Sumat han mga Parasamwak han Ginhadian

“Sayop nga Numero an Imo Nadayal”

HA Johannesburg, Sur Aprika, hira Leslie ngan Caroline nagbarubalyo ha pagsangyaw pinaagi han telepono ha mga tawo nga nag-uukoy ha makuri masulod nga komunidad han retirado nga mga tawo. Gutiay la an ira hin-abotan ha balay ngan pipira la an interesado ha ira Kristiano nga mensahe, salit nalipay hi Caroline han binaton an usa nga babaye.

“Hi Mrs. B— ba ini?” nagpakiana hi Caroline.

“Aw, diri,” siring han makisangkayon nga tingog, “Ako hi Mrs. G—. Sayop nga numero an imo nadayal.”

Tungod kay naobserbahan an pagkabuotan ha iya tingog, hi Caroline siniring: “Tuguti ako nga isaysay ha imo an karuyag ko isumat kan Mrs. B—.” Katapos nagtikang hiya pag-istorya mahitungod han mga bendisyon han tiarabot nga Ginhadian han Dios. Katapos magsabot mahitungod han pagdul-ong han brosyur nga Ano an Ginkikinahanglan ha Aton han Dios?, hi Mrs. G— nagpakiana: “Anay daw, ano ba an iyo relihiyon?”

“Mga Saksi ni Jehova kami,” binaton hi Caroline.

“Oh, diri ko karuyag ito nga relihiyon! Diri ko karuyag nga makita ka.”

“Kondi Mrs. G—,” naghangyo hi Caroline, “ha naglabay nga 20 minutos, iginsumat ko ha imo an pinakaurusahon nga paglaom, iginsaysay tikang ha Biblia kon ano an bubuhaton han Ginhadian han Dios para ha katawohan ha diri na maiha. Nalipay ka hinduro ha pakabati hini nga mga butang—naikag pa ngani—ngan naruyag mahibaro hin dugang pa. Ano gud an imo hinbabaroan mahitungod han mga Saksi ni Jehova? Kon masakit ka, makadto ka ba ha mekaniko? Kay ano nga diri mo ako tugotan ha pagsumat ha imo han gintotoohan han mga Saksi ni Jehova?”

Katapos hin madaliay nga paghilom, an babaye binaton: “Baga hin husto ka. Mas maopay kon kumadi ka. Kondi karuyag ko nga masabtan mo nga diri mo gud ako makukombirte!”

“Mrs. G—, diri ko gud ikaw makukombirte bisan kon karuyag ko,” binaton hi Caroline. “Hi Jehova la an makakahimo hito.”

Naglampos an pagbisita ha pagdul-ong han brosyur, ngan tinugot hi Mrs. G— (Betty) nga bisitahon utro. Han binalik hi Caroline, nagsiring hi Betty nga ginsumatan niya an kababayin-an ha ira karaonan nga nakikiistorya hiya ha mga Saksi ni Jehova. “Kay ano nga ginbuhat mo ito?” nagpakiana hira, nga baga hin waray na mahihimo. “Ito nga mga tawo diri ngani natoo kan Jesus!”

Ginpahinumdom dayon ni Caroline hi Betty han importante nga punto tikang han ira naglabay nga pag-istorya mahitungod han Ginhadian han Dios.

“Hin-o an magigin Hadi?” nagpakiana hi Caroline.

“Aw, hi Jesus,” binaton hi Betty.

“Siyempre,” nagsiring hi Caroline. Katapos nagpadayon hiya ha pagsaysay nga natoo an mga Saksi ni Jehova nga hi Jesus an Anak han Dios, kondi diri hiya katupong ha Dios sugad nga bahin han Trinidad.—Markos 13:32; Lukas 22:42; Juan 14:28.

Katapos hin pipira pa nga mga pagbisita, nagin matin-aw nga bisan kon may-ada hiya positibo, malipayon nga personalidad, hi Betty nag-aantos hin maluya nga kahimsog. Ha pagkamatuod, may-ada hiya kanser ngan nahahadlok nga mamatay. “Kunta hinbatian ko na ini nga mga butang hadto pa ngan nagkaada han imo pagtoo,” siring niya. Ginliaw hiya ni Caroline pinaagi han pagpakita ha iya hin mga teksto nga nagsasaysay han kamatayon sugad nga hilarom nga pagkaturog nga tikang hito mahimo mabanhaw an usa. (Juan 11:11, 25) Nakapadasig gud ini kan Betty, nga nagpapahimulos yana hin regular nga pag-aram ha Biblia. An iya la nagtitikaluya nga kahimsog an nakakapugong ha iya ha pagtambong ha mga katirok ha Kingdom Hall.

Hi Caroline nasiring: “Hinsasabtan ko nga an mga anghel an naggigiya hini nga buruhaton. An numero han telepono ni Betty ‘sayop nga nadayal,’ ngan hunahunaa la, 89 anyos na hiya!”—Pahayag 14:6.