HAN Marso 26, 1937, duha nga kapoy na nga lalaki an hinay-hinay nga nagbiyahe sakay han ira tapotapuhon nga trak pakadto ha Sydney, Australia. Tikang han naglabay nga tuig, sobra 19,300 ka kilometro na an ira nabiyahe ha pipira han pinakainteryor ngan bungturon nga mga rehiyon hito nga kontinente. Diri hira eksplorador o parasaliksik. Hira Arthur Willis ngan Bill Newlands duha la han madasigon nga mga payunir nga determinado nga isangyaw an maopay nga sumat han Ginhadian ha haluag nga interyor nga mga lugar han Australia.

Tubtob han ikatarapos han dekada han 1920, an gutiay nga grupo han mga Estudyante han Biblia * ha Australia kasagaran nga nagsasangyaw la ha mga syudad ngan bungto nga hirani ha dagat. An butnga hini nga kontinente gutiay la an umurukoy; usa ito nga mamara nga rehiyon nga an kahaluag sobra katunga han Estados Unidos. Pero nasasabtan gud han kabugtoan nga an mga sumurunod ni Jesus kinahanglan magpamatuod mahitungod ha iya “tubtob ha pinakahirayo nga lugar ha tuna,” pati na ha interyor nga mga lugar han Australia. (Buh. 1:8) Pero paonan-o nira matutuman iton daku nga buruhaton? Nasarig gud hira nga bibendisyonan ni Jehova an ira mga pangalimbasog, salit determinado hira nga buhaton an ira pinakamaopay.

Han 1929, an kongregasyon ha Queensland pati ha Weste han Australia nangalimbasog nga magkaada pipira nga awto nga magagamit ha pagkobre ha interyor nga mga lugar. An nagdadrayb hito amo adton mapailubon nga mga payunir nga makakagmaniobra hito bisan ha magkuri nga aragian ngan makakag-ayad hito kon maruba. Nakobrehan hini nga mga payunir an damu nga lugar nga waray pa gud masangyawi hadto.

An mga payunir nga waray awto napakadto ha interyor nga mga lugar sakay hin bisikleta. Pananglitan, han 1932, an 23 anyos nga hi Bennett Brickell nagbiyahe tikang ha Rockhampton, Queensland basi kumadto ha interyor nga lugar ha norte nga bahin hito nga syudad para magsangyaw ha sulod hin lima ka bulan. Damu ngan mabug-at an karga han iya bisikleta; may-ada ito mga taklap, bado, pagkaon, ngan damu  nga libro. Han waray na umilob an kaliding han iya bisikleta, nagpadayon pa gihapon hiya, nasarig nga bubuligan hiya ni Jehova. Gintugwayan niya an iya bisikleta hin mga 320 ka kilometro diin inagi hiya ha lugar nga may mga namatay tungod han duro nga uhaw. Ha sulod hin 30 ka tuig katapos hito, nakagbiyahe hi Brother Brickell hin ginatos ka yukot ka kilometro ha bug-os nga Australia gamit an bisikleta, motor, ngan awto. Gintikangan niya an pagsangyaw ha mga nitibo nga Aborigine ngan binulig ha pag-establisar hin bag-o nga mga kongregasyon. Nagin kilala liwat hiya ngan ginrirespeto ha ngatanan nga interyor nga lugar hito nga rehiyon.

Ha Australia mabibilngan an usa han mga lugar ha kalibotan nga may pinakagutiay nga umurukoy, ngan makikita ito ha interyor nga mga bahin han kontinente. Bisan kon higrayo ini nga mga lugar, determinado an katawohan ni Jehova nga sangyawan an mga umurukoy hito.

An payunir nga hira Stuart Keltie ngan William Torrington determinado gud ha pagbuhat hito. Han 1933, inagi hira ha Simpson Desert, usa nga haluag ngan bungturon nga disyerto basi magsangyaw ha bungto han Alice Springs nga nahimumutang ha butnga han kontinente. Han naruba an ira gutiay nga awto ngan kinahanglan nira ito bayaan, inupod pa gihapon hi Brother Keltie ha pagsangyaw bisan kon artipisyal la an iya usa nga tiil; pero hini nga higayon, sakay na hiya hin kamelyo! An pangalimbasog han mga payunir nagkaada maopay nga resulta han nasangyawan nira hi Charles Bernhardt nga tag-iya hin hotel nga hirani ha estasyon hin tren ha William Creek. Ha urhi, iya ginkarawat an kamatuoran, iginbaligya an iya hotel, ngan nagpayunir ha sulod hin 15 ka tuig ha pipira han pinakamamara ngan higrayo nga lugar han Australia.

An mga payunir hadto sigurado nga nagkinahanglan hin pagdasig ngan pagparig-on basi malamposan an damu nga kakurian. Makausa, han nagbiyahe an gin-unabi kanina nga hira Arthur Willis ngan Bill Newlands pakadto ha interyor nga mga lugar han Australia basi magsangyaw, inabot hira hin duha ka semana ha 32 ka kilometro nga pagbiyahe kay nagin malapok an disyerto tungod han makusog nga uran. Usahay nanunuro an ira balhas tungod han duro nga kapaso ngan han ira paniguro ha pagduso han trak basi makalahos ha dagku nga mga bungtod hin baras. Naagi hira ha batuhon nga mga walog ngan natabok ha mga salog. Kon naguguba an ira awto, nga agsob mahitabo, nagbabaktas hira o nagbibisikleta hin pipira ka adlaw pakadto ha pinakahirani nga bungto ngan katapos naghuhulat hin pipira ka semana ha pag-abot han piyesa nga igliliwan. Bisan pa hito nga mga kakurian, nagpabilin hira nga positibo. Ha pagkotar han gin-unabi han magasin nga The Golden Age, hi Arthur Willis nagsiring: “Waray makuri o hirayo hinduro nga dalan para ha Iya mga saksi.”

An maiha na nga payunir nga hi Charles Harris nagsiring nga an kamingaw ngan an mga kakurian nga iya naeksperyensyahan ha interyor nga mga lugar mas nagpaduok ha iya kan Jehova. Hiya nagdugang: “Mas maopay gud an pagkaada gutiay la nga panag-iya tubtob nga posible. Kon hi Jesus andam nga kumaturog ha gawas kon ginkikinahanglan, sadang liwat kita magin andam ha pagbuhat hito basi matuman naton an aton toka.” Ngan ito gud an ginbuhat han damu nga payunir. Mapasalamaton gud kita ha ira mga pangalimbasog kay tungod hito nakaabot an maopay nga sumat ha pinakasidsid han kontinente ngan damu nga indibiduwal an nabuligan nga dumapig ha Ginhadian han Dios.