Gin-aaghat kita ni Jehova nga Dios nga isumat ha iya an bisan ano nga pinas-an nga nakakapabug-at ha aton hunahuna ngan kasingkasing. (Salmo 55:22) Waray problema nga daku hinduro o gutiay hinduro nga diri kaya ig-ampo. Kon importante ha aton an usa nga butang, importante ito kan Jehova. An pag-ampo ha iya usa nga importante nga paagi basi magkaada kamurayawan ha hunahuna.—Filipos 4:6, 7.

Kon may problema kita ha aton mental nga kahimsog, bangin umabat kita nga nag-uusahan la kita. May mga panahon nga diri bug-os nga nasasabtan han iba an aton naieksperyensyahan. (Proberbios 14:10) Pero kon sinsero nga igsusumat naton ha Dios ha pag-ampo an aton inaabat, pirme hiya mamamati ha aton nga may pagkabuotan ngan maiintindihan kita niya. Nakikita kita ni Jehova, maaram hiya han aton kasakit ngan mga problema, ngan karuyag niya nga ig-ampo naton ha iya an bisan ano nga nakakapabaraka ha aton.—2 Cronicas 6:29, 30.

An pakiistorya kan Jehova ha pag-ampo nagpaparig-on han aton pagsarig nga hinigugma kita niya. Aabaton naton an gin-abat han salmista nga nag-ampo: “Nakita mo an akon pag-antos; maaram ka han akon duro nga kasakitan.” (Salmo 31:7) Bisan an paghibaro la nga nakikita ni Jehova an aton mga naieksperyensyahan daku gud nga bulig basi makapailob kita ha makuri nga mga panahon. Pero diri la kay basta nakikita niya an aton kasakit. Nasasabtan niya an aton mga naieksperyensyahan labaw kay ha bisan hin-o, ngan ginbubuligan kita niya nga makabiling hin pagliaw ngan pagdasig ha Biblia.