Kapitulo Trese

Kaluwasan Ngan Kalipay Ilarom han Pagmando han Mesias

Isaias 11:1–12:6

 1. Isaysay an espirituwal nga kahimtang han may kauyonan nga katawohan han Dios han panahon ni Isaias.

 HAN panahon ni Isaias, maraot an espirituwal nga kahimtang han may kauyonan nga katawohan han Dios. Bisan ilarom han pagmando han matinumanon nga mga hadi, sugad kan Usiya ngan Jotam, damu han katawohan an nagsingba ha higtaas nga mga lugar. (2 Hadi 15:1-4, 34, 35; 2 Kronikas 26:1, 4) Han nagin hadi hi Hesekia, kinahanglan kuhaon niya ha tuna an mga butang ngan mga buhat nga may kalabotan han pagsingba kan Baal. (2 Kronikas 31:1) Diri urusahon nga ginsagda ni Jehova an iya katawohan nga bumalik ha iya ngan ginpahamangnoan mahitungod han disiplina nga maabot!

2, 3. Ano nga pagdasig an iginhahatag ni Jehova para hadton naghihingyap nga mag-alagad ha iya bisan pa han kaylap nga pagkadiri-matinumanon?

² Kondi, diri ngatanan bug-os nga mga rebelde. Hi Jehova may-ada matinumanon nga mga propeta, ngan posible nga may-ada pipira nga mga Judio nga namati ha ira. Hi Jehova may-ada nakakaliaw nga mga pulong para ha ira. Katapos isaysay an makaharadlok nga mga pag-atake nga maieksperyensyahan han Juda durante han pagsulong han mga Asiryahanon, gin-aghat hi propeta Isaias nga isurat an usa han pinakamatahom nga mga bersikulo ha bug-os nga Biblia, an paghulagway han mga bendisyon nga maabot ilarom han pagmando han Mesias. a An pipira nga mga bahin hini nga mga bendisyon nagkaada gutiay nga katumanan han an mga Judio binalik tikang ha pagkabihag ha Babilonya. Kondi an tagna ha kabug-osan may-ada daku nga katumanan yana nga panahon. Totoo, hi Isaias ngan an iba nga matinumanon nga mga Judio ha iya panahon namatay nga waray makita ini nga mga bendisyon. Kondi naglaom hira hini nga may pagtoo ngan makikita nira an katumanan han mga pulong ni Isaias katapos han pagkabanhaw.—Hebreo 11:35.

³ An katawohan ni Jehova ha moderno nga panahon nagkikinahanglan liwat hin pagdasig. An madagmit nga nabubungkag nga mga suruklan ha moral ha kalibotan, an mabangis nga pagkontra ha mensahe han Ginhadian, ngan an personal nga mga kaluyahan nagigin ayat ha ira ngatanan. An urusahon nga mga pulong ni Isaias mahitungod ha Mesias ngan han iya pagmando makakaparig-on ngan makakabulig ha katawohan han Dios nga atubangon ini nga mga ayat.

Mesias—An May-Kapas nga Lider

4, 5. Ano an igintagna ni Isaias mahitungod han pag-abot han Mesias, ngan ano nga pag-aplikar han mga pulong ni Isaias an ginhimo ni Mateo?

⁴ Mga siglo antes han panahon ni Isaias, iginpatin-aw han iba nga Hebreohanon nga mga parasurat han Biblia an pag-abot han Mesias, an totoo nga Lider, nga susugoon ni Jehova ha Israel. (Genesis 49:10; Deuteronomio 18:18; Salmo 118:22, 26) Yana pinaagi kan Isaias, hi Jehova nagdudugang han mga detalye. Hi Isaias nagsurat: “May-ada magawas nga usa nga [sanga] tikang ha puno ni Jesse, ngan usa nga [saringsing] tikang ha iya mga gamot mabunga.” (Isaias 11:1; itanding an Salmo 132:11.) An “sanga” ngan “saringsing” pariho nagpapasabot nga an Mesias magigin tulin ni Jesse pinaagi han iya anak nga hi David, nga gindihogan hin lana sugad nga hadi han Israel. (1 Samuel 16:13; Jeremias 23:5; Pahayag 22:16) Ha pag-abot han totoo nga Mesias, ini nga “saringsing,” tikang ha balay ni David, magbubunga hin maopay nga bunga.

⁵ Hi Jesus an iginsaad nga Mesias. An parasurat han ebanghelyo nga hi Mateo nag-unabi han mga pulong han Isaias 11:1 han hiya nagsiring nga an pagtawaga kan Jesus nga “Nasareno” nagtuman han mga pulong han mga propeta. Tungod kay nagdaku hiya ha bungto han Nasaret, gintawag hi Jesus nga Nasareno, usa  nga ngaran nga may kalabotan ha Hebreo nga pulong nga ginamit ha Isaias 11:1 para han “saringsing.” b—Mateo 2:23, footnote ha NW; Lukas 2:39, 40.

 6. Magigin ano nga klase hin magmarando an igintagna nga Mesias?

⁶ Magigin ano nga klase hin magmarando an Mesias? Magigin pariho ba hiya han mabangis, mapahitas-on nga Asiryahanon nga nagbungkag han napulo-ka-tribo nga ginhadian han Israel ha norte? Siyempre diri. Mahitungod han Mesias, hi Isaias nasiring: “An espiritu ni Jehova mahugdon dida ha iya, an espiritu han kinaadman, ngan han sarabotan, an espiritu han kasaragdonan ngan han gahum, an espiritu han hibaro ngan han kahadlok kan Jehova. Ngan an iya kalipay maaada ha kahadlok kan Jehova.” (Isaias 11:2, 3a) An Mesias gindihogan, diri pinaagi han lana, kondi pinaagi han baraan nga espiritu han Dios. Nahitabo ini ha bawtismo ni Jesus, han nakita ni Juan nga Parabaptis an baraan nga espiritu han Dios nga nalusad kan Jesus ha porma han usa nga sarapati. (Lukas 3:22) An espiritu ni Jehova ‘hinugdon’ kan Jesus, ngan pinamatud-an niya ini han hiya ginios nga may kinaadman, pagsabot, sagdon, pagkagamhanan, ngan kahibaro. Maopay gud ito nga mga kalidad para ha usa nga magmarando!

 7. Ano an iginsaad ni Jesus ha iya matinumanon nga mga sumurunod?

⁷ An mga sumurunod ni Jesus mahimo liwat kumarawat han baraan nga espiritu. Ha usa han iya mga pahayag, hi Jesus nagsiring: ‘Kon kamo, bisan kon magraot, maaram maghatag hin mag-opay nga mga regalo ha iyo mga anak, labi pa gud an Amay ha langit nga maghahatag han baraan nga espiritu ha mga nangangaro ha iya!’ (Lukas 11:13) Salit, diri gud kita sadang mag-alang ha pangaro ha Dios han baraan nga espiritu, diri man kita sadang umundang ha pagpatubo han mag-opay nga mga bunga hito—nga ‘amo an gugma, kalipay, kamurayawan, hilawig nga pagpailob, kalooy, pagkamaopay, pagtoo, kaaghop, pagpugong ha kalugaringon.’ (Galasia 5:22, 23) Hi Jehova nagsasaad nga ihahatag niya an hangyo han mga sumurunod ni Jesus nga “kinaadman nga tikang ha kahitas-an” basi buligan hira nga malamposan an mga problema ha kinabuhi.—Jakobo 1:5; 3:17.

 8. Paonan-o nagkakaada kalipay hi Jesus ha kahadlok kan Jehova?

⁸ Ano an kahadlok kan Jehova nga ipinapakita han Mesias? Sigurado nga hi Jesus diri nangingirhat ha Dios, nahahadlok ha iya paghukom. Lugod, an Mesias may-ada matinalahuron nga kahadlok ha Dios, mahigugmaon nga pagtahod ha iya. An mahadlukon-ha-Dios nga tawo naghihingyap pirme ha ‘pagbuhat han nakakalipay ha iya,’ sugad han ginbubuhat ni Jesus. (Juan 8:29) Pinaagi han pulong ngan susbaranan, igintututdo ni Jesus nga waray mas daku nga kalipay kay ha paglakat kada adlaw ha mapulsanon nga kahadlok kan Jehova.

Usa ka Matadong Ngan Maloloy-on nga Hukom

 9. Ano nga susbaranan an iginhahatag ni Jesus ha mga igintoka ha paghukom ha mga butang ha Kristiano nga kongregasyon?

⁹ Igintatagna ni Isaias an damu pa nga mga kalidad han Mesias: “Hiya diri maghuhukom sumala han hikikit-an han iya mga mata, diri man mahatag hin kahusayan sumala han hinbabatian han iya mga talinga.” (Isaias 11:3b) Kon kinahanglan umatubang ka ha usa nga hukmanan, diri ka ba magpapasalamat ha sugad hito nga hukom? Ha iya kapasidad sugad nga Hukom ha bug-os nga katawohan, an Mesias diri naiimpluwensyahan han buwa nga mga pangatadongan, tuso nga mga taktika ha hukmanan, mga tsismis, o panggawas nga mga butang, sugad han bahandi. Hinbabaroan niya an panlimbong ngan nakikita an lahos pa han diri-maopay panggawas nga mga hitsura, nga nasasabtan ‘an tinago nga pagkatawo han kasingkasing,’ ‘an tinago nga tawo.’ (1 Pedro 3:4, footnote ha NW) An gihitaasi nga susbaranan ni Jesus usa nga ehemplo para ha ngatanan nga igintoka ha paghukom ha mga butang ha Kristiano nga kongregasyon.—1 Korinto 6:1-4.

10, 11. (a) Ha ano nga paagi gintatadong ni Jesus an iya mga sumurunod? (b) Ano nga paghukom an ipapadapat ni Jesus ha magraot?

¹⁰ Paonan-o maiimpluwensyahan han gihitaasi nga mga kalidad han Mesias an iya hudisyal nga mga desisyon? Hi Isaias nagsasaysay: “Pinaagi han katadongan hiya maghuhukom ha mga kablas, ngan mahatag hin husay pinaagi han kaangayan para ha mga maaghop ha tuna; ngan iya hahampakon an tuna han pudlos han iya baba; ngan pinaagi han gininhawa han iya mga im-im iya pamamatayon an mga magraot. Ngan an katadongan maaamo an bakos han iya hawak, ngan an pagkamatinumanon an bakos han iya mga baliatang.”—Isaias 11:4, 5.

¹¹ Kon an iya mga sumurunod nagkikinahanglan hin pagtadong, iginhahatag ito ni Jesus ha paagi nga  labi nga mapulsanon para ha ira—maopay gud nga susbaranan para ha Kristiano nga mga tigurang. Ha luyo nga bahin, adton nagbubuhat han karaotan makakalaom hin duro nga paghukom. Kon makighusay na an Dios hini nga sistema han mga butang, an Mesias ‘mahampak han tuna’ pinaagi han iya gamhanan nga tingog, magpapagawas hin paghukom nga kabungkagan han ngatanan nga magraot. (Salmo 2:9; itanding an Pahayag 19:15.) Ha kataposan, mawawaray na magraot nga mga tawo nga mahibibilin ha pagdaot han kamurayawan han katawohan. (Salmo 37:10, 11) Hi Jesus, nga nabugkosan an iya mga hawak ngan mga baliatang hin pagkamatadong ngan pagkamatinumanon, may-ada gahum ha pagtuman hini.—Salmo 45:3-7.

Ginbag-o nga mga Kahimtang ha Tuna

12. Bangin mabaraka ha ano an usa nga Judio kon ginhuhunahuna niya an pagbalik tikang ha Babilonya pakadto ha Tuna nga Iginsaad?

¹² Handurawa an usa nga Israelita nga nahibaro pa la han sugo ni Ciro nga an mga Judio mabalik ha Jerusalem ngan magtutukod-utro han templo. Babayaan ba niya an seguridad han Babilonya ngan magbibiyahe hin maiha tipauli? Durante han 70-ka-tuig nga kawara han Israel, higtaas na an mga banwa ha binayaan nga kaumhan. An mga lobo, mga leopardo, mga leon, ngan mga oso may kagawasan nga naglalakatlakat na dida hiton nga kaumhan. An mga kobra nag-uukoy na liwat didto. An nabalik nga mga Judio kinahanglan dumepende ha maanad nga mga hayop basi mabuhi—an kakarnerohan ngan kabakahan an maghahatag hin gatas, barahibo, ngan karne, ngan an mga baka an magdadanas han arado. Mabibiktima ba hira han mga hayop nga natukob? Tutukbon ba han mga halas an gudtiay nga kabataan? Kumusta man an peligro nga atakehon durante han biyahe?

13. (a) Ano nga makalilipay nga hulagway an iginsasaysay ni Isaias? (b) Paonan-o kita nahibabaro nga an kamurayawan nga iginsasaysay ni Isaias nag-uupod hin labaw pa ha katalwasan tikang ha ihalas nga mga hayop?

¹³ Iginsasaysay yana ni Isaias an makalilipay nga hulagway han mga kahimtang nga igpapahinabo han Dios ha tuna. Hiya nasiring: “An lobo malungon han nati nga karnero, ngan an leopardo maluob upod han nati nga kanding; ngan an nati nga baka ngan an nati nga leon ngan an yubo maglulungon; ngan an usa nga gutiay nga bata magmamando ha ira. Ngan an baka ngan an oso manhahangrab; an ira mga nati magtatarampo pagluob; ngan an leon makaon han dagami sugad han baka nga lalaki. Ngan an minasus-an nga bata mag-uuyag dida ha buho han aspid, ngan an bata nga lutas na magbubutang han iya kamot dida ha lungib han kobra. Diri hira magdadaot o diri maggugunaw ha bug-os ko nga bukid nga baraan; kay an tuna mapupuno han hibaro ni Jehova, sugad nga an katubigan nagpupuno han dagat.” (Isaias 11:6-9) Diri ba ini nga mga pulong nakakalipay han kasingkasing? Tigamni nga an kamurayawan nga iginsasaysay dinhi amo an resulta han kahibaro kan Jehova. Salit, labaw pa an nahiuupod kay ha katalwasan la tikang ha ihalas nga mga hayop. An kahibaro kan Jehova diri magbabag-o han mga hayop, kondi makakaapekto ito ha mga tawo. Diri na mahahadlok an mga Israelita ha ihalas nga mga hayop o ha sugad-ihalas nga mga tawo samtang nauli o adto na ha ira iginpahiuli nga tuna.—Esra 8:21, 22; Isaias 35:8-10; 65:25.

14. Ano an darodaku nga katumanan han Isaias 11:6-9?

¹⁴ Kondi, ini nga tagna may-ada darodaku nga katumanan. Han 1914, hi Jesus, an Mesias, nahitrono ha langitnon nga Bukid han Sion. Han 1919 an mga nanhibilin han ‘Israel han Dios’ nakaeksperyensya hin kagawasan tikang ha pagkabihag ha Babilonya ngan nakiangbit ha pagpahiuli han totoo nga pagsingba. (Galasia 6:16) Sugad nga resulta, naabrihan an dalan para han katumanan ha moderno nga panahon han tagna ni Isaias mahitungod han Paraiso. An ‘husto nga kahibaro,’ an kahibaro kan Jehova, nakakagbag-o han mga personalidad. (Kolosas 3:9, 10) An madarahog nga mga tawo hadto nagigin mamurayawon na. (Roma 12:2; Efeso 4:17-24) Ini nga mga hitabo nakakaapekto yana han minilyon nga mga tawo tungod kay an tagna ni Isaias nag-uupod han madagmit magtikadamu nga mga Kristiano nga tunan-on an paglaom. (Salmo 37:29; Isaias 60:22) Nahibabaro hira ha paghulat han panahon nga an bug-os nga tuna maibalik na ha may seguridad, mamurayawon nga paraiso, sumala ha orihinal nga katuyoan han Dios.—Mateo 6:9, 10; 2 Pedro 3:13.

15. Makatadunganon ba nga laoman naton nga magkakaada literal nga katumanan ha bag-o nga kalibotan an mga pulong ni Isaias? Isaysay.

¹⁵ Dida hiton nahibalik nga Paraiso, an tagna ba ni Isaias magkakaada hin dugang, bangin mas literal nga katumanan? Baga in makatadunganon an paghunahuna hito. An tagna naghahatag ha ngatanan nga magkikinabuhi ilarom han pagmando han Mesias hin pariho nga pasarig nga iginhatag hito ha nabalik nga mga Israelita; hira ngan an ira mga anak diri mahahadlok ha kadaot tikang ha bisan ano nga pagtitikangan  hito—tawo man o hayop. Ilarom han pagmando han Ginhadian han Mesias, an ngatanan nga mga umurukoy ha tuna magpapahimulos han mamurayawon nga mga kahimtang pariho hadton pinahimulsan ni Adan ngan Eva ha Eden. Siyempre, diri iginsusumat han Kasuratan an ngatanan nga detalye kon ano an kahimtang han kinabuhi hadto ha Eden—o kon ano an magigin kahimtang hito ha Paraiso. Kondi, makakasarig kita nga ilarom han maaramon ngan mahigugmaon nga pagmando han Hadi nga hi Jesu-Kristo, an ngatanan magigin sugad gud han sadang mahitabo.

Iginpapahiuli an Putli nga Pagsingba Pinaagi han Mesias

16. Ano an tinindog sugad nga tigaman para ha katawohan han Dios han 537 A.K.P.?

¹⁶ Siyahan nga gin-atake an putli nga pagsingba ha Eden han malampuson nga naimpluwensyahan ni Satanas hi Adan ngan Eva nga magtalapas kan Jehova. Tubtob yana, hi Satanas diri pa naundang han iya tumong nga maitalikod an damu pahirayo ha Dios. Kondi diri gud tutugotan ni Jehova nga an putli nga pagsingba mawara ha tuna. Nahiuupod an iya ngaran, ngan nagtatagad hiya hadton nag-aalagad ha iya. Salit, pinaagi kan Isaias naghimo hiya hin makatirigamnan nga saad: “Mahinanabo hadto nga adlaw, nga an gamot ni Jesse, nga natindog sugad nga usa nga bandera han mga katawohan, ha iya mangingita an mga nasud ngan an iya lugar nga pahuwayan magmamahimayaon.” (Isaias 11:10) Han 537 A.K.P., an Jerusalem, an siyudad nga ginhimo ni David nga sentro han nasud, nagserbi sugad nga tigaman, gintatawag an matinumanon nga nanhibilin han nagsarang nga mga Judio nga bumalik ngan tukuron-utro an templo.

17. Paonan-o hi Jesus ‘tinindog ha pagmando ha mga nasud’ ha siyahan nga siglo ngan ha aton panahon?

¹⁷ Kondi, labaw pa hito an gin-uunabi han tagna. Sugad han nakita na, nag-uunabi ito han pagmando han Mesias, an usa nga totoo nga Lider para ha katawohan han ngatanan nga nasud. Ginkotar ni apostol Pablo an Isaias 11:10 basi ipakita nga ha iya panahon an katawohan han mga nasud magkakaada hin lugar ha Kristiano nga kongregasyon. Ha pagkotar han hubad han Septuagint hini nga bersikulo, hiya nagsurat: ‘Hi Isaias nasiring: Magkakaada han gamot ni Jesse, ngan may usa nga matindog ha paghadi ha mga nasud; ha iya maglalaom an mga nasud.’ (Roma 15:12) Dugang pa, an tagna nalahos pa gud—tubtob ha aton panahon nga an katawohan han mga nasud nagpapakita han ira gugma kan Jehova pinaagi han pagsuporta ha dinihogan nga kabugtoan han Mesias.—Isaias 61:5-9; Mateo 25:31-40.

18. Ha aton panahon, paonan-o hi Jesus nagin usa nga tigaman?

¹⁸ Ha katumanan ha moderno nga panahon, an “hadto nga adlaw” nga gin-unabi ni Isaias nagtikang han an Mesias nahitrono sugad nga Hadi han langitnon nga Ginhadian han Dios han 1914. (Lukas 21:10; 2 Timoteo 3:1-5; Pahayag 12:10) Tikang hadto, hi Jesu-Kristo amo an matin-aw nga tigaman para han espirituwal nga Israel ngan para han katawohan han ngatanan nga nasud nga naghihingyap hin matadong nga gobyerno. Ilarom han paggiya han Mesias, an maopay nga sumat han Ginhadian gindadara ha ngatanan nga nasud, sugad han igintagna ni Jesus. (Mateo 24:14, Markos 13:10) Inin maopay nga sumat may-ada gamhanan nga epekto. “An [daku nga panon], nga waray tawo nga sadang makaihap, tikang ha tagsatagsa nga nasud” nagpapasakop ha Mesias pinaagi han pag-upod ha dinihogan nga nanhibilin ha putli nga pagsingba. (Pahayag 7:9) Samtang damu nga mga bag-ohan an nagpapadayon ha pakig-upod ha nanhibilin ha espirituwal nga “balay ha pag-ampo” kan Jehova, ira dinudugangan an himaya han “pahuwayan” han Mesias, an daku espirituwal nga templo han Dios.—Isaias 56:7; Hagay 2:7.

Nagkakaurosa nga Katawohan an Nag-aalagad kan Jehova

19. Ha ano nga duha nga okasyon ginpabalik ni Jehova an nanhibilin han iya katawohan ha bug-os nga tuna?

¹⁹ Sunod nga ginpapahinumdom ni Isaias an mga Israelita nga hi Jehova hadto pa nagtagana na hin kaluwasan para ha ira han an nasud inatubang ha panalumpigos han gamhanan nga kaaway. Iton nga bahin han kasaysayan han Israel—an pagluwas ni Jehova ha nasud tikang ha pagkabihag ha Ehipto—pinabibilhan gud han ngatanan matinumanon nga mga Judio. Hi Isaias nagsurat: “Mahinanabo hadto nga adlaw, nga an Ginoo magbubutang liwat ha ikaduha han iya kamot ha pagtirok han salin han iya katawohan, nga mahibibilin, tikang ha Asirya, ngan tikang ha Ehipto, ngan tikang ha Patros, ngan tikang ha Kus, ngan tikang ha Elam, ngan tikang ha Sinar, ngan tikang ha Hamat, ngan tikang ha mga poro ha dagat. Ngan hiya magpapatindog hin bandera para ha mga nasud, ngan magtitirok han mga hinalin han Israel, ngan tirukon an nanagpatlaag han Juda tikang ha upat nga kanto han tuna.” (Isaias 11:11, 12) Sugad hin kinakaptan hira ha kamot,  tutugwayan ni Jehova an matinumanon nga nanhibilin han Israel ngan Juda tikang ha mga nasud nga dida hito hira nagpatlaag ngan dadad-on hira nga talwas ngadto ha ira urukyan. Ha gutiay nga paagi, nahitabo ini han 537 A.K.P. Kondi, mas mahimayaon gud an daku nga katumanan! Han 1914, ginpabangon ni Jehova an nahitrono nga hi Jesu-Kristo sugad nga ‘tigaman para ha mga nasud.’ Tikang han 1919 an nanhibilin han ‘Israel han Dios’ nagtikang magtirok ngada hini nga tigaman, disidido nga makiangbit ha putli nga pagsingba ilarom han Ginhadian han Dios. Inin naiiba nga espirituwal nga nasud nagtitikang ‘ha tagsatagsa nga tribo ngan yinaknan ngan katawohan ngan nasud.’—Pahayag 5:9.

20. Ano nga pagkaurosa an pahihimulsan han katawohan han Dios ha ira pagbalik tikang ha Babilonya?

²⁰ Iginsasaysay yana ni Isaias an pagkaurosa han nahibalik nga nasud. Ha pag-unabi han ginhadian ha norte sugad nga Epraim ngan han ginhadian ha sur sugad nga Juda, hiya nasiring: “An kaawa liwat han Epraim mawawara, ngan hira nga magsasamok han Juda lalaglagon: an Epraim diri maaawa han Juda, ngan an Juda diri magsasamok han Epraim. Ngan hira mahugdon dida ha sugbong han mga Pilisteohanon dida ha katundan, ha tingob ira pag-aagawan an mga anak han sinirangan: ira ibubutang an ira kamot ngada ha Edom ngan ha Moab; ngan an mga anak ni Amon masugot ha ira.” (Isaias 11:13, 14) Ha pagbalik han mga Judio tikang ha Babilonya, diri na hira mababahin ha duha nga nasud. An mga membro han ngatanan nga tribo han Israel nagkakaurosa nga mabalik ha ira tuna. (Esra 6:17) Diri na hira magpapakita hin maraot nga kaburut-on ngan kapungot ha usa kag usa. Sugad nga nagkakaurosa nga katawohan, matindog hira nga madaugon kontra han ira mga kaaway ha nakapalibot nga mga nasud.

21. Paonan-o nga makatirigamnan gud an pagkaurosa han katawohan han Dios yana?

²¹ Mas darayawon pa gud an pagkaurosa han ‘Israel han Dios.’ An 12 ka simboliko nga tribo han espirituwal nga Israel haros 2,000 ka tuig na nga nagpapahimulos han pagkaurosa nga iginbasar ha gugma ha Dios ngan ha ira espirituwal nga kabugtoan. (Kolosas 3:14; Pahayag 7:4-8) Yana, an katawohan ni Jehova—an espirituwal nga mga Israelita ngan adton may-ada tunan-on nga paglaom—nagpapahimulos han kamurayawan ngan pagkaurosa ha bug-os nga kalibotan ilarom han pagmando han Mesias, mga kahimtang nga diri hinbabaroan han mga iglesia han Kakristianohan. An mga Saksi ni Jehova may-ada nagkakaurosa espirituwal nga determinasyon kontra han mga pangalimbasog ni Satanas nga pugngan an ira pagsingba. Sugad nga usa nga katawohan, ginbubuhat nira an sugo ni Jesus nga isangyaw ngan igtutdo an maopay nga sumat han Ginhadian han Mesias ha ngatanan nga nasud.—Mateo 28:19, 20.

Malalamposan an mga Ulang

22. Paonan-o “gugunawon gud ni Jehova an dila han dagat han Ehiptohanon” ngan “pakakayabkayabon an iya kamot ha igbaw han Salog”?

²² Damu an mga ulang, ha literal ngan simboliko nga paagi, basi mapugngan an pagbalik han mga Israelita tikang ha pagkabihag. Paonan-o ito malalamposan? Hi Isaias nasiring: “Gugunawon gud ni Jehova an dila han dagat han Ehiptohanon; ngan pinaagi han iya makasurunog nga hangin iya pagpapakayabkayabon an iya kamot ha igbaw han Salog, ngan hahampakon ini nga magmapito nga aawasan, ngan papagmartsahon an mga tawo ha bawbaw ha mamara nga sapin.” (Isaias 11:15) Hi Jehova an magkukuha han ngatanan nga ulang ha pagbalik han iya katawohan. Bisan an ulang nga marig-on sugad han dila o haligot nga tuna nga nautwal ngadto ha Dagat nga Pula (sugad han Gulpo han Suez) o diri-maaagian sugad han Salog Euprates magmamara, siring pa, basi an usa ka tawo makatabok nga diri na maghuhukas han iya mga sandalyas!

23. Ha ano nga paagi ‘magkakaada dalan tikang ha Asirya’?

²³ Han panahon ni Moises, igin-andam ni Jehova an dalan basi makapalagiw an Israel tikang ha Ehipto ngan magmartsa ngadto ha Tuna nga Iginsaad. Bubuhaton niya an pariho hito yana: “Mamamay-ada dalan para han salin han iya katawohan, nga mahibibilin, tikang ha Asirya; sugad nga may-ada para han Israel hadto nga adlaw han iya pag-abot tikang ha tuna ha Ehipto.” (Isaias 11:16) Tutugwayan ni Jehova an nabalik nga mga bihag sugad hin naglalakat hira ha dalan tikang ha ira lugar han pagkabihag ngadto ha ira tuna nga natawohan. An mga parakontra magsasari ha pagpaundang ha ira, kondi an ira Dios, hi Jehova, maupod ha ira. An dinihogan nga mga Kristiano ngan an ira mga kaupod yana naatubang liwat ha mabangis nga pag-atake, kondi maisugon hira nga nagpapadayon! Ginawas na hira ha moderno nga Asirya, an kalibotan ni Satanas, ngan binubuligan nira an iba nga magbuhat liwat hito. Maaram hira nga an putli nga pagsingba maglalampos ngan mag-uuswag. Diri ito buruhaton han tawo, kondi buruhaton han Dios.

 Waray Kataposan nga Kalipay Para han mga Sakop han Mesias!

24, 25. Pinaagi han ano nga mga pulong han pagdayaw ngan pagpasalamat magsisinggit an katawohan ni Jehova?

²⁴ Pinaagi han makalilipay nga mga pulong iginsasaysay yana ni Isaias an kalipay han katawohan ni Jehova tungod han katumanan han Iya pulong: “Hadto nga adlaw masiring ka: Maghahatag ako hin mga pagpasalamat ha imo, O Jehova; kay bisan ka nasina ha akon, an imo kasina pinasimang, ngan imo ako ginlipay.” (Isaias 12:1) Duro an disiplina ni Jehova ha iya matinalapason nga katawohan. Kondi natuman an katuyoan hito ha pagtambal ha relasyon han nasud ha iya ngan ha pagpahiuli han putli nga pagsingba. Ginpapasarig ni Jehova an iya matinumanon nga mga magsiringba nga ha kataposan iya luluwason hira. Diri urusahon nga hira nagpahayag hin apresasyon!

²⁵ Bug-os nga ginparig-on na han binalik nga mga Israelita an ira pagsarig kan Jehova, ngan hira nagsinggit: “Kitaa, an Dios amo an akon kaluwasan; ako masarig, ngan diri mahahadlok: kay hi Jehova, bisan hi Jehova, amo an akon kusog ngan kanta; ngan hiya nahimo nga akon kaluwasan. Busa ha kalipay masarok kamo han tubig tikang ha mga atabay han kaluwasan.” (Isaias 12:2, 3) An Hebreo nga pulong nga iginhubad nga “kanta” ha Isa 12 bersikulo 2 makikita sugad nga “pagdayaw” ha Septuagint nga bersyon. An mga magsiringba nagsinggit ha pagkanta tungod han kaluwasan tikang kan ‘Jah Jehova.’ Sugad nga pinahalipot nga porma han ngaran nga Jehova, ginagamit an ‘Jah’ ha Biblia basi ipahayag an hilarom nga mga pagbati hin pagdayaw ngan pagpasalamat. An paggamit han pulong nga ‘Jah Jehova’—gindudoble an ngaran han Dios—nagpapahitaas pa gud han pagdayaw ha Dios.

26. Hin-o yana an nagpapahayag han mga pakig-upod han Dios ha mga nasud?

²⁶ Diri mahihimo han totoo nga mga magsiringba ni Jehova nga ira la an ira kalipay. Hi Isaias nagtatagna: “Hadto nga adlaw kamo masiring: Paghatag hin mga pagpasalamat kan Jehova, tawag han iya ngaran, pagsaysay han iya mga binuhatan dida ha mga katawohan, sumati nga an iya ngaran pagpahitas-on. Pagkanta kan Jehova; kay hiya nagbuhat hin mga butang nga mahal: ipahibaro ini ha bug-os nga tuna.” (Isaias 12:4, 5) Tikang han 1919, an dinihogan nga mga Kristiano—ha urhi pinaagi han bulig han ira mga kaupod nga ‘iba nga mga karnero’—‘nagpapahayag han mga kamahalan hadton nagtawag ha ira tikang ha kasisidman ngadto ha iya urusahon nga kahayag.’ Hira an ‘pinili nga kamamatan, . . . an baraan nga nasud’ nga iginlain para hini nga katuyoan. (Juan 10:16; 1 Pedro 2:9) Iginpapahayag han mga dinihogan nga ginpapahitaas an baraan nga ngaran ni Jehova ngan nakikiangbit hira ha pagpasamwak hito ha bug-os nga tuna. Hira an nangunguna ha ngatanan nga mga magsiringba ni Jehova ha pagkalipay ha iya pagtagana para han ira kaluwasan. Sugad la ito han pagsinggit ni Isaias: “Pagsangpit ha daku nga tingog ngan guliat, ikaw umurukoy ha Sion; kay daku dida ha imo an Baraan nga Uusa ha Israel”! (Isaias 12:6) An Baraan nga Uusa ha Israel amo hi Jehova nga Dios mismo.

Paghulat han Tidaraon nga May Pagsarig!

27. Samtang naghuhulat ha katumanan han ira paglaom, ha ano nasarig an mga Kristiano?

²⁷ Minilyon yana an nagtitirok ngada ha ‘tigaman para ha mga katawohan’—hi Jesu-Kristo nga nahitrono ha Ginhadian han Dios. Nalilipay hira nga magin mga sakop hiton nga Ginhadian ngan malipayon gud nga nakilala hi Jehova nga Dios ngan an iya Anak. (Juan 17:3) Nagkakaada hira daku nga kalipay ha ira nagkakaurosa Kristiano nga pakig-upod ngan nangangalimbasog gud ha pagtipig han kamurayawan nga amo an tigaman han totoo nga mga surugoon ni Jehova. (Isaias 54:13) Tungod kay kombinsido nga hi Jah Jehova an Dios nga nagtutuman han iya mga saad, nasarig hira ha ira paglaom ngan nagkakaada daku nga kalipay ha pagsumat hito ha iba. Hinaot an tagsa nga magsiringba ni Jehova magpadayon ha paggamit han iya bug-os nga kusog ha pag-alagad ha Dios ngan ha pagbulig ha iba nga magbuhat hin pariho. Hinaot tipigan han ngatanan ha ira kasingkasing an mga pulong ni Isaias ngan malipay ha kaluwasan pinaagi han Mesias ni Jehova!

[Mga footnote]

[Mga Pakiana]