An Dagat nga Patay nahubas hin mga usa ka metro kada tuig. Nababaraka an pipira nga bangin bug-os nga humubas ito ha 2050. An mga opisyal namimiling hin solusyon. Usa nga opsyon nga gin-iistudyohan pa amo an pagkuha han asin ha tubig han Dagat nga Pula basi magamit han mga tawo. Katapos, an nahibilin nga maasin nga tubig paaawason ngadto ha Dagat nga Patay. Nababaraka an mga kritiko nga tungod hito nga paagi, madaot an maopay nga sistema han ekolohiya han Dagat nga Patay.

Kon Pasko, mas damu hin mga tulo ka bahin an nahuhospital tungod ha atake ha kasingkasing kay ha iba nga mga adlaw han tuig, sumala ha surbey han usa nga kompanya han insurance. Nagsiring ito nga an nangunguna nga rason amo an duro nga istres han usa ha pagpinamiling hin mga regalo ngan an hitaas nga ginlalaoman han iya mga kapamilya ngan kasangkayan.

Iginreport han Britano nga mga syentista nga an usa nga mollusk ha Iceland nga ginhuhunahuna nga nabuhi hin mga 405 ka tuig, 507 ka tuig na ngay-an han diri ginlalaoman nga mamatay ito han 2006. Ito an hayop nga may pinakahilawig nga kinabuhi. * Namatay an mollusk han igin-freeze ito han mga syentista basi dad-on ha ira laboratoryo.

Ha miting nga gindumara ha Havana, Cuba, temprano hini nga tuig, igindeklara han 33 nga nasud nga membro han Community of Latin American and Caribbean States an ira katunaan sugad nga ‘peace zone’ pinaagi ha pagkauruyon nga diri magamit hin pwersa ha pagsulbad han mga diri pagkasinabtanay. Upod han mga umatender ha miting, amo an Secretary General han Nagkakaurosa nga mga Nasud nga hi Ban Ki-moon.