PRINSIPYO HA BIBLIA: ‘Jehova, hin-o ba an magpupuyo dida ha imo tabernakulo? An naglalakat hin hingpit, ngan nagbubuhat ha katadongan, ngan nagyayakan hin kamatuoran ha iya kasingkasing.’—Salmo 15:1, 2.

MGA KAPULSANAN: Ginpapabilhan han kadam-an an pagin tangkod ngan pagkaada integridad. Pero ano man kon an usa may higayon nga makapanlimbong ngan diri ito mahibabaroan han iba? An iya bubuhaton nadepende ha kon ano an aada ha iya kasingkasing.

Hi Raquel nga nagtatrabaho ha purchasing, nagsiring: “May mga ahente nga nagsari paghukip ha akon. Nagsiring hira nga kon ha ira ako mapalit, ihahatag nira ha akon an iba nga ‘discount,’ imbes ha kompanya nga akon gintatrabahoan. Pero akon nahinumdoman an sagdon ha Biblia may kalabotan ha pagin tangkod, salit nagdumiri ako. Nahibaroan ito han akon boss, ngan mas tumapod hiya ha akon.”

Kon nasulay hi Raquel han tanyag ha iya, bangin nagkaada hiya kwarta hito nga panahon. Kondi ano daw la an mahitatabo kon mahibaroan ito han iya agaron? Matatanggal ba hiya ha trabaho? Ngan may makarawat pa ba ha iya nga iba nga kompanya? Mas importante kan Raquel an iya konsensya ngan an pagtahod ha kalugaringon. “Gabay pa nga magkamay-ada maupay nga ngaran kay han dako nga manggad; ngan an pagkatinalahuron labaw pa kay han bulawan ug salapi,” siring han Darahunon o Proberbios 22:1 (Baraan nga Biblia).

Hi Jessie tangkod liwat ngan masasarigan, salit maopay an iya reputasyon ha iya agaron. Ano an mga kapulsanan nga iya nakarawat? Na-promote hiya sugad nga manidyer ngan gintagan pa hiya hin dugang nga kagawasan ha iya eskedyol. Tungod hito, nagkaada hiya mas daku nga panahon ha iya asawa, mga anak, ngan ha pag-alagad ha Dios.

Kon namimiling hin mga empleyado an iba nga agaron, nakadto hira ha mga grupo nga kilala ha pagin tangkod. Pananglitan, usa nga manidyer hin kompanya ha Pilipinas an nagsurat ha sanga nga opisina han mga Saksi ni Jehova basi hangyoon an mga Saksi nga mag-aplay hin trabaho ha ira kompanya. Hiya nagsiring nga “maduruto hira, tangkod, ngan seryoso ha trabaho.” Kondi an sadang dayawon tungod hini amo hi Jehova nga Dios, an nagtututdo ha aton nga ‘dumtan an maraot’ ngan ‘higugmaon an maopay.’—Amos 5:15.