“Kahuna ko nga hiya na an para ha akon. ‘Hiya na an karuyag ko nga makaupod ha bug-os ko nga kinabuhi,’ siring ko ha akon kalugaringon. Pero paglabay la hin duha ka bulan, kinahanglan ko makigbulag ha iya. Diri ako makatoo nga an amon maopay nga tinikangan madagmit la nga natapos!”—Anna. *

“Baga hin damu gud an amon ginkakaparihoan. Kahuna ko nga kami na an magkakadayon. Pero samtang nalabay an panahon, nakikita ko nga magkaiba ngay-an kami. Han nakapamurubuot ako nga daku gud nga sayop an akon desisyon, nakigbulag ako ha iya.”—Elaine.

Ito ba an imo kahimtang yana? Kon oo, ini nga artikulo makakabulig ha imo ha pag-atubang hito.

An pagbulag mahimo magin masakit, bisan hadton nakigbulag. “Masakit hinduro!” siring han batan-on nga hi Sarah, nga nakigbulag ha iya uyab paglabay hin unom ka bulan. “Diri pa gud la maiha, bahin hiya han akon kinabuhi ngan han akon mga plano ha tidaraon; pero tigda na la nga nawara hiya ha akon. Kon nakakabati ako hin mga kanta nga espesyal ha amon, nahinunumdoman ko an makalilipay nga panahon nga magkaupod kami. Ngan kon nakadto ako ha mga lugar nga espesyal ha amon, inaabat ko an kasakit han iya kawara ha akon. Ini an akon gin-abat bisan kon ako an nakigbulag!”

An pagbulag bisan kon masakit, mahimo makaopay. “Diri mo karuyag makasakit,” siring ni Elaine. “Kondi nakikita mo nga pariho kamo masasakitan kon iyo ipapadayon an iyo relasyon nga waray la dadangatan.” Nauyon hini hi Sarah. Hiya nagsiring: “Kon diri ka malipayon ha iya yana nga mag-uyab pa la kamo, posible nga diri ka liwat magigin malipayon kon mag-asawa na kamo, salit an pagbulag amo an pinakamaopay nga desisyon.”

An pagbulag diri nagpapasabot nga pakyas ka. Ha pagkatinuod, an malampuson nga relasyon han mag-uyab diri pirme natatapos ha kasal, kondi ha usa nga desisyon. Kon ikaw o an imo uyab seryoso nga nagruruhaduha, bangin an husto nga desisyon amo an pagbulag. Kon mahitabo ito, diri karuyag sidngon nga tungod kay waray maglampos an iyo relasyon, diri ka na maglalampos. Mahimo ka makapadayon ha imo kinabuhi! Paonan-o?

Karawata nga normal la an masakitan. “Diri la kay basta sangkay an nawara ha akon, kondi duok gud nga sangkay,” siring ni Elaine nga gin-unabi kanina. Kon makibulag ka ha usa nga duok gud ha imo, natural la nga masubo ka. “Kon natapos an iyo relasyon,” siring han usa nga batan-on nga hi Adam, “normal la nga umabat hin kasakit, bisan kon maaram ka nga para ito ha iyo kaopayan.” Bangin abaton mo an pariho han gin-abat ni Hadi David ha panahon han Biblia. “Ikinagab-i pinalulutaw ko an akon higdaan . . . han akon mga luha,” hiya nagsurat ha panahon nga masurub-on gud hiya. (Salmo 6:6) Usahay, an pinakamaopay buhaton basi malamposan an kasakit amo an pag-atubang hito, diri an paglikay hito. An pagkarawat nga normal la nga masakitan mahimo magin siyahan nga pitad basi matambal an kasakit.—Prinsipyo ha Biblia: Salmo 4:4.

Makig-upod ha mga tawo nga nahigugma ha imo. Ha pagkatinuod, bangin diri ito masayon. “Ha siyahan, nadiri ako makakita hin mga tawo,” siring ni Anna nga gin-unabi kanina. “Kinahanglan ko hin panahon basi makaghunahuna ngan masabtan an nahitabo.” Kondi paglabay han panahon, nasantop ni Anna nga maaramon an pakig-upod ha iya duok nga kasangkayan nga makakaparig-on ha iya. “Mas nakakapanhunahuna na ako yana hin maopay,” siring niya, “ngan an amon pagbulag diri na sugad kasakit kay han akon inabat hadto.”—Prinsipyo ha Biblia: Proberbios 17:17.

Mahibaro tikang ha nahitabo. Pakianhi an imo kalugaringon: ‘Ini ba nga eksperyensya nagpapakita nga may-ada ako kinahanglan pauswagon? Kon may-ada, ano an akon kinahanglan bag-uhon para ha akon sunod nga relasyon?’ “Paglabay han panahon, mas nasabtan ko na an mga nahitabo,” siring han batan-on nga hi Marcia. “Kondi, maiha-iha anay antes ako nakapanhunahuna nga diri naaapektohan han akon emosyon.” Ito liwat an gin-abat ni Adam nga gin-unabi kanina. Hiya nagsiring: “Usa ka tuig anay an naglabay antes mawara an kasakit han amon pagbulag. Kondi mas maiha pa antes ko hibaroan an leksyon han nahitabo ha akon. Tungod han akon naeksperyensyahan, damu an akon nahibaroan mahitungod ha akon kalugaringon, ha diri kapariho ha sekso, ngan ha pakigrelasyon. Yana, an akon kasakit diri na gud pariho han akon inabat hadto.”

Ig-ampo an imo mga kabaraka. An Biblia nasiring nga ‘gintatambal han Dios an may mga ruba nga kasingkasing, ngan ginpuputos niya an ira mga samad.’ (Salmo 147:3) Bisan kon diri hiya an nagpipili han aton magigin asawa—diri man liwat hiya an angay basulon kon magbulag an mag-uyab—interesado hiya han aton kaopayan. Isumat ha iya an imo inaabat pinaagi han pag-ampo.—Prinsipyo ha Biblia: 1 Pedro 5:7.