Pinaagi kan propeta Esekiel, igintagna ni Jehova nga magkakahiusa an mga Israelita sugad nga nasud kon bumalik na hira ha Tuna nga Iginsaad. Ito nga tagna nagsusumat liwat nga magkakahiusa an katawohan han Dios, nga nagtikang matuman durante han kataposan nga mga adlaw.

Ginsugo ni Jehova hi Esekiel nga suratan an duha nga istik. Susuratan niya an usa nga istik, ‘Kan Juda, ngan ha mga anak ni Israel nga iya mga kaupod,’ ngan ha usa pa, ‘Kan Jose, an kagingking [o, istik] ni Epraim, ngan ha bug-os nga balay ni Israel nga iya mga kaupod.’ An duha nga istik ‘mahihimo nga usa’ nga istik ha kamot ni Esekiel.​—Esek. 37:15-17.

 Ano an ginrirepresentaran han pulong nga “Epraim”? An siyahan nga hadi han napulo-ka-tribo nga ginhadian ha norte nga hi Jeroboam, tikang ha tribo ni Epraim, nga amo an nangunguna nga tribo. (Deut. 33:13, 17; 1 Hadi 11:26) Ini nga tribo tikang ha anak ni Jose nga hi Epraim. (Num. 1:32, 33) Nakakarawat hi Jose hin espesyal nga bendisyon tikang ha iya amay nga hi Jacob. Salit, an istik nga nagrirepresentar ha napulo-ka-tribo nga ginhadian husto la nga tawagon nga an istik ni Epraim. Han iginsurat ni Esekiel an tagna mahitungod ha duha nga istik, an norte nga ginhadian han Israel maiha na nga bihag han mga Asiryahanon han 740 B.C.E. (2 Hadi 17:6) Salit hito nga panahon, an kadam-an han mga Israelita nagsarang na ha imperyo han Babilonya, nga nagsakop han imperyo han Asirya.

Han 607 B.C.E., ginbihag han Babilonya an duha-ka-tribo nga ginhadian ha sur ngan bangin pati an mga nanhibilin ha norte nga ginhadian. An mga hadi nga nagmando hinin duha nga tribo tikang ha tulin ni Juda, ngan an pagkasaserdote konektado liwat ha ira kay an mga saserdote nag-aalagad ha templo ha Jerusalem. (2 Kron. 11:13, 14; 34:30) Salit husto la nga an duha-ka-tribo nga ginhadian nagrirepresentar ha istik para kan Juda.

Kakan-o ginhiusa inin duha nga simboliko nga istik? Nahitabo ito han 537 B.C.E. han bumalik an mga Israelita ha Jerusalem basi tukuron utro an templo. An mga representante han duha-ka-tribo nga ginhadian ngan han napulo-ka-tribo nga ginhadian urosa nga binalik tikang ha pagkadistyero. Waray na magkabahin-bahin an mga anak ni Israel. (Esek. 37:21, 22) An mga Israelita nagkaurosa utro ha pagsingba kan Jehova. Ini nga paghiusa igintagna liwat nira propeta Isaias ngan Jeremias.​—Isa. 11:12, 13; Jer. 31:1, 6, 31.

Ano nga importante nga kamatuoran may kalabotan ha putli nga pagsingba an ginpapabug-atan hini nga tagna? Amo ini: Papahinaboon ni Jehova nga ‘magin usa’ an iya mga magsiringba. (Esek. 37:18, 19) Ini ba nga tagna may kalabotan ha paghiusa natutuman ha aton panahon? Oo. Nagtikang ini matuman han 1919, han hinay-hinay nga naorganisar ngan nagkaurosa utro an katawohan han Dios. Waray maglampos an pangalimbasog ni Satanas nga padayon nga magkabahin-bahin an katawohan han Dios.

Hito nga panahon, kadam-an han nagkaurosa utro nga katawohan may paglaom nga magin mga hadi ngan saserdote ha langit kaupod ni Jesus. (Pah. 20:6) Ha simboliko nga pagkayakan, pariho hira han istik para kan Juda. Kondi paglabay han panahon, an nagtitikadamu nga may tunan-on nga paglaom umupod hinin espirituwal nga mga Judio. (Sak. 8:23) Pariho hira han istik para kan Jose; diri hira maghahadi kaupod han Kristo.

Yana, inin duha nga grupo urosa nga nag-aalagad sugad nga katawohan ni Jehova nga ginmamandoan han usa nga Hadi nga hi Jesu-Kristo, nga gin-uunabi ha tagna sugad nga “an akon surugoon nga hi David.” (Esek. 37:24, 25) Nag-ampo hi Jesus nga an ngatanan niya nga sumurunod ‘magin usa, sugad nga an iya Amay kahiusa niya ngan hiya kahiusa han iya Amay.’ * (Juan 17:20, 21) Igintagna liwat ni Jesus nga an iya gutiay nga panon, an dinihogan nga mga sumurunod, ngan an “iba nga mga karnero” “magigin usa nga panon.” Hira ngatanan gigiyahan han “usa nga paraataman.” (Juan 10:16) Maopay gud an pagkahulagway ni Jesus han espirituwal nga pagkaurosa han katawohan ni Jehova anoman an ira paglaom!