AN MGA relihiyon ha damu nga nasud ha kalibotan, sugad han Romano Katoliko, Ortodokso, Budhismo, ngan iba pa, nag-oobligar han celibacy ha ira mga lider ngan mga klero. Kondi para ha damu, ito an hinungdan han bag-o la nga seksuwal nga mga eskandalo han mga klero ha iba-iba nga relihiyon.

Salit angayan la magpakiana, Igin-oobligar ba han Biblia an celibacy ha Kristiano nga mga ministro? Basi mabaton ini, tagdon naton an gintikangan ngan an mga panhitabo may kalabotan hito, pati an panhunahuna han Dios.

Sumala ha Encyclopædia Britannica an celibacy amo “an kahimtang han pagin diri inasaw-an, ngan salit, nagpupugong ha pakighilawas, kasagaran nga tungod han ira katungdanan ha relihiyon o pagin debotado.” Ha usa nga sermon han papa nga hi Benedict XVI para ha Roman Curia han 2006, nagsiring hiya nga an igin-oobligar nga celibacy tikang ha “usa nga tradisyon nga nagtikang pa ha panahon katapos mamatay an mga Apostol.”

Kondi, an celibacy diri kustomre han siyahan-siglo nga mga Kristiano. Ha pagkamatuod, hi apostol Pablo han siyahan nga siglo, nagpahamangno ha mga tumuroo mahitungod hadton naghihimo hin “nakakalimbong nga mga kapahayagan” ngan ‘nagdidiri ha pag-asawa.’—1 Timoteo 4:1-3.

Ginkarawat han “Kristiano” nga mga singbahan ha Weste an celibacy han ikaduha ka siglo. Sumala ha libro nga Celibacy and Religious Traditions, “uyon [ini] ha bag-o nga mga surundon ha paglikay ha pakighilawas nga nagtikang ha Imperyo han Roma.”

Han sumunod nga mga siglo, igin-aghat han mga konseho han singbahan ngan han gintatawag nga mga Padre han Singbahan an celibacy ha mga klero. Para ha ira, mahugaw an pakighilawas ngan diri angayan ha usa nga klero. Bisan pa hito, an Encyclopædia  Britannica nasiring nga “ha ikatarapos han ika-10 ka siglo damu nga padi pati na an pipira nga obispo an may asawa.”

An celibacy ha mga klero gin-implementar durante han Lateran Council nga ginhimo ha Roma han 1123 ngan 1139, ngan ito la gihap an opisyal nga iginpapatuman han Iglesia Katolika tubtob yana. Pinaagi hini, nalilikyan han singbahan nga mawara an awtoridad ngan kwarta nga nagigin resulta kon iginhahatag han inasaw-an nga mga padi an propyedad han singbahan ha ira mga anak.

An panhunahuna han Dios mahitungod ha celibacy matin-aw nga mababasa ha iya Pulong, an Biblia. Dida hito, mababasa an ginsiring ni Jesus mahitungod hadton nagpabilin nga solo, pariho ha iya, “tungod han Ginhadian han langit.” (Mateo 19:12) Hi apostol Pablo naghisgot liwat mahitungod han mga Kristiano nga nagsunod han iya susbaranan ha pagin solo “para ha maopay nga sumat.”—1 Corinto 7:37, 38; 9:23.

Kondi, waray sugoa ni Jesus o ni Pablo an mga ministro nga magin solo. Hi Jesus nagsiring nga an pagin solo usa nga “regalo” nga diri gintatag-iya han tanan niya nga sumurunod. Han nagsurat hi Pablo mahitungod han “mga waray pa mag-asawa,” hiya prangka nga nagsiring: “Waray ako sugo tikang ha Ginoo, pero naghahatag ako hin opinyon.”—Mateo 19:11; 1 Corinto 7:25, footnote.

Dugang pa, iginpapakita han Biblia nga inasaw-an an damu nga Kristiano nga ministro han siyahan nga siglo, upod na hi apostol Pedro. (Mateo 8:14; Marcos 1:29-31; 1 Corinto 9:5) Ha pagkamatuod, tungod han pagkalyap han imoral nga mga buhat ha Roma hito nga panahon, hi Pablo nagsurat nga kon an usa nga Kristiano nga paramangno inasaw-an, kinahanglan “usa la an [iya] asawa” ngan “an iya mga anak . . . nagpapasakop.”—1 Timoteo 3:2, 4.

Diri ini pag-asawa nga waray seksuwal nga relasyon, kay an Biblia prangka nga nasiring nga kinahanglan “ihatag han bana an panginahanglan han iya asawa” ngan diri sadang ‘pugngan’ han mag-asawa an paghatag ha usa kag usa han ira seksuwal nga panginahanglan. (1 Corinto 7:3-5) Matin-aw, an celibacy diri igin-oobligar han Dios, ngan diri liwat ito iginpipirit ha Kristiano nga mga ministro.

Kon diri igin-oobligar an celibacy, kay ano man nga positibo an ginsiring ni Jesus ngan ni Pablo mahitungod ha pagpabilin nga solo? Tungod kay naghahatag ito ha usa hin mas daku nga higayon nga maipasamwak an maopay nga sumat. Mas daku nga panahon ngan kusog an mahimo ihatag han mga solo tungod kay diri nira naieksperyensyahan an mga problema nga gin-aatubang han mga inasaw-an.—1 Corinto 7:32-35.

Tagda hi David, nga nagdesisyon pagbaya han iya maopay nga trabaho ha Mexico City basi bumalhin ha usa nga bungto ha Costa Rica para magtutdo mahitungod ha Biblia. Nakabulig ba kan David an pagin solo? “Oo,” siring niya. “Makuri an pag-adjust ha bag-o nga kultura ngan ha iba nga paagi ha pagkinabuhi, pero tungod kay kalugaringon ko la an akon gin-aataman, nagin mas masayon ito.”

Hi Claudia, usa nga solo nga Kristiano nga binalhin ha lugar diin daku an panginahanglan para hin ebanghelisador, nagsiring: “Nalilipay ako ha akon pag-alagad ha Dios. Napaparig-on an akon pagtoo ngan relasyon ha Dios kon nakikita ko kon paonan-o niya ako gin-aataman.”

Diri ulang an pagin solo. Hi Claudia nagdugang: “Diri importante kon inasaw-an ka man o solo, magigin malipayon ka kon ginhahatag mo kan Jehova nga Dios an imo pinakamaopay.”—Salmos 119:1, 2.