MAKALILIPAY GUD ITO NGA PAGLAOM! An aton Maglalarang nagsasaad nga mahimo kita magkaada kinabuhi nga dayon, dinhi mismo ha tuna. Kondi damu an diri natoo hito. ‘An ngatanan kinahanglan mamatay,’ siring nira. ‘Bahin ito han natural nga sikolo han kinabuhi ngan kamatayon.’ Para ha iba posible nga mabuhi hin waray kataposan, kondi diri dinhi ha tuna. Nasiring hira nga mahimo la kita magkaada kinabuhi nga dayon kon mamatay kita ngan kumadto na ha langit. Ano ha imo hunahuna?

Antes mo ito batunon, tagda an baton han Biblia hinin tulo nga pakiana: Ano an iginpapakita han pagkalarang han tawo may kalabotan ha kon mationan-o kahilawig hiya sadang mabuhi? Ano an orihinal nga katuyoan han Dios para ha tawo ngan ha tuna? Kay ano nga namamatay an tawo?

Ha tanan nga ginlarang han Dios ha tuna, an tawo an pinakanaiiba. Ha ano nga paagi? Sumala ha Biblia, an tawo la an ginlarang uyon ha “dagway” han Dios ngan “pariho” ha Dios. (Genesis 1:26, 27) Ano an iginpapasabot hito? Nagpapasabot ito nga an tawo gintagan hin mga kinaiya ngan kalidad nga pariho han kanan Dios, sugad han gugma ngan hustisya.

Dugang pa, gintagan an tawo hin panhunahuna ngan abilidad ha pagdesisyon, ha paghibaro han maopay ngan maraot, ngan hin hingyap nga magin duok ha Dios. Salit naaapresyar naton an pagkamakaruruyag han uniberso, han pagkaurusahon han palibot, pati han mga obra, musika, ngan siday. Labaw ha ngatanan, an tawo may abilidad nga magkaada maopay nga relasyon ha Maglalarang. Tungod hito, naiiba gud an mga tawo ha tanan nga linarang ha tuna.

Salit hunahunaa ini: Maghahatag ba an Dios ha tawo hin sugad kamaopay nga mga kalidad, upod an waray tubtoban nga abilidad ha pagkultibar ngan pagpauswag hito, kon katuyoan niya nga mabuhi la kita hin pipira ka tuig? Oo, iginhatag han Dios inin naiiba nga mga kalidad ngan abilidad basi mapahimulsan naton an kinabuhi nga dayon dinhi mismo ha tuna.

May mga nasiring nga diri katuyoan han Dios nga mabuhi hin dayon an mga tawo dinhi ha tuna. Nasiring hira nga an tuna gindisenyo basi magin temporaryo nga urukyan, diin sasarihan an mga tawo kon hin-o an takos kumadto ha langit ngan magkinabuhi kaupod han Dios ha waray kataposan. Kondi kon tinuod ito, diri ba sugad hin an Dios an may baratunon han tanan nga karaotan dinhi ha tuna? Magigin kabaliktaran gud ito ha tinuod nga kinaiya han Dios. Mahitungod ha iya, an Biblia nasiring: “Kay ngatanan niya nga dalan hustisya. Usa nga Dios nga matinumanon  nga diri gud nagbubuhat hin kawaray-hustisya; matadong ngan tangkod hiya.”—Deuteronomio 32:4.

Matin-aw nga iginpapakita han Biblia an orihinal nga katuyoan han Dios para ha tuna hini nga mga pulong: “Mahitungod han mga langit, hi Jehova an tag-iya hito, pero an tuna iginhatag niya ha mga anak han mga tawo.” (Salmo 115:16) Oo, ginlarang han Dios an tuna basi magin makaruruyag ngan permanente nga urukyan han tawo, ngan ginpuno niya ito han tanan nga kinahanglan nira basi magin mapulsanon ngan waray tubtoban an ira kinabuhi.—Genesis 2:8, 9.

“Mahitungod han mga langit, hi Jehova an tag-iya hito, pero an tuna iginhatag niya ha mga anak han mga tawo.”—Salmo 115:16

Dugang pa, matin-aw nga iginsusumat han Biblia an katuyoan han Dios para ha tawo. Ginsugo niya an siyahan nga mag-asawa nga ‘pun-on an tuna ngan kultibaron ito, ngan magkaada awtoridad ha tagsa nga buhi nga linarang nga nagkikiwa ha tuna.’ (Genesis 1:28) Daku gud nga pribilehiyo para ha ira nga atamanon ngan pahaluagon an ira inuukyan nga Paraiso ha bug-os nga tuna! Ha pagkatinuod, kinabuhi nga dayon ha tuna an naghuhulat kanda Adan ngan Eva ngan ha ira magigin mga anak, diri kinabuhi ha langit.

Kondi, kay ano nga namamatay kita? An Biblia nasiring nga tungod kay ginsamok han usa nga espiritu nga linarang han Dios, nga ha urhi iginpakilala sugad nga an rebelde nga hi Satanas nga Yawa, an kahikayan han Dios ha Eden. Paonan-o?

Ginsulay ni Satanas an aton siyahan nga mga kag-anak, hira Adan ngan Eva, nga umupod ha iya ha pagrebelde ha Dios. Han nagsiring hi Satanas nga may-ada maopay nga butang nga diri iginhahatag an Dios ha ira—an katungod ha pagdesisyon ha kon ano an husto ngan sayop—sugad hin inupod hira kan Satanas ngan bumaya ha Dios. An resulta? Ha urhi, namatay hira sugad la han siring han Dios. Nawara ha ira an paglaom nga mabuhi hin dayon ha Paraiso nga tuna.—Genesis 2:17; 3:1-6; 5:5.

An pagrebelde nira Adan ngan Eva nakaapekto ha tanan nga tawo tubtob yana. An Biblia nasiring: “Sugad la nga pinaagi han usa nga tawo [hi Adan] an sala sinulod ha kalibotan ngan an kamatayon pinaagi han sala, tungod hito an kamatayon dinangat ha ngatanan nga tawo.” (Roma 5:12) Namamatay kita tungod han aton napanunod nga sala ngan kamatayon tikang ha aton orihinal nga kag-anak, diri tungod han itinanda na nga daan ngan diri masabtan nga ‘plano’ han Dios.

An pagrebelde ha Eden waray magwara han orihinal nga katuyoan han Dios para ha tawo ngan ha tuna. An perpekto nga gugma ngan hustisya han Dios nagpagios ha iya nga maghatag hin paagi basi matalwas kita ha pagkauripon ha sala ngan kamatayon. Hi apostol Pablo nagsaysay: “An bayad han sala amo an kamatayon, pero an regalo nga iginhahatag han Dios amo an kinabuhi nga waray kataposan pinaagi kan Kristo Jesus nga aton Ginoo.” (Roma 6:23) Tungod han gugma, “iginhatag [han Dios] an iya bugtong nga Anak [nga hi Jesu-Kristo] basi an bisan hin-o nga nagpapakita hin pagtoo ha iya diri mabungkag kondi magkaada kinabuhi nga waray kataposan.” (Juan 3:16) Pinaagi ha paghatag han iya kalugaringon sugad nga halad-lukat, iginbalik ni Jesus an tanan nga nawara ni Adan. a

Diri na maiha, tutumanon han Dios an iya saad nga paraiso nga tuna. Maieksperyensyahan mo inin maopay nga tidaraon kon susundon mo an siring ni Jesus: “Sulod kamo pinaagi ha haligot nga ganghaan, kay haluag an ganghaan ngan hilapad an dalan tipakadto ha kabungkagan, ngan damu an nasulod pinaagi hito; kondi haligot an ganghaan ngan gutiay an dalan tipakadto ha kinabuhi, ngan pipira la an nakakabiling hito.” (Mateo 7:13, 14) Oo, an imo tidaraon nadepende ha imo hihimoon nga desisyon. Ano an imo pipilion?