PRINSIPYO HA BIBLIA: “Sadang pasidunggan han ngatanan an pag-asawa, ngan diri paghugawan an higdaan han mag-asawa.”—Hebreo 13:4.

MGA KAPULSANAN: May mga nasiring nga kadaan na ito nga prinsipyo. Kondi sayop hira—sayop gud hira! Kon masakit hinduro ha panahon han Biblia an magin biktima ha pagin diri maunungon han asawa, sugad liwat hito an inaabat han mga biktima yana.—Proberbios 6:34, 35.

Hi Jessie nga bana ngan amay, nagsurat: “Tungod han amon pagin maunungon ha usa kag usa, nagin marig-on an amon pag-asawa ngan nagin malipayon kami. Oo, an pagsarig importante gud ha mag-asawa. Kondi gin-guguba han pagin diri maunungon ito nga pagsarig—labot pa han magigin epekto hito ha mga anak.”

Haros magbulag hi Ligaya * ngan han iya bana tungod han iya binuhatan. Hi Ligaya nagsiring: “Nagtikang ako makig-upod-upod ha magraot nga mga tawo. Tungod hito, nahiara ako ha waray-kontrol nga kalipayan ha gab-i, ngan nagin diri ako maunungon ha akon bana.” Nagin malipayon ba hiya hito nga iya pagkinabuhi? Pirme hira nag-aaway han iya bana, ngan nagin miserable an iya kinabuhi. Hiya nagdugang: “Han ginpamalandong ko an akon maraot nga mga ginbuhat, nasantop ko nga husto gud an ginsiniring han akon mga kag-anak, ‘An maraot nga mga kaupod nakakadaot han maopay nga pamatasan.’”—1 Corinto 15:33.

Hi Ligaya dugang nga nagsiring: “Antes pa magin grabe an sitwasyon, nagdesisyon ako nga iundang an akon maraot nga mga buhat ngan mag-aram ha Biblia—hini nga takna, akon na igin-aaplikar an mga katutdoan hito.” Ano an resulta? Naisalbar niya an ira pag-asawa, ngan an iya bana nagin mas buotan na ngan mas narespeto na ha iya. “Ginbag-o han Biblia an akon kinabuhi,” siring niya, “ngan waray gud ako ginbasolan nga ginbayaan ko an akon pagkinabuhi hadto ngan an akon kunohay mga kasangkayan.”