PARA HA IBA DIRI. Iginpariho han usa nga doktor an paggamit han Biblia ha paggamit hin libro nga iginsurat ha dekada han 1920 ha pagtutdo hin chemistry. Bangin magpakiana pa ngani an usa nga diri natoo ha Biblia kon husto ba gamiton an manwal han kadaan nga kompyuter basi mahibaro ha paggamit han moderno nga kompyuter. Ha iba nga pagkayakan, para ha iba diri na praktikal yana an Biblia.

Kay ano nga kadaan nga giya an gagamiton nga moderno ngan high-tech na man an aton panahon? Ngani, damu nga website ngan blog an may-ada pirme bag-o nga sagdon ngan giya. An mga programa ha TV naghahatag hin hura nga sagdon tikang ha mga psychologist, eksperto, ngan awtor. Ngan an mga bookstore nagbabaligya hin damu hinduro nga libro mahitungod ha pagsulbad han personal nga mga problema, salit nagin binilyon ka dolyar ini nga negosyo.

Tungod hiton damu nga napapanahon gud nga impormasyon, kay ano nga magamit pa kita han Biblia, nga haros 2,000 ka tuig na man ito nga iginsurat? Husto daw la an siring han mga diri natoo ha Biblia nga an paggamit hiton kadaan nga libro sugad nga giya pariho ha paggamit hin kadaan nga libro ha chemistry o manwal han kompyuter? Ha pagkamatuod, sayop ito nga pangatadongan. Madagmit magbag-o an syensya ngan teknolohiya, pero nagbabag-o ba an panginahanglan han tawo? Karuyag la gihap han tawo nga magkaada katuyoan ha kinabuhi, kalipay, kasigurohan, malipayon nga pamilya, ngan duok nga kasangkayan.

Bisan kon daan na, ginhihisgotan han Biblia ito nga mga panginahanglan ngan an iba pa. Nasiring liwat ito nga giniyahan ito han aton Maglalarang. Naghahatag ito hin giya ha tanan nga bahin han aton kinabuhi ngan nabulig ha pagsulbad hin bisan ano nga problema. (2 Timoteo 3:16, 17) Dugang pa, may-ada ito mga sagdon nga diri gud nadadaan! An Biblia mismo nasiring: “An pulong han Dios buhi.”—Hebreo 4:12.

Tinuod gud ba an siring han Biblia? Daan na gud ba ito, o ito ba an pinakapraktikal o buhi nga libro? An katuyoan hini nga edisyon han An Barantayan, an siyahan ha serye han espesyal nga mga gowa, amo an pagbulig ha imo nga mahibaroan an baton hito nga mga pakiana.