Hi apostol Pablo nagsurat ha mga Kristiano ha Tesalonica: “Kon may diri nasugot ha amon ginsisiring pinaagi hini nga surat, tigamni niyo hiya.” (2 Tes. 3:14) Hadto, nagsiring kita nga ini nga instruksyon para ha mga tigurang. Kon may usa nga padayon nga nagbabalewaray han mga prinsipyo ha Biblia bisan pa han pauroutro nga pagsagdon, an mga tigurang mahimo maghatag hin nagpapahamangno nga pahayag ha kongregasyon. Katapos, an tagsa nga magwarali diri na makikig-upod-upod ha usa nga gintigamnan.

Pero may ginkikinahanglan nga pagbag-o. An sagdon ni Pablo klaro nga mahitungod ha bubuhaton han indibiduwal nga mga Kristiano ha pipira nga espisipiko nga kahimtang. Salit an mga tigurang diri na kinahanglan maghatag hin nagpapahamangno nga pahayag. Kay ano nga ginbag-o ini? Tagda an sagdon ni Pablo ha konteksto.

Naobserbaran ni Pablo nga “nagpipinasaway” an pipira nga Kristiano hito nga kongregasyon. Ginbabalewaray nira an giniyahan nga sagdon. Ha naglabay niya nga pagbisita, naghatag hiya hini nga sugo: “Kon may nadiri pagtrabaho, ayaw liwat hiya pakaona.” Pero an iba nadiri la gihapon pagtrabaho basi suportaran an ira kalugaringon, bisan kon kaya nira ito. An iba naman, nanginginlabot ha buruhaton han iba. Ano an dapat nga pagtratar han mga Kristiano hito nga mga nagpipinasaway?​—2 Tes. 3:​6, 10-12.

Hi Pablo nagsiring, “tigamni niyo hiya.” An Griego nga pulong hito, nagpapasabot hin pagtigaman gud hin maopay hito nga tawo. Ginhatag ni Pablo ini nga instruksyon ha bug-os nga kongregasyon, diri la ha mga tigurang. (2 Tes. 1:1; 3:6) Salit an indibiduwal nga mga Kristiano nga bangin nakapansin nga an iya igkasi-Kristiano diri nasugot han giniyahan nga sagdon an magdidesisyon nga ‘diri na makig-upod’ ha usa nga nagpipinasaway.

Nagpapasabot ba ito nga gintratar ito nga tawo sugad hin gintanggal ha kongregasyon? Waray, nagsiring pa hi Pablo: “Padayon nga sagdoni hiya sugad nga bugto.” Salit an tagsa nga Kristiano makikig-upod la gihapon ha usa nga tinigamnan ha panahon han mga katirok ngan ha ministeryo, pero diri hira makikig-upod ha iya ha mga pagturotarampo o pagpahalibway. Kay ano? “Basi maawod hiya,” siring ni Pablo. Sugad nga resulta han pagtigaman, an sarawayon nga Kristiano bangin maawod han iya ginbubuhat ngan magbag-o.​—2 Tes. 3:​14, 15.

Paonan-o maiaaplikar han mga Kristiano yana ini nga sagdon? Siyahan, angay naton siguruhon kon an paggawi ba nga ginkukwestyon tinuod gud ba nga pagin ‘sarawayon’ sugad han iginsaysay ni Pablo. Diri hiya naghihisgot ha mga butang mahitungod ha mga hihimoon nga desisyon basado ha konsensya o personal nga karuyag. Ngan an iginpapasabot niya diri adton mga nakasakit ha aton mga emosyon. Lugod, an ginhuhunahuna ni Pablo adton tinuyo nga diri nasugot bisan pa han sagdon nga iginhatag tikang ha Pulong han Dios.

Yana, kon may mapansin kita nga igkasi-Kristiano nga nagpapakita hin sugad nga pagin diri masinugtanon, a maghihimo kita hin personal nga desisyon nga diri makig-upod ha iya ha mga pagturotarampo o pagpahalibway. Tungod kay personal nga desisyon ini, diri naton ito ig-iistorya ha iba nga diri naton kapamilya. Ngan makikig-upod la gihapon kita hito nga bugto ha aton mga katirok ngan ha ministeryo. Kon tadungon na niya an iya panggawi, ibabalik na naton an normal nga pakig-upod ha iya.