Waray Niya Ikompromiso an Iya Gintotoohan
Han 11 anyos hi Song Hee, naobserbaran han iya nanay nga diri normal an kurba han likod ni Song Hee. Usa nga doktor an nagsiring nga may-ada hiya scoliosis—pagkurba han butagtok sugad han letra nga “C” o “S.” Nagtikagrabe an iya kondisyon salit kinahanglan hiya operahan. Pero nadiri hiya magpaabuno hin dugo. Gin-interbyu hiya han Pagpamata! mahitungod han iya eksperyensya.
Han nadayagnos ka nga may scoliosis, nabuligan ka ba han mga doktor?
Mga tulo ka tuig nga ginmonitor ako hin duha nga doktor, kondi padayon nga nagtikagrabe an pagkurba han akon butagtok. Ngani, naiipit na hini an akon kasingkasing ngan mga baga, salit nakukurian ako pagginhawa. Tungod hito, kinahanglan ko na gud magpaopera.
Naruyag ka ba magpaopera?
Oo. Pero ginsidngan ako nga magigin makuri an operasyon. Hito nga takna, 116 ka digri na an pagkurba han akon butagtok, karuyag sidngon grabe na gud ito. Kondi an akon pagpaopera daku gud nga ayat. Tungod han akon gintotoohan nga basado ha Biblia, diri ako magpapaabuno hin dugo. *
May nabilngan ka ba nga doktor nga naruyag mag-opera?
Oo, may nabilngan kami ni Nanay nga usa nga espesyalista ha amon lugar ha Florida, E.U.A. Kondi han ginsidngan ko hiya nga diri ako magpapaabuno hin dugo, nagsiring hiya nga waray doktor nga maruruyag pagbuhat hin sugad kakomplikado nga operasyon kon diri ako mapaabuno. Nagsiring pa gud hiya nga bangin diri na ako umabot hin 20 anyos kon diri ako magpapaopera. Ngan hito nga panahon, 14 anyos la ako.
Iginsaysay mo ba ha iya an basihan han imo gintotoohan?
Oo. Iginsaysay ko ha iya nga basado ha Biblia an akon gintotoohan, ngan akon ginpabug-atan nga nagsiring an Dios nga sagrado an dugo, kanan tawo man ito o hayop. * Para ha usa nga Israelita, kamatayon an sirot ha pagkaon hin dugo! * Iginpakita ko liwat ha iya an Buhat 15:19, 20. Ginsusugo hito an mga Kristiano: “Maglikay . . . ha dugo.” Karuyag sidngon, diri ito sadang isulod ha lawas han tawo ha anoman nga paagi—ha baba man o ha ugat.
Ano man an ginsiring han doktor?
Ginpirit la gihapon niya ako nga magpaabuno hin dugo. Ngan nahipausa ako han gintanyagan ako han hospital nga waray kami babaydan ha operasyon kon magpapaabuno ako.
Nakakaengganyar gud ito nga tanyag! Ano man an iyo ginbuhat ni imo nanay?
Bisan kon baga hin waray doktor nga naruruyag mag-opera ha akon kon diri ako aabunohan, waray gud namon ikompromiso an amon gintotoohan. Ngan nagin mas komplikado pa gud an sitwasyon kay sumala ha balaud, minor-de-edad pa ako. Tungod kay nagtitikagrabe an akon kondisyon, iginpasa an akon kaso ha korte. Maopay na la, gintagan kami hin 30 ka adlaw han huwes ha Florida basi mamiling hin doktor nga marespeto han akon gintotoohan.
May nabilngan ka ba?
Oo. Mahigugmaon nga ginkontak han Hospital Liaison Committee han mga Saksi ni Jehova ha amon lugar an usa nga espesyalista ha butagtok ha New York nga positibo gud ha sugad nga operasyon, ngan inuyon hiya nga makigkita ha akon. Salit antes pa matapos an 30 ka adlaw, nakabiling na kami hin doktor. *
Kumusta man an operasyon?
Naglampos gud ito! Basi matadong an akon butagtok, ginbutangan ito ni Dr. Robert M. Bernstein hin mga adjustable rod. Duha ka beses ako nga gin-operahan nga may duha ka semana nga lat-ang.
Kay ano nga duha ka beses?
Kay kon damu nga dugo an mawara ha akon ha siyahan nga operasyon, an lat-ang maghahatag hin panahon ha akon lawas nga makahimo hin dugang nga pula nga mga selyula han dugo antes han ikaduha nga operasyon. Hiton duha nga operasyon, gutiay gud la an nawara nga dugo ha akon tungod han maopay nga pagplano, pagin eksperto, ngan pagin metikuloso han grupo han mga doktor nga nag-opera ha akon. Madagmit liwat ako nga naka-recover, ngan tungod kay waray ako magpaabuno hin dugo, waray ako mga komplikasyon. *
Ano an reaksyon han imo doktor ha nagin resulta han operasyon?
Sadang ikonsiderar han mga doktor an kabug-osan nga kahimtang han pasyente
Nalipay gud hiya! “An pagtambal han mga doktor,” siring niya, “diri la kay basta pagbuhat hin mga operasyon.” Para ha iya, sadang ikonsiderar han mga doktor an kabug-osan nga kahimtang han pasyente, upod na an iya mga gintotoohan. Sigurado nga ito liwat an karuyag han damu nga tawo bisan kon diri hira mga Saksi ni Jehova.
^ par. 7 An nanay ni Song Hee usa nga Saksi ni Jehova. Hi Song Hee nagin Saksi ni Jehova liwat ngan nabawtismohan han 2012 ha edad nga 16.
^ par. 17 An Hospital Liaison Committee nabulig ha mga Saksi nga pasyente nga makabiling hin mga doktor nga maruruyag pagtambal nga diri mag-aabuno hin dugo.
^ par. 21 Ha usa nga artikulo mahitungod ha mga komplikasyon ha pagpaabuno hin dugo, an Clinical Excellence Commission, New South Wales (Australia) Health, nagsiring: “An pag-abuno hin dugo amo an pag-transplant hin buhi nga tisyu. Anoman an ig-transplant, awtomatiko nga diri ginkakarawat han lawas han tawo an bisan ano nga diri bahin hito. Ini nga kamatuoran daku gud nga bulig basi magin talwas an pasyente.”
