Tikang han ginlarang an mga tawo, an Dios nakikigkomunikar na ha ira pinaagi han mga anghel ngan mga propeta. Dugang pa, iya iginpasurat an iya mensahe ngan an iya iginsaad nga mga bendisyon. Ini nga mga saad han Dios may daku nga epekto ha imo kabubuwason. Salit diin mo mabibilngan yana an mga saad han Dios?

An mensahe han Dios ha aton mababasa ha Baraan nga Kasuratan. (2 Timoteo 3:16) Paonan-o an Dios gumamit hin mga propeta basi isurat an iya mensahe? (2 Pedro 1:21) Iginbutang han Dios an iya panhunahuna ha hunahuna han pinili nga mga kalalakin-an, katapos, iginsurat nira ito. Puropariho ito ha usa nga negosyante nga nagsugo hin sekretaryo basi isurat an iya mensahe. Bisan kon an sekretaryo an nagsurat hito, gintatagad naton nga mensahe ito han negosyante. Ha pariho nga paagi, bisan kon an Dios nagsugo hin mga kalalakin-an basi igsurat an iya mensahe, hiya an tinuod nga Awtor han Baraan nga mga Sinurat.

An mensahe han Dios importante gud salit karuyag niya nga mabasa ngan masabtan ito han ngatanan nga tawo. Yana, an iya “waray kataposan nga maopay nga sumat” mababasa na han “tagsa nga nasud ngan tribo ngan yinaknan.” (Pahayag 14:6, footnote) Ha bulig han Dios, an bug-os nga Baraan nga Kasuratan o an bahin hito mababasa na ha sobra 3,000 nga yinaknan, mas damu gud ito kay han bisan ano nga libro ha bug-os nga kalibotan.