“O Jehova, tubtob san-o ako mangangaraba para hin bulig, pero diri ka namamati? Tubtob san-o ako mangangaro hin bulig tungod han kamadarahog, pero diri ka nanginginlabot?” (Habakuk 1:2, 3) Ini an pangaraba ni Habakuk nga usa nga maopay nga tawo nga nalilipayan han Dios. An iya ba mga pulong nagpapakita hin kawaray-pagtoo? Diri gud! Ginpasarig utro han Dios hi Habakuk nga may-ada Hiya itinanda nga panahon ha pagtapos han tanan nga pag-antos.​—Habakuk 2:2, 3.

Kon nag-aantos ka o an usa nga duok ha imo, masayon la hunahunaon nga an Dios mahinay gumios, ngan sadang na unta hiya gumios yana. Kondi, an Biblia nagpapasarig: “Hi Jehova diri mahinay may kalabotan han iya saad, sugad han ginhuhunahuna han iba nga mga tawo nga pagkamahinay, pero nagpapailob hiya ha iyo kay diri niya karuyag nga mabungkag an bisan hin-o, lugod karuyag niya nga magbasol an ngatanan.”​—2 Pedro 3:9.

Ha diri na gud maiha! Hi Jesus nagsiring nga may usa nga henerasyon nga makita han naiiba nga mga kahimtang nga magtitigaman han “ikatarapos han sistema han mga butang.” (Mateo 24:3-42) An katumanan han tagna ni Jesus ha aton panahon nagpapasabot nga hirani na manginlabot an Dios ha kahikayan han tawo. *

Kondi, paonan-o tatapuson han Dios an tanan nga pag-antos? Han nakanhi hi Jesus ha tuna, iya iginpakita an gahum han Dios ha pagbulig ha mga tawo nga maibanan an ira pag-antos. Iini an pipira nga ehemplo.

Natural nga Kalamidad: Samtang nagbibiyahe hi Jesus ngan an iya mga apostol ha Dagat han Galilea, hapit na hira malunod tungod hin makusog nga subasko. Kondi iginpakita ni Jesus nga makukontrol niya ngan han iya Amay an natural nga mga elemento. (Colosas 1:15, 16) Hi Jesus nagsiring: “Husto na! Maglinaw ka!” An resulta? “Inundang an hangin ngan nagkalma gud ito.”​—Marcos 4:35-39.

Sakit: Kilala gud hi Jesus ha iya abilidad ha pagtambal hin buta, piay, epileptiko, may leprosi, o iba pa nga sakit. “Gintambal niya an ngatanan nga nag-aantos.”​—Mateo 4:23, 24; 8:16; 11:2-5.

Gutom: Gin-gamit ni Jesus an gahum nga iginhatag han iya Amay ha pagpadamu hin gutiay la nga pagkaon. An Biblia nasiring nga durante han iya pagministeryo, duha ka beses nga nagpakaon hiya hin yinukot nga tawo.​—Mateo 14:14-21; 15: 32-38.

Kamatayon: An gahum ni Jehova ha pagbanhaw klaro nga napamatud-an han tulo ka beses nga pagbanhaw ni Jesus hin mga patay, sugad han nakarekord ha Biblia. Usa han iya ginbanhaw an upat na ka adlaw nga patay.​—Marcos 5:35-42; Lucas 7:11-16; Juan 11:3-44.