Ito an inabat han 13 anyos nga bata han ginregalohan hiya hin ayam. Usa nga malampuson nga negosyante an nagsiring nga an kompyuter nga iginhatag ha iya han iya tatay han hayskul hiya amo an regalo nga nakagbag-o han iya kinabuhi. Ngan usa nga bana an nagsiring nga an kard nga ginhimo han iya asawa para ha ira siyahan nga anibersaryo amo an pinakamaopay nga regalo nga iya nakarawat.

Kada tuig, damu an naggagahin hin panahon ngan nangangalimbasog ha pagpamiling han “pinakamaopay” nga regalo para ha usa nga sangkay o kapamilya ha espesyal nga okasyon. Ngan kadam-an an nalilipay pakabati hin reaksyon sugad han gin-unabi ha igbaw. Kumusta ka man? Karuyag mo ba makahatag o makakarawat hin regalo nga gin-aapresyar gud?

Makalilipay gud an pakahatag o pakakarawat hin regalo, diri la tungod han epekto hito ha nakarawat kondi tungod liwat han kalipay nga naihahatag ha nagregalo. Aw, husto an siring han Biblia: “Mas makalilipay an paghatag kay ha pagkarawat.” (Buhat 20:35) Syempre, mahimo madugangan an kalipay ha paghatag kon gin-aapresyar gud an regalo.

Kon sugad, paonan-o an paghatag hin regalo makakahatag hin tinuod nga kalipay ha imo ngan ha makarawat hito? Ngan kon diri ka makakahatag han “pinakamaopay” nga regalo, ano an imo puydi buhaton basi maapresyar an imo regalo?