HI Hilton mahilig ha boksing. Bisan han syete anyos pa la hiya, nakikigsuntokay na hiya—ha sulod ngan ha gawas han ring! Han hayskul hiya, naglilinibot-libot hiya ngan han iya mga barkada ha pagpinamiling hin makakastigo. “Nangangawat ako, naghuhuygo, nagkikita hin pornograpiya, nanbabastos hin mga babaye, ngan nabuyayaw ha akon mga kag-anak,” siring niya. “Kahuna han akon mga kag-anak nga diri na ako magbabag-o. Paggradwar ko ha hayskul, linayas ako ha amon.”

Pagbalik ni Hilton 12 ka tuig na an naglabay, diri gud makatoo an iya mga kag-anak han iya pagbag-o! Kalmado na hiya, may pagpugong ha kalugaringon, ngan matinalahuron. Ano an nakapabag-o ha iya? Samtang waray hiya ha poder han iya mga kag-anak, ginpamalandong gud niya kon ano an direksyon han iya kinabuhi. Gin-usisa liwat niya an Biblia basi hibaroan kon makakabulig ba ito ha iya nga magbag-o. Hi Hilton nagsiring: “Gin-aplikar ko an akon nababasa ha Biblia, sugad han paghukas han akon daan nga personalidad ngan pagsunod ha sugo ha Efeso 6:2, 3 nga pasidunggan an akon mga kag-anak. Ha bug-os ko nga kinabuhi, yana pa la ako nagin tinuod nga malipayon, ngan napalipay ko an akon mga kag-anak, diri pariho hadto nga puro la kasakit an akon iginhahatag ha ira!”

Iginpapakita han eksperyensya ni Hilton an kapulsanan ngan an nakakapabag-o nga gahum han mga prinsipyo ha Biblia. (Hebreo 4:12) Aton hisgotan an pipira hito nga mga prinsipyo may kalabotan ha pagin tangkod, pagpugong ha kalugaringon, pagin maunungon ha asawa, ngan gugma. Aton liwat hihisgotan kon paonan-o ito makakabulig nga magin mas malipayon an aton kinabuhi.