Bisan kon an Biblia diri libro han medisina, naghahatag ito hin praktikal ngan mapulsanon nga sagdon nga makakabulig ha usa nga tawo nga nag-aantos hin mga problema ha mental nga kahimsog. Pansina an pipira nga ehemplo.

“An maghimsog nga mga tawo diri nanginginahanglan hin doktor, kondi an mga may sakit.”—MATEO 9:12.

Maaram an Biblia nga bangin magkinahanglan kita hin medikal nga bulig. Damu nga may sakit ha hunahuna an nabuligan pinaagi ha paghibaro han husto nga impormasyon mahitungod ha ira sakit ngan pagpakonsulta ha doktor.

“An pag-ehersisyo maopay para ha imo lawas.”—1 TIMOTEO 4:8, Contemporary English Version.

An paghatag hin panahon ngan kusog para magin mas maopay an imo pisikal nga kahimsog bangin makabulig nga magin mas maopay an imo mental nga kahimsog. Nag-uupod ito hin regular nga pag-ehersisyo, pagkaon hin masustansya, ngan pagkaada sakto nga katurog.

“An malipayon nga kasingkasing maopay nga bulong, pero an rumok nga espiritu nakakaubos han kusog han usa nga tawo.”—PROBERBIOS 17:22.

An pagbasa hin makaparig-on nga mga teksto ha Biblia ngan pagkaada hin mga tumong nga kaya mo  makab-ot mabulig ha imo nga magpabilin nga malipayon. Kon magpupokus ka ha mag-opay nga mga butang ha kinabuhi ngan maglaom nga an mga butang magigin mas maopay ha tiarabot, mabulig ini ha imo nga makaya an imo mga problema ha mental nga kahimsog.

“An kinaadman aada ha mga mapainubsanon.”—PROBERBIOS 11:2.

Bangin makita mo nga diri mo kaya buhaton an ngatanan nga karuyag mo kon ikaw la, salit kinaburut-on nga karawata an bulig han iba. Posible nga karuyag ka buligan han imo kasangkayan ngan kapamilya, pero bangin diri hira maaram han ira bubuhaton. Pahibaroa hira kon ano gud an makakabulig ha imo. Magin makatadunganon ha imo ginlalaoman, ngan pirme magin mapasalamaton ha bulig nga ira iginhahatag.

“Inabat ko nga baga hin diri ako okey, salit nagpakonsulta ako ha doktor. Nahibaroan niya an akon kondisyon. Nakabulig ini ha akon nga akseptaron kon ano gud an akon sitwasyon ngan mahibaro kon ano nga klase hin mga pagtambal an may-ada basi maataman hin mas maopay an akon kahimsog.”—Hi Nicole, a nga nag-aantos tungod han bipolar disorder.

“Nakita ko nga an regular nga pagbasa ha Biblia kaupod han akon asawa nakakabulig ha akon nga matikangan an tagsa nga adlaw nga may positibo ngan makaparig-on nga panhunahuna. Ngan kasagaran, ha mga adlaw nga nakukurian ako, usa nga partikular nga teksto an makakabantad ha akon kasingkasing.”—Hi Peter, nga nag-aantos tungod han depresyon.

“Makuri an pagsumat ha iba mahitungod ha akon sakit kay naaawod gud ako. Pero may-ada ako usa nga duok nga sangkay nga nakakaintindi gud ngan napaid ha akon. Ginbuligan gud niya ako nga magin mas maopay an akon pag-abat ngan diri umabat nga nag-uusahan.”—Hi Ji-yoo, nga nag-aantos tungod hin eating disorder.

“An Biblia nabulig ha akon nga magin balanse ngan makatadunganon may kalabotan ha trabaho ngan ha pagpahuway. An kinaadman hito nabulig ha akon nga maatubang an mga problema ha emosyon nga nagpapakuri ha akon.”—Hi Timothy, nga nag-aantos tungod han obsessive-compulsive disorder.