AN MGA Kazakh nagbuburobalhin hin urukyan tikang pa hadto. Tubtob yana, ginbuburobalhin hin lugar han pipira nga Kazakh nga paraataman hin hayop an ira mga panon depende han klima. Ha katpaso, gindadara nira an ira panon ha mataghom nga kabungtoran nga damu an banwa. Katapos, kon hirani na an kathagkot, iginbabalhin nira ito ha mapaso nga kapatagan.

May mga Kazakh nga naukoy ha moderno ngan mainuswagon nga mga syudad. Bisan pa hito, damu han ira tradisyon, pagkaon, ngan produkto an nagpapakita han paagi han pagkinabuhi han ira kaapoy-apoyan. Hura liwat an kultura han Kazakh hin mga siday, kanta, ngan musika nga gintutokar gamit an lokal nga mga instrumento.

An yurt nga usa nga tradisyonal ngan nabuburobalhin nga balay, nagin usa nga simbolo nga an tawo mahimo  magkinabuhi ha paagi nga diri nakakadistruso ha palibot. Para ha mga paraataman han karnero, mas karuyag la gihap nira an yurt, ngan agsob nga ginagamit ito han mga taga-syudad para ha espesyal nga mga okasyon. An yurt ginagamit liwat sugad nga komportable nga urukyan han mga turista. Mahimo makita ha sulod hito an iba-iba nga talento han Kazakh nga kababayin-an ha pagborda, paglara, ngan paghimo hin karpet.

Importante para ha mga taga-baryo nga Kazakh an ira mga kabayo. May-ada hira diri maminos 21 nga pulong para ha kabayo, nga an tagsa hito may iba nga kahulogan, ngan may-ada hira sobra 30 nga termino basi ihulagway an kolor han barahibo han kabayo. An maopay nga klase hin kabayo usa nga mahal ngan ginpapabilhan nga regalo. Ha mga huron, an kabataan nga kalalakin-an maaram na mangabayo ha temprano nga pangidaron.

An tradisyonal nga pagkaon han mga Kazakh pirme may karne ngan kasagaran diri damu an panakot. Usa han ira paborito nga irimnon an koumiss, nga hinimo tikang ha gatas han kabayo ngan gintotoohan nga nakakaopay ha kahimsog, ngan an makrema ngan medyo maaslom nga shubat nga hinimo tikang ha gatas han kamelyo.

Gin-aabiabi ha sanga nga opisina han mga Saksi ni Jehova ha Almaty an bisan hin-o nga karuyag bumisita ngan mag-tour didto.