AN MUSIKA importante gud ha kadaan nga Israel sugad nga bahin han ira kultura. An Biblia agsob mag-unabi hin mga tawo nga nagamit hin mga instrumento ngan nagkakanta. Ngani, an mga dyes porsyento nga bahin han Kasuratan mga kanta. Pananglitan, an Mga Salmo, Kanta ni Solomon, ngan Mga Pagtangis iginsurat basi kantahon. Sumala ha ginsiring han libro nga Music in Biblical Life, an Biblia klaro nga nagpapakita nga an mga Israelita ginamit hin musika ha damu nga buruhaton ha ira kinabuhi.

Musika ha adlaw-adlaw nga pagkinabuhi. An mga Israelita nagpatokar hin mga instrumento ngan nagkanta basi ipahayag an ira mga emosyon. (Isa. 30:29) An kababayin-an nagtutokar hin mga tamborin, malipayon nga nagkakanta ngan nagsasarayaw kon may bag-o nga hadi nga ginkoronahan, kon may mga piyesta, ngan kon nagdadaog an mga sundalo. (Huk. 11:34; 1 Sam. 18:​6, 7; 1 Hadi 1:​39, 40) An mga Israelita nagkakanta liwat basi ipahayag an ira kasubo kon may namatay. (2 Cron. 35:25) Sugad han ginsiring han McClintock and Strong’s Cyclopedia, klaro nga kilala “an mga Hebreo nga mahilig gud ha musika.”

Musika ha palasyo han hadi. An mga hadi han Israel nalilipay gud ha pagpamati ha musika. Iginpatawag ni Hadi Saul hi David basi magin musikero ha palasyo. (1 Sam. 16:​18, 23) Ha urhi han nagin hadi mismo hi David, nag-imbento hiya hin mga instrumento ha musika, nagkomposo hin mag-opay nga kanta, ngan nag-organisar hin orkestra nga nagtokar ha templo ni Jehova. (2 Cron. 7:6; Amos 6:5) Hi Hadi Solomon may mga parakanta ha palasyo nga mga lalaki ngan babaye.​—Ecles. 2:8.

Musika ha pagsingba. An pinakaimportante, gumamit an mga Israelita hin musika ha pagsingba kan Jehova. Ngani, may 4,000 nga musikero nga nagtokar ha templo ha Jerusalem. (1 Cron. 23:5) Nagtokar hira hin mga simbal, instrumento nga may kwerdas, arpa, ngan trumpeta. (2 Cron. 5:12) Pero diri la ini nga propesyonal nga mga musikero an nagsingba kan Jehova gamit an musika. Damu nga Israelita an nagkanta han Kanta ha Pagsagka ha ira mga pagbiyahe ha tinuig nga piyesta ha Jerusalem. (Sal. 120-134) Ngan sumala ha mga sinurat han Judio, an mga Israelita nagkanta han Hallel nga mga Salmo a ha panahon han panihapon han Paskua.

Importante la gihapon an musika ha katawohan han Dios. (San. 5:13) Nagkakanta kita sugad nga bahin han aton pagsingba. (Efe. 5:19) Inaabat naton nga nagkakaurosa kita kon nagkakanta kita kan Jehova. (Col. 3:16) Ngan nagpaparig-on ito ha aton kon may mga problema kita. (Buh. 16:25) An musika usa nga maopay nga paagi ha pagpakita han aton pagtoo ngan gugma kan Jehova.