AN TAWO NAGHIHINGYAP HIN GUGMA. Waray mag-asawa, pamilya, o magsangkay nga makakagpadayon kon waray gugma. Salit masisiring nga importante an gugma ha kahimsog han aton hunahuna ngan ha aton kalipay. Kondi, ano an kahulogan han “gugma”?

An gugma nga ginhihisgotan dinhi diri an romantiko nga gugma, nga syempre importante liwat. Lugod, usa ito nga hitaas nga klase han gugma nga nagpapagios ha indibiduwal nga magpakita hin sinsero nga pagkonsiderar ha kaopayan han iba, nga gin-uuna pa ngani an iba antes an iya kalugaringon. Gugma ito nga ginigiyahan han mga prinsipyo tikang ha Dios, ngan may pagpaid ngan pagbati liwat.

An maopay nga diskripsyon ha gugma, nasiring: “An gugma nagpapasensya ngan buotan. An gugma diri nangangabugho, diri naghahambog, diri nagpapahitaas, diri nagawi hin diri desente, diri naghuhunahuna han kalugaringon la nga kaopayan, ngan diri madali masina. Diri ito nag-iihap han karat-an. Diri ito nalilipay ha pagkadiri-matadong, pero nalilipay ha kamatuoran. Nag-aantos ito han ngatanan nga butang, . . . naglalaom han ngatanan nga butang, ngan nagpapailob han ngatanan nga butang. An gugma diri gud napapakyas.”—1 Corinto 13:4-8.

An sugad nga gugma “diri gud napapakyas” tungod kay diri ito mawawara. Ngani, nagigin marig-on ito paglabay han panahon. Ngan tungod kay nagpapasensya ito, buotan, ngan mapinasayloon, ito “an hingpit nga bugkos han pagkaurosa.” (Colosas 3:14) Salit an relasyon nga ginbugkos hito marig-on ngan malipayon bisan pa han pagin diri perpekto han mga indibiduwal. Pananglitan, kitaa an pag-asawa.

Hi Jesu-Kristo nagtutdo hin importante nga mga prinsipyo ha pag-asawa. Pananglitan, hiya nagsiring: “ ‘Babayaan han lalaki an iya tatay ngan an iya nanay ngan magpapadayon nga kaupod han iya asawa, ngan hira nga duha magigin usa nga unod’ . . . Kon sugad, an gintampo han Dios diri pagbulagon han tawo.” (Mateo 19:5, 6) May diri maminos duha nga importante nga prinsipyo nga ginpapabug-atan dinhi.

“HIRA NGA DUHA MAGIGIN USA NGA UNOD.” An pag-asawa amo an pinakaduok nga relasyon, ngan an gugma mahimo magprotektar han mag-asawa kontra ha pagin diri maunungon—diin an bana o asawa nagigin “usa nga lawas” han iba, labot la han iya asawa. (1 Corinto 6:16; Hebreo 13:4) An pagin diri tangkod nakakawara han pagtapod ngan nakakadaot han pag-asawa. Ngan kon may mga anak, mahimo ito magkaada maraot nga epekto ha ira emosyon, umabat hin pagin diri hinigugma, kawaray-kasigurohan, o kasina pa ngani.

“AN GINTAMPO HAN DIOS.” An pag-asawa usa nga paghiusa nga gin-uuyonan han Dios. An mag-asawa nga narespeto hito nga kamatuoran nangangalimbasog nga parig-unon an ira pag-asawa. Kon nagkakaproblema, diri hira namimiling hin paagi basi tapuson an ira relasyon. An ira gugma marig-on ngan nakakapahiuyon. An sugad nga gugma ‘nag-aantos han ngatanan nga butang,’ ngan nabulig ito nga masulbad an problema basi matipigan an maopay ngan murayaw nga relasyon han mag-asawa.

Kon an mag-asawa may nagsasakripisyo nga gugma para ha kada tagsa, magpapahimulos gud an mga anak. An batan-on nga hi Jessica nagsiring: “Ginhihigugma gud ngan ginrirespeto nira Tatay ngan Nanay an kada tagsa. Kon nakikita ko nga ginrirespeto ni Nanay hi Tatay, labi na kon may kalabotan ha amon nga mga anak, naaaghat ako nga subaron hiya.”

An gugma amo an nangunguna nga kalidad han Dios. Ha pagkamatuod, an Biblia nasiring: “An Dios gugma.” (1 Juan 4:8) Salit, diri urusahon nga hi Jehova gintatawag liwat nga “malipayon nga Dios.” (1 Timoteo 1:11) Magigin malipayon liwat kita kon nangangalimbasog kita nga subaron an mga kalidad han aton Maglalarang—labi na an iya gugma. An Efeso 5:1, 2 nasiring: “Hinigugma nga mga anak, subara niyo an Dios, ngan padayon nga magkinabuhi kamo nga may gugma.”