ARADMAN NGA ARTIKULO 29
Andam Ka Na ba ha Daku nga Kasakitan?
“Kinahanglan magin andam . . . kamo.”—MAT. 24:44.
KARANTAHON 150 Pamilnga an Dios Basi Ka Maluwas
MAHITUNGOD HAN ARTIKULO a
1. Kay ano nga maaramon nga mangandam ha mga kalamidad?
AN PAGPANGANDAM nagtatalwas hin kinabuhi. Pananglitan, kon may kalamidad, an mga tawo nga nakapangandam hito mas daku an posibilidad nga makatalwas ngan makabulig ha iba. Usa nga organisasyon ha Europe nga naniningkamot ha pagbulig ha mga tawo an nagsiring: “An pagpangandam hin maopay nakakatalwas hin kinabuhi.”
2. Kay ano nga dapat kita mangandam ha daku nga kasakitan? (Mateo 24:44)
2 An “daku nga kasakitan” tigda nga maabot. (Mat. 24:21) Pero diri pariho ha iba nga mga kalamidad, maaram kita nga tiabot ito. Mga 2,000 ka tuig na an naglabay, ginpahamangnoan ni Jesus an iya mga sumurunod nga mangandam para hito nga adlaw. (Basaha an Mateo 24:44.) Kon andam kita, magigin mas masayon para ha aton nga mailob iton makuri nga panahon ngan buligan an iba nga ito liwat an buhaton.—Luc. 21:36.
3. Paonan-o an pagpailob, pagpaid, ngan gugma mabulig ha aton nga magin andam ha daku nga kasakitan?
3 Tagda an tulo nga kalidad nga makakabulig ha aton nga magin andam ha daku nga kasakitan. Ano an aton bubuhaton kon sugoon kita nga magsangyaw hin nakakapasina nga mensahe han paghukom ngan kontrahon kita han mga diri tumuroo? (Pah. 16:21) Pagkikinahanglanon ta an pagpailob basi masugot hi Jehova, nga nasarig nga puprotektaran kita niya. Ano an aton bubuhaton kon an aton kabugtoan mawad-an han pipira o han ngatanan nira nga materyal nga butang? (Hab. 3:17, 18) Pagkikinahanglanon ta an pagpaid basi mapagios kita nga tagan hira hin materyal nga bulig. Kon umatake na an alyansa han mga nasud, ano an aton bubuhaton kon kinahanglan ta mag-ukoy kaupod an damu nga kabugtoan hin pipira ka panahon? (Ezek. 38:10-12) Pagkikinahanglanon ta an marig-on nga gugma ha ira basi mabuligan kita nga mailob iton makuri nga panahon.
4. Paonan-o iginpapakita han Biblia nga kinahanglan ta padayon nga kultibaron an pagpailob, pagpaid ngan gugma?
4 An Pulong han Dios nag-aaghat ha aton nga padayon nga kultibaron an pagpailob, pagpaid, ngan gugma. An Lucas 21:19 nasiring: “Pinaagi han iyo pagpailob matitipigan niyo an iyo kinabuhi.” An Colosas 3:12 nasiring: “Pagsul-ot kamo han . . . pagpaid.” Ngan an 1 Tesalonica 4:9, 10 nasiring: “Kamo mismo gintutdoan han Dios nga higugmaon an usa kag usa. . . . Pero gin-aaghat namon kamo, mga kabugtoan, nga padayon nga buhaton niyo ito hin labaw pa.” Ito nga mga teksto iginsurat para ha mga disipulo nga nagpakita na hin pagpailob, pagpaid, ngan gugma. Pero kinahanglan padayon nira nga kultibaron ini nga mga kalidad. Ito liwat an dapat ta buhaton. Basi mabuligan kita, hisgotan ta kon paonan-o iginpakita han siyahan nga mga Kristiano an tagsa nga kalidad. Katapos, hisgotan ta liwat kon paonan-o masusubad ito nga mga disipulo, ngan sugad nga resulta, mapamatud-an nga andam kita ha daku nga kasakitan.
PARIG-ONA AN IMO PAGPAILOB
5. Paonan-o gin-ilob han siyahan nga mga Kristiano an ira mga problema?
5 An siyahan nga mga Kristiano kinahanglan magpailob. (Heb. 10:36) Labot la ha mga problema nga komon ha ngatanan, may iba pa hira nga problema. Damu ha ira an gintimaraot, diri la han Judio nga mga lider han relihiyon ngan han Romano nga mga opisyal kondi pati liwat han ira mismo pamilya. (Mat. 10:21) Ngan ha sulod han kongregasyon, usahay kinahanglan nira atohan an impluwensya ngan an katutdoan han mga apostata nga nagpapahinabo hin pagkabahin-bahin. (Buh. 20:29, 30) Pero nagpailob ito nga mga Kristiano. (Pah. 2:3) Paonan-o? Ginpamalandong nira an mga ehemplo ha Kasuratan han mga nagpailob, sugad kan Job. (San. 5:10, 11) Nag-ampo hira para hin kusog. (Buh. 4:29-31) Ngan nagpokus hira ha mag-opay nga resulta han ira pagpailob.—Buh. 5:41.
6. Ano an imo nahibaroan ha ginbuhat ni Merita basi mailob an pagkontra?
6 Makakapailob liwat kita kon regular naton nga aadman an mga ehemplo han mga nagpailob nga mababasa ha Pulong han Dios ngan ha aton mga publikasyon ngan pamalandungon ito. Tungod ha pagbuhat hito, hi Merita nga sister ha Albania, nakapailob tikang ha madarahog nga pagkontra han iya pamilya. Hiya nagsiring: “Naparig-on gud ako han gin-adman ko an asoy ha Biblia parte kan Job. Duro gud an iya pag-antos ngan diri hiya maaram kon hin-o an nagpahinabo hito, pero hiya nagsiring: ‘Tubtob nga mamatay ako, diri ko isasalikway an akon integridad!’ (Job 27:5) Nahunahuna ko nga an akon mga problema gutiay gud la kon ikompara han kan Job. Diri pariho ha iya, maaram ako kon kanay tikang ini nga mga problema.”
7. Bisan kon waray magbug-at nga problema nga gin-aatubang, ano an dapat ta mahibaroan nga buhaton yana?
7 Mapaparig-on ta liwat an aton pagpailob pinaagi han agsob ngan sinsero nga pagsumat kan Jehova han aton mga kabaraka. (Fil. 4:6; 1 Tes. 5:17) Yana, bangin waray ka magbug-at nga problema. Pero nag-aampo ka ba kan Jehova ngan nangangaro han iya bulig kon nasusubo ka, nawuwurok, o diri maaram han bubuhaton? Kon yana pirme ka nadaop ha aton Dios para hin bulig ha imo mga problema ha adlaw-adlaw, diri ka mag-aalang pagdaop ha iya kon may mas dagku ka nga problema ha tiarabot. Ngan makakasiguro ka nga maaram gud hiya kon san-o ngan kon paonan-o hiya magios para ha imo.—Sal. 27:1, 3.
PAGPAILOB
An kada problema nga aton gin-iilob nabulig ha aton nga mailob an sunod nga problema (Kitaa an parapo 8)
8. Paonan-o an ehemplo ni Mira nagpapakita nga an pagpailob ha mga problema yana mabulig ha aton nga mailob an tiarabot nga mga problema? (Santiago 1:2-4) (Kitaa liwat an piktyur.)
8 Posible nga mas mailob naton an tiarabot nga daku nga kasakitan kon mag-iilob kita han mga problema yana. (Roma 5:3) Kay ano nga nakasiring kita hito? Damu nga kabugtoan an nasiring nga ha kada panahon nga gin-iilob nira an magkuri nga sitwasyon nabulig ito ha ira nga mailob an sunod nga problema. Kon naiilob nira an usa nga problema ha bulig ni Jehova, nagigin mas marig-on an ira pagtoo nga karuyag hira buligan ni Jehova. Ngan ito nga pagtoo nabulig ha ira nga mailob an sunod nga problema. (Basaha an Santiago 1:2-4.) Nakita ni Mira, nga payunir ha Albania, nga an iya pagpailob ha naglabay nakabulig ha iya nga padayon nga magpailob. Siring niya nga usahay naabat hiya nga hiya an may pinakadamu nga problema. Pero ginhinumdom niya kon paonan-o hiya ginbuligan ni Jehova ha naglabay nga 20 ka tuig, ngan nagsiring hiya ha iya kalugaringon: ‘Pagpabilin nga matinumanon. Ayaw tuguti nga makarag la an imo mga pagpailob ngan an pagbulig ha imo ni Jehova nga malamposan an damu nga problema.’ Mahimo mo liwat pamalandungon kon paonan-o ka ginbubuligan ni Jehova nga makailob. Makakasarig ka nga nakikita niya an tagsa mo nga pagpailob ha mga problema ngan babalosan ka niya. (Mat. 5:10-12) Katapos, kon magtikang na an daku nga kasakitan, maaram ka na kon paonan-o magpapailob ngan magigin determinado nga padayon nga magpailob.
PAGPAKITA HIN PAGPAID
9. Paonan-o an kongregasyon ha Antiokia han Sirya nagpakita hin pagpaid?
9 Pansina kon ano an nahitabo ha mga Kristiano ha Judea nga nakaeksperyensya hin duro nga gutom. Han nahibaroan han kongregasyon ha Antiokia han Sirya an mahitungod ha gutom, inabat hira hin pagpaid ha ira kabugtoan ha Judea. Katapos, ito nga pagpaid iginpakita nira ha buhat. “Nagdesisyon, an kada tagsa uyon ha iya maaakos, nga magpadara hin bulig ha kabugtoan nga naukoy ha Judea.” (Buh. 11:27-30) Bisan kon hirayo an kabugtoan nga apektado han gutom, an mga Kristiano ha Antiokia determinado bumulig ha ira.—1 Juan 3:17, 18.
PAGPAID
An mga kalamidad naghahatag ha aton hin higayon nga magpakita hin pagpaid (Kitaa an parapo 10)
10. Paonan-o ta maipapakita an pagpaid kon an aton kabugtoan naapektohan hin kalamidad? (Kitaa liwat an piktyur.)
10 Makakapakita liwat kita hin pagpaid yana kon nahibabaroan ta nga an aton mga igkasi-magsiringba naapektohan hin kalamidad. Nagios kita dayon—bangin pinaagi ha pagpakiana ha mga tigurang kon paonan-o makakabulig ha usa nga proyekto, pinaagi ha pagdonar ha worldwide work, o pinaagi ha pag-ampo hadton naapektohan hin kalamidad. b (Prob. 17:17) Pananglitan, han 2020, sobra 950 nga Disaster Relief Committee an ginporma ha bug-os nga kalibotan basi manginano ha mga apektado han COVID-19 nga pandemya. Mapasalamaton gud kita ha kabugtoan nga nagboluntaryo hini nga mga komite. Tungod han ira pagpaid ha ira kabugtoan, nanhatag hira hin materyal nga bulig, nagtagana hin espirituwal nga pagliaw, ngan ha pipira nga kahimtang, nag-ayad o nagtukod hin mga balay ngan mga lugar han pagsingba.—Ikompara an 2 Corinto 8:1-4.
11. Paonan-o an aton iginpapakita nga pagpaid nagpapasidungog ha aton langitnon nga Amay?
11 Kon nagpapakita kita hin pagpaid katapos hin kalamidad, napapansin han iba an aton mga sakripisyo. Pananglitan, han 2019, an bagyo nga Dorian nakaguba hin Kingdom Hall ha Bahamas. Samtang gintutukod utro han kabugtoan an Kingdom Hall, nagpakiana hira ha diri Saksi nga kontraktor kon pira an magagasto. An kontraktor nagsiring: “Karuyag ko magpahuram . . . hin equipment, maghatag hin mga materyales, ngan magpadara hin magtatrabaho. . . . Karuyag ko ini buhaton para ha iyo organisasyon. Naimpres ako han [iyo] pagtratar ha iyo kasangkayan.” An kadam-an nga tawo ha kalibotan diri nakilala kan Jehova. Pero nakikita han damu ha ira an pagbulig han mga Saksi ha iba. Makalilipay gud mahibaroan nga an aton iginpapakita nga pagpaid mahimo magpahirani ha mga tawo ngadto ha Dios nga “daku an kalooy”!—Efe. 2:4.
12. Paonan-o an pagkultibar hin pagpaid yana mag-aandam ha aton ha daku nga kasakitan? (Pahayag 13:16, 17)
12 Kay ano nga kinahanglan ta magpakita hin pagpaid ha daku nga kasakitan? Iginpapakita han Biblia nga adton diri masuporta ha politikal nga sistema maatubang hin mga problema—yana ngan ha daku nga kasakitan. (Basaha an Pahayag 13:16, 17.) An aton kabugtoan bangin magkinahanglan hin bulig basi magkaada han ira nangunguna nga panginahanglan. Kon an aton Hadi, hi Kristo Jesus, magpadapat na han paghukom, hinaot makita kita niya nga nagpapakita hin pagpaid ngan sidngan kita nga “panunda niyo an Ginhadian.”—Mat. 25:34-40.
PARIG-ONA AN IMO GUGMA
13. Sugad han iginpapakita ha Roma 15:7, paonan-o ginparig-on han siyahan nga mga Kristiano an ira gugma ha usa kag usa?
13 An gugma amo an pangirilal-an han siyahan nga mga Kristiano. Pero nagin masayon ba ha ira an pagpakita hin gugma? Hunahunaa an pagkaiba-iba han kabugtoan ha kongregasyon ha Roma. An iba ha ira mga Judio, nga gintutdoan nga sundon an Mosaiko nga Balaud, ngan an iba naman mga Hentil, nga iba gud nga mga kustomre an gindak-an. May mga Kristiano nga posible mga uripon, ngan an iba diri—ngan bangin an pipira mga agaron pa ngani. Paonan-o nalamposan hito nga mga Kristiano an sugad nga pagkaiba-iba ngan naparig-on an ira gugma? Gin-aghat hira ni apostol Pablo nga ‘abiabihon an usa kag usa.’ (Basaha an Roma 15:7.) Ano an iya karuyag sidngon? An pulong nga iginhubad nga “abiabihon” nangangahulogan nga karawaton an usa nga may pagkabuotan, sugad han pag-imbitar ha iya ha balay o pakigsangkay ha iya. Pananglitan, ginsidngan ni Pablo hi Filemon kon paonan-o aabiabihon an pinalagiw nga uripon nga hi Onesimo: “Mahigugmaon nga karawata hiya.” (Filem. 17) Ngan gin-abiabi nira Priscilla ngan Aquila hi Apolos, nga gutiay la an nahibabaroan ha Kristianidad kon ikompara ha ira, pinaagi ha ‘pagpaupod ha iya.’ (Buh. 18:26) Waray tuguti hito nga mga Kristiano nga an ira pagkaiba-iba magin hinungdan hin pagkabahin-bahin ngan ginkarawat nira an usa kag usa.
GUGMA
Kinahanglan naton an gugma han aton kabugtoan (Kitaa an parapo 15)
14. Paonan-o hi Anna ngan an iya bana nagpakita hin gugma?
14 Maipapakita ta liwat an gugma ha aton kabugtoan pinaagi ha pakigsangkay ha ira. Kasagaran nga magpapagios ito ha ira nga magpakita liwat hin gugma ha aton. (2 Cor. 6:11-13) Pansina an eksperyensya ni Anna ngan han iya bana. Waray pag-iha katapos nira bumalhin ha ira bag-o nga asaynment sugad nga mga misyonero ha West Africa, nagtikang an COVID-19 nga pandemya. Salit diri hira puydi magkirigta hin personal han ira mga kakongregasyon. Paonan-o iginpakita han mag-asawa an ira gugma? Naggamit hira hin videoconference basi makontak an kabugtoan didto, ngan ginsidngan nira an kabugtoan nga karuyag nira nga mas makilala pa hira. An mga pamilya nalipay gud ha gugma nga iginpakita han mag-asawa salit agsob nga gintatawagan ngan ginmi-message nira an mag-asawa. Kay ano nga ginbuhat ito han mag-asawa? Hi Anna nagsiring, “Diri ko gud makakalimtan an gugma nga iginpakita han kabugtoan ha akon ngan ha akon pamilya ha mag-opay nga panahon ngan ha magkuri nga kahimtang, nagpagios ito ha akon nga magpakita liwat hin gugma.”
15. Ano an imo nahibaroan ha ehemplo ni Vanessa parte ha paghigugma ha tanan naton nga kabugtoan? (Kitaa liwat an piktyur.)
15 Damu ha aton an may mga kakongregasyon nga iba-iba an gintikangan ngan personalidad. Mapaparig-on ta an aton gugma ha ira pinaagi ha pagpokus ha ira mag-opay nga kalidad. An sister nga hi Vanessa, nga taga-New Zealand, nakurian pakig-upod ha pipira niya nga kakongregasyon. Pero imbes nga likyan an mga bugto nga may mga personalidad nga nakakapaaringit ha iya, mas nakig-upod lugod hiya ha ira. An pagbuhat hito nakabulig ha iya nga makita kon kay ano nga hinigugma hira ni Jehova. Hiya nagsiring: “Tikang han nagin paramangno han sirkito an akon bana, nakakaupod namon an damu nga kabugtoan nga iba-iba an personalidad, ngan nagin mas masayon ha akon an pakig-upod ha ira. Yana nai-enjoy ko na an pagkaiba-iba han kabugtoan. Ngan sigurado nga nalilipay liwat hito hi Jehova, kay gin-urosa niya an mga tawo nga iba-iba an personalidad ha pagsingba ha iya.” Kon ginkikita naton an iba sugad han pagkita ni Jehova ha ira, ginpapamatud-an naton nga hinigugma naton hira.—2 Cor. 8:24.
Ha daku nga kasakitan, nagsaad hi Jehova nga puprotektaran kita niya kon padayon kita nga magkakaurosa kaupod han aton kabugtoan (Kitaa an parapo 16)
16. Kay ano nga an gugma importante ha daku nga kasakitan? (Kitaa liwat an piktyur.)
16 Importante gud an gugma ha daku nga kasakitan. Kon magtikang na an kasakitan, diin kita makakabiling hin proteksyon? Pansina an sugo ni Jehova ha iya katawohan han gin-atake an kadaan nga Babilonya: “Lakat, akon katawohan, sulod ha iyo gisusuluri nga mga kwarto, ngan sadhi an iyo mga purtahan pagsulod niyo. Tago hin madaliay tubtob nga lumabay an kapungot.” (Isa. 26:20) Ito nga mga pulong bangin aplikado liwat ha aton ha daku nga kasakitan. An “gisusuluri nga mga kwarto” mahimo magtudlok ha aton mga kongregasyon. Ha daku nga kasakitan, nagsaad hi Jehova nga puprotektaran kita niya kon padayon kita nga magkakaurosa kaupod han aton kabugtoan. Salit kinahanglan maningkamot kita yana diri la ha pagkarawat ha aton kabugtoan kondi pati liwat ha paghigugma ha ira. Importante ito ha aton katalwasan!
PANGANDAM YANA
17. Kon mangangandam kita yana, ano an aton mahihimo ha daku nga kasakitan?
17 “An daku nga adlaw ni Jehova” maghahatag hin kasakitan ha katawohan. (Zep. 1:14, 15) An katawohan ni Jehova maatubang liwat hin kakurian. Pero kon mangangandam kita yana, makakapabilin kita nga kalmado ngan makakabulig ha iba. Maiilob naton an bisan ano nga problema nga mahimo ta atubangon. Kon nag-aantos an aton kabugtoan, bubuhaton ta an aton mahihimo basi mabuligan hira pinaagi ha pagpakita hin pagpaid ngan pagtagana han ira panginahanglan. Ngan kon hihigugmaon naton an aton kabugtoan yana, makakapakita kita hin gugma ha ira ha tiarabot. Ha pagbuhat hito, babalosan kita ni Jehova hin kinabuhi nga waray kataposan ha kalibotan nga waray na mga kalamidad ngan kasakitan.—Isa. 65:17.
KARANTAHON 144 Pagpokus Pirme ha Premyo!
a An daku nga kasakitan hirani na magtikang. An mga kalidad nga pagpailob, pagpaid, ngan gugma mabulig ha aton nga magin andam ha pinakamakuri nga mga panhitabo nga maieksperyensyahan han mga tawo. Pansina kon paonan-o an siyahan nga mga Kristiano nahibaro pagpakita hito nga mga kalidad, kon paonan-o ta liwat ito maipapakita yana, ngan kon paonan-o ito nga mga kalidad mabulig ha aton nga magin andam ha daku nga kasakitan.
b Adton karuyag magboluntaryo ha mga proyekto han disaster relief kinahanglan magpasa hin Local Design/Construction Volunteer Application (DC-50) o hin Application for Volunteer Program (A-19) ngan maghulat nga tawagan basi bumulig ha proyekto.