HAN Sabado, Abril 25, 2015, ginbay-og han 7.8-magnitude nga linog an bukiron nga nasud han Nepal ha norte han India. Naigo han linog an lugar nga mga 80 ka kilometro ha norte-weste han kapital nga syudad nga Kathmandu. Makasurubo, sobra 8,500 nga tawo an namatay; tungod hini, ini an nairekord nga kalamidad ha Nepal nga may pinakadamu nga namatay. Sobra tunga ka milyon nga balay an narumpag. May 2,200 nga Saksi ni Jehova ha Nepal, ngan kadam-an ha ira an naukoy ha apektado nga lugar. Makasurubo, usa nga Saksi ngan an iya duha nga anak an namatay.

“Nahitabo an linog han an mga kongregasyon ha apektado gud nga lugar nagdudumara han ira Kristiano nga katirok,” siring han Saksi nga hi Michelle. “Kon nahitabo ito ha panahon nga damu an nakadto ha ira balay, sigurado nga mas damu an namatay.” Kay ano nga natalwas an mga tumambong ha katirok? Daku gud an naibulig han disenyo han Kingdom Hall.

An moderno nga mga Kingdom Hall ha Nepal gindisenyo basi makailob ha linog. Hi Man Bahadur, nga kaapi ha pagpanukod hin Kingdom Hall, nagsiring: “Agsob kami pakianhan kon kay ano nga nagbubutang kami hin marig-on nga pundasyon para ha gutiay nga istraktura. Yana nakita namon an mga kapulsanan!” Katapos han linog, gin-aprobaran nga gamiton an mga Kingdom Hall sugad nga evacuation center. Bisan pa han mga aftershock, an mga Saksi ni Jehova ngan an ira mga amyaw inabat hin pagin talwas didto.

Ginpamiling dayon han Kristiano nga mga tigurang an mga membro han kongregasyon nga nawawara. “Gin-una han mga tigurang an kaopayan han kongregasyon kay han ira kalugaringon,” siring han Saksi nga hi Babita. “Nabantad gud kami nga makita an sugad nga gugma.” Kinabuwasan katapos han linog, an tulo nga membro han komite nga nanginginano han buruhaton han mga Saksi ni Jehova ha Nepal, ngan an nagbibiyahe nga mga ministro, o paramangno han sirkito, binisita ha mga kongregasyon basi panginanoon an mga panginahanglan ngan basi suportaran an lokal nga mga tigurang.

Unom ka adlaw katapos han linog, hi Gary Breaux han headquarters han mga Saksi ha Estados Unidos, inabot ha Nepal kaupod han iya asawa nga hi Ruby. Hi Reuben nga usa nga membro han komite, nagsiring: “Tungod han kasamok ha Kathmandu ngan han mga aftershock, nagruhaduha kami kon maabot hi Bugto Breaux. Kondi determinado hiya, ngan inabot gud hira. Gin-apresyar gud han mga Saksi dinhi an ira pagbisita.”

Hi Silas nga nagbuboluntaryo ha opisina han mga Saksi ha Nepal, nagsiring: “Han nahibalik an linya han amon telepono, pirme ito nagriring adlaw ngan gab-i! An mga Saksi ha bug-os nga kalibotan nababaraka gud ha amon. Bisan kon diri namon nasasabtan an yinaknan han iba, inabat namon an ira gugma ngan hingyap ha pagbulig ha amon.”

Ha sulod hin pipira ka adlaw katapos han linog, an lokal nga mga Saksi nagdara hin pagkaon  ha mga Kingdom Hall para ha nanginginahanglan. Dugang pa, gin-organisar an usa nga Disaster Relief Committee, ngan waray pag-iha inabot an suplay han pagkaon ngan iba pa nga panginahanglan, kadam-an hito tikang ha Bangladesh, India, ngan Japan. Ha sulod hin pipira ka adlaw, usa nga medical team hin mga Saksi an inabot tikang ha Europa ngan gin-gamit nira an usa nga Kingdom Hall sugad nga klinika. Nagtrabaho dayon hira; diri la nira gintsitsek-ap an kahimsog han mga biktima, kondi ginbubuligan liwat basi maatubang an truma.

Pariho han inabat han damu, hi Uttara nagsiring: “Makaharadlok gud an linog. Pero katapos hito, nagin mas duok gud kami yana ha amon espirituwal nga pamilya.” Oo, ito nga linog waray magpaluya han gugma han katawohan ni Jehova para ha Iya ngan para ha kada tagsa. Lugod, nagparig-on ito hito nga gugma.