An sayop nga impormasyon kasagaran nga nagriresulta hin diskriminasyon. Tagda an masunod nga ehemplo:

• May mga boss nga sayop nga naghuhunahuna nga diri kaya han kababayin-an an mga trabaho nga magkuri, magbug-at, o komplikado.

• Ha kadaan nga Europa, gin-akusaran an mga Judio nga nagbutang hin hilo ha mga bubon ngan nagpasarang hin sakit. Ha panahon naman han Nazi, gin-akusaran hira nga amo an hinungdan han krisis ha Germany. Ito nga mga akusasyon nagresulta han duro nga diskriminasyon ha ira, nga tubtob yana naieksperyensyahan pa ito han pipira.

• Damu an sayop nga naghuhunahuna nga adton may depekto ha panlawas pirme masurub-on ngan madali masina.

An mga tawo nga natoo han sugad hito nga mga ideya bangin mag-unabi hin mga ehemplo o ebidensya basi pakamatadungon an ira iginpapakita nga diskriminasyon. Ngan ginhuhunahuna nira nga ignorante an bisan hin-o nga diri nauyon ha ira.

“An tawo nga waray kahibaro diri maopay.”​—PROBERBIOS 19:2.

Ano an karuyag sidngon hito? Sayop an aton nagigin mga desisyon kon diri kita maaram han kamatuoran. Kon matuod kita ha mga sumat-sumat la imbes nga ha kamatuoran, magigin negatibo an aton panhunahuna ha iba nga tawo.

Kon maaram kita han kamatuoran mahitungod ha iba nga tawo, diri kita matuod ha sayop nga ginsisiring han iba mahitungod ha ira. Ngan kon mahibaroan naton nga sayop ngay-an an igin-istorya han mga tawo mahitungod ha usa nga partikular nga grupo, diri na kita basta la matuod kon may ig-istorya hira mahitungod ha iba pa nga grupo.

• Hinumdumi nga bisan kon may negatibo nga kalidad an pipira nga tawo han usa nga grupo, diri ngatanan hito nga grupo sugad hito.

• Karawata nga diri ngatanan nga impormasyon mahitungod ha usa nga grupo posible mo mahibaroan.

• Kuha hin impormasyon tikang ha masasarigan nga surok.