AN PUNTO DE BISTA HAN BIBLIA
Pagin Eksakto ha Oras
Damu han nag-aapresyar han bili han pagin eksakto ha oras an nangangalimbasog liwat nga diri maatrasar. An Biblia naghahatag hin praktikal nga kinaadman may kalabotan hini.
Mationan-o kaimportante an pagin eksakto ha oras?
KON KAY ANO NGA IMPORTANTE
Hinbaroan han pipira nga an pag-abot hin temprano ha mga apoyntment nakakaiban han istres. Nakakabulig liwat ito nga magkaada an usa hin maopay nga reputasyon. Paonan-o?
Nagpapakita ito hin kapasidad ha pagin epektibo. Kon eksakto ka ha oras, iginpapakita hito nga nangangalimbasog ka nga ikaw an may kontrol han imo kinabuhi imbes nga ikaw an ginkukontrol han mga kahimtang.
Nagpapakita ito hin pagin masasarigan. Ha sosiedad diin kalyap an diri pagtuman han saad ngan pagbalewaray han mga ginkasabotan, gin-aapresyar gud an mga tawo nga nagtutuman han ira saad. An mga tawo nga masasarigan gintatahod han ira pamilya ngan kasangkayan. An mga agaron nagpapabili ha ira mga empleyado nga nasulod ha eksakto nga oras ngan nakakaabot han ira mga deadline. An masasarigan nga trabahador gintatagan pa ngani hin mas daku nga sweldo ngan daku nga pagtapod.
AN GINSISIRING HAN BIBLIA
May mga teksto ha Biblia nga may kalabotan ha pagin eksakto ha oras. Pananglitan, ito nasiring: “Buhata niyo an ngatanan ha desente ngan organisado nga paagi.” (1 Corinto 14:40) Kon an duha nagsabot nga magkita ha espisipiko nga oras ngan lugar, husto ngan angayan la para ha ira nga umabot ha eksakto nga oras. An Biblia nagsiring liwat: “Ha tagsa nga butang mayada usa ka panahon, ngan usa ka panahon para ha tagsa nga tinguha ha sirong han langit.” (Eklesiastes 3:1) An konteksto hini nga teksto nasiring nga may “panahon ha pagtanum, ngan may panahon ha paggabut.” (Eklesiastes 3:2) An parauma nagtatanom ha eksakto nga panahon basi magkaada han pinakamaopay nga ani. Karuyag sidngon, mapulsanon gud ha parauma an pagin eksakto ha oras.
Iginsusumat liwat han Biblia an mas makatadunganon nga rason ha pagin eksakto ha oras: Nagpapakita ito hin respeto ha igkasi-tawo ngan han ira presyoso nga panahon. (Filipos 2:3, 4) Ha kabaliktaran, adton pirme nagpapahulat sugad hin nagkakawat han oras han iba.
“Magin matinagaron kamo, diri la para ha iyo kalugaringon nga kaopayan, kondi para liwat ha kaopayan han iba.”—Filipos 2:4.
Ano an imo mahimo buhaton basi magin eksakto ha oras?
AN GINSISIRING HAN BIBLIA
Gin-aaghat kita han Biblia nga abanse nga magplano. (Proberbios 21:5) Kon pirme ka naaatrasar ha imo mga apoyntment, bangin puno an imo eskedyol. Kay ano nga diri ibanan an diri importante nga buruhaton? Paggahin hin dugang nga panahon ha butnga han duha nga apoyntment, ngan himoa nga tumong nga makaabot hin temprano. Mabulig ini ha imo nga diri malangan kon may diri ginlalaoman nga panhitabo, sugad han trapik o maraot nga panahon.
Gin-aaghat liwat kita han Biblia nga magin mahunahunaon ha aton limitasyon. (Proberbios 11:2) Nagpapasabot ini nga sadang naton hibaroan kon tubtob la diin an aton mahihimo. Hunahunaa kon posible ba ha imo eskedyol an usa nga apoyntment o deadline antes mo karawaton ito. Kon kakarawaton mo an mga apoyntment nga diri mo na mahihimo, nagdudugang ka hin istres ngan kapakyasan ha imo kalugaringon ngan ha iba!
An Biblia dugang nga nag-aaghat nga gamiton naton ha pinakamaopay nga paagi an aton panahon. (Efeso 5:15, 16) Iprayoridad an pinakaimportante nga mga buruhaton. (Filipos 1:10) Pananglitan, samtang sakay hin panpubliko nga transportasyon o naghuhulat ha iba, pahimulsi an panahon pinaagi ha pagbasa o pagplano para han imo bug-os nga adlaw.
“An mga hunahuna han madoroto tipakadto . . . ha kahuraan.”—Proberbios 21:5.
