1. Ano an nahihimo han lukat?

DAMU nga bendisyon an nagin posible tungod han halad-lukat ni Jesu-Kristo. An lukat naghahatag hin higayon ha ngatanan nga anak ni Adan nga nahigugma han katadongan nga magin membro han pamilya han Dios ha tidaraon. An lukat naghahatag liwat ha aton hin higayon nga mabuhi nga malipayon ha kadayonan. Pero diri la ito an nahihimo han halad-lukat han Kristo. An kinaburut-on nga pagsuporta ni Jesus ha katadongan ni Jehova tubtob ha kamatayon nagbabaton ha importante nga mga isyu ha uniberso.—Heb. 1:8, 9.

2. (a) Ano nga importante nga mga isyu ha uniberso an aton hibabaroan ha pag-ampo ni Jesus? (Kitaa an retrato hini nga pahina.) (b) Ano an aton hihisgotan hini nga artikulo?

² Mga duha ka tuig antes ihatag ni Jesus an iya kinabuhi sugad nga lukat, gintutdoan niya an iya mga disipulo nga mag-ampo: “Amay namon ha langit, pagbaraanon an imo ngaran. Kumanhi unta an imo Ginhadian. Matuman an imo kaburut-on dinhi ha tuna sugad han ha langit.” (Mat. 6:9, 10) Basi mas maghilarom an aton apresasyon ha lukat,  hisgotan naton kon ano an kalabotan hito ha pagbaraan han ngaran han Dios, ha pagmando han Ginhadian han Dios, ngan ha pagtuman han katuyoan han Dios.

3. Ano an ginrirepresentaran han ngaran ni Jehova, ngan paonan-o ginpakaraot ni Satanas ito nga baraan nga ngaran?

³ Ha modelo nga pag-ampo ni Jesus, an siyahan niya nga hangyo amo an pagbaraan han ngaran han Dios. An ngaran ni Jehova nagrirepresentar han iya pagkaharangdon, pagin gamhanan, ngan pagin baraan. Ha usa pa nga pag-ampo ni Jesus, gintawag niya hi Jehova nga “Baraan nga Amay.” (Juan 17:11) Tungod kay baraan hi Jehova, an ngatanan niya nga balaud ngan prinsipyo baraan liwat. Bisan pa hito, ginkwestyon ni Satanas ha hardin han Eden an katungod han Dios nga maghimo hin mga suruklan para ha mga tawo. Pinaagi ha pagyakan hin mga buwa mahitungod kan Jehova, ginpakaraot ni Satanas an baraan nga ngaran han Dios.—Gen. 3:1-5.

4. Ano an ginbuhat ni Jesus basi mabaraan an ngaran han Dios?

⁴ Ha luyo nga bahin, hinigugma gud ni Jesus an ngaran ni Jehova. (Juan 17:25, 26) Ginbuhat niya an ngatanan basi mabaraan an ngaran han Dios. (Basaha an Salmos 40:8-10.) Pinaagi ha pagin matinumanon ni Jesus dinhi ha tuna, iya iginpakita nga husto ngan makatadunganon gud nga hi Jehova an maghimo hin mga suruklan para ha iya intelihente nga mga linarang. Bisan kon ginpahinabo ni Satanas nga mag-antos hi Jesus hin masakit nga kamatayon, nagpabilin gud hi Jesus nga maunungon ha iya langitnon nga Amay. An iya pagin maunungon nagpapamatuod nga posible para ha perpekto nga tawo nga bug-os nga magin masinugtanon ha matadong nga mga suruklan han Dios.

5. Paonan-o kita makakabulig ha pagbaraan han ngaran han Dios?

⁵ Paonan-o naton maipapakita nga hinigugma naton an ngaran ni Jehova? Pinaagi han aton mga buhat. Gin-oobligar kita ni Jehova nga magin baraan. (Basaha an 1 Pedro 1:15, 16.) Nangangahulogan ini nga hi Jehova gud la an aton sisingbahon, ngan kinasingkasing kita nga masunod ha iya. Bisan kon gintitimaraot kita, nangangalimbasog kita nga magkinabuhi uyon ha iya matadong nga mga prinsipyo ngan balaud. Pinaagi han aton matadong nga mga buhat, naipapasanag naton an aton sugâ salit nahihimaya naton an ngaran ni Jehova. (Mat. 5:14-16) Sugad nga baraan nga katawohan, ginpapamatud-an naton ha aton pagkinabuhi nga maopay an mga balaud ni Jehova ngan buwa an mga akusasyon ni Satanas. Kon nakakasala kita tungod kay diri kita perpekto, sinsero kita nga nagbabasol ngan ginbabayaan naton an mga buhat nga diri nagpapasidungog kan Jehova.—Sal. 79:9.

6. Kay ano nga nagin posible nga tagdon kita ni Jehova nga matadong bisan kon diri kita perpekto?

⁶ Pinaagi han halad han Kristo, ginpapasaylo ni Jehova an mga sala hadton nagpapakita hin pagtoo. Ginkakarawat niya sugad nga iya mga magsiringba an mga nagdidedikar han ira kalugaringon ha iya. Ginpapahayag ni Jehova nga matadong an dinihogan nga mga Kristiano sugad nga iya mga anak ngan an “iba nga mga karnero” sugad nga iya kasangkayan. (Juan 10:16; Roma 5:1, 2; San. 2:21-25) Salit bisan yana, nagin posible nga magin matadong kita ha atubangan han aton Amay ngan makabulig ha pagbaraan han iya ngaran tungod han lukat.

7. Ano nga mga bendisyon han Ginhadian an nagin posible tungod han lukat?

⁷ Ha modelo nga pag-ampo ni Jesus, naghangyo liwat hiya ha Dios: “Kumanhi unta an imo ginhadian.” Ano an kalabotan han lukat ha Ginhadian han Dios? Tungod han lukat, nagin posible an pagtirok ha 144,000 nga magigin hadi ngan saserdote kaupod han Kristo ha langit. (Pah. 5:9, 10; 14:1) Pinaagi han Ginhadian han Dios nga  ginkukompwesto ni Jesus ngan han iya mga igkasi-magmarando, makakarawat han magtinumanon nga katawohan an kapulsanan han lukat ha sulod hin 1,000 ka tuig. An tuna hihimoon nga paraiso, ngan an ngatanan nga magtinumanon nga tawo bubuligan nga magin perpekto. Hito nga kahimtang, maghihiusa na an langitnon ngan tunan-on nga bahin han pamilya han Dios. (Pah. 5:13; 20:6) Tutultugon ni Jesus an ulo han halas ngan wawad-on an ngatanan nga epekto han pagrebelde ni Satanas.—Gen. 3:15.

8. (a) Paonan-o ginbuligan ni Jesus an iya mga disipulo nga masabtan an pagkaimportante han Ginhadian han Dios? (b) Paonan-o naton iginpapakita yana nga ginsusuportaran naton an Ginhadian?

⁸ Han nakanhi hi Jesus ha tuna, ginbuligan niya an iya mga disipulo nga masabtan an pagkaimportante han Ginhadian han Dios. Katapos gud la han iya bawtismo, iginpasamwak niya “an maopay nga sumat han Ginhadian han Dios” ha iba-iba nga lugar. (Luc. 4:43) Antes hi Jesus sumaka ha langit, iya ginsugo an iya mga disipulo nga magin iya mga saksi “tubtob ha pinakahirayo nga lugar ha tuna.” (Buh. 1:6-8) Pinaagi han pagsangyaw nga buruhaton, an mga tawo ha bug-os nga kalibotan magkakaada higayon nga mahibaro mahitungod han lukat ngan magin sakop han Ginhadian han Dios. Yana, iginpapakita naton nga ginsusuportaran naton an Ginhadian kon ginbubuligan naton an kabugtoan han Kristo ha pagsangyaw han maopay nga sumat ha bug-os nga kalibotan.—Mat. 24:14; 25:40.

9. Kay ano nga makakasiguro kita nga tutumanon ni Jehova an iya katuyoan para ha katawohan?

⁹ Ano an karuyag sidngon ni Jesus han hiya nagsiring: “Matuman an imo kaburut-on”? Hi Jehova an Maglalarang. Kon magyakan hiya nga mahitatabo an usa nga butang, sigurado nga matutuman ito. (Isa. 55:11) Diri niya tutugotan an pagrebelde ni Satanas nga makaulang ha Iya katuyoan para ha katawohan. Tikang pa ha tinikangan, kaburut-on na ni Jehova nga mapuno an tuna hin perpekto nga mga anak nira Adan ngan Eva. (Gen. 1:28) Kon namatay hira Adan ngan Eva nga waray anak, diri matutuman an kaburut-on han Dios nga pun-on an tuna han ira katulinan. Salit katapos makasala nira Adan ngan Eva, gintugotan hira ni Jehova nga magkaanak. Pinaagi han lukat, gintatagan han Dios hin higayon an ngatanan nga nagpapakita hin pagtoo nga magin perpekto ngan mabuhi ha waray kataposan. Hinigugma ni Jehova an katawohan, ngan kaburut-on niya nga magkinabuhi an masinugtanon nga mga tawo uyon ha iya katuyoan para ha ira.

10. Ano an kapulsanan han lukat para ha namatay nga mga tawo?

¹⁰ Kumusta man an binilyon nga tawo nga namatay nga waray magkaada higayon nga makilala hi Jehova ngan mag-alagad ha iya? Tungod han lukat, nagin posible an pagkabanhaw. An mga patay bubuhion utro han aton mahigugmaon nga Amay ha langit ngan tatagan hira hin higayon nga mahibaro mahitungod han iya katuyoan ngan magkaada kinabuhi nga waray kataposan. (Buh. 24:15) Oo, karuyag ni Jehova nga mabuhi an mga tawo, diri mamatay. Tungod kay hiya an “burabod han kinabuhi,” hiya an magigin Amay han ngatanan nga babanhawon. (Sal. 36:9) Salit angayan gud nga gintutdoan kita ni Jesus nga mag-ampo: “Amay namon ha langit.” (Mat. 6:9) Gintagan ni Jehova hi Jesus hin importante nga papel ha pagbanhaw ha mga patay. (Juan 6:40, 44) Ha Paraiso, tutumanon ni Jesus an iya papel sugad nga “an pagkabanhaw ngan an kinabuhi.”—Juan 11:25.

11. Ano an kaburut-on han Dios para ha “daku nga grupo”?

¹¹ An gugma ni Jehova diri limitado ha pipira la nga tawo, kay hi Jesus nagsiring: “An bisan hin-o nga nagbubuhat han kaburut-on han Dios hiya an akon bugto nga lalaki ngan bugto nga babaye ngan akon nanay.” (Mar. 3:35) Kaburut-on  han Dios nga an diri maihap nga “daku nga grupo” tikang ha ngatanan nga nasud, tribo, ngan pinulongan magin iya mga magsiringba. An mga nagpapakita hin pagtoo ha halad-lukat han Kristo ngan nagbubuhat han kaburut-on han Dios mahimo magin kaupod ha mga nasinggit: “An katalwasan utang naton ha aton Dios, nga nalingkod ha trono, ngan ha Kordero.”—Pah. 7:9, 10.

12. Paonan-o iginpapakita ha modelo nga pag-ampo an katuyoan ni Jehova para ha masinugtanon nga katawohan?

¹² Iginpapakita ha modelo nga pag-ampo ni Jesus an katuyoan ni Jehova para ha masinugtanon nga katawohan. Uyon hini nga pag-ampo, nangangalimbasog gud kita nga baraanon, o tagdon nga baraan, an ngaran ni Jehova. (Isa. 8:13) An ngaran mismo ni Jesus nangangahulogan nga “Hi Jehova an Katalwasan,” ngan an aton katalwasan tungod han lukat nagpapasidungog ngan naghihimaya ha ngaran ni Jehova. Pinaagi han Ginhadian han Dios, makakarawat han masinugtanon nga katawohan an mga kapulsanan han lukat. Oo, an modelo nga pag-ampo nagpapasarig ha aton nga waray makakapugong ha Dios ha pagtuman han iya kaburut-on.—Sal. 135:6; Isa. 46:9, 10.

13. Ano an iginpapakita han aton bawtismo?

¹³ Usa han importante nga paagi nga maipapakita naton nga gin-aapresyar naton an lukat amo an pagdedikar han aton kalugaringon kan Jehova ngan pagpabawtismo. An aton bawtismo nagpapakita nga “kan Jehova kita.” (Roma 14:8) Nagrirepresentar ito han aton hangyo ha Dios nga tagan kita hin maopay nga konsensya. (1 Ped. 3:21) Ginbabaton ni Jehova ini nga hangyo pinaagi ha paglimpyo ha aton gamit an dugo nga iginhalad han Kristo. Makakasarig gud kita nga ihahatag niya ha aton an ngatanan nga iya iginsaad.—Roma 8:32.

14. Kay ano nga ginsusugo kita nga higugmaon an aton igkasi-tawo?

 ¹⁴ Ano an iba pa nga paagi nga maipapakita naton nga gin-aapresyar naton an lukat? Tungod kay gugma an nagpapagios kan Jehova ha pagbuhat han ngatanan nga butang, karuyag niya nga an ngatanan niya nga magsiringba magpakita hin gugma ngan ito an magin nangunguna nira nga kalidad. (1 Juan 4:8-11) Kon ginhihigugma naton an aton igkasi-tawo, ginpapamatud-an naton nga karuyag naton magin “mga anak [han aton] Amay nga aadto ha langit.” (Mat. 5:43-48) An sugo nga higugmaon an aton igkasi-tawo ikaduha la ha sugo nga higugmaon hi Jehova. (Mat. 22:37-40) Usa han importante nga paagi han pagpakita hin gugma ha aton igkasi-tawo amo an pagsugot ha sugo nga isangyaw an maopay nga sumat han Ginhadian han Dios. Kon ginhihigugma naton an aton igkasi-tawo, naipapasanag naton an himaya han Dios. Ngani, ‘makikita ha aton an hingpit nga gugma han Dios’ kon ginsusunod naton an sugo nga higugmaon an iba, labi na an aton kabugtoan.—1 Juan 4:12, 20.

15. (a) Ano nga mga bendisyon an aton nakakarawat yana tikang kan Jehova? (b) Ano nga mga bendisyon an aton ginpapamulat?

¹⁵ Kon magpapakita kita hin pagtoo ha lukat, bug-os kita nga mapapasaylo ni Jehova. An Pulong han Dios nagpapasarig ha aton nga mahimo niya “paraon” an aton mga sala. (Basaha an Buhat 3:19-21, ftn.) Sugad han gin-unabi na, an lukat an nagin yawi basi maampon ni Jehova an iya dinihogan nga mga surugoon sugad nga iya mga anak. (Roma 8:15-17) Ngan para ha aton nga membro han “iba nga mga karnero,” sugad hin nagkuha hi Jehova hin sertipiko han pag-ampon nga may-ada han aton mga ngaran. Kon magin perpekto na kita ngan makapasar ha ultimo nga pagsari, malilipay hi Jehova nga pirmahan an sertipiko, siring pa, ngan ampunon kita sugad nga iya hinigugma nga mga anak ha tuna. (Roma 8:20, 21; Pah. 20:7-9) An gugma ni Jehova ha iya presyoso nga mga anak diri gud napapas. An mga kapulsanan han lukat magpapadayon ha waray kataposan. (Heb. 9:12) Padayon gud nga magigin birilhon ini nga regalo. Waray bisan hin-o o bisan ano nga makakaagaw hini ha aton.

16. Paonan-o an lukat nabulig ha aton nga magkaada tinuod nga kagawasan?

¹⁶ Diri gud mapupugngan ni Satanas an bisan hin-o nga tinuod nga mabinasulon nga magin membro ha pamilya ni Jehova ha tidaraon. Hi Jesus namatay hin “makausa la.” Salit an lukat bug-os na nga naibayad. (Heb. 9:24-26) Tungod hito, nagkaada kita kagawasan tikang ha epekto han sala nga aton napanunod kan Adan. Mapasalamaton gud kita ha halad-lukat han Kristo kay pinaagi hito diri na kita uripon hini nga kalibotan nga kontrolado ni Satanas, ngan diri na kita nahahadlok ha kamatayon.—Heb. 2:14, 15.

17. Ano an kapulsanan ha imo han gugma ni Jehova?

¹⁷ An mga saad han Dios masasarigan gud. Sugad la nga diri nagbabag-o an mga balaud nga iginbutang han Dios ha iya mga linarang, diri liwat nagbabag-o hi Jehova. Diri gud kita niya papakyason. (Mal. 3:6) Labaw pa han kinabuhi an iya iginhahatag ha aton; iginpapakita niya mismo an iya gugma ha aton. “Aton hinbaroan nga hinigugma kita han Dios ngan kombinsido kita hito. An Dios gugma.” (1 Juan 4:16) An bug-os nga kalibotan hihimoon nga usa nga makaruruyag gud nga paraiso diin an ngatanan magpapakita han gugma han Dios. Hinaot dumuyog kita ha matinumanon nga mga linarang ha langit ha pagsiring: “Dios namon, takos ka han pagdayaw, himaya, kinaadman, pagpasalamat, dungog, gahum, ngan kusog ha kadayonan. Amen.”—Pah. 7:12.