotan ha katawohan ha kabug-osan. Kondi, nagpapahayag hira hin nagpapadayon nga mahigugmaon nga pagkabuotan, o maunungon nga gugma, ha ira nga may-ada liwat relasyon nga inuyonan han Dios.—Mateo 5:45; Galasia 6:10.

 6. Ano nga mga kalidad han mahigugmaon nga pagkabuotan nga iginpapahayag butnga han mga tawo an iginpapatin-aw dida ha Pulong han Dios?

⁶ Ha pagpatin-aw han pipira nga dugang nga mga kalidad han mahigugmaon nga pagkabuotan, aton paghihisgotan hin madaliay an tulo nga asoy ha Biblia nga nagpapakita hini nga kalidad. Tikang hini matitigamnan naton nga an mahigugmaon nga pagkabuotan nga iginpapahayag han mga tawo (1) iginpapahayag pinaagi han espisipiko nga mga buhat, (2) kinaburut-on nga iginpapahayag, ngan (3) ipinapakita labi na ha mga nanginginahanglan. Dugang pa, ipinapakita hini nga mga asoy kon paonan-o naton bubuhaton an mahigugmaon nga pagkabuotan yana nga panahon.

An Amay Nagpakita hin Mahigugmaon nga Pagkabuotan

 7. Ano an iginsumat han surugoon ni Abraham kan Betuel ngan Laban, ngan ano nga isyu an iginbangon han surugoon?

⁷ An Genesis 24:28-67 nagsasaysay han nahisalin nga bahin han istorya mahitungod han surugoon ni Abraham, nga gin-unabi ha nauna nga artikulo. Katapos makilala hi Rebeka, gindapit hiya ngadto ha balay han amay ni Rebeka, hi Betuel. ( Ge 24:1Bersikulo 28-32) Didto detalyado nga iginsumat han surugoon an iya pamiling hin usa nga maarasawa para han anak ni Abraham. ( Ge 24:1Bersikulo 33-47) Iya pinabug-atan nga iya gintagad an kalamposan nga iya nadangat na sugad nga tigaman tikang kan Jehova, “nga nagtutdo ha akon ha pagkuha han anak nga babaye han bugto han akon agaron para han iya anak.” ( Ge 24:1Bersikulo 48) An surugoon sigurado nga naglaom nga an iya sinsero nga pagsaysay han hitabo magkukombinse kan Betuel ngan ha iya anak nga lalaki nga hi Laban nga hi Jehova an nagbibendisyon hini nga toka. Ha kataposan, an surugoon nagsiring: “Kon kamo maruyag [pagbuhat hin  mahigugmaon nga pagkabuotan] ngan hin kamatuoran ha akon agaron, pagsumati ako: ngan kon diri, pagsumati ako; basi ako umatubang ha too o kon ha wala.”— Ge 24:1Bersikulo 49.

 8. Ano an reaksyon ni Betuel ha mga kahimtang may kalabotan kan Rebeka?

⁸ Hi Jehova nagpakita na hin mahigugmaon nga pagkabuotan kan Abraham. (Genesis 24:12, 14, 27) Magigin disidido ba hi Betuel ha pagbuhat liwat hito pinaagi han pagtugot kan Rebeka nga umupod ha surugoon ni Abraham? An mahigugmaon nga pagkabuotan ba han tawo idudugang ha mahigugmaon nga pagkabuotan han Dios basi bug-os nga matuman an katuyoan hito? O mapapakyas ba an hirayo nga biyahe han surugoon? Nakaliaw gud ha surugoon ni Abraham nga mabatian hi Laban ngan hi Betuel nga nasiring: “Ini nga bagay ginowa tikang kan Jehova.” ( Ge 24:1Bersikulo 50) Kinilala nira an pagmaniobra ni Jehova han mga kahimtang ngan kinarawat dayon an iya desisyon. Sunod, iginpahayag ni Betuel an iya mahigugmaon nga pagkabuotan pinaagi han pagdugang: “Kitaa, hi Rebeka aada ha atubangan mo, kuhaa hiya, ngan lumakat, ngan himoa hiya nga asawa han anak han imo agaron, sugad han kan Jehova iginyakan.” ( Ge 24:1Bersikulo 51) Kinaburut-on nga inupod hi Rebeka ha surugoon ni Abraham, ngan waray pag-iha nagin hinigugma nga asawa hiya ni Isaak.— Ge 24:1Bersikulo 49, 52-58, 67.

Mahigugmaon nga Pagkabuotan nga Ipinakita han Anak

9, 10. (a) Ginhangyo ni Jakob an iya anak nga hi Jose nga buhaton an ano para ha iya? (b) Paonan-o ipinakita ni Jose an mahigugmaon nga pagkabuotan ha iya amay?

⁹ An apo ni Abraham nga hi Jakob nakakarawat liwat hin mahigugmaon nga pagkabuotan. Sugad han igin-aasoy han Genesis kapitulo 47, hi Jakob nag-uukoy hito nga panahon ha Ehipto, ngan “an panahon nagtitikahirani na nga [hiya] mamamatay.” (Ge 47 Bersikulo 27-29) Nabaraka hiya tungod kay mamamatay hiya ha gawas han tuna nga iginsaad han Dios kan Abraham. (Genesis 15:18; 35:10, 12; 49:29-32) Kondi, diri karuyag ni Jakob nga iglubong ha Ehipto, salit naghikay hiya nga dad-on an iya patay nga lawas ngadto ha tuna han Kanaan. Hin-o an magigin mas angayan ha pagsiguro nga matuman an iya karuyag kay ha iya maimpluwensya nga anak, hi Jose?

¹⁰ An asoy nasiring: “Gintawag [ni Jakob] an iya anak nga hi Jose, ngan siniring ha iya: Kon niyan ako nakaagi hin kalooy ha imo mga mata, . . . buhata ha akon an [mahigugmaon nga pagkabuotan] ngan [pagkamasasarigan]; ayaw ako iglubong ha tuna ha Ehipto; nanginginyupo ako ha imo. Kondi kon kumaturog ako upod han akon mga amay, imo ako igawas ha Ehipto, ngan iglubong ako didto ha ira mga lubnganan.” (Genesis 47:29, 30) Hi Jose nagsaad nga bubuhaton niya ini nga hangyo, ngan waray pag-iha katapos hito namatay hi Jakob. Gindara ni Jose ngan han iba nga mga anak nga kalalakin-an ni Jakob an iya lawas “ngadto ha tuna han Kanaan, ngan iginlubong hiya ha lungib han hagna ha Makpela, nga kan Abraham pinalit upod han hagna.” (Genesis 50:5-8, 12-14) Hito nga paagi ginbuhat ni Jose an mahigugmaon nga pagkabuotan ha iya amay.

Mahigugmaon nga Pagkabuotan Tikang ha Umagad nga Babaye

11, 12. (a) Paonan-o ipinakita ni Rut an mahigugmaon nga pagkabuotan kan Noemi? (b) Ha ano nga paagi nga ‘an kataposan nga pagpakita’ han mahigugmaon nga pagkabuotan ni Rut mas maopay kay han ‘ha siyahan’?

¹¹ An libro han Rut nagsasaysay kon paonan-o nakarawat han balo nga hi Noemi an mahigugmaon nga pagkabuotan tikang ha iya Moabita nga umagad nga hi Rut, nga usa liwat nga balo. Han nagdesisyon hi Noemi pagbalik ngadto ha Betlehem ha Juda, hi Rut nagpakita hin mahigugmaon nga pagkabuotan ngan determinasyon, nasiring: “Kon ngain ka kadto, maupod ako; ngan kon diin ka huron, aadto ako huhuron; an imo katawohan maaakon katawohan, ngan an imo Dios akon Dios.” (Rut 1:16) Ha urhi iginpahayag ni Rut an iya mahigugmaon nga pagkabuotan han iginsumat niya an iya pagkadisidido ha pag-asawa ha edaran na nga paryente ni Noemi nga hi Boas. a (Deuteronomio 25:5, 6; Rut 3:6-9) Iya ginsumatan hi Rut: ‘Nagpakita ka hin labaw nga mahigugmaon nga pagkabuotan ha kataposan kay ha siyahan, kay waray ka bumunyog ha mga batan-on nga kalalakin-an, kablas man o bahandianon.’—Rut 3:10.

¹² ‘An siyahan nga pagpakita’ han mahigugmaon nga pagkabuotan ni Rut nahitabo han binayaan niya an iya katawohan ngan duok nga nagpabilin upod ni Noemi. (Rut 1:14; 2:11) Bisan iton  nga buhat nalabawan han ‘kataposan nga pagpakita’ han mahigugmaon nga pagkabuotan—an pagkadisidido ni Rut ha pag-asawa kan Boas. Makakahatag na yana hi Rut hin usa nga manurunod para kan Noemi, nga diri na makakapanganak. Nahitabo an kasal, ngan han hi Rut ha urhi nanganak, an kababayin-an ha Betlehem nagsinggit: “May-ada usa nga anak nga lalaki nga natawo kan Noemi.” (Rut 4:14, 17) Hi Rut tinuod nga usa ka “babaye nga birilhon,” nga tungod hito ginbalosan ni Jehova hin maopay nga pribilehiyo nga magin kaapoy-apoyan ni Jesu-Kristo.—Rut 2:12; 3:11; 4:18-22; Mateo 1:1, 5, 6.

Iginpahayag Pinaagi han mga Buhat

13. Paonan-o iginpahayag ni Betuel, Jose, ngan Rut an ira mahigugmaon nga pagkabuotan?

¹³ Natigamnan mo ba kon paonan-o iginpahayag ni Betuel, Jose, ngan Rut an ira mahigugmaon nga pagkabuotan? Ira ginbuhat ito diri la pinaagi han binuotan nga mga pulong kondi upod an espisipiko nga mga buhat. Hi Betuel diri la kay nagsiring, ‘Iini hi Rebeka’ kondi iya ‘ginpaupod hi Rebeka.’ (Genesis 24:51, 59) Hi Jose diri la kay nagsiring, “Akon bubuhaton sugad han imo iginsiring” kondi hiya ngan an iya kabugtoan nagbuhat para kan Jakob ‘sugad gud han iginsugo niya ha ira.’ (Genesis 47:30; 50:12, 13) Diri la kay nagsiring hi Rut, “Kon ngain ka kadto, maupod ako” kondi binaya hiya ha iya katawohan ngan inupod kan Noemi, salit “nagkalakat hira ngada han pag-abot nira ha Betlehem.” (Rut 1:16, 19) Ha Juda, hi Rut nagbuhat na liwat “sumala han ngatanan nga iginsugo ha iya han iya ugangan nga babaye.” (Rut 3:6) Oo, an mahigugmaon nga pagkabuotan ni Rut, pariho han iba, iginpahayag pinaagi han mga buhat.

14. (a) Paonan-o ipinapakita han mga surugoon han Dios yana an mahigugmaon nga pagkabuotan pinaagi han mga buhat? (b) Ano nga mga buhat han mahigugmaon nga pagkabuotan an hinbabaroan mo dida ha mga Kristiano ha iyo lugar?

¹⁴ Makalilipay nga makita kon paonan-o an mga surugoon han Dios yana nga panahon nagpapadayon ha pagpahayag han mahigugmaon nga pagkabuotan pinaagi han mga buhat. Pananglitan, hunahunaa adton naghahatag hin padayon nga suporta ha emosyon ha masakit, nanluluya, o nasusubo nga mga igkasi-tumuroo. (Proberbios 12:25) O tagda an damu nga mga Saksi ni Jehova nga regular nga nagdadara han mga lagas pakadto ha Kingdom Hall basi makatambong ha sinemana nga mga katirok ha kongregasyon. Hi Ana, nga 82 anyos na ngan nag-aantos han arthritis, nagpapahayag han mga pagbati han damu nga iba pa han hiya nagsiring: “Usa ka bendisyon tikang kan Jehova nga ig-upod ako han kabugtoan ngadto ha ngatanan nga katirok. Kinasingkasing gud nga nagpapasalamat ako ha iya tungod ha paghatag ha akon han sugad nga mahigugmaon nga kabugtoan.” Nakikigbahin ka ba ha sugad nga mga buhat ha iyo kongregasyon? (1 Juan 3:17, 18) Kon nakikigbahin ka, laomi nga inaapresyar gud an imo mahigugmaon nga pagkabuotan.

Kinaburut-on nga Ginbuhat

15. Ano nga kalidad han mahigugmaon nga pagkabuotan an iginpatin-aw pa pinaagi han tulo nga asoy ha Biblia nga aton ginhisgotan?

¹⁵ An mga asoy ha Biblia nga aton ginhisgotan nagpapakita liwat nga an mahigugmaon nga pagkabuotan iginpapahayag hin hura ngan kinaburut-on, diri napipiritan. Hi Betuel kinaburut-on nga nagkooperar ha surugoon ni Abraham, ngan sugad man hi Rebeka. (Genesis 24:51, 58) Ipinakita ni Jose an iya mahigugmaon nga pagkabuotan nga diri ginsasagda han iba. (Genesis 50:4, 5) Hi Rut ‘nagpirit gud ha pag-upod kan Noemi.’ (Rut 1:18) Han nagsuhestyon hi Noemi nga humirani hi Rut kan  Boas, an mahigugmaon nga pagkabuotan nagpagios ha Moabita nga magpahayag: “An ngatanan nga imo ipinamulong bubuhaton ko.”—Rut 3:1-5.

16, 17. Ano an nakahimo han mahigugmaon nga pagkabuotan ni Betuel, Jose, ngan Rut nga labi nga makatirigamnan, ngan ano an nagpagios ha ira ha pagpakita hini nga kalidad?

¹⁶ Labi nga makatirigamnan an mahigugmaon nga pagkabuotan nga ipinakita ni Betuel, Jose, ngan Rut tungod kay hi Abraham, Jakob, ngan Noemi diri makakagpirit ha ira. Aw, hi Betuel waray legal nga obligasyon nga ihatag an iya anak nga babaye. Masisiring unta dayon niya ha surugoon ni Abraham: ‘Diri, diri ko karuyag nga mahibulag an akon maduruto nga anak nga daraga.’ (Genesis 24:18-20) Sugad man, may kagawasan hi Jose ha pagdesisyon kon bubuhaton ba niya o diri an hangyo han iya amay, kay patay na hi Jakob ngan diri na mapipirit hi Jose nga tumanon an iya saad. Ipinakita mismo ni Noemi nga may kagawasan hi Rut nga magpabilin ha Moab. (Rut 1:8) Hi Rut may kagawasan liwat ha pag-asawa ha usa han “mga batan-on nga kalalakin-an” imbes nga ha lagas na nga hi Boas.

¹⁷ Hi Betuel, Jose, ngan Rut kinaburut-on nga nagpakita han mahigugmaon nga pagkabuotan; kinasingkasing nga napagios hira ha pagbuhat hito. Inabat nira an moral nga responsabilidad ha pagpakita hini nga kalidad ha mga may-ada relasyon ha ira, sugad la han inabat ni Hadi David ha urhi nga obligado hiya nga ipakita ito kan Mepiboset.

18. (a) Upod an ano nga panhunahuna ‘ginbabantayan an panon’ han Kristiano nga mga tigurang? (b) Paonan-o iginpahayag han usa nga tigurang an iya mga pagbati mahitungod han pagbulig ha mga igkasi-tumuroo?

¹⁸ An mahigugmaon nga pagkabuotan usa nga pangirilal-an pa gihapon han katawohan han Dios, upod na an kalalakin-an nga nagbabantay ha panon han Dios. (Salmo 110:3; 1 Tesalonika 5:12) An sugad nga mga tigurang, o mga paramangno, naabat hin responsabilidad nga magin takos ha pagsarig nga ipinapakita ha ira tungod han pagpilia ha ira. (Buhat 20:28) Bisan pa, an ira pagmangno nga buruhaton ngan iba nga mga buhat han mahigugmaon nga pagkabuotan para ha kongregasyon ginbubuhat, ‘diri ha pinirit, kondi kinaburut-on.’ (1 Pedro 5:2) An mga tigurang nagbabantay ha panon tungod kay may-ada hira responsabilidad ngan hingyap nga buhaton ito. Ira iginpapahayag an mahigugmaon nga pagkabuotan ha mga karnero ni Kristo tungod kay kinahanglan ngan karuyag nira nga buhaton ini. (Juan 21:15-17) “Karuyag ko gud bumisita ha mga balay han kabugtoan o tawagan hira ha telepono basi la ipakita nga ginhuhunahuna ko hira,” siring han usa nga Kristiano nga tigurang. “Daku an akon kalipay ngan katagbaw ha pagbulig ha kabugtoan!” Bug-os-kasingkasing nga nauyon hito an mahigugmaon nga mga tigurang ha bisan diin.

Ipakita an Mahigugmaon nga Pagkabuotan ha mga Nanginginahanglan

19. Ano nga kamatuoran mahitungod han mahigugmaon nga pagkabuotan an pinabubug-atan han mga asoy ha Biblia nga ginhisgotan hini nga artikulo?

¹⁹ An mga asoy ha Biblia nga aton ginhisgotan nagpapabug-at liwat han kamatuoran nga an mahigugmaon nga pagkabuotan kinahanglan ipakita ha mga nanginginahanglan nga waray kapas nga magkaada hito. Basi magpadayon an katulinan han iya pamilya, ginkinahanglan ni Abraham an kooperasyon ni Betuel. Basi dad-on an iya patay nga lawas ngadto ha Kanaan, ginkinahanglan ni Jakob an bulig ni Jose. Ngan basi magkaada manurunod, ginkinahanglan ni Noemi an bulig ni Rut. Diri magkakaada hira Abraham, Jakob, bisan hi Noemi hito nga mga panginahanglan kon waray bulig. Sugad man yana nga panahon, an mahigugmaon nga pagkabuotan sadang ipakita labi na ha mga nanginginahanglan. (Proberbios 19:17) Sadang subaron naton an patriarka nga hi Job, nga nagtagad ha ‘kablas nga nagsangpit hin bulig, ngan ha waray amay ngan ha bisan hin-o nga waray nabulig’ sugad man “hadton andam ha pagkahanaw.” Hi Job liwat ‘nagpalipay han kasingkasing han balo nga babaye’ ngan nagin ‘mga mata han buta ngan mga tiil han piang.’—Job 29:12-15.

20, 21. Hin-o an nanginginahanglan han aton mahigugmaon nga pagkabuotan, ngan sadang magin determinado an kada usa ha aton nga buhaton an ano?

 ²⁰ Ha tinuod, may-ada ‘mga kablas nga nasangpit hin bulig’ ha tagsa nga Kristiano nga kongregasyon. Bangin resulta ini han kamingaw, panluya, mga pagbati hin kawaray-pulos, pag-abat hin kasubo ha iba, grabe nga sakit, o kamatay han usa nga hinigugma. Anoman an hinungdan han mga kasakitan, an ngatanan han sugad nga mga hinigugma may-ada mga panginahanglan nga mahimo ngan sadang ihatag han aton kinaburut-on ngan nagpapadayon nga mga buhat han mahigugmaon nga pagkabuotan.—1 Tesalonika 5:14.

²¹ Salit, magpadayon kita ha pagsubad kan Jehova nga Dios, nga “hura hin mahigugmaon nga [pagkabuotan].” (Eksodo 34:6; Efeso 5:1) Mahihimo naton ito pinaagi han kinaburut-on nga pagbuhat ha espisipiko nga paagi, labi na para ha mga nanginginahanglan. Ngan sigurado nga mapapasidunggan naton hi Jehova ngan makakaeksperyensya kita hin daku nga kalipay samtang ‘nagbubuhat kita hin mahigugmaon nga pagkabuotan ha usa kag usa.’—Sakarias 7:9.

[Footnote]

Paonan-o Mo Babatunon?

• Paonan-o naiiba an mahigugmaon nga pagkabuotan ha tawhanon nga pagkabuotan?

• Ha ano nga mga paagi ipinakita ni Betuel, Jose, ngan Rut an mahigugmaon nga pagkabuotan?

• Upod an ano nga panhunahuna sadang ipakita naton an mahigugmaon nga pagkabuotan?

• Hin-o an nagkikinahanglan han aton mga kapahayagan han mahigugmaon nga pagkabuotan?

[Mga Pakiana]

[Retrato ha pahina 18]

Paonan-o ipinakita ni Betuel an mahigugmaon nga pagkabuotan?

[Retrato ha pahina 21]

An maunungon nga gugma ni Rut bendisyon kan Noemi4

[Mga Retrato ha pahina 23]

An tawhanon nga mahigugmaon nga pagkabuotan kinaburut-on nga ginbubuhat, ipinapakita pinaagi han espisipiko nga buhat, ngan ipinapakita ha mga nanginginahanglan