An Biblia may-ada nakakaliaw nga mga mensahe nga nagpaparig-on ha aton ngan nabulig basi makapailob para maatohan an negatibo nga mga panhunahuna. An mensahe han Biblia naghahatag liwat ha aton hin paglaom nga ha diri na maiha an kasakit ha emosyon mawawara na.

Kita ngatanan usahay naabat hin duro nga kasakit; pero adton nag-aantos tungod ha depresyon o sobra nga kabaraka bangin umabat hin kasakit ha emosyon ha ngatanan nga panahon. Paonan-o makakabulig an Biblia?

• An Biblia naghahatag hin damu nga positibo nga mensahe nga puydi isaliwan ha negatibo nga panhunahuna. (Filipos 4:8) Mahimo hito mapuno an aton hunahuna hin nakakaliaw ngan nakakapakalma nga mga mensahe nga mabulig ha aton nga makontrol an aton emosyon.—Salmo 94:18, 19.

• An Biblia nakakabulig ha aton nga maatohan an paghunahuna nga waray kita pulos.—Lucas 12:6, 7.

• Damu nga teksto ha Biblia an nagpapasarig ha aton nga diri kita nag-uusahan ngan an Dios, nga aton Maglalarang, bug-os nga nakakaintindi ha aton mga inaabat.—Salmo 34:18; 1 Juan 3:19, 20.

• An Biblia nagsasaad nga wawad-on han Dios an aton masakit nga mga hinumdoman. (Isaias 65:17; Pahayag 21:4) Kon nag-aantos kita tungod ha pag-abat hin kahadlok ngan sobra nga kabaraka nga resulta han mga nahitabo ha naglabay, bangin makita naton nga ini nga saad naghahatag ha aton hin kusog nga makapadayon.