An Bulawanon nga Surundon—Praktikal Ito

Bisan kon ginhuhunahuna han kadam-an nga mga tawo an Bulawanon nga Surundon sugad nga katutdoan ha moral nga igintutdo ni Jesus, hiya mismo nagsiring: “An akon pagtutdo diri akon, kondi kanan han nagpakanhi ha akon.”—Juan 7:16.

OO, AN Gintikangan han igintutdo ni Jesus, upod na an gintawag sugad nga Bulawanon nga Surundon, amo an usa nga nagpadara kan Jesus, nga amo an Maglalarang, hi Jehova nga Dios.

Orihinal nga katuyoan han Dios nga tratuhon han ngatanan nga katawohan an usa kag usa sugad han ira karuyag nga pagtrato ha ira. Iginpakita niya an gimaopayi nga susbaranan ha pagpahayag hin pagtagad ha kaopayan han iba ha paagi nga iya ginlarang an katawohan: “An Dios naghimo han tawo ha iya kalugaringon nga ladawan, ha ladawan han Dios ginhimo hiya: lalaki ngan babaye ginhimo niya  hira.” (Genesis 1:27) Nangangahulogan ini nga mahigugmaon nga gintagan han Dios an katawohan hin usa ka sukol han iya darayawon nga mga kalidad basi mapahimulsan nira an kinabuhi ha kamurayawan, kalipayan, ngan pagkauruyon—posible nga ha waray kataposan. An ira hatag-han-Dios nga konsensya, kon husto nga ginbansay, maggigiya ha ira nga tratuhon an iba ha paagi nga karuyag nira mismo nga tratuhon.

Nagin Kaylap an Pagin Makikalugaringon

Tungod kay an katawohan nagkaada hin sugad kaopay nga tinikangan, ano an nahitabo? Ha simple nga pagkayakan, an mga tawo nagtikang magpakita han maraot nga kalidad han kahakog. Kadam-an han mga tawo an pamilyar ha asoy han Biblia mahitungod han ginbuhat han siyahan nga tawhanon nga mag-asawa, sugad han nakarekord ha Genesis kapitulo 3. Tungod kay gin-aghat ni Satanas, an parakontra ha ngatanan nga matadong nga mga suruklan han Dios, hi Adan ngan hi Eva hakog nga nagdumiri ha pagmando han Dios ngan nagpili han pagin-independente ngan pagbuot-ha-kalugaringon. An ira hakog ngan rebelyoso nga buhat nagresulta diri la ha ira daku nga kadaot kondi ha makasurubo nga mga resulta liwat para ha ngatanan nga ira mga anak ha tidaraon. Matin-aw ito nga kapahayagan han makaharadlok nga resulta han pagbalewaray han katutdoan nga gintawag nga Bulawanon nga Surundon. Salit, “tungod ha usa ka tawo, sinulod an sala ha kalibotan, ngan tungod ha sala an kamatayon; ngan sugad man an kamatayon inagi ha ngatanan nga katawohan, kay an ngatanan nakasala.”—Roma 5:12.

Bisan kon ha kabug-osan nagdumiri an katawohan ha mahigugmaon nga mga paagi ni Jehova nga Dios, waray niya isalikway hira. Pananglitan, iginhatag ni Jehova an iya Balaud ha nasud han Israel basi giyahan hira. Nagtutdo ito ha ira nga tratuhon an iba sugad han ira karuyag nga pagtrato ha ira. An Balaud naghatag hin giya ha pagtrato ha mga uripon, waray-amay nga kabataan nga kalalakin-an, ngan balo nga kababayin-an. Nagsaysay ito kon paonan-o pagdudumarahon an pagkastigo, pagkidnap, ngan pangawat. An mga balaud ha kalimpyo nagpakita hin pagtagad ha kahimsog han iba. May-ada pa ngani mga balaud mahitungod ha seksuwal nga mga butang. Ginsumaryo ni Jehova an  iya Balaud pinaagi ha pagsiring ha mga tawo: “Higugmaon mo an imo igkasitawo sugad ha imo ngahaw,” usa nga kapahayagan nga ginkotar ni Jesus ha urhi. (Lebitiko 19:18; Mateo 22:39, 40) An Balaud nagsaysay liwat hin mga regulasyon mahitungod ha pagtagad ha mga dumuruong nga kaupod han mga Israelita. An Balaud nagsugo: “Diri mo paglupiglupigon an dumuruong: kay maaram kamo han kasingkasing han dumuruong, kay kamo mga dumuruong man hadto ha tuna ha Ehipto.” Ha iba nga mga pulong, an mga Israelita kinahanglan magpakita hin mapinairon nga kalooy ha mga kablas.—Eksodo 23:9; Lebitiko 19:34; Deuteronomio 10:19.

Samtang maunungon nga ginsusunod han Israel an Balaud, ginbendisyonan ni Jehova an nasud. Ilarom han pagmando ni David ngan Salomon, nag-uswag an nasud, ngan nalipay ngan natagbaw an katawohan. An asoy han kasaysayan nagsusumat ha aton: “An Juda ngan an Israel sugad-sugad han baras nga dida ha hirani han dagat hin kadamu, nga nagpipinangaon ngan nag-iirignom ngan maglipayon. Ngan an Juda ngan an Israel nag-ukoy ha waray kataragman, an tagsa ka tawo ha sirong han iya balagon ngan ha sirong han iya kahoy nga igera.”—1 Hadi 4:20, 25.

Makasurubo, an kamurayawan ngan seguridad han nasud waray mag-iha. Bisan kon gintagan han Balaud han Dios, waray sunda ito han mga Israelita; gintugotan nira an pagin hakog nga makapugong han ira pagtagad ha iba. Ini, ngan an apostasya, nagresulta hin kakurian ha ira sugad nga indibiduwal ngan sugad nga nasud. Ha kataposan, han tuig 607 A.K.P., gintugotan ni Jehova an mga taga-Babilonya nga bungkagon an ginhadian han Juda, an siyudad han Jerusalem, ngan bisan an bantogan nga templo didto. Ha ano nga hinungdan? “Tungod kay kamo waray pamati han akon mga pulong, kitaa, akon pakakadtoon ngan kukuhaon an ngatanan nga mga panimalay ha amihanan, nasiring hi Jehova, ngan akon ipadara ngadto kan Nebukadnesar an hadi ha Babilonya, nga akon surugoon, ngan magdadara ha ira patok hini nga tuna, ngan patok ha mga umurukoy dida, ngan patok hini ngatanan nga nasud ha palibot; ngan akon titinuuron hira paggunaw, ngan hihimoon ko hira nga katingalahan, ngan harayukaton, ngan mga binayaan nga dayon.” (Jeremias 25:8, 9) Daku gud nga sirot ha pagsalikway han putli nga pagsingba ni Jehova!

An Susbaranan nga Angay Subaron

Ha luyo nga bahin, diri la kay igintutdo ni Jesu-Kristo an Bulawanon nga Surundon kondi iginpakita liwat an gimaopayi nga susbaranan ha pagsunod hito. Gintagad gud niya an kaopayan han iba. (Mateo 9:36; 14:14; Lukas 5:12, 13) Makausa, hirani ha siyudad han Nain, hinkit-an ni Jesus an usa nga nasusubo nga balo nga babaye ha lubong han iya bugtong nga anak nga lalaki. An asoy han Biblia nasiring: “Han pakakita ha iya, an Ginoo nalooy ha iya.” (Lukas 7:11-15) An ekspresyon nga “nalooy,” sumala ha Vine’s Expository Dictionary of Old and New Testament Words, nagpapasabot nga “mapagios sumala ha inaabat han usa.” Inabat ni Jesus an kasakit han kasingkasing han balo, ngan nakaaghat ito ha iya nga buhaton an positibo nga mga pitad ha pagkuha han kasakit han balo. Daku gud an kalipay hito nga balo han ginbanhaw ni Jesus an bata ngan ‘iginhatag hiya ha iya iroy’!

Ha kataposan, uyon ha katuyoan han Dios, hi Jesus kinaburut-on nga nag-antos ngan naghatag han iya kinabuhi sugad nga lukat basi an katawohan maluwas tikang ha pagkauripon ha sala ngan kamatayon. Ini an gihitaasi nga susbaranan han pagkinabuhi uyon ha Bulawanon nga Surundon.—Mateo 20:28; Juan 15:13; Hebreo 4:15.

Mga Tawo nga Nagkikinabuhi Uyon ha Bulawanon nga Surundon

May-ada ba mga tawo ha aton panahon nga totoo nga nagkikinabuhi uyon ha Bulawanon nga Surundon? May-ada, ngan diri la kon kombinyente ito. Pananglitan, durante han Girra ha Kalibotan II ha Nazi Alemanya, gintipigan han mga Saksi ni Jehova an ira pagtoo ha Dios ngan gugma ha ira igkasi-tawo ngan nagdumiri nga ikompromiso an Bulawanon nga Surundon. Samtang marig-on nga igin-aghat han Estado an usa nga kampanya han kapungot ngan diskriminasyon kontra ha ngatanan nga mga Judio, an mga Saksi nagpadayon ha pagsunod ha Bulawanon nga Surundon. Bisan ha mga kampo nga prisohan, padayon nga gin-aataman nira an mga igkasi-tawo, nakikigbahin han ira pagkaon, bisan kon gutiay la, ha nagugutom nga mga Judio ngan mga diri-Judio. Dugang pa, bisan kon ginsugo han Estado nga gumamit hin mga armas basi patayon an iba, nagdumiri hira ha pagbuhat hito, sugad la nga diri nira karuyag nga patayon han iba. Paonan-o nira papatayon adton kinahanglan nira higugmaon sugad han ira paghigugma ha kalugaringon? Tungod han ira pagdumiri, damu ha ira an iginpadara diri la ha mga kampo nga prisohan kondi ngadto ha ira kamatayon.—Mateo 5:43-48.

Samtang binabasa mo ini nga artikulo, napapahimulosan  mo an usa pa nga susbaranan han Bulawanon nga Surundon nga nagios. Maaram an mga Saksi nga damu an mga tawo yana nga nag-aantos hin kawaray-paglaom ngan kawaray-mahihimo. Tungod hini, an mga Saksi boluntaryo nga nagbubuhat hin positibo basi buligan an iba nga mahibaro mahitungod han paglaom ngan han praktikal nga giya nga aada ha Biblia. Bahin ito ngatanan han edukasyonal nga buruhaton nga ginbubuhat yana ha waray katupong nga sukol ha bug-os nga kalibotan. Ano an resulta? Sugad han igintagna ha Isaias 2:2-4, “damu nga katawohan,” ha pagkamatuod sobra unom ka milyon nga indibiduwal ha bug-os nga kalibotan, an ‘gintututdoan ha mga paagi ni Jehova ngan naglalakat ha iya mga dalan.’ Ha simboliko nga paagi, nahibabaro hira ha “[pagpanday han] ira mga kampilan nga mga punta hin arado, ngan [han] ira mga bangkaw nga mga garab nga ipangarapon.” Nabilngan na nira an kamurayawan ngan kasigurohan dida hinin makuri nga mga panahon.

Kumusta Ka Man?

Hunahunaa anay an kasakit ngan pag-antos han katawohan tungod han pagbalewaray ha Bulawanon nga Surundon tikang han pagrebelde ha Eden, nga gin-aghat ni Satanas nga Yawa. Katuyoan ni Jehova nga baliktaron an kahimtang ha diri na maiha. Paonan-o? “Tungod hini nga katuyoanan an Anak han Dios iginpahayag, basi ha pagbungkag ha mga buhat han yawa.” (1 Juan 3:8) Mahitatabo ini ilarom han pagmando han Ginhadian han Dios, ha maaramon ngan may katakos nga pagdumara ni Jesu-Kristo, an usa nga nagtutdo ngan nagkinabuhi uyon ha Bulawanon nga Surundon.—Salmo 37:9-11; Daniel 2:44.

Hi Hadi David han kadaan nga Israel nakaobserba: “Nagin bata ako, ngan yana lagas na ako; Kondi waray pa ako makakita nga an mga magtadong pagpasibay-an, bisan ngani waray pa an iya mga katulinan pagpakilimos hin tinapay. Ha bug-os nga adlaw nalolooy hiya ngan napahuram; Ngan an iya katulinan nabubulahan.” (Salmo 37:25, 26) Diri ka ba mauyon nga kadam-an han mga tawo yana an nangunguha ngan naninikas imbes nga ‘malooy ngan magpahuram’? Matin-aw, an pagsunod ha Bulawanon nga Surundon makakagtugway ngadto ha totoo nga kamurayawan ngan seguridad tungod kay pinaagi hito mapapahimulsan han usa an mga bendisyon yana ngan ha tidaraon ilarom han Ginhadian han Dios. Kukuhaon han Dios an ngatanan nga kahakog ngan karaotan ha tuna ngan sasaliwanan an presente nga sistema han maraot nga pagmando nga hinimo han tawo hin bag-o nga sistema nga hihimoon han Dios. Hiton nga panahon, an ngatanan nga tawo magkakalipay ha pagkinabuhi uyon ha Bulawanon nga Surundon.—Salmo 29:11; 2 Pedro 3:13.

[Mga Retrato ha pahina 4, 5]

Diri la kay igintutdo ni Jesus an Bulawanon nga Surundon kondi iginpakita liwat an gimaopayi nga susbaranan ha pagbuhat hito

[Mga Retrato ha pahina 7]

An pagsunod ha Bulawanon nga Surundon makakagtugway ngadto ha totoo nga kamurayawan ngan seguridad