NAGTIKANG magkaada mga pakiana hi Susan mahitungod ha Dios han syete anyos hiya han an iya noybe anyos nga sangkay nga hi Al nahospital ngan iginbutang ha iron lung tungod hin polio. An eksperyensya ni Susan mababasa ha Enero 6, 2013 nga gowa han The New York Times.

Katapos bisitahon hi Al ha hospital, nagpakiana hi Susan ha iya nanay: “Kay ano nga ginbuhat ito han Dios ha usa nga bata?”

An iya nanay binaton: “Sigurado an padi masiring nga may hinungdan an Dios, pero diri ako maaram kon ano ito.”

Paglabay hin duha ka tuig, han 1954, nadiskobrehan ni Jonas Salk an bakuna para ha polio, ngan an nanay ni Susan nagsiring nga bangin gin-giyahan han Dios ito nga pagsaliksik.

“Kay hadto pa unta gin-giyahan han Dios an mga doktor basi waray na maibutang hi Al ha iron lung,” siring ni Susan.

Gintapos ni Susan an istorya han iya pagkabata pinaagi ha pagsiring: “[Hi Al] namatay paglabay la hin walo ka tuig, ngan hito nga takna, ateyista na gud ako.”

Pariho kan Susan, damu han nakaeksperyensya hin mga trahedya o nakakita hito an diri nakakabiling hin makapatagbaw nga baton ha ira mga pakiana mahitungod ha Dios. An iba nagin ateyista. An iba bangin diri man naglilirong nga may-ada Dios, kondi nagruruhaduha hira.

An mga ateyista ngan an mga nagruruhaduha diri man masisiring nga waray hinbabaroan ha relihiyon. Ha kabaliktaran, an ira eksperyensya ha relihiyon an kasagaran nga nagigin hinungdan han kawara han ira pagtoo. Bangin para ha ira, diri nababaton han dagku nga mga relihiyon an magkuri nga mga pakiana ha kinabuhi. Ano ito nga mga pakiana? Urusahon nga an ira mga pakiana kasagaran nga pariho han mga iginpapakiana han mga nag-aangkon nga may pagtoo ha Dios. Tagda an tulo nga karuyag ipakiana han damu nga tawo ha Dios ngan an mga baton nga iginhahatag han Biblia.

Kay ano nga sadang ini ipakiana?

‘An usa nga mahigugmaon nga Dios diri matugot nga mahitabo an mga trahedya,’ siring han damu.

HUNAHUNAA INI: Para ha aton, bangin naiiba an mga kustomre ngan panggawi han mga tawo ha iba nga kultura, ngan posible nga mahipausa kita hito. Bangin masayon para ha aton nga makaghatag hin sayop nga interpretasyon ha ira mga ginbubuhat. Pananglitan ha usa nga kultura, an pagkita ha mata han iba tigaman han pagin sinsero, kondi ha iba, kawaray-respeto ito. Pero diri masisiring nga sayop hira. Lugod, kinahanglan la naton hira kilal-on hin maopay.

Posible daw la nga sugad liwat hito an mahitabo may kalabotan ha aton pagsabot mahitungod ha Dios? Damu an natoo nga an mga pag-antos ebidensya nga waray Dios. Kondi para ha mga nakakasabot kon kay ano nga gintutugotan han Dios an pag-antos, kombinsido hira nga naeksister hiya.

KON ANO AN GINSISIRING HAN BIBLIA: An panhunahuna ngan pamaagi han Dios iba gud kay han aton. (Isaias 55:8, 9) Tungod hito, bangin diri dayon naton masabtan an iya mga ginbubuhat, sugad man an iya mga hinungdan kon kay ano nga diri pa hiya nagios.

Bisan pa hito, diri kita gin-aaghat han Biblia nga karawaton an waray basihan nga ideya nga “an Dios nagios ha misteryoso nga paagi.” Lugod, ginsasagda kita hito nga kilal-on hin dugang pa an Dios basi masabtan naton kon kay ano ngan kon san-o hiya magios. * Mahimo pa ngani kita magin duok ha iya.—Santiago 4:8.

Kay ano nga sadang ini ipakiana?

An iba bangin sumiring, ‘Kon importante ha Dios an pagin sinsero, diri unta hipokrito an mga nag-aangkon nga nagsisingba ha iya.’

HUNAHUNAA INI: Handurawa nga may usa nga anak nga nagsalikway han maopay nga pagpadaku han iya amay ngan bumaya ha ira balay basi himoon an iya karuyag. Bisan kon diri nauyon an amay ha desisyon han anak, iya gintugotan ito. Husto ba hunahunaon nga an iya amay maraot, o nga waray hiya amay? Syempre, diri! Ha pariho nga paagi, an pagkahipokrito han relihiyon nagpapamatuod la nga gintutugotan han Dios an mga tawo nga pumili han paagi han ira pagkinabuhi.

KON ANO AN GINSISIRING HAN BIBLIA: An Dios nangangalas ha pagkahipokrito han relihiyon. (Jeremias 7:29-31; 32:35) Pero gintutugotan niya an mga tawo nga gamiton an ira kagawasan ha pagbuot. Damu han mga nag-aangkon nga natoo ha Dios an nagsusunod ha mga relihiyoso nga katutdoan nga hinimo han tawo ngan ha ira kalugaringon nga mga suruklan ha moral.—Mateo 15:7-9.

Ha luyo nga bahin, diri hipokrito an mga membro han relihiyon nga gin-uuyonan han Dios. * Hi Jesus nagsiring: “Tungod hini an ngatanan mahibabaro nga mga disipulo ko kamo, kon naghihigugmaay kamo.” (Juan 13:35) Ini nga gugma sadang magin “diri hipokrito.” (Roma 12:9, footnote) Kadam-an han relihiyon an diri nakakatuman hito. Pananglitan, durante han girra han mga tribo ha Rwanda han 1994, ginpatay han yinukot nga mga tawo an kapariho nira an relihiyon tungod la kay iba an tribo hito nga mga tawo. Pero waray makigbahin hito an mga Saksi ni Jehova, ngan ginprotektaran han damu ha ira an ira mga igkasi-tumuroo ngan an iba pa, bisan kon nameligro an ira kinabuhi. Iton diri makikalugaringon nga buhat pamatuod nga mahimo magin diri hipokrito an mga membro han relihiyon.

Kay ano nga sadang ini ipakiana?

An iba bangin maghunahuna: ‘Kay ano nga an tawo nabubuhi la hin 80 o 90 ka tuig, katapos namamatay na? Ano an katuyoan hinin halipot nga pag-eksister?’

HUNAHUNAA INI: Damu han diri natoo ha Dios an nauyon han pagin komplikado ngan pagin organisado han aton uniberso. Nasasantop nira nga an aton planeta, an iba pa nga planeta, ngan an bulan iginbutang ha husto nga posisyon basi sustinihan an kinabuhi ha tuna. Nasiring hira nga perpekto an mga balaud nga nagkukontrol han uniberso, salit imposible magkaada kinabuhi ha tuna kon magkaada bisan gutiay nga pagbag-o hito.

KON ANO AN GINSISIRING HAN BIBLIA: Damu an naghuhunahuna nga an aton halipot nga kinabuhi nagpapamatuod nga waray Dios, pero an aton palibot naghahatag hin damu nga ebidensya nga may-ada Maglalarang. (Roma 1:20) May-ada hiya katuyoan ha paglarang hini nga mga butang, ngan an hinungdan han aton pag-eksister konektado gud hito nga katuyoan. Ginlarang han Dios an tawo basi mabuhi ha tuna ha kadayonan, ngan waray niya bag-oha an iya katuyoan.—Salmo 37:11, 29; Isaias 55:11.

Pinaagi han mga linarang han Dios, mahimo naton masabtan an iya pag-eksister ngan bisan an pipira han iya mga kalidad, pero diri ha sugad nga paagi karuyag niya nga masabtan naton an iya katuyoan. Basi hibaroan naton an katuyoan han Dios ngan han aton pag-eksister, kinahanglan naton magkaada komunikasyon ha iya. Ha Biblia, nakikigkomunikar hiya ha aton ha simple ngan direkta nga mga pulong. * An mga Saksi ni Jehova nag-aaghat ha imo nga hunahunaon utro an mga baton nga makikita ha Biblia.