SARIHI AN IMO KAHIBARO

I-tsek an impormasyon kon husto o sayop.

HUSTO SAYOP

1. An mga Saksi ni Jehova mga Kristiano.

2. An mga Saksi ni Jehova mga creationist.

3. An mga Saksi ni Jehova diri nagpapadoktor.

4. An mga Saksi ni Jehova natoo han bug-os nga Biblia.

5. Kalugaringon la nga hubad han Biblia an ginagamit han mga Saksi ni Jehova.

6. Ginbabag-o han mga Saksi ni Jehova an ira Biblia basi maipahiuyon ha ira gintotoohan.

7. An mga Saksi ni Jehova waray naibubulig ha komunidad.

8. Ginmiminos han mga Saksi ni Jehova an mga tawo nga iba an relihiyon.

Kitaa an mga baton ha sunod nga mga pahina.

1.  1 HUSTO. Nangangalimbasog kami ha pagsunod hin maopay han katutdoan ngan panggawi ni Jesu-Kristo. (1 Pedro 2:21) Pero damu an amon kaibahan ha mga relihiyon nga gintatawag nga Kristiano. Pananglitan, hinbaroan namon nga an Biblia nagtututdo nga hi Jesus an Anak han Dios; diri hiya bahin han Trinidad. (Marcos 12:29) Diri kami natoo nga an kalag diri namamatay, o may-ada basihan ha Biblia basi tumoo nga ginpapakurian han Dios an mga tawo ha impyerno tubtob ha waray kataposan. Diri liwat kami natoo nga adton nangunguna ha relihiyoso nga mga buruhaton sadang tagan hin mga titulo nga nagpapakita nga labaw hira ha iba.—Eklesiastes 9:5; Esekiel 18:4; Mateo 23:8-10.

2. 2 SAYOP. Natoo kami nga an Dios an naglarang han ngatanan. Kondi diri kami nauyon ha mga natoo ha creationism. Kay ano? Tungod kay supak ha Biblia an damu nga igintututdo hito. Pananglitan, iginpipirit nira nga an unom ka adlaw han paglarang literal nga adlaw nga may 24 ka oras. Pero ha Biblia, an pulong nga “adlaw” mahimo magpasabot hin hilawig nga peryodo han panahon. (Genesis 2:4; Salmo 90:4) Dugang pa, igintututdo han mga creationist nga an tuna pipira pa la ka yukot ka tuig nga naeksister. Kondi, an Biblia nasiring nga an tuna ngan uniberso maiha na nga naeksister antes pa han unom ka adlaw nga paglarang. ¹—Genesis 1:1.

3. 3 SAYOP. Nakarawat kami hin medikal nga pagtambal. Ngani, mga doktor an pipira ha amon, pariho han Kristiano ha siyahan nga siglo nga hi Lucas. (Colosas 4:14) Kondi, diri kami nakarawat hin pagtambal nga supak ha mga prinsipyo ha Biblia. Pananglitan, diri kami nagpapaabuno hin dugo tungod kay igindidiri han Biblia an pagsulod hin dugo ha aton lawas.—Buhat 15:20, 28, 29.

   Bisan pa hito, karuyag namon an pinakamaopay nga paagi han pagpatambal para ha amon kalugaringon ngan ha amon pamilya. Ha pagkamatuod, an mga paagi han pagtambal nga diri nag-aabuno hin dugo nga ginagamit ha mga Saksi, ginagamit na yana para ha kapulsanan han ngatanan ha komunidad. Ha damu nga nasud, an mga pasyente mahimo na magdesisyon nga diri magpaabuno basi malikyan an mga peligro, sugad han sakit nga nakukuha ha dugo, mga komplikasyon, ngan ha mga sayop durante han proseso ha pag-abuno.

4. 4 HUSTO. Natoo kami nga an bug-os nga Biblia “giniyahan han Dios ngan mapulsanon.” (2 Timoteo 3:16) Ginkukompwesto ito han Daan nga Testamento ngan Bag-o nga Testamento, sugad han komon nga tawag hito. Kondi, kasagaran nga gintatawag namon ito nga mga seksyon nga Hebreo nga Kasuratan ngan Kristiano Griego nga Kasuratan. Hini nga paagi, nalilikyan namon an paghatag hin impresyon nga an iba nga bahin han Biblia daan na o diri na praktikal.

5.  5 SAYOP. Nagamit kami hin iba-iba nga bersyon ha amon pag-aram ha Biblia. Kondi, mas karuyag namon gamiton an New World Translation of the Holy Scriptures ha mga yinaknan nga may-ada hito tungod ha paggamit han ngaran han Dios, pagin husto, ngan pagin klaro. Tagda an may kalabotan ha paggamit han ngaran han Dios nga Jehova. Ha introduksyon han usa nga bersyon han Biblia, nakalista an ngaran han 79 nga tawo nga bumulig ha pagpublikar hito nga hubad. Kondi ginkuha dida hito an ngaran mismo han Awtor han Biblia—hi Jehova nga Dios! Ha kabaliktaran, iginbalik han New World Translation an ngaran han Dios ha yinukot nga teksto diin mababasa ito ha orihinal nga manuskrito. ²

6. 6 SAYOP. Kon amon nakikita nga an amon gintotoohan diri uyon ha Biblia, ginbabag-o namon an amon pagsabot. Antes pa namon ipublikar an New World Translation of the Holy Scriptures han 1950, nagamit na kami hin iba-iba nga bersyon ngan iginbasar namon an amon gintotoohan dida hito.

7. 7 SAYOP. Damu an nabubuligan ha komunidad han amon ministeryo. Damu na an amon nabuligan nga makabaya ha ira nakakadaot nga bisyo, sugad han pag-abuso ha droga ngan de-alkohol nga irimnon. Yinukot na ha bug-os nga kalibotan an nahibaro ha pagbasa ngan pagsurat tungod han amon pagdumara hin mga klase basi matutdoan hira. Nahatag liwat kami hin praktikal nga bulig ha mga biktima hin kalamidad—Saksi man hira o diri. Nangangalimbasog kami nga magtagana hin emosyonal ngan espirituwal nga bulig nga ginkikinahanglan gud han mga biktima. ³

8. 8 SAYOP. Ginsusunod namon an sagdon han Biblia nga ‘tahuron an ngatanan’—anoman an ira relihiyon. (1 Pedro 2:17, An Baraan nga Kasuratan) Pananglitan bisan kon yinukot ka gatos an mga Saksi ha pipira nga nasud, diri namon ginpipirit an mga politiko o magbaralaud nga igdiri an buruhaton han iba nga relihiyon. Diri liwat kami nangangampanya basi ipasa an balaud nga nag-oobligar ha mga tawo nga sundon an amon gintotoohan ha moral ngan relihiyon. Lugod, ginrirespeto namon an iba sugad la nga ginpapabilhan namon an respeto nga iginhahatag nira ha amon.—Mateo 7:12.

Ini nga artikulo nagsusulod hin mga impormasyon tikang ha amon website nga jw.org/tl. Para ha dugang nga impormasyon, kitaa an TUNGKOL SA AMIN > KARANIWANG MGA TANONG.