1. Ano an makatirigamnan nga mga abilidad nga iginhatag ni Jehova ha tawo?

GINLARANG ni Jehova an tawo nga may makatirigamnan nga mga abilidad. Gintagan kita niya hin abilidad ha paghunahuna basi masulbad naton an mga problema ngan makagplano para ha tidaraon. (Prob. 2:11) Gintagan kita niya hin “gahum” o abilidad basi matuman naton an aton mga plano ngan makab-ot an aton mga tumong. (Fil. 2:13) Ginlarang liwat kita niya nga may konsensya—an natural nga abilidad ha paghibaro kon ano an husto ngan sayop. Makakabulig ini ha aton nga malikyan an pakasala ngan tadungon an aton sayop.—Roma 2:15.

2. Ano an ginlalaoman ni Jehova nga bubuhaton naton ha aton mga abilidad?

² Naglalaom hi Jehova nga gagamiton naton ha maopay nga paagi an aton mga abilidad. Kay ano? Kay hinigugma kita niya ngan maaram hiya nga an pagbuhat naton hito makakapalipay ha aton. Pinaagi han iya Pulong, pauroutro kita nga gin-aaghat ni Jehova nga gamiton ha maopay nga paagi an aton mga abilidad. Pananglitan, ha Hebreo nga Kasuratan, aton mababasa: “An mga hunahuna han madoroto  tipakadto la ha kahuraan”; ngan “bisan ano nga buhat an hiagian han imo kamot, buhata ini ha imo kusug.” (Prob. 21:5; Ekles. 9:10) Ha Kristiano Griego nga Kasuratan, gin-aaghat kita: “Samtang may higayon kita, buhaton naton an maopay ha ngatanan”; ngan “sugad la nga an tagsa ha iyo may nakakarawat nga regalo, gamita ito ha pagbulig ha usa kag usa.” (Gal. 6:10; 1 Ped. 4:10) Matin-aw nga karuyag ni Jehova nga buhaton naton an aton bug-os nga mahihimo basi magpahimulos kita ngan an iba.

3. Ano an aton mga limitasyon?

³ Ha luyo nga bahin, maaram hi Jehova han aton mga limitasyon. Diri naton mawawara an pagkadiri-hingpit, sala, ngan kamatayon ha aton la pangalimbasog; diri liwat naton makukontrol an iba nga tawo kay kita ngatanan may kagawasan ha pagbuot. (1 Hadi 8:46) Ngan bisan kon damu na an aton kahibaro o eksperyensya, pariho la gihapon kita hin bata kon itanding kan Jehova.—Isa. 55:9.

4. Ano an aton hihisgotan hini nga artikulo?

⁴ Kinahanglan kita magpagiya pirme kan Jehova, ngan sumarig nga bubuligan kita niya ngan bubuhaton niya an mga butang nga diri naton mahihimo. Pero sadang liwat naton buhaton an aton bug-os nga mahihimo ha pagsulbad han mga problema ngan ha pagbulig ha iba. (Basaha an Salmos 37:3.) Karuyag sidngon, kinahanglan kita ‘sumarig kan Jehova ngan magbuhat hin maopay.’ Paonan-o naton ini mahihimo? Tagdon naton an ehemplo nira Noe, David, ngan iba pa nga matinumanon nga surugoon han Dios nga sinarig kan Jehova ngan nagbuhat han ira bug-os nga mahihimo may kalabotan han ira kahimtang. Makikita naton nga nag-uupod ini ha paghibaro kon ano an ira diri mahihimo ngan kon ano an ira mahihimo ngan gumios uyon hito.

5. Ihulagway an kahimtang nga gin-atubang ni Noe.

⁵ Hi Noe nabuhi ha panahon nga an kalibotan ‘puno hin panraugdaog’ ngan imoralidad. (Gen. 6:4, 9-13) Bisan kon maaram hiya nga bubungkagon ni Jehova iton diri diosnon nga kalibotan, sigurado nga nasubo gud hiya hiton maraot nga kahimtang. Kondi nasantop ni Noe nga may mga butang nga diri niya mahihimo pero may mga butang liwat nga iya mahihimo.

6, 7. (a) Ano an diri mahihimo ni Noe? (b) Ano an kaparihoan han mga kahimtang ha panahon ni Noe ngan ha aton panahon?

⁶ Kon ano an diri mahihimo ni Noe: Bisan kon nangangalimbasog  hiya nga isangyaw an nagpapahamangno nga mensahe ni Jehova, diri niya mapipirit an magraot nga tawo nga karawaton ito; diri liwat niya mapapadagmit an pag-abot han Baha. Kinahanglan ni Noe sumarig nga tutumanon ni Jehova an Iya saad nga wawad-on Niya an karaotan, ngan bubuhaton ito han Dios ha husto nga panahon.—Gen. 6:17.

⁷ Nagkikinabuhi liwat kita ha kalibotan nga kalyap an karaotan, ngan maaram kita nga nagsaad hi Jehova nga bubungkagon niya ito. (1 Juan 2:17) Bisan kon iginsasangyaw naton an “maopay nga sumat han Ginhadian,” diri naton mapipirit an mga tawo nga karawaton ito. Diri liwat naton mapapadagmit an pag-abot han “daku nga kasakitan.” (Mat. 24:14, 21) Pariho kan Noe, kinahanglan naton magkaada marig-on nga pagtoo ngan sumarig nga diri na mag-iiha bubungkagon han Dios an magraot. (Sal. 37:10, 11) Kombinsido kita nga diri tutugotan ni Jehova inin maraot nga kalibotan nga lumahos hin bisan usa la ka adlaw ha iya itinanda nga panahon.—Hab. 2:3.

8. Paonan-o nagpokus hi Noe ha kon ano an iya mahihimo? (Kitaa an retrato ha tinikangan hini nga artikulo.)

⁸ Kon ano an mahihimo ni Noe: Imbes nga manluya hi Noe tungod han iya diri mahihimo, nagpokus hiya ha kon ano an iya mahihimo. Sugad nga “parasangyaw han katadongan,” nangalimbasog hiya nga ipasamwak an nagpapahamangno nga mensahe nga igintoka ha iya. (2 Ped. 2:5) Sigurado nga nakabulig ito kan Noe nga matipigan nga marig-on an iya pagtoo. Labot la han pagsangyaw, gin-gamit liwat niya an iya kusog ngan hunahuna basi tumanon an igintoka ha iya han Dios—an paghimo han arka.—Basaha an Hebreo 11:7.

9. Paonan-o naton masusubad an ehemplo ni Noe?

⁹ Pariho kan Noe, nangangalimbasog kita nga magkaada ‘damu nga ginbubuhat ha buruhaton han Ginoo.’ (1 Cor. 15:58) Ito nga buruhaton bangin nag-uupod ha pagmintinar ha mga pasilidad nga ginagamit ha pagsingba, pagboluntaryo ha mga asembleya ngan kombensyon, o pagbulig ha mga buruhaton ha sanga nga opisina o ha remote translation office. Labaw ha ngatanan, nagpapabilin kita nga sagipo ha pagsangyaw nga buruhaton kay nagpaparig-on ito han aton paglaom ha tidaraon. Usa nga matinumanon nga bugto an nagsiring: “Kon iginsusumat mo ha iba an mga bendisyon han Ginhadian han Dios, nasasantop mo nga waray gud paglaom an imo mga mamarati ngan ginhuhunahuna nira nga waray na gud  solusyon an ira mga problema.” Oo, an pakigbahin ha pagsangyaw nga buruhaton nagpaparig-on han aton paglaom ha tidaraon ngan han aton determinasyon nga magpadayon ha rumba han kinabuhi.—1 Cor. 9:24.

10. Ihulagway an kahimtang nga gin-atubang ni David.

¹⁰ Iginhulagway ni Jehova hi Hadi David sugad nga “tawo nga inuuyonan han [iya] kasingkasing.” (Buh. 13:22) Ha kabug-osan, an kinabuhi ni David usa nga ehemplo han pagin maunungon. Bisan pa hito, nakabuhat hiya hin seryoso nga sala. Nag-adulteryo hiya kan Batseba. Mas nagdaku pa an iya sala han nagsari hiya nga itago ito; iya ginplano nga mamatay ha girra an bana ni Batseba nga hi Uria. Iginpadara pa ngani ni David kan Uria an surat nga nagsusugo ha pagpapatay ha iya mismo! (2 Sam. 11:1-21) Pero waray gud maitago ni David an iya sala. (Mar. 4:22) Han hinbaroan an iya sala, ano an iya nagin reaksyon?

11, 12. (a) Katapos ni David makasala, ano an iya diri mahihimo? (b) Kon magbabasol kita ha aton nabuhat nga seryoso nga sala, ano an malalaoman naton nga bubuhaton ni Jehova?

¹¹ Kon ano an diri mahihimo ni David: Diri na mababag-o ni David an iya nabuhat nga sala; diri liwat hiya makakalikay ha mga resulta hito. Ngani, an pipira hito nga resulta makakaapekto ha iya bug-os nga kinabuhi. (2 Sam. 12:10-12, 14) Salit kinahanglan niya hin pagtoo. Kinahanglan niya sumarig nga kon tinuod hiya nga magbabasol, papasayloon hiya ni Jehova ngan bubuligan nga mailob an mga resulta han iya mga nabuhat.

¹² Tungod kay diri kita hingpit, kita ngatanan nakakasala. May mga sala nga mas seryoso kay ha iba. Ha pipira nga kahimtang, bangin diri na naton mababag-o an aton nabuhat nga sala. Bangin kinahanglan na gud la naton atubangon an mga resulta hito. (Gal. 6:7) Pero nasarig kita ha saad ni Jehova nga kon magbabasol kita, bubuligan kita niya nga malamposan an magkuri nga kahimtang—bisan kon kita mismo an hinungdan han aton mga pag-antos.—Basaha an Isaias 1:18, 19; Buhat 3:19.

13. Paonan-o naibalik ni David an iya maopay nga espirituwalidad?

¹³ Kon ano an mahihimo ni David: Gintugotan ni David nga buligan hiya ni Jehova nga maibalik an iya maopay nga espirituwalidad. Paonan-o niya ito ginbuhat? Ginkarawat niya an sagdon han representante ni Jehova nga hi propeta Natan. (2 Sam. 12:13) Nag-ampo liwat hiya kan Jehova, iginsumat an iya mga sala, ngan iginpahayag an iya sinsero nga hingyap nga makarawat utro an pag-uyon han Dios. (Sal. 51:1-17) Imbes nga mawad-an hin paglaom tungod han kakonsensya, nahibaro hiya tikang ha iya mga sayop. Waray na gud niya buhata utro an iya seryoso nga mga sala. Paglabay hin mga tuig, namatay hiya nga matinumanon; an iya integridad gintitipigan gud ni Jehova ha Iya memorya.—Heb. 11:32-34.

14. Ano an aton mahibabaroan ha ehemplo ni David?

¹⁴ Ano an aton mahibabaroan ha ehemplo ni David? Kon nakabuhat kita hin seryoso nga sala, kinahanglan kita sinsero nga magbasol ngan mangaro hin pasaylo kan Jehova. Sadang naton isumat ha iya an aton mga sala. (1 Juan 1:9) Kinahanglan liwat naton makiistorya ha mga tigurang kay mabubuligan kita nira ha espirituwal. (Basaha an Santiago 5:14-16.) Pinaagi ha pagpahimulos han mga tagana ni Jehova, iginpapakita naton nga nasarig kita ha iya saad nga tatambalon kita ha espirituwal ngan papasayloon kita niya. Kinahanglan liwat kita mahibaro tikang ha aton mga sayop, magpadayon ha pag-alagad kan Jehova, ngan bug-os nga sumarig ha iya.—Heb. 12:12, 13.

15. Ano an aton mahibabaroan ha ehemplo ni Hana?

¹⁵ Bangin may mahunahuna ka pa nga matinumanon nga mga surugoon hadto nga sinarig kan Jehova ngan nagbuhat han ira bug-os nga mahihimo basi malamposan an ira kahimtang. Pananglitan, waray mahihimo hi Hana ha iya pagin baog. Pero nasarig hiya nga liliawon hiya ni Jehova, salit  padayon hiya nga nagsingba ha tabernakulo ngan iginsumat an ngatanan nga aada ha iya kasingkasing pinaagi ha pag-ampo. (1 Sam. 1:9-11) Maopay gud nga susbaranan hi Hana para ha aton yana! Kon may-ada kita sakit o iba pa nga problema nga diri naton kontrolado, iginpapasa naton kan Jehova an aton mga kabaraka ngan nasarig kita nga napaid hiya ha aton. (1 Ped. 5:6, 7) Ginhihimo liwat naton an ngatanan basi magpahimulos ha Kristiano nga mga katirok ngan ha iba pa nga espirituwal nga tagana.—Heb. 10:24, 25.

16. Ano an mahibabaroan han mga kag-anak ha lagas na nga hi Samuel?

¹⁶ Kumusta man an matinumanon nga mga kag-anak nga may anak nga inundang ha pag-alagad kan Jehova? Diri mapipirit han lagas na nga hi Samuel an iya adulto nga mga anak nga padayon nga sundon an magtadong nga suruklan nga iya igintutdo ha ira. (1 Sam. 8:1-3) Kinahanglan niya isarig kan Jehova an iya kahimtang. Bisan pa hito, mahimo niya matipigan an iya integridad ngan mapalipay an iya langitnon nga Amay, hi Jehova. (Prob. 27:11) Yana, may Kristiano nga mga kag-anak nga naatubang han sugad nga kahimtang. Nasarig hira nga pariho han amay ha parabola mahitungod han makaragon nga anak, andam pirme hi Jehova nga karawaton utro an makasasala nga nagbabasol. (Luc. 15:20) Labot ha pagsarig kan Jehova, nangangalimbasog gud hira nga magpabilin nga maunungon ha iya, naglalaom nga an ira susbaranan magpapagios ha ira mga anak nga bumalik kan Jehova.

17. Kay ano nga makapadasig an ehemplo han balo nga babaye?

¹⁷ Hunahuna liwat an pobre nga balo nga babaye ha panahon ni Jesus. (Basaha an Lucas 21:1-4.) Waray hiya mahihimo ha maraot nga ginbubuhat ha templo. (Mat. 21:12, 13) Ngan diri na niya mababag-o an iya pagin pobre. Bisan pa hito, kinaburut-on nga naghulog hiya hin “duha nga sinselyo”—“an ngatanan nga iya ginpakabuhian.” Iginpakita hiton matinumanon nga babaye an iya bug-os nga pagsarig kan Jehova. Maaram hiya nga kon uunahon niya an espirituwal nga mga butang, itatagana ha iya ni Jehova an iya materyal nga panginahanglan. An iya pagsarig kan Jehova nagpagios ha iya nga suportaran an kahikayan ha pagsingba. Sugad man, nasarig liwat kita nga kon uunahon naton an pagpamiling han Ginhadian, sisiguruhon ni Jehova nga may-ada kita han aton ginkikinahanglan.—Mat. 6:33.

18. Paghatag hin ehemplo han surugoon han Dios ha moderno nga panahon nga may-ada husto nga panhunahuna.

¹⁸ Damu liwat han aton mga igkasi-tumuroo ha moderno nga panahon an nagpapakita han sugad nga pagsarig kan Jehova ngan nagbubuhat han ira bug-os nga mahihimo may kalabotan ha ira kahimtang. Tagda hi Malcolm nga nagpabilin nga matinumanon tubtob han iya kamatay han 2015. Ha sulod hin mga dekada nga iya pag-alagad kan Jehova kaupod an iya asawa, nakaeksperyensya hira hin mga problema. Hiya nagsiring: “An kinabuhi usahay nagbuburobag-o, waray kasigurohan, ngan komplikado pa ngani. Kondi ginbibendisyonan ni Jehova an mga nasarig ha iya.” Ano an iya sagdon? “Pag-ampo nga magin mabungahon ka ngan aktibo ha pag-alagad kan Jehova tubtob ha imo mahihimo. Pagpokus ha kon ano an imo mahihimo, diri ha kon ano an diri mo mahihimo.” *

19. (a) Kay ano nga angayan gud an aton tinuig nga teksto para ha 2017? (b) Paonan-o mo maiaaplikar ha imo kinabuhi an tinuig nga teksto para ha 2017?

¹⁹ Samtang ‘mas nagtitikaraot pa gud’ ini nga sistema, makakalaom kita nga mas magtitikakuri an aton kahimtang. (2 Tim. 3:1, 13) Salit mas ginkikinahanglan gud yana nga diri kita mawad-an hin paglaom tungod han mga problema. Lugod, importante nga kultibaron naton an marig-on nga pagsarig kan Jehova ngan buhaton an aton bug-os nga mahihimo ha aton kahimtang. Salit angayan gud an aton tinuig nga teksto para ha 2017: “Sumarig ka kan Jehova, ngan magbuhat ka hin kaopayan”!—Sal. 37:3.