“Magtrabaho hiya hin maduruto, nga nagbubuhat hin maopay pinaagi han iya mga kamot, basi may maihatag hiya ha nanginginahanglan.”​—EFESO 4:28.

Gin-aaghat kita han aton Maglalarang nga magkaada positibo nga panhunahuna ha trabaho. Kay ano? Malipayon an maduruto nga nagtatrabaho kay nakakagtagana hiya para ha iya kalugaringon ngan ha iya pamilya. Mahimo pa ngani niya mabuligan an nanginginahanglan. Papabilhan liwat hiya han iya agaron. Salit an maopay nga trabahador mas daku an posibilidad nga makapabilin ha iya trabaho. Angayan la nga iginhuhulagway han Kasuratan an mga balos ha maduruto nga pagtrabaho sugad nga ‘regalo han Dios.’​—Eclesiastes 3:13.

“Natapod kami nga may-ada kami tangkod nga konsensya, kay karuyag namon gumawi hin tangkod ha ngatanan nga butang.”​—HEBREO 13:18.

Kon tangkod kita, may-ada kita respeto ha kalugaringon, murayaw an aton hunahuna, ngan mas maopay an aton katurog. Dugang pa, tataporan ngan rirespetuhon kita han iba. Diri ito naieksperyensyahan han mga diri tangkod. Sugad man, bangin pirme hira nakukonsensya ngan nahahadlok nga hibaroan han iba an ira pagin diri tangkod.

“Mahigawas ha paghigugma ha kwarta an iyo pagkinabuhi, samtang kontento na kamo ha mga butang nga aada.”​—HEBREO 13:5.

Kinahanglan naton an kwarta basi makapalit hin pagkaon ngan iba pa nga panginahanglan. Pero delikado gud an ‘gugma ha kwarta.’ Tungod hito, mahimo gamiton han usa an haros ngatanan niya nga panahon ngan kusog basi madugangan pa an iya kwarta. Ini nga pagpinamiling hin kwarta mahimo makaapekto ha iya pag-asawa, makagwara han iya panahon ha iya mga anak, ngan makadaot pa ngani ha iya kahimsog. (1 Timoteo 6:9, 10) Sugad man, an tawo nga nahigugma ha kwarta bangin masulay nga magin diri tangkod. Ini an siring han usa nga maaramon nga tawo: “An matinumanon nga tawo makakakarawat hin damu nga bendisyon, pero an tawo nga nagdadagmit nga magin riko diri magpapabilin nga waray sala.”​—Proberbios 28:20.

“Panalipdi an praktikal nga kinaadman ngan an abilidad ha paghunahuna.”​—PROBERBIOS 3:21.

An maopay nga edukasyon nakakabulig ha aton nga magin responsable nga mga adulto ngan mga kag-anak. Pero an pagkaada la maopay nga sekular nga edukasyon diri makakagarantiya hin nagpapadayon nga seguridad o kalipay. Basi magin tinuod nga malampuson ha ngatanan nga bahin han kinabuhi, kinahanglan naton an edukasyon nga iginhahatag han Dios. Ini an siring han Kasuratan mahitungod ha tawo nga namamati ha Dios: “An ngatanan nga iya ginbubuhat maglalampos.”​—Salmo 1:1-3.